Lajmet

Punëtorët e KEK-ut kërkojnë rritje të pagave, kërcënojnë me grevë

Llumnica tha se krahas rritjes së pagës duhet të paguhet edhe rrezikshmëria në punë dhe disa kërkesa të tjera.

Published

2 years ago

March 16, 2023

Betim Gashi

Qindra punëtorë të KEK-ut protestuan të enjten, duke kërkuar rritje të pagave. Para zyrave qendrore të KEK-ut në Prishtinë, ata kërcënuan menaxhmentin aktual se në rast se nuk përmbushin kërkesat e tyre do të hyjnë në grevë, duke lënë siç thanë, Kosovën në terr.

Kryetari i Sindikatës së Punëtorëve në KEK, Nexhat Llumnica tha se krahas rritjes së pagës duhet të paguhet edhe rrezikshmëria në punë, shujta e ushqimit dhe pagesa për punën në vikend, sipas Ligjit të punës.

“Sot jemi këtu sepse kemi kërkuar që 1 vit ngritjen e pagave. Ne si përfaqësues sindikal në mënyrë të shkruar i kemi kryer detyrat tona, janë shterë mundësitë e dialogimit. Nuk kemi dal për dëshirë këtu, e di që ju kemi vonuar pak, e di që keni bërë presion shumë më herët tek ne që me bë këtë protestë. Por, të tregojmë sinqerisht, kemi dashur të dalim mirë dhe t’i shterim gjitha mënyrat e dialogimit. Premtimi i drejtorit menaxhues për shujtën e ushqimit ka qenë më 22 shtator që do të paguhet shujta nëse nuk hapen restorantet, ajo nuk ndodhi. Premtimi i tij prapë ka qenë më 22 dhjetor që nuk po mundemi tash se mos po vonohet paga dhe iu paguajmë në janar. Prapë ne besuam, por ja që nuk doli kjo. Punëtorët e KEK-ut kanë punë të rëndë, por ushqim të lehtë. Ngritja e pagave duhet të jetë e domosdoshme për kohën, për arsyen se ne kemi arritur të tejkalojmë prodhimin, të eksportojmë 10 për qind të prodhimit të energjisë elektrike, kemi arritur të bëjmë Kosovën në dritë, punëtorët janë ata që e kanë arritur, mirëpo menaxhmenti po i injoron punëtorët”, tha ai.

Më kërcënues ndaj menaxhmentit të KEK-ut për rritje të pagave ishte përfaqësuesi tjetër i sindikatës, Xhelal Jashari. Ai tha se rritja e pagave nuk ka alternativë në KEK, pasi në të kundërtën do të hyjnë në grevë.

“Nga këtu i bëjmë apel këtij menaxhimet të dështuar ose të ngritë pagën ose ne do të hymë në grevë dhe Kosova do të jetë në terr. Nuk ka alternativë tjetër, ne jemi lodhur. Kjo djersë ky mund që derdhet në KEK nuk paguhet, shkelen shumë të drejta prandaj kështu si jemi të bashkuar, ky menaxhimet nuk ka si na gjunjëzoj, përkundrazi do të forcojë deri në realizimin e kërkesës sonë”, theksoi ai.

Përkrahje kërkesave të punëtorëve të KEK-ut iu dha edhe kryetari i Bashkimit të Sindikatave të Pavarura të Kosovës (BSPK), Atdhe Hykolli.

“Ne kemi dalë të kërkojmë të drejtën tonë e cila na takon. Ju që e rrezikoni jetën, shëndetin e juaj që ne të jemi këtu, andaj edhe menaxhmenti duhet të jetë transparent dhe t’i plotësojë kërkesat e juaja që janë shumë të drejta. Ne po kërkojmë një pagë dinjitoze. Paga dinjitoze do të thotë që ne të blejmë ushqimin sot sikur e kemi ble dje dhe ditët e tjera. Ky menaxhment duhet të kuptojë dhe është mirë që ta bëjë këtë sa më shpejtë. Ne këtu jemi partner dhe nuk jemi kundërshtar të këtij menaxhmenti”, deklaroi ai.

Ndërkaq, kryetar i Sindikatës së Administratës Publike, Ali Gashi tha se kërkesat për rritje pagash në KEK janë legjitime.

