Tottenham Hotspuri ka arritur marrëveshje për transferimin e sulmuesit brazilian Savinho nga Manchester City.

Sipas raportimeve të mediave angleze, marrëveshja kap vlerën e 85 milionë funteve, apo rreth 100 milionë eurove.

Tottenhami do të paguajë fillimisht 75 milionë funte, ndërsa 10 milionë të tjera janë të parapara në formën e bonuseve.

Me këtë transferim, Tottenhamit i është rritur edhe më tej shpenzimi gjatë kësaj vere. Klubi londinez tashmë ka shpenzuar mbi 300 milionë funte, në përpjekje për t’u rikthyer në majat e futbollit anglez.

Sipas “Sky Sports”, 22-vjeçari brazilian te Tottenham do të prezantohet me emrin Savio.

Ndërkohë, për Manchester Cityn, shitja e Savinhos përbën transferimin më të shtrenjtë në dalje në historinë e klubit.

D.L

Notarët kosovarë kanë zhvilluar garat e radhës të martën në Lojërat Mesdhetare “Taranto 2026”, ndërsa paraqitjen më të mirë e pati Hana Beiqi.

Beiqi garoi në disiplinën 50 metra stil i lirë, ku u rendit e 13-ta në kualifikime nga gjithsej 22 notare. Ajo e përfundoi garën me kohën 26.72 sekonda, ndërsa për një vend në finale nevojitej koha 25.89 sekonda. Në finale u kualifikuan tetë notaret më të mira.

Në të njëjtën disiplinë garoi edhe Riga Shala, e cila e përfundoi garën në vendin e fundit, me kohën 28.11 sekonda.

Te meshkujt, në 50 metra stil i lirë garoi Dior Krasniqi. Ai u rendit i 18-ti dhe i fundit nga notarët që morën pjesë, me kohën 24.97 sekonda. Për krahasim, notari i parafundit regjistroi kohën 23.93 sekonda, ndërsa koha e fundit që siguronte kualifikimin në finale ishte 22.73 sekonda.

Ndërkohë, Erina Idrizaj garoi në disiplinën 100 metra shpinë dhe u rendit e nënta nga 11 notare. Ajo regjistroi kohën 1:08.56, ndërsa për finale nevojitej të ishte në mesin e tetë më të mirave. Notarja e fundit që siguroi finalen kishte kohën 1:04.33.

Megjithatë, Idrizaj arriti të lërë pas notare nga Libani dhe Shqipëria.

Paraqitjet e notarëve kosovarë vazhdojnë në ditët në vijim, me synimin për rezultate sa më të mira në “Taranto 2026”.

D.L

Hendbollistët e Kosovës kanë pësuar edhe humbjen e dytë në Lojërat Mesdhetare “Taranto 2026”.

Kosova u mposht të martën paradite nga Egjipti me rezultat të thellë 42:21, në një ndeshje ku kundërshtari konsiderohet ndër favoritët kryesorë për triumf në turne.

Hendbollistët kosovarë arritën të qëndronin pranë egjiptianëve në pjesën e parë, e cila u mbyll me rezultat 17:14. Megjithatë, në pjesën e dytë Egjipti dominoi plotësisht dhe krijoi një epërsi të madhe deri në fund.

Kosova pati probleme me realizimin, ndërsa gjuajtjet e pasuksesshme dhe gabimet teknike ndikuan në rezultatin përfundimtar.

Në ndeshjen e parë të turneut, të dielën, Kosova ishte mposhtur nga Italia me rezultat 39:23.

Hendbollistët kosovarë do ta zhvillojnë ndeshjen e radhës të enjten, kur do të përballen me Portugalinë.

D.L

Kosova të martën do të jetë në garë në hendboll, volejboll, futboll dhe not, në ditën e gjashtë të Lojërave Mesdhetare “Taranto 2026”.

Në hendboll dhe volejboll do të garojnë ekipet e meshkujve, ndërsa në futboll do të paraqitet përfaqësuesja e vajzave.

Të gjitha këto ekipe janë ende në kërkim të fitores së parë në këtë edicion të Lojërave Mesdhetare dhe do të synojnë ta ndryshojnë bilancin në ndeshjet e radhës.

Ndërkohë, notarët kosovarë do të zbresin sërish në pishinë për garat e tyre, me synimin për të arritur rezultate sa më të mira dhe për të sjellë suksese të reja për Kosovën.

D.L