Në Reporting House, në Prishtinë, ekspozita “Një mur na ndan ” sjell para vizitorëve një histori të veçantë dashurie, përkushtimi dhe idealizmi përmes mbi 50 letrave të shkëmbyera ndërmjet çiftit të UÇK-së, Xhevë Krasniqi-Lladrovci dhe Fehmi Lladrovci, si dhe eksponateve të tjera që dokumentojnë rrugëtimin e tyre. Letrat u shkruan kryesisht gjatë kohës kur Fehmiu vuante dënimin si i burgosur politik në burgun e Stara Gradishkës në Kroaci.

Përmes fjalëve të shkruara, Xheva dhe Fehmiu ndanin mallin, emocionet dhe ëndrrat për një jetë të përbashkët, pavarësisht largësisë që i ndante. Letrat, të zbukuruara me lule të vizatuara, shkronja të shkruara me ngjyra kuqezi, poezi dhe prozë, dëshmojnë jo vetëm dashurinë e tyre të thellë, por edhe formimin intelektual, bindjet dhe përkushtimin ndaj Kosovës.

Ato pasqyrojnë dy njerëz që, krahas lidhjes personale, i bashkonte edhe ideali për lirinë e vendit. Një element i veçantë i ekspozitës është edhe kostumi i kuq i Xhevës, të cilin ajo e veshi kur u vendos në familjen Lladrovci në Gllanasellë të Drenasit, pas vendimit për ta pritur Fehmiun gjatë viteve të burgimit.

Kjo veshje shënon një moment të rëndësishëm të jetës së tyre dhe e lidh historinë personale të çiftit me rrugëtimin e tyre atdhetar. Përveç letrave dhe veshjes, ekspozita përfshin edhe eksponate të tjera, ndër to intervistën e Fehmi Lladrovcit të vitit 1998 dhe pamje të burgut ku ai kaloi pesë vjet. Së bashku, këto materiale sjellin një dimension më njerëzor të historisë, duke zbuluar ndjenjat, mendimet dhe përvojat e dy figurave që shpesh kujtohen vetëm përmes rolit të tyre në luftën çlirimtare.

Xhevë Krasniqi-Lladrovci dhe Fehmi Lladrovci u vranë më 22 shtator 1998, gjatë luftës në Kosovë. Sot, përmes letrave të tyre të ruajtura dhe të ekspozuara në Reporting House, historia e tyre vazhdon të rrëfehet, duke ndërthurur dashurinë personale me idealet dhe përkushtimin ndaj vendit.

Ekspozita “Një mur na ndan” na kujton se pas figurave historike qëndrojnë njerëz me ndjenja, shpresa dhe ëndrra.

Letërkëmbimi i Xhevës dhe Fehmiut mbetet një dëshmi e rrallë e një dashurie që i rezistoi ndarjes, kohës dhe rrethanave të vështira, si dhe e një lidhjeje të ndërtuar mbi barazinë, besimin dhe idealet e përbashkëta.

(Autore: Adile Muli, studente e vitit të dytë në Fakultetin Media dhe Komunikim në UBT)

Policia e Kosovës ka marrë vendim për suspendimin e 11 zyrtarëve policorë lidhur me trajtimin e rastit të vrasjes së Arlinda Zekajt në Vitomiricë të Pejës. Vendimi është mbështetur në Ligjin për Policinë, Udhëzimin Administrativ për procedurat disiplinore dhe rekomandimin e drejtpërdrejtë të Inspektoratit Policor të Kosovës (IPK).

Masa e suspendimit përfshin të gjithë zinxhirin komandues dhe hetimor në rajonin e Pejës, përfshirë ushtruesin e detyrës së Drejtorit Rajonal, Shefin e Hetimeve Rajonale, Komandantin dhe Zëvendëskomandantin e Stacionit Policor në Pejë, Shefin e Hetimeve, ushtruesin e detyrës së Shefit të Operativës, Komandantin e Nënstacionit në Vitomiricë, si dhe katër hetues policorë.

