Lajmet

​Përfaqësuesit e Vetëvendosjes e akuzojnë Dakën për shkelje të ligjit

Published

on

Mbledhja e Komisionit Qendror të Zgjedhjeve (KQZ) u zhvillua me debate ndërmjet përfaqësuesve të Lëvizjes Vetëvendosje dhe kryetares së KQZ-së, Valdete Daka, këtë të fundit e akuzuan për shkelje të ligjit dhe pozitës që mban në krye të këtij institucioni. Ndërsa Daka tha se mbledhjet e KQZ-së po zhvillohen me sulme personale ndaj saj duke penguar kështu të zhvillohet puna për çka janë të thirru si komision.

Anëtari i KQZ-së, nga radhët e Lëvizjes Vetëvendosje, Sami Kurteshi ka kërkuar nga kryetarja e KQZ-së, sqarime se nga kush ka dërguar shkresa në Panelin Zgjedhor të Ankesave dhe Parashtesave (PZAP), të cilat siç tha ai nuk janë miratuar paraprakisht në komision, që kanë të bëjnë me çështjen e moscertifikimit e listave për zgjedhjet e 14 shkurtit.

“Nëse ky institucion merr vendime dhe ka marrë vendime edhe kundër disa partive politike, me vota, nuk janë certifikuar listat e disa partive politike, në mesin e tyre Vetëvendosje, edhe ky ka qenë vendimi prej nga e drejta që PZAP-së t’i dërgohen letra me propozime nga kryesuesja se si duhet të veprohet, pa marrë vendim KQZ, ky trup ka vendosur qysh ka vendosë nuk kanë kaluar listat e partive politike edhe kush ka propozuar që të bëhet një selektim propozojmë që lista të miratohet, por këta persona mos të miratohen, këtë vendim nuk e ka marrë KQZ, kush i ka shkruar ato letra, nëse ju i kemi shkruar zonja kryesuese kjo nuk është bartje e platformës politike, por kjo është shkelje e ligjit dhe rregullores”, tha Kurteshi.

E sipas përfaqësuesit tjetër nga ky subjekt, Alim Rama, Daka po bënë shkelje nga pozita të cilën e mban.

“Përveç shkresës që e përmendi kolegu Kurteshi, ju jeni përgjigjur vet në shkresat në PZAP, ose dikush prej zyrës, ne e kemi konfirmim që zyra për regjistrim të partive politike nuk i ka bërë ato shkresa. Po ashtu arsyetimet kanë qenë të votuara në KQZ, në KQZ është e qartë që disa lista nuk kanë marrë vota të mjaftueshme për çertifikim, arsyetimet kanë qenë arbitrare dhe nuk janë votuar në KQZ dhe nuk kanë të shkruara nga zyra, kjo është shkelje flagrante e pozitës që e keni, e ajo është shumë shqetësuese, keni penguar zbatimin e planit operacional, keni bërë shkresë në mënyrë autonome”, tha ai.

Krejt këto kryetarja e KQZ-së, Valdete Daka i ka konsideruar sulme personale ndaj saj, duke kërkuar pastaj që mbledhjet të zhvillohen në përputhje me rendin e ditës.

“Asnjë shkresë nuk është votuar asnjëherë në KQZ, dhe shkresat që i nënshkruaj unë, draftet që mi dërgojnë, i kontrolloj, sepse duhet me i nënshkru vet dhe e barti përgjegjësinë vet, dhe hiç mos u mërzit e barti përgjegjësinë për çdo gjë që e kam nënshkruar, kështu që jemi, ok, unë e barti përgjegjësinë edhe penale edhe morale për të gjitha shkresat që i nënshkruaj sepse e shikoj çka nënshkruaj. Mbledhjet tona po shndërrohen në dialogje e monologje të cilat nuk kanë të bëjnë fare me procesin zgjedhor por më shumë me atake personale kryesisht ndaj meje por nejse”, tha ajo.

Përveç këtyre, në KQZ sot u diskutua edhe për letra kërcënuese që u tha se kanë marrë stafi civil.

Anëtarët e Vetëvendosjes kërkuan që të diskutohet rreth kërkesës së drejtorit të Zyrës për Regjistrimin e Partive Politike.

Anëtarët e KQZ-së nuk votuan për të futur në rend dite një diskutim të tillë që ishte kërkesë e përfaqësuesve të Vetëvendosjes çka ngjalli debat pastaj në mes të përfaqësuesve të Vetëvendosjes dhe kryetares së KQZ-së.

“Me vota për ose kundër kjo punë nuk rregullohet, ai ka shprehur shqetësimet e veta në atë e-mail, kjo nuk kalon ashtu vetëm me vota, ne me vota nuk mundemi me harru që dikush këtu është kërcënuar dhe e ka shkruar një e-mail që është kërcënuar dhe meriton të shqyrtohet”, tha ai.

Ndërsa Valdete Daka foli edhe për një kërcënim tjetër, që sipas saj, për t’u diskutuar këto raste, duhet të hidhen ne votim, për çka nuk gjeti mbështetje nga anëtarët e KQZ-së.

“E kemi pas edhe një kërcënim dhe letër tjetër, e cila na është drejtuar gjithashtu nga stafi civil, e cila po ashtu nuk do të trajtohet këtu sepse janë çështje të cilat nuk trajtohen këtu dhe nuk është vendimmarrje e KQZ-së e cila i trajton ato, nëse konsideroni ju që po, atëherë i qes në votim të dyja. Të lutem, njëherë të përfundoj unë fjalinë, ju kisha lutë të gjithë anëtarëve që t’a përfillin rregulloren e mos me na përngja mbledhjet në pazar”, tha ajo.

