Kryetari i AAK-së, Ramush Haradinaj, ka dorëzuar sot zyrtarisht në Kuvendin e Republikës së Kosovës një kërkesë për organizimin e një ceremonie përkujtimore në nderim të ish-kongresmenit amerikan, Eliot Engel.

Përmes kësaj iniciative, Haradinaj synon që institucionet e Kosovës të shprehin mirënjohje të lartë për kontributin e jashtëzakonshëm të Engelit në proceset e lirisë, pavarësisë dhe shtetndërtimit, duke e cilësuar atë si një nga zërat më të fuqishëm pro Kosovës në momentet më vendimtare të historisë.

Propozimi i dorëzuar parashihet të përfshijë mbajtjen e një seance të veçantë përkujtimore, krijimin e një çmimi vjetor që do të mbajë emrin e mikut amerikan, si dhe vendosjen e një memoriali të përhershëm brenda hapësirave të Kuvendit.

Haradinaj ka theksuar se nderimi i aleatëve të tillë është një detyrim institucional dhe kombëtar, i cili shërben për të ruajtur kujtesën historike dhe për të forcuar lidhjen e përhershme strategjike me Shtetet e Bashkuara të Amerikës.

Një aksident i rëndë ka ndodhur pasditen e djeshme në fshatin Ceraj të Leposaviqit, ku dy punëtorë të një kompanie private kanë pësuar lëndime të rënda trupore.

Sipas raportit të Policisë, viktimat janë rrëzuar nga mjeti i punës derisa ishin duke kryer detyrat e tyre profesionale.

Të lënduarit janë dërguar me urgjencë për tretman mjekësor në spitalin rajonal, për shkak të natyrës së rëndë të lëndimeve të pësuara.

Lidhur me rastin, policia ka arrestuar një person të dyshuar, i cili me vendim të prokurorit është dërguar në mbajtje. Rasti po hetohet nën dyshimin për “rrezikim të sigurisë në vendin e punës”.

Gjatë 24 orëve të fundit, Policia e Kosovës ka ndërhyrë në tri raste të ndara të dhunës në familje, të cilat kanë rezultuar me arrestimin e disa personave në Podujevë dhe Rahovec.

Në Podujevë janë raportuar dy raste. Në orët e hershme të mëngjesit të djeshëm, dy vëllezër janë arrestuar pasi janë përleshur fizikisht pas një mosmarrëveshjeje.

Të dy kanë marrë trajtim mjekësor, ndërsa me vendim të prokurorit, njëri është dërguar në mbajtje dhe tjetri është liruar në procedurë të rregullt.

Po në këtë qytet, rreth orës 10:30, një person është arrestuar pasi ka dëbuar bashkëshorten nga shtëpia. Pas intervistimit, i dyshuari është liruar, ndërsa rasti po trajtohet në procedurë të rregullt.

Ndërkohë, një incident më i rëndë ka ndodhur në Rahovec pak para mesnatës.

Një person, nën ndikimin e alkoolit, ka ushtruar dhunë fizike ndaj bashkëshortes dhe vajzës së tij, duke u shkaktuar lëndime trupore. Viktimat kanë pranuar ndihmë mjekësorë në QKMF-në e Rahovecit, ndërsa i dyshuari, me urdhër të prokurorit, është dërguar në qendrën e mbajtjes.

Kryeministri i Shqipërisë, Edi Rama, ka udhëtuar këtë të premte drejt Spanjës për të marrë pjesë në samitin “Në Mbrojtje të Demokracisë” që po mbahet në Barcelonë.

Me ftesë të kryeministrit spanjoll Pedro Sánchez, Rama do t’i bashkohet liderëve evropianë për të diskutuar mbi rreziqet që i kanosen institucioneve demokratike nga dezinformimi dhe ndikimi i shpejtë i teknologjisë.

Përveç tryezës kryesore të samitit, ku do të kërkohet një bashkëpunim më i fortë ndërkombëtar për rregullimin e hapësirës digjitale, Rama do të zhvillojë takime të rëndësishme dypalëshe.

Ai do të pritet nga homologu Sánchez dhe do të zhvillojë një bisedë me Presidentin e Këshillit Evropian, António Costa.

Kjo vizitë në Spanjë pason ndalesën e tij në Itali, ku pas takimit me kryeministren Giorgia Meloni u rikonfirmua vullneti për thellimin e bashkëpunimit në menaxhimin e emigracionit dhe mbrojtjen.

Vizita në Romë shërbeu si një moment bilanci gjashtë muaj pas nënshkrimit të 16 marrëveshjeve strategjike mes dy vendeve në fusha si siguria dhe infrastruktura.