Analisti politik Artan Muhaxhiri ka vlerësuar se dështimi për formimin e Qeverisë së re përbën një ofendim të klasës politike ndaj qytetarëve të Kosovës.

Në një intervistë ai ka thënë se paaftësia e partive për të siguruar një shumicë të thjeshtë tregon mungesë përgjegjësie ndaj popullit dhe krizave me të cilat po përballet vendi.

“Ajo që ndodhi (në seancën e jashtëzakonshme të Kuvendit për zgjedhjen e qeverisë së re) ishte ofendim i klasës politike ndaj qytetarëve të Kosovës. Paaftësia e tyre për të krijuar një shumicë të thjeshtë është jashtëzakonisht zhgënjyese dhe flet shumë për raportin që ata kanë me qytetarët dhe me nevojat, kërkesat e qytetarëve, me problemet, me krizën e jashtëzakonshme ekonomike me të cilën është duke u përballur populli i Kosovës”, tha ai.

Muhaxhiri ka paralajmëruar se pasojat e mosformimit të qeverisë do të jenë të shumta dhe të ndjeshme në shumë fusha, duke theksuar se situata aktuale po dëmton imazhin dhe funksionimin institucional të shtetit.

“Pasojat nga mos themelimi i qeverisë janë të shumta në dimensione të ndryshme, do të ketë pasoja politike, ekonomike, për imazhin e Kosovës, pasoja në stagnimin e jetës institucionale, në pamundësimin e marrjes së fondeve për zhvillim. Kryesore është në transmetimin e një porosie se politikanët kosovarë janë të paaftë që të bëjnë edhe një koalicion më të thjeshtë për ta pasur një shumicë prej 61 deputetëve në Kuvendin e Kosovës”, tha ai.

Duke komentuar mundësinë që vendi të shkojë në zgjedhje të reja, Muhaxhiri e ka quajtur absurde mbajtjen e katër palë zgjedhjeve brenda një viti, duke e cilësuar këtë si tregues të kulturës së dobët politike dhe mungesës së vetëdijes institucionale.

“Mbajtja e katër palë zgjedhjeve brenda një viti është absurde sepse nuk ka asnjë nevojë për një gjë të tillë, ky është vetëm indikator i qartë i mënyrës me të cilën operojnë politikanët kosovarë, kulturës së tyre politike, mungesës së ndërgjegjes, moralit politik sepse nëse kaq shumë kohë humbet në mbajtjen në procese zgjedhore kjo me automatizëm nënkupton që nuk ka kohë për t’u marrë me projekte zhvillimore, me ekonomi, me përmirësim të sistemit institucional të Kosovës, me avancimin e Kosovës në arenën ndërkombëtare. Pra, është një humbje e madhe në të gjitha nivelet e mundshme”, tha ai.

Ai ka theksuar gjithashtu se hendeku i thellë ndërmjet partive politike është bërë pengesë e madhe për formimin e institucioneve, duke treguar mungesë vullneti dhe kreativiteti për bashkëpunim politik.

“Hendeku mes partive politike është shumë i madh, jo vetëm në raport me VV-në si fituese e zgjedhjeve por edhe ndërmjet vetë opozitës, ky është absurditeti më i theksuar. Askush me askënd nuk është i gatshëm që të bëjë koalicion, që të bëjë marrëveshje, nuk ka vullnet politik, nuk ka guxim, nuk ka sens, nuk ka kreativitet, gatishmëri që të bëhen bashkëpunime mes partive politike për të arritur themelimin e qeverisë së Kosovës, sepse sistemi politik i Kosovës është i tillë që imponon bashkëpunime dhe në momentin që nuk ka bashkëpunim nuk ka as themelim të institucioneve”, tha ai.

Në seancën e jashtëzakonshme të Kuvendit të Kosovës më 26 tetor, kryeministri në detyrë dhe mandatar për formimin e Qeverisë së re, Albin Kurti, nuk arriti t’i sigurojë 61 votat e nevojshme për të nisur një mandat të ri në pushtet. Ai mori 56 vota për, 52 kundër dhe 4 abstenime./S.K/EO/

Forca e Sigurisë së Kosovës do të organizojë sot Ditën e Vizitorëve në kuadër të ushtrimit fushor “Ujku Shigjetë”.

Ky organizim do të mbahet në poligonin ushtarak në Babaj të Bokës, Gjakovë me fillim nga ora 11:00, sipas njoftimit për media.

Ushtrime të tilla, FSK ka realizuar edhe herë të tjera, ku shihen pamjet më poshtë.

Kampionati i Kosovës në futboll ka zhvilluar tashmë dhjetë xhiro mjaftë interesante dhe në këtë mesjave do të zhvillohen ndeshjet e xhiros së 11-të.

Në qytetin e Gjilanit do të ndeshjen Gjilani dhe Dukagjini, skuadra të cilat po kërkojnë të gjejnë stabilitet në këtë fillim sezoni. Dukagjini i drejtuar nga Ismet Munishi e nisi shumë fuqishëm edicionin, por në pesë ndeshjet e fundit ka tri humbjen, një barazim dhe një fitore dhe ka mbledhur 14 pikë pas dhjetë ndeshjeve duke u renditur në venin e katër në tabelë.

Nga ana tjetër, Gjilani ka mbledhur vetëm 11 pikë pas dhjetë ndeshjeve duke mbajtur vendin e tetë në tabelë.

Ballafaqimi tjetër është ai ndërmjet Malishevës dhe Ballkanit, duke që sjellë emocione pas të dy skuadrat synojnë kreun e tabelës. Momentalisht Ballkani ka 19 pikë në vendin e dytë, kurse Malisheva është e gjashta me 13 pikë.

Të dy ndeshjet nisin nga ora 13:00./S.K/KP/

Mediat e huaja kanë raportuar se tashmë tre persona kanë vdekur në Xhamajka, mirëpo thuhet nga meteorologët amerikanë se ajo po përgatitet për stuhinë më të fortë në botë këtë vit, dhe ndoshta më të fortën e regjistruar ndonjëherë në ishull.

Me shpejtësi ere deri në 282 km/orë, Uragani Melissa është një stuhi e kategorisë pesë- forca maksimale.

“Po intensifikohet dhe pritet të arrijë në ishullin e Karaibeve herët të martën”, thuhet në njoftim të BBC.

Ekspertët paralajmërojnë se ritmi i ngadaltë i Melissës mund të nënkuptojë shira të zgjatur të rrëmbyeshëm në disa zona, duke rritur rrezikun e përmbytjeve vdekjeprurëse dhe rrëshqitjeve të dheut./S.K/KP/BBC/