Lajmet

​24-vjetori i masakrës së Mejës, Konjufca dhe Kurti kërkojnë të veprojë drejtësia

Kurti tha se 24 vjet më parë, shqiptarët u vranë në mënyrë mizore nga regjimi gjenocidal i Millosheviqit.

Published

3 years ago

on

Kryeministri Albin Kurti dhe kryeparlamentari Glauk Konjufca kanë bërë homazhe në Kompleksin Memorial në Mejë. Në përvjetorin e kësaj masakre dhe ditën e të pagjeturve, ata kanë bërë thirrje për drejtësi dhe efikasitet të këtij sistemi.

Kryeministri Albin Kurti tha se 24 vjet më parë, shqiptarët u vranë në mënyrë mizore nga regjimi gjenocidal i Millosheviqit.

“24 vjet më vonë nuk kemi ende drejtësi dhe nuk kemi ende rehabilitim për familjet e viktimave dhe për mbarë popullin tonë. Dje në mbledhjen e qeverisë e iniciuam aderimin në Komisionin Ndërkombëtar për Personat e Zhdukur dhe në Kuvend do të ratifikohet në mënyrë që në këtë organizatë të rëndësishme ndërkombëtare të bëjmë hapa drejt zbardhjes së fatit të të pagjeturve, të atyre që u zhdukën me dhunë, që i rrëmbyen me forcë duke kërkuar edhe të vërtetën edhe përgjegjësinë, drejtësinë”, ka thënë ai.

Ai shtoi se në vitet e kaluara, në Policinë e Kosovës hetimet për krimet e kryera kanë qenë vetëm një sektor në kuadër të Drejtorisë për Krimet e Rënda, ndërkaq tani është bërë drejtori e veçantë. Më tej, ai deklaroi se kanë shtuar buxhetin për prokurorinë, me shtimin edhe e numrit të prokurorëve.

“Në mesin e të vrarëve këtu në Mejë janë edhe 11 nxënës e 20 arsimtarë. Pra, janë vrarë shqiptarët pa dallim moshe, gjinie, prejardhje, feje. Ju i shihni këtu varret bashkë të myslimanëve dhe katolikëve, vetëm pse ishin shqiptarë. Shqiptarët ishin bashkë edhe ne luftë çlirimtare, por ata u vranë bashkë edhe prej forcave gjenocidale të Serbisë. Dhe tash ne i kujtojmë me mall e dhimbje si martirë e dëshmorë të kombit tonë”, ka shtuar Kurti.

Kurti edhe në Mejë ka kërkuar efikasitetin e sistemit të drejtësisë, por edhe mbështetjen e ndërkombëtarëve.

Shefi i ekzekutivit është pyetur se kur do të përfundojnë punimet në Kompleksin Memorial në Mejë, ku tha se prioriteti kryesor duhet të jetë drejtësia.

“Ministria e Kulturës, Rinisë dhe të Sportit por edhe gjithë qeveria është duke u angazhuar që në njërën anë të ndajmë mjete dhe në anën tjetër të kryejmë punimet në mënyrë që memorialet të jenë në nivelin e duhur për kujtesën tonë kolektive, por edhe në aspektin e qëndrueshmërisë materiale dhe estetike. Edhe këtë ne do ta përfundojmë”, deklaroi Kurti.

Kryetari i Kuvendit të Kosovës, Glauk Konjufca tha se sot po kujtojnë aktin më të madh të gjenocidit qe ka ndodhur në Kosovë.

