Dita e sotme në Kosovë do të karakterizohet nga disa aktivitete të rëndësishme në fusha të ndryshme, përfshirë shëndetësinë, drejtësinë, punësimin dhe përkujtime kombëtare.

Kryeministri në detyrë, Albin Kurti, dhe ministri në detyrë i Shëndetësisë, Arben Vitia, pritet të marrin pjesë në ceremoninë e vendosjes së gurthemelit për ndërtimin e aneksit të Depos së barnave të Ministrisë së Shëndetësisë, si dhe fillimin e renovimeve në këtë objekt. Aktiviteti mbahet në rrugën “Aziz Abrashi”, zona industriale në Prishtinë, nga ora 10:00.

Po në orën 10:00, para administratës së QKUK-së në Prishtinë, Sindikata e Sektorit Privat të Kosovës do të mbajë takim me punëtorët e sigurimit fizik, ku do të vendosen hapat e mëtutjeshëm për të drejtat dhe përfaqësimin e tyre.

Në fushën e drejtësisë, po ashtu në ora 10:00 në hotelin “Mercure” në Prishtinë, do të lansohet Sistemi Elektronik i Menaxhimit të Përmbarimit, një hap drejt dixhitalizimit dhe rritjes së efikasitetit në këtë proces.

Ndërkohë, nga ora 11:00 në hotelin “Sirius”, Qendra për Avokim të Kulturës Demokratike (ACDC) do të mbajë një konferencë me temën “Punësimi dhe përfshirja institucionale e komuniteteve joshumicë në Kosovë”.

Në Ferizaj, do të zhvillohen ceremonitë mortore për veprimtarin e çështjes kombëtare, Ekrem Jashari. Homazhet pranë arkivolit do të fillojnë në orën 13:00 në Galerinë e Arteve, pasuar nga mbledhja komemorative në Teatrin “Adriana” në orën 15:00, ndërsa varrimi do të bëhet në Varrezat e Veteranëve të qytetit në orën 17:00.

Oda Ekonomike e Kosovës njoftoi se Gjykata Komerciale në Prishtinë ka vendosur për pezullimin e njoftimit të Zyrës së Rregullatorit për Energji (ZRrE) lidhur me daljen e detyrueshme të bizneseve në tregun e lirë të energjisë elektrike.

Në njoftim thuhet se OEK-ja ka kërkuar nga ZRRE-ja që të ndalë veprimet “që mund të ndikojë negativisht në funksionimin e bizneseve”.

“OEK fton ZRrE-për bashkëpunim të ngushtë për të hartuar së bashku një fazë tranzitore të drejtë dhe të zbatueshme, duke theksuar se OEK nuk është kundër daljes në tregun e lirë, por ka kërkuar vazhdimisht që ky proces të realizohet me një plan të qartë tranzicioni, që siguron stabilitet për bizneset dhe qytetarët e Kosovës”, thuhet në njoftim.

Federata e Motoçiklizmit të Kosovës ka njoftuar se gara e planifikuar në kuadër të kalendarit të garave, Kupa e Kosovës, e cila ishte paraparë të mbahej më 29 qershor 2025, do të shtyhet për muajin shtator.

“Arsyeja e shtyrjes lidhet me kushtet atmosferike tepër të nxehta që mund të rrezikojnë shëndetin dhe sigurinë e pjesëmarrësve, si dhe cilësinë e organizimit të garës”, thuhet në njoftimin e kësaj federate.

Data e saktë për mbajtjen e Kupës së Kosovës do të caktohet ditëve në vazhdim.

Komisioni Qendror i Zgjedhjeve ka njoftuar se është përmbyllur afati ligjor për partitë politike që të deklarojnë pjesëmarrjen e tyre përmes koalicioneve zgjedhore apo mospjesëmarrjen në zgjedhjet lokale për kryetarë të Komunave dhe Kuvende Komunale, që do të mbahen më 12 tetor 2025.

Gjatë periudhës 15-ditore, nga 9 deri më 23 qershor, në Zyrën për Regjistrim, Certifikim dhe Kontrollin Financiar të Subjekteve Politike, janë paraqitur këto koalicione:“Koalicija Vakat”, i përbërë nga Demokratska Stranka Bošnjaka (DSB) dhe Demokratska Stranka Vatan (DSV); Koalicioni “SDU-NAŠA (NAŠA SDU)”, i përbërë nga Socijaldemokratska Unija dhe Naša Inicijativa, i cili do të garojë vetëm në komunën e Prizrenit.

“Po ashtu, disa parti politike kanë njoftuar zyrtarisht KQZ-në për mospjesëmarrjen e tyre në këto zgjedhje. Këto parti janë: Organizata Balli Kombëtar Demokrat (OBKD), Partia Demokratike e Diasporës (PDD), Partia e Drejtësisë (PD), Kosovaki Nevi Romani Partia (KNRP) dhe Partia Balliste (PB). KQZ ka bërë të ditur se më 26 qershor 2025 do të hapet afati për aplikimin për certifikim dhe dorëzimin e listës së kandidatëve për të gjitha subjektet politike që synojnë të marrin pjesë në zgjedhjet lokale”, thuhet në njoftim.