“Sot jemi me ju në mbështetje e kërkesave të juaja të drejta dhe legjitime. Ju jeni ata që me punën tuaj, sakrificën e vazhdueshme Kosovën e ndriçoni atëherë kur tërë bota paraqet që kemi krizë energjetike…Ju meritoni më shumë sesa rritje të pagave, kurse sa i përket çështjes së kushteve të punës kjo është një mizerje, shkelje e të drejtave të njeriut, pasi ju jeni ata të cilët në vazhdimësi jeni shembulli më i mirë se si duhet atdheu”, theksoi Gashi.

Punëtorët e KEK-ut marshuan edhe para ndërtesës së Qeverisë së Kosovës, ku potencuan nevojën e pranimit edhe të 2 mijë punëtorëve të rinj në KEK.

Related Topics:KEK KEK-u Nexhat Llumnica

Up Next

Sveçla: Epoka e keqpërdorimit të detyrës zyrtare në kurriz të qytetarëve ka përfunduar

Don't Miss

Zhduken tonelata uraniumi në Libi

Lajmet

Përmbyllet protesta kundër Gjykatës Speciale

Published

5 hours ago

August 7, 2025

UBTnews

Lajm i përditësuar

Me përfundimin e fjalimit të Ali Ahmetit, njërit prej ish-themeluesve të Ushtrisë Çlirimtare të Kosovës (UÇK), është shpallur e përfunduar protesta kundër gjykimit të ish-krerëve të UÇK-së nga ana e Dhomave të Specializuara në Hagë.

Qindra qytetarë nga e gjithë Kosova, por edhe nga treva të tjera shqiptare, u mblodhën në sheshin qendror të Prishtinës për të shprehur kundërshtimin e tyre ndaj, siç u cilësua, “padrejtësive” që po u bëhen ish-pjesëtarëve të UÇK-së.

Motoja e protestës “Kundër padrejtësisë! Në mbrojtje të UÇK-së dhe së vërtetës” u shoqërua me pankarta dhe flamuj kombëtar, të cilët protestuesit i mbanin lart gjatë gjithë tubimit.

Ndërsa disa komuna ofruan transport falas për qytetarët që dëshironin të merrnin pjesë në protestë. Një pjesë e konsiderueshme e tyre kishte arritur në Prishtinë që në orët e hershme të mëngjesit.

Gjatë fjalimeve të mbajtura në shesh, u theksua se qëndrimi i protestuesve nuk është kundër drejtësisë, por kundër, siç u tha, njëanshmërisë dhe selektivitetit të Gjykatës Speciale në adresimin e krimeve të luftës.

Protesta përfundoi në mënyrë paqësore, pa incidente, ndërsa organizatorët paralajmëruan se nuk do të ndalen së kërkuari drejtësi për luftën e UÇK-së dhe do të vazhdojnë angazhimin qytetar për të mbrojtur, sipas tyre, të vërtetën historike.

17:49 – Hetuesja në rastin e gjykimit të Sllobodan Millosheviqit, Neveka Tromp, ka kritikuar zvarritjen e procesit ndaj ish-krerëve të UÇK-së.

Tromp, në protestën kundër Gjykatës Speciale, ka thënë se të akuzuarit mbështetën krijimin e Speciales sepse besonin në drejtësi dhe ndershmëri.

“Ata që sot po akuzohen ishin vetë ata që mbështetën krijimin e Dhomave të Specializuara, sepse besonin në drejtësi dhe ndershmëri,” u shpreh Tromp.

Ajo theksoi se ligjet që rregullojnë luftën janë krijuar për të mbrojtur çlirimtarët, e jo për t’i ndëshkuar ata.

“Gjykata duhet të veprojë në mënyrë profesionale. Nëse drejtësia zbatohet në mënyrë selektive, ajo rrezikon të kthehet në padrejtësi. Në raste të tilla, gjykimet nuk janë për të zbuluar të vërtetën, por janë gjykime të inskenuara.

