Kryeministri sllovak, Robert Fico mbeti i plagosur si pasojë e të shtënave me armë zjarri të mërkurën dhe u dërgua në spital.

Ai u godit në stomak pasi u shkrepën katër plumba pranë Shtëpisë së Kulturës së Qytetit, Handlova, rreth 150 kilometra në verilindje të kryeqytetit, sipas TA3.

Presidentja sllovake Zuzana Caputova e dënoi sulmin brutal ndaj kryeministrit.

“Jam e shokuar. I uroj shërim të shpejtë kryeministrit Robert Fico”, tha ajo./UBTNews/

Kandidati për kryeministër nga radhët e Partisë Demokratike të Kosovës, Bedri Hamza, ka bërë të ditur se partia e tij do t’i votojë marrëveshjet ndërkombëtare në Kuvend. Ai në një konferencë për media tha se prioritet është interesi i qytetarëve dhe jo i individëve.

Hamza tha se ky qëndrim i PDK-së vjen si rezultat i kandidaturës së tij për kryeministër dhe jo për shkak të takimit me kryeministrin Albin Kurti.

“Votimi i marrëveshjeve ndërkombëtare, PDK do t’i votojë ato. Për mua si kandidat, prioritetet janë të qarta, interesi i vendit, i partisë, dhe së fundi i neve si individë. Mbi të gjitha interesi i qytetarëve. Kosova është nën masa sanksionuese, janë qindra milionë euro të bllokuara…përtej aspektit financiar kemi të bëjmë me një dëmtim të reputacionit të vendit. Përveç milionave të bllokuara, ka edhe qindra miliona të tjera, të ratifikuara në Kuvend të cilat nuk janë të shpenzuara, si rezultat i paaftësisë për t’i kryer projektet në dobi të qytetarëve”, tha ai.

Kryetari i Nisma Socialdemokrate, Fatmir Limaj, ka thënë se Qeveria Kurti duhet të shkarkohet për t’i hapur rrugë zgjedhjeve të parakohshme dhe jo të shpërbëhet Kuvendi. Limaj u ka bërë thirrje deputetëve që të mos e shkarkojnë veten, pasiqë sipas tij në këtë formë administrohet keqqeverisja e kryeministrit Kurti.

Ish-deputeti Limaj tha se Kurti ka dështuar në secilin sektor, andaj duhet të jap dorëheqje ose të shkarkohet nga deputetët.

“Kur keni dështime në të gjitha planet, në planin social, planin e brendshëm ekonomik, ka dështime në diplomaci, në çdo sektor të zhvillimit ekonomik. Sot arsimtari dhe punëtori i shëndetësisë jeton shumë më keq sesa para katër vjetëve, shporta familjare është dyfishuar. Rrogat nuk kanë lëvizur, kurse gjendja sociale në shoqëri, polarizimi dhe përplasjet kanë arritur në shkallën më të lartë. Largimi i njerëzve dhe fuqisë aktive të punës e shohim si faktor dhe në situata të tilla duhet dikush të marrë përgjegjësinë. Përgjegjësinë e merr ai që e drejton vendin, ata që e duan vendin dhe janë të përgjegjshëm para atyre që kanë votuar japin dorëheqje. Nëse s’ka nivel të tillë të sensit të përgjegjësisë shkohet në një rrugë tjetër, mblidhen deputetët dhe shkarkojnë. Këto janë dy rrugë që i bënë demokracia dhe njihet në sistemin demokratik. Sot tendenca që të mos bëhet askush përgjegjës për këtë situatë është skandaloz. Ne e mbështesim këtë rrugë që e ka iniciuar Aleanca, çdo rrugë tjetër është me i ikë përgjegjësisë dhe me amnistua dhe kjo është me zgjatë agoninë dhe keqmenaxhimin. Apeli jonë është që i ftoj të gjithë deputetët që mos te marrin përgjegjësinë që s’iu takon. Askund në botë deputeti nuk e shkarkon vetën. Bashkohuni dhe shkarkoni”, tha ai.

Duke folur për dialogun me Serbinë, Limaj tha se është e trishtueshme rruga që e ka ndjekur kryeministri Kurti.

