Presidentja e Komisionit Evropian, Ursula von der Leyen si pjesë e një vizite në Ballkanin Perëndimor do të vizitojë sot Bosnjën dhe Hercegovinën, kurse nesër më 15 tetor Republikën e Kosovës.

Vizita në Kosovë është planifikuar për të nënvizuar mbështetjen e BE-së për rrugën e rajonit drejt anëtarësimit në BE dhe anëtarësimit gradual në tregun e vetëm.

Po ashtu, vizita vije edhe si shkas për të diskutuar Planin e Rritjes së BE-së për Ballkanin Perëndimor.

Në Bosnjë dhe Hercegovinë, Presidentja von der Leyen do të vizitojë Qendrën Memoriale të Srebrenicës e më pas ajo do të takohet me anëtarët e Presidencës së Bosnjës dhe Hercegovinës në Sarajevë.

Ndërkaq, ajo do të qëndrojë për vizitë në Kosovë, më 15 tetor ku sipas agjendës së publikuar Von der Leyen do të takohet me presidenten, Vjosa Osmani dhe kryeministrin në detyrë, Albin Kurti./S.K/EO/

Në Kosovë po vazhdon procesi i numërimit të votave për asamble komunale, ku më saktë në Prishtinë aktualisht janë numëruar 254  nga 268 kuti të votimit.

Nga ky numërim, është bërë e ditur se me vota po prin Lidhja Demokratike e Kosovës, ndërsa e dyta me radhë është Partia Demokratike e Kosovës, kurse e treta Lëvizja Vetëvendosje.

Numërimet po vazhdojnë edhe më tutje edhe për 14 kuti të mbetura./S.K/EO/

Mediat e huaja si CNN, The New York Times, Reuters, AP dhe NPR, kanë refuzuar të pranojnë rregullat e reja të vendosura nga Pentagoni, të cilat i detyrojnë gazetarët të zotohen se nuk do të publikojnë materiale të paautorizuara, përfshirë edhe dokumente jo-sekrete.

Sipas mediave, këto rregulla cenojnë lirinë e shtypit, e garantuar nga Kushtetuta e Shteteve të Bashkuara të Amerikës.

Shoqata e gazetarëve që mbulojnë Pentagonin e ka cilësuar këtë vendim si përpjekje për të kontrolluar median dhe ka paralajmëruar se gazetarët mund të përballen me pasoja ligjore nëse i shkelin rregullat.

Rregullat janë mbështetur nga Sekretari amerikan i Mbrojtjes, Pete Hegseth, një ish-prezantues i Fox News, i emëruar nga Presidenti Trump.

Kushtetuta e SHBA-së garanton lirinë e fjalës dhe të shtypit në Amendamentin e Parë.

Këto të drejta janë mbrojtur në mënyrë të veçantë edhe nga një vendim i Gjykatës së Lartë në vitin 1971, që lejonte mediat të publikojnë dokumente ushtarake të klasifikuara lidhur me Luftën e Vietnamit.

Kritikët thonë se përpjekja për të kufizuar raportimin pa ndonjë arsye të qartë për rrezik kombëtar, përbën kërcënim të drejtpërdrejtë ndaj shtypit të lirë./S.K/EO/

Bashkimi Evropian ka njoftuar se mirëpret zhvillimin paqësor, konkurrues dhe gjithëpërfshirës të raundit të parë të zgjedhjeve lokale, por në të njejtën kohë bën thirrje për certifikim dhe zbatim të shpejtë të rezultateve.

Një zëdhënës i BE-së ka nënvizuar se institucionet me seli në Bruksel, mirëpresin pjesëmarrjen e të gjitha komuniteteve në votime, si dhe një mbulim mediatik të lirë, të drejtë dhe gjithëpërfshirës që, siç thuhet, kontribuon në një proces zgjedhor transparent.

“Për ato komuna ku kryetarët e komunave u zgjodhën në raundin e parë, ne bëjmë thirrje për certifikim dhe zbatim të shpejtë të rezultateve të zgjedhjeve përmes një tranzicioni të rregullt të qeverisjes lokale. Për komunat e tjera, ku do të mbahen zgjedhjet e balotazhit për kryetar bashkie, ne bëjmë thirrje për një zhvillim po aq paqësor, konkurrues dhe gjithëpërfshirës më 9 nëntor”, ka porositur zëdhënësi i Bashkimit Evropian./S.K/EO/