Dy raste të dhunës në familje janë raportuar dje në Prishtinë dhe Rahovec, ndërsa Policia e Kosovës ka ndërmarrë veprimet e nevojshme ndaj personave të dyshuar.

Në Prishtinë, një grua  ka raportuar në polici se ishte kanosur nga ish-bashkëshorti i saj.

Sipas raportit policor, i dyshuari është arrestuar më 9 gusht. Pas intervistimit, me vendim të prokurorit, ai është dërguar në mbajtje për 48 orë.

Ndërkohë, një rast tjetër është raportuar dje në Rahovec. Një grua kosovare ka deklaruar në polici se ishte sulmuar fizikisht nga një burrë kosovar.

Të dyja palët janë intervistuar, ndërsa me vendim të prokurorit i dyshuari është arrestuar dhe është dërguar në mbajtje.

Rastet po trajtohen nga organet kompetente.

D.L

Gjatë 24 orëve të fundit në Kosovë janë regjistruar dy aksidente trafiku me pasojë fataliteti, si dhe 32 aksidente të tjera ku kanë mbetur të lënduar disa persona.

Sipas statistikave zyrtare të publikuara nga Policia e Kosovës, përgjatë kësaj periudhe kohore janë shënuar edhe 69 aksidente trafiku që kanë shkaktuar vetëm dëme materiale.

Në kuadër të zbatimit të rregullave të komunikacionit dhe rritjes së sigurisë rrugore, zyrtarët policorë kanë shqiptuar gjithsej 1 mijë e 985 tiketa trafiku për shkelësit e ligjit.

Po ashtu, në raportin 24-orësh të Policisë bëhet e ditur se janë arrestuar 16 persona për vepra të ndryshme penale, nga të cilët 11 prej tyre janë dërguar në mbajtje. /E.A/

Një person është gjetur pa shenja jete në Pejë, ka bërë të ditur Policia e Kosovës përmes raportit të saj.

Sipas raportit, në vendin e ngjarjes kanë dalë njësitet përkatëse policore, ndërsa ekipi mjekësor ka konstatuar vdekjen e viktimës burrë, shtetas i Kosovës.

Me vendim të prokurorit të shtetit, trupi i pa jetë është dërguar në Institutin e Mjekësisë Ligjore (IML) për obduksion, ndërsa rasti po hetohet si “Hetim i vdekjes”. /E.A/

Një person është arrestuar në lidhje me një rast të ngacmimit seksual, ka bërë të ditur Policia e Kosovës në raportin e saj 24-orësh.

Sipas raportit policor, i dyshuari burrë është arrestuar pasi ka kryer veprën penale të ngacmimit seksual ndaj viktimës grua, shtetase e Kosovës.

Pas intervistimit nga hetuesit, me vendim të prokurorit të shtetit, i dyshuari është dërguar në mbajtje. /E.A/