“377 shqiptarë janë ekzekutuar mizorisht prej forcave të ushtrisë dhe policisë së Serbisë. Kjo ditë po ashtu është dita e të zhdukurve me dhunë në Republikën e Kosovës. Së pari, duhet të flasim për atë që e ka bërë ketë masakër, shteti i Serbisë, përgjegjësia është në shtetin e Serbisë meqë çdo segment qe ka marrë pjesë është e qartë urdhërdhënia, është e qartë përgjegjësia shtetërore, komanduese brenda ushtrisë, brenda aparatit shtetëror. Prandaj, ne gjithmonë duhet ta specifikojmë se përgjegjësi dihet, personat që e kanë kryer këtë masakër dihen. Ajo që ka munguar, e vetmja, është drejtësia që nuk ka ardhur në vendin tonë. Së dyti, gjithmonë duhet ta kujtojmë e kurrë nuk duhet ta harrojmë që ky është një krim i shumëfishtë. Për shkak se jo vetëm është planifikuar, ekzekutuar nga ana e Serbisë, por shumë prej të vrarëve janë rrëmbyer e trupat e tyre janë zhdukur. 36 persona jomadhorë janë ekzekutuar në këtë masakër, janë të mitur. Dhe për ketë deri tashmë askush nuk ka dhënë përgjegjësi serioze”, ka thënë Konjufca.

Kryeparlamentari Konjufca i bëri thirrje drejtësisë vendore e ndërkombëtare që ta kryejnë punën, meqë dëshmitarët janë ende gjallë dhe kanë parë se çfarë ka ndodhur 24 vjet më parë.

Related Topics:
Continue Reading

Vendi

Dorëzohen nënshkrimet për Kuvend të jashtëzakonshëm të LDK-së

Published

10 minutes ago

on

July 15, 2026

By

Deputeti i zgjedhur i Lidhjes Demokratike të Kosovës, Armend Zemaj, dhe kryetari i degës së dytë të LDK-së në Prishtinë, Florian Dushi, kanë dorëzuar të mërkurën nënshkrimet e grumbulluara për thirrjen e Kuvendit të jashtëzakonshëm të partisë.

Iniciativa u nis me kërkesën për shkarkimin e Lumir Abdixhikut nga posti i kryetarit të partisë, pasi LDK-ja doli sërish e treta në zgjedhjet e 7 qershorit.

Abdixhiku pati refuzuar kërkesën e disa degëve për dorëheqje.

Siç pati thënë vetë Zemaj ditë më parë, për thirrjen e këtij kuvendi janë mbledhur më shumë se 150 nënshkrime.

Sekretari i partisë, Ilir Ferati, një ditë më parë u shpreh se sapo të ketë zyrtarisht kërkesë të tillë, ajo do të trajtohet me seriozitet.

Kuvendi i LDK-së ka 355 delegatë, kurse mbledhjen e tij mund të thirren me 118 nënshkrime. Pas deponimit të këtyre nënshkrime, sipas statutit të LDK-së, kryesia e partisë është e obliguar që ta thërrasë Kuvendit brenda 60 dite.

Abdixhiku i pati mbijetuar votëbesimit më 31 janar, pas zgjedhjeve të 28 dhjetorit.

Nga ato zgjedhje, në zgjedhjet e 7 qershorit LDK-ja u rrit për tre deputetë. Në zgjedhjet e qershorit ajo kandidoi me ish-presidenten Vjosa Osmani si prijëse të listës. /Koha/

Continue Reading

Lajmet

Dyshohet për helmim nga ushqimi në Han të Elezit, rreth 65 persona kërkojnë trajtim mjekësor

Published

1 hour ago

on

July 15, 2026

By

Rreth 65 persona dyshohet se janë helmuar nga ushqimi në Han të Elezit, pas konsumimit të ushqimeve në dy piceri të ndryshme.

Drejtoresha e Shëndetësisë në Komunën e Hanit të Elezit, Kimete Kuka, ka bërë të ditur se janë marrë mostra nga Instituti Kombëtar i Shëndetësisë Publike të Kosovës (IKShPK), në bashkëpunim me Inspektoratin Shëndetësor, ndërsa rezultatet ende janë duke u pritur.

Sipas saj, rastet e para me simptoma të dyshuara të helmimit janë paraqitur të hënën rreth orës 16:00, ndërsa numri më i madh i pacientëve është regjistruar nga ora 23:00 deri në orët e hershme të mëngjesit të së martës.

