Një person ka mbetur i lënduar pasi dyshohet se është therur me thikë nga persona të panjohur në Shtime.

Sipas Policisë, rasti ka ndodhur të enjten, më 2 korrik, rreth orës 22:12. Viktima, mashkull kosovar, ka kërkuar ndihmë mjekësore pasi kishte pësuar lëndime nga therja me thikë dhe më pas është dërguar për trajtim në Spitalin e Ferizajt.

Policia ka bërë të ditur se rasti është cilësuar si “Lëndim i rëndë trupor”, ndërsa njësitë relevante policore kanë nisur hetimet për identifikimin e të dyshuarve dhe zbardhjen e plotë të rrethanave të ngjarjes.

D.L

Në Fushë Kosovë, policia arrestoi një të dyshuar, pasi sipas dyshimeve ai kishte sulmuar fizikisht një grua pas një mosmarrëveshjeje. Viktima mori trajtim mjekësor, ndërsa i dyshuari, me vendim të prokurorit, u dërgua në mbajtje.

Në Prishtinë, u raportua një rast i dhunës psikologjike, ku një burrë dyshohet se kishte ushtruar dhunë ndaj një gruaje. Rasti është duke u hetuar nga organet kompetente.

Në Pejë, një burrë raportoi se kishte pranuar mesazhe kërcënuese nga një grua. Policia ka iniciuar hetimet për zbardhjen e rrethanave të rastit.

Ndërkaq, në Klinë, u arrestua një i dyshuar për sulm fizik ndaj një gruaje. Viktima pranoi trajtim mjekësor, ndërsa i dyshuari, pas intervistimit dhe me vendim të prokurorit, u dërgua në mbajtje.

Policia ka bërë të ditur se të gjitha rastet janë trajtuar sipas procedurave ligjore, ndërsa hetimet po vazhdojnë për sqarimin e plotë të rrethanave.

D.L

Policia e Kosovës ka sekuestruar katër armë automatike AK-47, nëntë karikatorë dhe 262 fishekë gjatë një aksioni në Podujevë, ndërsa një person është dërguar në mbajtje.

Sipas raportit policor, pas pranimit të informatave më 25 qershor janë ndërmarrë veprime hetimore, ku gjatë kontrollit të një porosie të dërguar përmes një agjencioni turistik janë gjetur dhe sekuestruar katër armë AK-47, nëntë karikatorë, 262 fishekë dhe dy dritare plastike.

Më 2 korrik, në vazhdën e hetimeve, policia ka shoqëruar dy persona për intervistim. Me urdhër të prokurorit është bastisur edhe një shtëpi, ku janë gjetur dhe sekuestruar tri pjesë të një arme AK-47 dhe një kondak druri i pushkës.

Pas intervistimit, me vendim të prokurorit kompetent, njëri nga të dyshuarit është dërguar në mbajtje, ndërsa rasti po hetohet për veprën penale “Import, eksport, furnizim, transportim, prodhim, këmbim, ndërmjetësim ose shitje e paautorizuar e armëve apo materialeve plasëse.”/A.K/

Policia e Kosovës ka dhënë detaje të reja përmes raportit 24-orësh lidhur me incidentin me armë zjarri që ndodhi mesditën e së enjtes në Podujevë, ku pas një përleshjeje mbetën të plagosur katër persona. Ngjarja ka ndodhur rreth orës 13:40 dhe është cilësuar zyrtarisht nga autoritetet si “Vrasje e rëndë në tentativë”, “Armëmbajtje pa leje” dhe “Asgjësim apo dëmtim i pasurisë”.

Në këtë incident kanë mbetur të plagosur tre nga personat e përfshirë në konflikt, të cilët po trajtohen si të dyshuar, si dhe një kalimtar i rastit i cili u gjend aty pranë, ku që të gjithë kanë pranuar tretmanin e nevojshëm mjekësor. Pas ndërhyrjes së menjëhershme të forcave të rendit, në vendin e ngjarjes u gjetën dhe u sekuestruan tri armë zjarri dhe 28 gëzhoja.

Me vendim të prokurorit të rastit, njësitë policore kanë kryer bastisje edhe në pronat e të dyshuarve.

Gjatë këtyre kontrolleve, policia arriti të gjejë dhe të sekuestrojë edhe dy armë të shkurtra me 82 fishekë, një armë gjuetie me 49 fishekë, si dhe katër karikatorë që mbanin në total 85 fishekë të tjerë.

Ky rast tashmë po i nënshtrohet procedurave të mëtejme hetimore në bashkëpunim dhe koordinim të plotë me organet e drejtësisë për të zbardhur të gjitha rrethanat e ngjarjes. /E.A/