“Është e trishtueshme se me sa lehtësi dhe papërgjegjshmëri sillen ata që flasin në emër tonin. Është e trishtueshëm me i pa diplomatët ndërkombëtar që tash nuk e fshehin. Ata që ne na prezantojnë si negociator ne i quajmë si gënjeshtar dhe mashtrues, fatkeqësisht tash e disa herë ka ndodhur nga Brukseli t’i shohim kështu ata që na përfaqësojnë neve si negociator. Kjo është një arsye shtesë për t’u alarmuar dhe për të lanë mërit anash. Tani është koha për racionalitet, pjekuri që dikur mund të bëhet vonë. Ashtu dëmi është bërë dhe jemi të vonuar dhe koha është për ndryshime të mëdha”, theksoi Limaj.

Këto komente i bëri ai pasi prezantoi aderimin e ri në parti, doktor Murtez Zekolli. Zekolli para mediave tha se angazhimi në Nisma është për shkak të nevojës për ndryshim në Kosovë.

“Jam i pakënaqur me gjendjen që gjendet Kosova në këto momente dhe dëshirojë të jap kontribut për vendin tim, çfarë kontributi përpos aktivitetit politik. Unë kam vendosur që përmes këtij subjekti politik të ndryshojmë gjendjen në Kosovë. Besoj se Kosova se ka merituar këtë gjendje që e ka sot”, deklaroi Zekolli.

Kryeministri Albin Kurti para dy ditësh ka takuar kryetarin e PDK-së, Memli Krasniqi me të cilin kanë diskutuar edhe mundësinë për zgjedhje të parakohshme. Kurti ka takuar edhe Mimoza Kusari-Lila nga Alternativa dhe Donika Gërvallën nga iniciativa Guxo, por ftesën për takim e kanë refuzuar nga LDK dhe AAK. Kurti po kërkon që në zgjedhje të shkohet duke e shpërbërë Kuvendin, me të cilët janë të pajtimit edhe në PDK, por LDK dhe AAK po kërkojnë që së pari Kurti të jap dorëheqje dhe pastaj të shpërbëhet Kuvendi.

Një piceri në zemër të Napolit që u themelua nga një burrë i cili gatoi picë për presidentin amerikan, Bill Clinton, u sekuestrua nga policia pas një hetimi në lidhje me mafinë.

Pronari i Dal Presidente dhe gruaja e tij janë në mesin e pesë personave të arrestuar nën dyshimet se biznesi i tyre ka lidhje me klanin Contini të Camorras.

Piceria, në via Tribunali, u hap nga i ndjeri Ernesto Cacialli, i njohur si “picabërësi i presidentit” pasi përgatiti një pice a portafoglio, ose “picë portofol”, për Clinton në Di Matteo, ku ai punonte kur ish-presidenti i SHBA ishte në qytet për takimin e G7-së në vitin 1994. Clinton ishte duke vizituar qendrën historike të Napolit me shoqëruesit e tij të truprojave, kur thuhet se u josh te Di Matteo nga aroma e picës.

Cacialli, i cili fitoi disa çmime për prodhimin e picave, hapi Dal Presidente në vitin 2001, ku “shiste deri në 1 mijë pica në ditë” deri në vdekjen e tij në moshën 60-vjeçare, sipas faqes së internetit të La Figlia Del Presidente, një restorant në pronësi të vajzës së tij.

Blerja e Dal Presidente nga pronari i saj aktual dyshohet se u financua nga paratë e mbrojtjes, që erdhën nga një anëtar i shquar i klanit Contini. Edhe ky mafioz i dyshuar shprehu interes për biznesin, “nga stafi i pjekjes deri te zgjedhja e produkteve të përdorura për brumin”, raportoi Il Fatto Quotidiano.

Piceria, e njohur nga napolitanët dhe turistët, është ndër pasuritë me vlerë 35 milionë euro të sekuestruara nga policia në këtë hetim.

Shumica e klientëve të rregullt u befasuan nga sekuestrimi i lokalit.

“Kam ngrënë atje shumë herë, është një nga piceritë më të njohura në Napoli”, tha një klient, i cili kërkoi të mbetet anonim. “Pica ishte shumë e mirë, por dëgjova nga të tjerët se kishte diçka pak të çuditshme në lidhje me të… pastaj gjithçka u kuptua dje”.

Tre nga të dyshuarit janë burgosur ndërsa dy, duke përfshirë një oficer policie, janë në arrest shtëpiak. Ata përballen me akuza për transferime mashtruese të aseteve dhe pastrim parash./UBTNews/