“Trajtim aktualisht po marrin 65 persona. Dyshohet se 65 është numri i personave të dyshuar për helmim, pasi në total janë mbi 90 persona me simptoma të ngjashme, por një pjesë e tyre dyshohet se janë me virozë”, ka deklaruar Kuka.

Tre persona janë dërguar për trajtim në Qendrën Klinike Universitare të Kosovës.

Ndërkohë, zëdhënësi i Policisë së Kosovës për rajonin e Ferizajt, Kanun Veseli, ka bërë të ditur se nga data 13 deri më 15 korrik janë trajtuar rreth 80 persona me simptoma të diarresë dhe vjelljes në Qendrën Kryesore të Mjekësisë Familjare në Han të Elezit.

Institucionet përkatëse, përfshirë IKShPK-në, janë njoftuar dhe po merren me hetimin e rastit./A.K/

Continue Reading

Rajoni

Apeli lë në fuqi dënimin me 16 vite burg për Mario Pëlleshajn për vrasjen e Martin Canit

Published

1 hour ago

on

July 15, 2026

By

Gjykata e Apelit të Juridiksionit të Përgjithshëm ka lënë në fuqi vendimin e Gjykatës së Tiranës, duke dënuar me 16 vite burg Mario Pëlleshajn për vrasjen e të miturit Martin Cani.

Pëlleshaj është shpallur fajtor për veprën penale të “vrasjes në rrethana të tjera cilësuese” ndaj Martin Canit, si dhe për “vrasjen në rrethana të tjera cilësuese, mbetur në tentativë” ndaj Luis Meçes, i cili mbeti i plagosur.

Gjykata e Tiranës kishte caktuar fillimisht 12 vite burg për vrasjen e Martin Canit dhe 10 vite burg për tentativën e vrasjes së Luis Meçes. Pas bashkimit të dënimeve, masa përfundimtare ndaj Pëlleshajt ishte 16 vite heqje lirie, vendim që tashmë është konfirmuar edhe nga Apeli.

Ngjarja e rëndë ndodhi më 18 nëntor 2024, pas një konflikti mes të miturve që kishte nisur në shkollën 9-vjeçare “Fan Noli” në Tiranë.

Përplasja përfundoi me vdekjen e Martin Canit dhe plagosjen e Luis Meçes./euronews.al//A.K/

Continue Reading

Lajmet

UBT i pari me numrin më të madh të programeve të akredituara në sektorin privat

Published

2 hours ago

on

July 15, 2026

By

Agjencia e Kosovës për Akreditim (AKA) ka publikuar listën zyrtare të programeve të studimit të akredituara për vitin akademik 2026/2027, duke konfirmuar programet që kanë kaluar me sukses procesin e akreditimit institucional dhe programor sipas standardeve kombëtare dhe ndërkombëtare të sigurimit të cilësisë.

Sipas listës së publikuar nga AKA, UBT prin në sektorin privat me numrin më të madh të programeve të akredituara, duke dëshmuar edhe një herë përkushtimin e institucionit ndaj cilësisë akademike, zhvillimit të vazhdueshëm dhe ofrimit të programeve bashkëkohore që u përgjigjen kërkesave të tregut të punës.

Ky rezultat e forcon pozitën e UBT-së si institucioni privat lider i arsimit të lartë në Kosovë, me një gamë të gjerë programesh studimi në fusha të ndryshme, të cilat plotësojnë standardet e kërkuara të cilësisë dhe u ofrojnë studentëve mundësi për arsimim konkurrues dhe zhvillim profesional.

Publikimi i listës zyrtare nga AKA u shërben maturantëve, studentëve dhe publikut si referencë e besueshme për zgjedhjen e programeve të studimit të akredituara për vitin akademik 2026/2027.

Lista e plotë e programeve të akredituara për vitin akademik 2026/2027 mund të gjendet në këtë link: LINKU

Continue Reading

Të kërkuara