13 marsi do të mbetet përgjithmonë një nga datat më të rëndësishme në historinë e sportit kosovar. Në këtë ditë të vitit 2015, Federata e Basketbollit e Kosovës u pranua zyrtarisht si anëtare me të drejta të plota në FIBA, duke i hapur rrugë përfaqësimit ndërkombëtar të basketbollit të Kosovës pas shumë vitesh përpjekjesh.

Ky moment historik shënoi një kapitull të ri për basketbollin në vend, pasi Kosova u bë pjesë e familjes botërore të këtij sporti dhe fitoi mundësinë të garojë në arenën ndërkombëtare.

13 marsi përfaqëson shumë më tepër se një vendim formal. Ai simbolizon një rrugëtim të gjatë përkushtimi dhe sakrifice nga gjenerata të shumta basketbollistësh, trajnerësh, gjyqtarësh dhe punëtorësh sportivë që kanë kontribuar në zhvillimin e basketbollit në Kosovë.

Në përputhje me Planin Strategjik të Federatës së Basketbollit të Kosovës për periudhën 2026–2030 dhe me synimin për të zgjeruar komunitetin e basketbollit në vend, është vendosur që 13 marsi të shënohet çdo vit si Dita e Basketbollit në Kosovë.

Kjo ditë synon të bashkojë të gjithë dashamirët e basketbollit dhe të rikujtojë rrugëtimin, përkushtimin dhe sukseset që kanë ndërtuar historinë e këtij sporti në Kosovë.

Përzgjedhësi i Kosovës në hendboll, Jesper Ostlund, ka folur për faqen zyrtare të Federatës së Hendbollit të Kosovës pas publikimit të listës së lojtarëve për ndeshjet e javës së ardhshme ndaj Bosnjë-Hercegovinës.

Takimet i takojnë fazës së dytë kualifikuese për Kampionatin Botëror të Hendbollit 2027. Ndeshja e parë do të zhvillohet të enjten në Tuzla, ndërsa takimi i kthimit është programuar të dielën në Prishtinë.

Në Kombëtare janë rikthyer disa lojtarë kyç, ndërsa emër i ri në listë është Olt Kabashi. Megjithatë, disa mungesa janë konfirmuar.

“Kemi disa mungesa, por mendoj se ende kemi ekip që mund ta sfidojë Bosnjën në një ditë të mirë,” ka deklaruar Ostlund.

Nëse Kosova eliminon Bosnjë-Hercegovinën, Kombëtarja do të ketë vetëm një pengesë tjetër drejt Botërorit. “Mendoj se kemi shansa të avancojmë. Bosnja natyrisht është favorite, por kam besim të fortë në ekipin tim dhe do të bëjmë çdo gjë të mundur,” shtoi përzgjedhësi suedez.

Në raundin e parë kualifikues, Kosova eliminoi Britaninë e Madhe, por Bosnjë-Hercegovina përfaqëson një nivel më të lartë evropian. “Është ekip fizik, me lojtarë që luajnë në skuadra të mëdha dhe me një grup të gjerë. Do të jetë një sfidë e vërtetë ta mposhtim Bosnjën,” tha Ostlund.

Ky grumbullim do të jetë i treti i suedezit me Kombëtaren e Kosovës. “Jam i kënaqur. Herën e parë kur takova ekipin e mposhtëm Britaninë e Madhe dy herë. Ishte hera ime e parë me një ekip nga Ballkani dhe e kam shijuar shumë. Në kampin e dytë kishim dhjetë lojtarë të lënduar, kështu që pata mundësinë të shoh dhe testoj shumë lojtarë të rinj,” përfundoi Ostlund.

Kosova synon të tregojë forcën e saj dhe të marrë avantazhin për fazën finale të kualifikimeve për Botërorin 2027.

Gjyqtari ndërkombëtar nga Kosova, Istref Elezaj, vijon të shfaqet në nivelet më të larta të volejbollit evropian, duke marrë pjesë në ndeshje të rëndësishme të kupave kontinentale.

Mbrëmë, Elezaj ishte refer i dytë në gjysmëfinalen e meshkujve në CEV Challenge Cup, në përballjen mes Altekma SK Izmir (Turqi) dhe Allianz Milano (Itali). Ndeshja përfundoi me fitoren 1-3 të skuadrës italiane, e cila siguroi kualifikimin në finalen e këtij kompeticioni.

Takimi u zhvillua me përdorimin e Challenge System, një teknologji e standardizuar në nivelet më të larta të volejbollit evropian. Madje, edhe pika e fundit e ndeshjes u vendos përmes këtij sistemi, duke e bërë arbitrazhin më profesional dhe sfidues për gjyqtarët e përzgjedhur në këtë nivel.

Për performancën e tij në këtë takim, Elezaj mori vlerësim të lartë, duke vazhduar serinë e delegimeve në ndeshjet më të rëndësishme të garave evropiane.

Ky është një tjetër dëshmi e besimit që strukturat e volejbollit evropian i japin referimit kosovar, duke i besuar një ndeshjeje vendimtare të fazës finale pikërisht gjyqtarit tonë, Istref Elezaj.

Në këtë mënyrë, arbitrazhi kosovar vazhdon të konsolidojë emrin e tij në skenën ndërkombëtare të volejbollit.

Shai Gilgeous-Alexander tha se jep “gjithçka për lojën” pasi theu rekordin 63-vjeçar të NBA-së për më shumë ndeshje rresht me të paktën 20 pikë.

Lojtari më i vlefshëm i sezonit të kaluar shënoi 35 pikë për Oklahoma City Thunder në fitoren 104-102 ndaj Boston Celtics, duke vazhduar serinë që nisi më 1 nëntor 2024 dhe tani ka arritur 127 ndeshje rresht me 20 pikë e më shumë.

Legjendari Wilt Chamberlain mbante rekordin e mëparshëm me 126 ndeshje nga tetori 1961 deri në janar 1963.

“Të gjitha rekordet dhe arritjet janë të shkëlqyera, por nuk kanë rëndësi nëse nuk fiton, dhe kjo ishte gjithçka që kisha në mendje,” tha Gilgeous-Alexander, i cili shkëlqeu për Thunder kur ata fituan titullin e NBA-së sezonin e kaluar.

“Do ta kisha dhënë rekordin për fitore çdo ditë të javës. Jam i lumtur që fituam dhe vendosa rekord.”

Gilgeous-Alexander bëri histori kur shënoi një gjuajtje 20-këmbëshe shtatë minuta e katër sekonda para përfundimit të çerekut të tretë, duke arritur pikën e 21-të të ndeshjes.

Ai shtoi edhe 14 pikë të tjera në një performancë që përfshinte gjithashtu nëntë asistime dhe gjashtë kërcime.

“Unë thjesht jap gjithçka që kam për lojën,” tha 27-vjeçari kanadez.

“Ka shumë gjëra në basketboll dhe në jetë që nuk mund t’i kontrollosh. Unë kam gjetur sukses duke u fokusuar te gjërat që mund t’i kontrolloj dhe duke dhënë maksimumin tim. Kam ulur kokën, kam bërë ato gjëra dhe kur shikoj prapa, kam arritur disa gjëra.”

Kjo ishte fitorja e shtatë rresht për Thunder, që ndodhen në krye të Konferencës Perëndimore me një bilanc prej 52 fitore dhe 15 humbje, ndërsa Celtics janë të dytët në Konferencën Lindore me 43 fitore dhe 23 humbje./BBC/