Nga Policia e Kosovës bëhet e ditur se ky hap është ndërmarrë në interes të hetimeve të pavarura, llogaridhënies institucionale dhe përcaktimit të përgjegjësive individuale lidhur me veprimet apo mosveprimet e zyrtarëve në këtë rast.

“Suspendimet janë bërë në interes të hetimeve të pavarura, llogaridhënies institucionale dhe përgjegjësive individuale, në trajtimin e rastit. Policia e Kosovës mbetet e përkushtuar në ruajtjen e vlerave, integritetit dhe shërbimit në mënyrë të drejtë e të paanshme”, thuhet në njoftimin zyrtar të Policisë. /E.A/

Studentja e vitit të dytë në programin e Dizajnit të Modës në UBT, Erza Fejza, ka shënuar një sukses të rëndësishëm krijues, pasi projekti i saj është përzgjedhur fitues në konkursin “Tirana School Mural Fest” dhe tashmë është realizuar në fasadën e Gjimnazit “Bedri Lagami” në Tiranë.

Konkursi, me temën “Ngjyrat dhe simbolet e traditës etnografike shqiptare”, u ka dhënë mundësi të rinjve të interpretojnë trashëgiminë kulturore shqiptare përmes një gjuhe artistike bashkëkohore, të frymëzuar nga ngjyrat, motivet dhe ornamentet e veshjeve popullore dhe tekstileve tradicionale shqiptare.

Pas përzgjedhjes si projekt fitues dhe përshtatjes grafike sipas kërkesave specifike të artit mural, ideja kreative e Erzës u realizua nga artistët profesionistë të Bashkisë së Tiranës. Përzgjedhja e projektit fitues u konfirmua nga Helidon Gjergji, drejtor artistik i festivalit.

Tashmë, murali është bërë pjesë e mjedisit shkollor dhe e përditshmërisë së nxënësve, duke sjellë një interpretim artistik të trashëgimisë kulturore shqiptare dhe duke dëshmuar se krijimtaria e të rinjve mund të shndërrohet në vepra me ndikim të drejtpërdrejtë në hapësirat publike.

Kjo arritje dëshmon potencialin krijues të studentëve të UBT-së dhe rëndësinë e ndërthurjes së edukimit artistik me projekte praktike që lidhin artin, identitetin kulturor dhe komunitetin.

UBT vazhdon të dëshmojë ekspertizën dhe rolin e tij të rëndësishëm në bashkëpunimin ndërkombëtar dhe në zhvillimin e programeve inovative akademike.

Në kuadër të projekteve Erasmus+, Drejtori për Bashkëpunim Ndërkombëtar dhe Projekte në UBT, Prof. Dr. Bekim Marmullaku, dhe Dekani i Fakultetit të Shkencave Kompjuterike, Prof. Dr. Besnik Qehaja, morën pjesë në një punëtori ndërkombëtare të organizuar në Universitetin Teknik të Sofjes, në Bullgari, së bashku me përfaqësues të universiteteve partnere.

Punëtoria u fokusua në zhvillimin e një programi të përbashkët ndërkombëtar të studimeve Master në Siguri Kibernetike dhe Forenzikë Digjitale (Cybersecurity and Digital Forensics). Gjatë saj u trajtuan struktura e programit, harmonizimi i kurrikulave dhe përcaktimi i kompetencave profesionale, në përputhje me standardet evropiane dhe kërkesat e tregut të punës.

Përmes angazhimit aktiv dhe ekspertizës së përfaqësuesve të tij, UBT rikonfirmoi rolin e tij si partner i besueshëm në iniciativat akademike ndërkombëtare, duke kontribuar në forcimin e bashkëpunimit ndëruniversitar, avancimin e ndërkombëtarizimit dhe krijimin e mundësive të reja për studentët dhe stafin akademik.