Ja ku jemi, pesë vjet më vonë, dhe ata ende ndodhen në paraburgim, pa një gjykim të drejtë. Besimi i tyre në drejtësinë e shpejtë është thyer. Por mos harroni – udhëheqësit që sot po akuzohen, janë ata që mbështetën krijimin e këtyre dhomave. E bënë këtë duke qenë të vetëdijshëm për rrezikun.

Pse? Sepse ata besuan në drejtësinë e kauzës së tyre. Besuan se lufta ishte e drejtë, një luftë e lejuar. Ata luftuan dhe fituan. Shkuan në Hagë sepse besonin në drejtësi dhe ndershmëri – besonin në sundimin e ligjit dhe në aftësinë e gjykatës.

Ata besuan se ligjet që rregullojnë luftën janë krijuar për të mbrojtur çlirimtarët e lirisë, dhe jo për t’i ndëshkuar”, ka thënë ajo.

17:15 – Nën brohoritjet e shumta UÇK në Prishtinë ka nisur protesta gjithëpopullore në mbrojtje të vlerave të luftës çlirimtare dhe ish-krerëve të saj që po mbahen padrejtësisht nga Gjykata Speciale.

Në protestë po marrin pjesë një numër i madh i qytetarëve nga e gjithë Kosova e më gjerë, raporton KosovaPress.

‘Skënderbeu’ nis të mbushet me qytetarë në mbrojtje të vlerave të luftës së UÇK-së

“Kundër padrejtësisë! Në mbrojtje të UÇK-së dhe së vërtetës” është motoja e protestës.

Ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi ndodhen në paraburgim në Hagë prej nëntorit 2020.

Ata ngarkohen për krime lufte, teksa janë deklaruar të pafajshëm për të gjitha pikat e aktakuzës. Gjykimi ndaj tyre nisi më 3 prill 2023.

Lajmet

Barduani takon Sorensen, Orav e Barbano në selinë e KFOR-it

Published

8 hours ago

August 7, 2025

UBTnews

Kreu i KFOR-it gjeneral major Enrico Barduani, priti sot në takim emisarin special të BE-së për dialogun Peter Sorensen, përfaqësuesin special të BE-së për Kosovën, Aivo Orav dhe shefin e EULEX-it Giovanni Pietro Barbano.

Në takim u diskutua mbi zhvillimet më të fundit mbi situatën e sigurisë në Kosovë dhe mbështetjen e vazhdueshme të KFOR-it për dialogun e lehtësuar nga BE-ja midis Kosovë dhe Serbisë, raporton KosovaPress.

Gjenerali Barduani nënvizoi rëndësinë e bashkëpunimit të qëndrueshëm me institucionet evropiane në Kosovë dhe midis partnerëve ndërkombëtarë të angazhuar në stabilitetin rajonal, thuhet në njoftimin e KFOR-it.

Vizita dëshmon angazhimin e përbashkët të NATO-s dhe BE-së për paqe të qëndrueshme, dialog rajonal dhe një mjedis të sigurt për të gjitha komunitetet në Kosovë.

Lajmet

Lëngu i panxharit ul tensionin e gjakut tek të moshuarit, ja çfarë thotë studimi i ri

Published

8 hours ago

August 7, 2025

UBT News

Lëngu i panxharit njihet për aftësinë e tij për të ulur në mënyrë natyrale tensionin e gjakut, falë përmbajtjes së lartë të nitrateve.

Një studim nga Universiteti i Exeter përforcon përfitimet për të moshuarit. Sipas gjetjeve, efekti pozitiv i këtij lëngu lidhet me ndryshime specifike në mikrobiomën orale të të moshuarve. Studimi, i botuar në Free Radical Biology and Medicine, krahasoi dy grupmosha: 39 të rritur nën moshën 30 vjeç dhe 36 të rritur të moshës 60–70 vjeç.

Pjesëmarrësit konsumuan dy herë në ditë për dy javë një koncentrat lëngu panxhari të pasur me nitrate. Për dy javë të tjera morën suplement placebo pa nitrate, me një periudhë “pastrimi” prej dy javësh ndërmjet tyre.

Rezultatet treguan se konsumi i lëngut të panxharit solli një ulje të ndjeshme të presionit të gjakut vetëm tek grupi i të moshuarve.

