Turneu Beach Volley Kamenica 2026 është përmbyllur me sukses në kuadër të Kamenica Summer Fest 2026, duke sjellë ndeshje cilësore, rivalitet sportiv dhe atmosferë të shkëlqyer gjatë gjithë garës.

Në konkurrencën e femrave, titulli i kampioneve i takoi çiftit Xhudjena Kruti dhe Lyra Pireva, të cilat dominuan turneun me paraqitje të shkëlqyera dhe siguruan vendin e parë.

Në konkurrencën e meshkujve, fitues u shpallën Ermal Maliqi dhe Erion Bajrami, të cilët triumfuan pas një serie paraqitjesh bindëse, duke e mbyllur turneun në krye të renditjes.

Turneu u organizua nga Komuna e Kamenicës në kuadër të Kamenica Summer Fest 2026, duke konfirmuar përkushtimin për promovimin e volejbollit në rërë dhe zhvillimin e aktiviteteve sportive e rekreative gjatë sezonit veror.

Me këtë rast, Federata e Volejbollit e Kosovës shprehu urimet dhe përgëzimet më të sinqerta për Komunën e Kamenicës dhe të gjithë organizatorët për organizimin e suksesshëm të turneut. Federata gjithashtu përgëzoi fituesit për suksesin e arritur dhe falënderoi të gjithë sportistët dhe pjesëmarrësit, të cilët kontribuuan në realizimin e një tjetër aktiviteti të suksesshëm të beach volley në Kosovë.

D.L

Përfaqësuesja U17 e Kosovës në volejboll për meshkuj e ka nisur me humbje paraqitjen në BVA U17 Kampionatin Ballkanik, që po zhvillohet në Farkë të Shqipërisë.

Në ndeshjen e parë të turneut, përfaqësuesja e Kosovës u përball me Turqinë, e cila dominoi takimin nga fillimi deri në fund, duke triumfuar me rezultat maksimal 3:0 (25:5, 25:11, 25:17).

Turqia ishte superiore në dy setet e para, duke mos i lënë shumë hapësirë ekipit kosovar. Megjithatë, në setin e tretë, djemtë e Kosovës reaguan dukshëm më mirë, ngritën nivelin e lojës dhe ofruan rezistencë më të madhe ndaj një prej skuadrave favorite për titull.

Pavarësisht humbjes në debutim, Kombëtarja e Kosovës do të kërkojë të rikuperohet në ndeshjet e radhës të kampionatit, me synimin për të siguruar rezultat pozitiv dhe paraqitje sa më të mira.

D.L

Shefi i zhvillimit global të futbollit në FIFA, Arsene Wenger, ka mbështetur vendimin për të tërhequr planin e presidentit Gianni Infantino për përfshirjen e investitorëve privatë në garat e FIFA-s, duke e cilësuar atë si “absolutisht të nevojshëm dhe të padiskutueshëm”.

Infantino kishte propozuar krijimin e një dege tregtare që do të menaxhonte ngjarjet kryesore të FIFA-s, përfshirë Kupën e Botës, me mundësinë që investitorë të jashtëm të blinin aksione. Për të siguruar mbështetjen e federatave anëtare, presidenti i FIFA-s kishte ofruar nga 40 milionë dollarë për secilën prej 211 federatave kombëtare.

Megjithatë, plani u përball me kritika të ashpra nga shumë palë, përfshirë UEFA-n, e cila, sipas raportimeve, paralajmëroi se 55 federatat e saj anëtare mund të bojkotonin turnetë e FIFA-s. Përballë këtij presioni, Infantino u detyrua të tërhiqte projektin.

Wenger, i cili është pjesë e FIFA-s që nga viti 2019 dhe merret me zhvillimin global të futbollit, analizën e të dhënave, programet e trajnerëve dhe garat e të rinjve, tha se nuk kishte qenë i përfshirë në hartimin e këtij plani.

“Ngjarjet e fundit në FIFA meritojnë qartësi nga ana ime. Nuk isha i përfshirë në këtë plan strategjik dhe për projektin mësova fillimisht nga raportimet në media. Vendimi për tërheqjen e tij ishte absolutisht i nevojshëm dhe i padiskutueshëm, sepse besoj fuqishëm në një FIFA të pavarur që i shërben futbollit me përkushtim, transparencë dhe integritet”, thuhet në deklaratën e Wengerit.

Francezi kishte mbështetur më herët edhe idenë e Infantinos për zhvillimin e Kupës së Botës çdo dy vjet, por kësaj radhe u distancua qartë nga projekti i investimeve private.

Wenger ishte një nga 18 zyrtarët e FIFA-s të përmendur në një letër të UEFA-s, me të cilën kërkohej ruajtja e dokumentacionit lidhur me këtë çështje, ndërsa paralajmëroheshin edhe veprime ligjore.

Deri më tani, Carlos Cordeiro, këshilltar i lartë i Infantinos për strategjinë dhe qeverisjen globale, është zyrtari i vetëm që ka dhënë dorëheqje si pasojë e këtij skandali.

Edhe sekretari i përgjithshëm i FIFA-s, Mattias Grafström, i konsideruar një nga bashkëpunëtorët më të afërt të Infantinos, e ka kritikuar situatën. Në një letër drejtuar stafit të FIFA-s, ai e përshkroi javën e fundit si “të vështirë për t’u kuptuar dhe pranuar”.

D.L

Transferimi i mundshëm i Mirlind Dakut te Spartaku i Moskës vazhdon të jetë në qendër të vëmendjes në Rusi, edhe pse marrëveshja ende nuk është zyrtarizuar.

Një pjesë e tifozëve të Spartakut, grupi “Crazy North”, janë shprehur kundër afrimit të sulmuesit shqiptar nga Rubin Kazani, duke publikuar më herët një deklaratë me përmbajtje fyese ndaj shqiptarëve dhe kosovarëve.

Ndaj këtij qëndrimi ka reaguar ish-futbollisti i Spartakut, Andrei Tikhonov, i cili ka kërkuar që sporti të ndahet nga çështjet politike dhe se vendimet e klubit duhet të bazohen në aspektin sportiv.

Sipas Tikhonov, Spartaku ka nevojë për një sulmues dhe afrimi i Dakut do të ishte një përforcim i rëndësishëm për skuadrën.

“Për momentin, Spartaku ka nevojë për një sulmues. Do t’i japin një pagë. Për të është një bekim që i bashkohet Spartakut, një ekip që luan mirë. Është futboll, vëlla”, ka deklaruar Tikhonov në kanalin e tij në YouTube.

Daku është shumë pranë kalimit te një prej klubeve më të mëdha ruse. Sipas raportimeve të mediave atje, Spartaku i Moskës ka arritur marrëveshje me sulmuesin për kushtet personale dhe zyrtarizimi i transferimit pritet në ditët e ardhshme.

Sulmuesi 28-vjeçar pritet të largohet nga Rubin Kazani pas një periudhe shumë të suksesshme. Në 93 paraqitje me këtë klub, Daku ka realizuar 38 gola, duke u shndërruar në një prej sulmuesve më efikasë të kampionatit rus.

Pavarësisht reagimeve negative nga një pjesë e tifozëve, Mirlind Daku mbetet objektiv konkret i Spartakut, ndërsa klubi pritet të marrë vendimin përfundimtar për realizimin e transferimit.

D.L