Ministri i Financave, Hekuran Murati, ka thënë se aksioni i Policisë së Kosovës në komunat veriore të vendit, i zhvilluar të hënën, ka qenë veprim i bazuar në ligjshmëri.

Murati, pas mbledhjes së Qeverisë së martën, ka thënë se ka pasur dyshime se po zhvilloheshin aktivitete financiare pa licensë.

“Ne sigurohemi për zbatimin e ligjshmërisë për fushën financiare. Ka pasur dyshime të bazuara që po zhvillohen aktivitete financiare në kundërshtim me ligjin. Dyshimi i bazuar ka qenë që është zhvilluar aktivitet pa licensa. Sa i përket reagimit nuk jam ne dijeni për detaje, por çdo veprim është i bazuar në ligjshmëri”, tha Murati.

Të hënën, autoritetet e Kosovës zhvilluan operacion në veri, ku mbyllën gjashtë objekte të Bankës Kursimore të Postës dhe Bankës Popullore të Serbisë, që operonin në komunat veriore.

Policia e Kosovës konfiskoi 1.6 milion euro, 74 milionë dinarë, mbi 19 mijë franga dhe rreth 14 mijë dollarë. Për këtë aksion ka reaguar edhe Departamenti Amerikan i Shtetit, të cilin e cilësoi si të pa koordinuar me aleatët dhe që përshkallëzon tensionet në atë pjesë.

Qeveria e Kosovës ka miratuar sërish marrëveshjen ndërkombëtare me Fondin Zhvillimor OPEC, pak ditë pasi e njëjta dështoi të ratifikohet në Kuvendin e Kosovës. Ekzekutivi në mbledhjen e sotme mori vendim që të shpërbëjë Ndërmarrjen e Re Energjetike të Kosovës, e cila ishte themeluar për të menaxhuar kontratën e ndërtimit të termocentralit “Kosova e Re” nga “Contour Global”, por ky projekt është anuluar që nga marsi i vitit 2020. Krahas kësaj, u morën disa vendime për shpronësime, përfshirë atë për konservimin, restaurimin dhe ndërtimin e kompleksit memorial Masakra e Reçakut.

Ministri i Financave, Punës dhe Trasnfereve, Hekruan Murati tregoi sipas tij domosdoshmërinë e ratifikimit të marrëveshjes me OPEC në Kuvend. Ai tha se për të njëjtën marrëveshje janë thënë shumë të pavërteta, pasi sipas tij, përmes kësaj marrëveshje Kosova do të përfitonte rreth 40 milionë dollarë.

“Marrëveshja në fjalë është me Fondin OPEC për zhvillim ekonomik. Megjithatë kjo ka qenë e lidhur në kuadër të bashkëpunimit që kemi pasur me Bankën Botërore. Banka Botërore ka qenë udhëheqësi i procesit në kuadër të një pakete të reformave të politikave publike. Me rastin e realizimit kanë liruar mjete të cilat janë vënë Kosovës në dispozicion. Marrëveshja me Bankën Botërore ka qenë në vlerë 50 milionë euro. Ajo marrëveshje është nënshkruar, ratifikuar dhe tashmë mjetet Kosova i ka marrë. Kurse, pjesa e dytë që ka qenë me OPEC ka mbetur ende e padisbursuar pasi marrëveshja ende nuk është ratifikuar në Kuvend. Konsideroj se është e rëndësishme që të përmbyllet cikli i reformave që ka qenë dhe mjetet të disburosohen. Përveç se ka përfitime financiare, me kushte 20 vjet kthimi, bëhet fjalë edhe për rritjen dhe përforcimin e bashkëpunimit të Kosovës me të gjitha shtetet”, tha ai.

Qeveria po ashtu miratoi nismën për lidhjen e marrëveshjes për sigurime sociale ndërmjet Kosovës dhe Turqisë. Ndërkaq është shtyrë edhe për dy vite afati i zbatimit të marrëveshjes IPA me Bashkimin Evropian.

Mbi 900 mijë njerëz, afërsisht 40% e popullsisë në Gaza, janë zhvendosur gjatë dy javëve të fundit si pasojë e bombardimeve të vazhdueshme të Izraelit, tha zëdhënësi i Organizatës së Kombeve të Bashkuara, Stephane Dujarric.

Bombardimet e Izraelit u shoqëruan me luftime të vazhdueshme, kryesisht në lindje të Rafahut dhe Jabalisë. Ai tha se nga palestinezët e zhvendosur, 812 mijë janë nga Rafah dhe mbi 100 mijë nga veriu i Gazës.

“Deri më sot, më shumë se 75% e Rripit të Gazës – rreth 285 kilometra katrorë – është nën urdhra evakuimi mes armiqësive në rritje”, tha Dujarric.

Individët e zhvendosur po kërkojnë strehim në hapësira të hapura, ndërtesa të dëmtuara dhe toka bujqësore në Khan Younis dhe Deir al-Balah./UBTNews/

Kryeministri i Kosovës, Albin Kurti ka thënë se arratisja e Enver Sekiraqës është dështim i sistemit gjyqësor. Kreu qeveritar në mbledhjen e qeverisë të mërkurën, tha se vrasësit e policëve në liri janë kulmi i padrejtësisë.

Sipas tij, reforma në drejtësi dikur ishte nevojë, kurse tashmë është urgjencë institucionale dhe shtetërore.

“Të gjithë ata që e kanë njohur Triumfin si profesionist të pashoqë, të shkathtë në detyrë e shumë njerëzor me qytetarë. Triumfin e kam takuar edhe unë dhe kam po këtë përshtypje. Arratisja e personit përgjegjës për vrasjen e tij, Enver Sekiraqa është dështim i sistemit gjyqësor që vazhdon të arratiset vet nga drejtësia. Më e rëndë bëhet situata kur këso raste nuk përbëjnë përjashtim ose nuk ngjajnë më si rastësi. Qeveria e Kosovës angazhohet çdo ditë për të përfshirë qytetarët nga të gjitha komunitetit padallim në jetën institucionale, zhvillimin ekonomik, drejtësinë sociale të Republikës sonë të përbashkët. Vendosja e rendit dhe ligjit është kusht i domosdoshëm për arritjen e këtij synimi. Këtë nuk e bëjnë askujt të posaçëm por gjithnjë për të gjithë, për interesin publik. Shteti i së drejtës dhe sundimi i ligjit janë dhe duhet të jenë qëllim dhe përkushtim i shtetit. Me gjyqësorin e mirë që drejtësinë dhe ligjit i bënë sinonime në përshtypjen e qytetarëve dhe shoqërisë. Vrasësit e policëve në liri janë kulmi i padrejtësisë, reforma në drejtësi që dikur ishte nevojë tashmë është urgjencë. Urgjencë institucionale, shtetërore dhe kombëtare”, tha ai.