Në të dy grupmoshat u vunë re ndryshime në mikrobiomën orale, por modelet ishin të ndryshme. Tek të moshuarit u vu re rënie e baktereve të gjinisë Prevotella dhe një rritje e baktereve të dobishme si Neisseria, të cilat lidhen me shëndet më të mirë oral dhe kardiovaskular.

Profesoresha Dr. Anni Vanhatalo, e cila udhëhoqi studimin, shpjegon: “E dimë që njerëzit e moshuar prodhojnë më pak oksid nitrik me kalimin e moshës dhe kanë tendencë të kenë presion më të lartë të gjakut, faktorë të lidhur me ndërlikime kardiovaskulare si goditja në tru dhe infarkti. Përmirësimi i dietës së tyre me perime të pasura me nitrate mund të jetë shumë i dobishëm në planin afatgjatë.”

Ajo shton, “nëse dikush nuk është i dhënë pas panxharit, mund të zgjedhë burime tjera të pasura me nitrate, si spinaqi, rukola, kopra, selinoja dhe lakra.”

Bashkautori i studimit, Profesor Dr. Andy Jones, thekson: “Hulumtimi tregon se nitratet dietike ndikojnë në mikrobiomën orale në mënyrë që mund të ndihmojë në uljen e inflamacionit dhe tensionit të gjakut tek të moshuarit. Këto gjetje hapin rrugën për studime të ardhshme më të mëdha që do të shqyrtojnë ndikimin e stilit të jetesës dhe gjinisë në reagimin ndaj suplementeve me nitrate.”

Studimi thekson edhe një herë rëndësinë e ushqyerjes si mjet parandalues, sidomos në moshat e vjetra, duke treguar se edhe ndërhyrjet e vogla ditore mund të sjellin përfitime të mëdha për shëndetin.

Aktualitet

Bullgaria dërgon një kontingjent ushtarak në KFOR

Published

8 hours ago

August 7, 2025

UBT News

Një kontingjent prej 97 ushtarakësh u dërgua përmes një ceremoni zyrtare para Bashkisë së Shumenit për të marrë pjesë në misionin KFOR në Kosovë.

Në ceremoni morën pjesë zëvendësshefi i Mbrojtjes gjenerallejtënant Mikhail Popov, admirali i Flotës Galin Manev, zëvendëskomandanti i Komandës së Forcave të Përbashkëta, gjeneral brigade Plamen Yordanov, zëvendëskomandanti i Forcave Tokësore, guvernatorja e rajonit Shumen Katya Ivanova, kryetarja e Këshillit Bashkiak Shumen Asya Asparuhova dhe zëvendëskryetari i Bashkisë Shumen, Nikolay Kolev.

“E di që shumica prej jush keni marrë pjesë në misione. Misionet nuk janë të njëjta. Çdo javë dhe çdo ditë është e ndryshme. Situata në Kosovë është aktualisht e qëndrueshme, por mund të ndryshojë ndjeshëm brenda disa orësh. Prandaj, jini të përgatitur të reagoni në mënyrë adekuate. Ndiqni procedurat standarde të operimit dhe urdhrat e komandantëve tuaj”, theksoi Popov.

“Jam i sigurt se përvoja dhe përgatitja juaj do t’ju lejojnë të performoni në një nivel të lartë. Gjithmonë mbani një mendim në kokën tuaj në Kosovë ju nuk përfaqësoni Batalionin e 29-të të Mekanizuar, ju nuk përfaqësoni Forcat Tokësore. Para aleatëve tanë ju përfaqësoni Ushtrinë Bullgare, dhe para popullsisë lokale dhe autoriteteve lokale, ju jeni përfaqësues të NATO-s”, theksoi Popov.

Kolev i dhuroi kontingjentit një ikonë të Shën Gjergjit Fitimtar dhe iu drejtua ushtarakëve me fjalët: “Kur një ushtar bullgar del përtej kufijve të Bullgarisë, kjo gjithmonë shoqërohet me një mision dhe detyrë të përgjegjshme ndaj atdheut.

“Sot po ju dërgojmë ju, ushtarakët e kompanisë së manovrimit të batalionit të 29-të të mekanizuar, dhe të gjithë besojmë në përgatitjen, profesionalizmin dhe disiplinën tuaj të mirë”, tha ai.