Pas gërmimeve të kryera nga njësitë e policisë në Rahovec, janë gjetur pjesë eshtërore që dyshohet se i përkasin një personi të zhdukur gjatë luftës në Kosovë.

Mbetjet janë dërguar menjëherë në Institutin e Mjekësisë Ligjore për autopsi dhe analiza të ADN-së.

“Lidhur me rastin njësia kompetente policore ka filluar gërmimet ku gjatë gërmimeve janë hasur pjesë eshtërore me prejardhje njerëzore të cilat dyshohet se i përkasin një individi të zhdukur gjatë luftës në Kosovë. Mbetjet eshtërore janë dërguar në IML për autopsi dhe analizën e ADN-së”, thuhet në raport.

Gjatë 24 orëve të fundit në Policinë e Kosovës janë raportuar disa raste të dhunës në familje në qytete të ndryshme.

Në rastin  e parë në  Klinë, policia ka arrestuar një person i cili dyshohet se ka sulmuar fizikisht një grua. Gjatë bastisjes në shtëpinë e tij, policia ka gjetur dhe konfiskuar edhe një revole me pesë fishekë. Viktima ka marrë ndihmë mjekësore, ndërsa i dyshuari është dërguar në mbajtje.

Raste të ngjashme janë regjistruar edhe në Gjakovë dhe Rahovec. Në të dyja qytetet, pas mosmarrëveshjeve në familje në dy raste të ndara, burrat kanë sulmuar fizikisht gratë, duke u shkaktuar lëndime trupore. Policia ka ndërhyrë menjëherë duke i arrestuar të dyshuarit, të cilët me vendim të prokurorit po mbahen në paraburgim.

Ndërkohë, në Lipjan, një tjetër rast i dhunës ka përfunduar me lëndimin e viktimës, e cila ka kërkuar tretman mjekësor. I dyshuari për këtë sulm ka arritur të largohet dhe aktualisht ndodhet në kërkim nga policia, e cila po punon për lokalizimin dhe kapjen e tij.

Në Raportin 24 orësh të Policisë së Kosovës behët e ditur se është arrestuar një burrë në Pejë, pasi i njëjti dyshohet se ka kërcënuar me armë një person tjetër pas një konflikti.

Gjatë kontrollit që policia ka ushtruar në shtëpinë e të dyshuarit, janë gjetur dhe konfiskuar dy armë: një pushkë gjuetie dhe një pistoletë shkrepëse.

Pas arrestimit, i dyshuari është shoqëruar në stacionin policor për intervistim. Me urdhër të prokurorit, ai është liruar dhe rasti do të vazhdojë të hetohet në procedurë të rregullt, nën dyshimet për kanosje dhe armëmbajtje pa leje.

Një aksion kontrolli i Policisë së Kosovës në një shtëpi në Vushtrri ka rezultuar me gjetjen e një arme zjarri mëngjesin e së martës. Rreth orës 07:25, zyrtarët policorë kanë arrestuar një të dyshuar pasi gjatë bastisjes në pronën e tij u gjet një armë e paligjshme.

Sipas raportit njëditor, policia ka konfiskuar një pushkë gjysmë-automatike së bashku me një karikator që përmbante gjashtë fishekë.

Pas shoqërimit në stacionin policor dhe intervistimit, me vendim të prokurorit i dyshuari është liruar.

Rasti po vazhdon të trajtohet në procedurë të rregullt.