Në mbledhjen e KQZ-së, kryeshefi ekzekutiv i sekretariatit, Burim Ahmetaj tha se janë mbi 174 mijë aplikues përmes e-mailit për zgjedhjet e 14 shkurtit, proces i cili pritet që të përfundojë sot.

Por ai shtoi se këto të dhëna janë preliminare dhe numri mund të ndryshojë meqë ka raste kur përmes një e-maili janë dërguare shumë aplikacione.

Gjithashtu sot, është votuar udhëzuesi për tërheqjen e shortit për radhitje në fletëvotim dhe janë aprovuar akreditimet e vëzhguesve të rinj për zgjedhjet e 14 shkurtit.

Aktualitet

Aksident trafiku në Klinë të Ulët, një e vdekur dhe katër të lënduar

Published

on

Një aksident trafiku ndodhi sot në rrugën rajonale Mitrovicë – Skenderaj, pikërisht në fshatin Klinë e Ulët.

Policia e Kosovës njoftoi se në aksident u përfshinë dy vetura, ku si pasojë e lëndimeve të pësuara humbi jetën viktima një femër rreth 65 vjeçare, ndërsa u lënduan edhe katër persona të tjerë, të cilët u dërguan për mjekim në Spitalin Rajonal të Mitrovicës.

Continue Reading

Lajmet

Çmimi i rrymës për bizneset pritet të rritet deri në 30 për qind

Published

on

Deri në 30 për qind pritet të shtrenjtohet çmimi i energjisë për bizneset e mëdha, paralajmërojnë përfaqësues të disa kompanive të licencuara për furnizimin me energji elektrike në Kosovë.

Këto kompani aktualisht kanë shtuar përpjekjet për sigurimin e energjisë, në prag të nisjes së procesit të liberalizimit të tregut të energjisë.

Çfarë do të thotë liberalizimi i tregut të energjisë?

Procesi i liberalizimit të tregut të energjisë në vendet e Bashkimit Evropian ka filluar në fund të viteve ‘90 me qëllim rritjen e konkurrencës, efikasitetit, sigurisë dhe zgjedhjes për konsumatorët. Ndërsa, në Ballkanin Perëndimor ky proces është ende në zhvillim.

Në Kosovë, liberalizimi i tregut të energjisë është paraparë me Ligjin për energjinë elektrike të miratuar në vitin 2017, por zbatimi i tij është shtyrë për shkak të rrethanave të ndryshme. Tashmë, Zyra e Rregullatorit për Energji ka marrë vendim që nga data 1 qershor të gjitha kompanitë e mëdha – konkretisht ato me mbi 50 të punësuar ose me qarkullim vjetor mbi 10 milionë euro – të kalojnë në tregun e hapur të energjisë. Sipas ZRRE-së, numri i tyre është mbi 1.000.

Këto biznese furnizohen nga Operatori për Furnizim me Energji, si furnizuesi kryesor i licencuar për energji me çmime të rregulluara nga ZRRE-ja.

Nga 1 qershori, kompanitë e mëdha duhet të zgjedhin vetë furnizuesin, me çmime të parregulluara, që përcaktohen nga kërkesa dhe oferta në treg.

Aktualisht, në tregun e lirë janë të licencuara 18 kompani që ofrojnë furnizim me energji elektrike, shumica janë nga Kosova, por ka edhe kompani nga rajoni. Disa prej tyre kanë nisur negociatat me prodhues të energjisë në rajon për të siguruar kapacitetet e nevojshme për furnizimin e klientëve të rinj.

Ndërkohë, disa biznese, si Frutex në Suharekë, po kërkojnë kompani vendore për të negociuar çmimin për rrymën.

Bizneset përballë zgjedhjes së furnizuesve të rinj

Drilon Brahimi, drejtor i përgjithshëm i kompanisë Tredint Group L.L.C, e cila u licencua për furnizim me energji elektrike në fund të vitit të kaluar, thotë se janë në fazën e hulumtimit të tregut për të siguruar çmime më të volitshme, por ende nuk kanë nënshkruar asnjë kontratë me kompani prodhuese nga rajoni.

“Shumë kompani vendore, konkretisht ato prodhuese, kanë filluar të na dërgojnë profilin vjetor të konsumit energjetik dhe po kërkojnë informacione rreth çmimit. Ne jemi në fazën e përgatitjes së ofertave. Përgjigjja konkrete për secilën pritet t’iu dërgohet në fillim të majit”, thotë ai për Radion Evropa e Lirë.

Megjithatë, Brahimi thekson se çmimi për muajt e parë pritet të jetë deri në 30 për qind më i lartë se tarifat aktuale të energjisë.

Aktualisht, për konsumatorët e amvisërisë dhe ata komercialë që shpenzojnë deri në 800 kilovatë në orë brenda një muaji, çmimi i rrymës gjatë ditës është 7.79 centë për kilovat, ndërsa për ata që shpenzojnë më shumë se 800 kilovatë, pjesa mbi këtë u llogaritet me çmim prej 13.29 centësh.

Nga 1 maji hyjnë në fuqi tarifat e reja, me një rritje prej 16.1 për qind, por ato nuk do të zbatohen për bizneset me mbi 50 punëtorë.

Rritjen prej 30 për qind për kompanitë e mëdha e paralajmëron edhe Diamant Dalladaku nga kompania Enerco LLC.

Edhe ai thotë se ende nuk ka nënshkruar ndonjë kontratë me kompani të huaja dhe se janë në proces të hulumtimit të tregut.

“Liberalizimi i tregut të energjisë është një proces i ri dhe gjatë zbatimit po paraqiten sfida. Si problem në kohën e përgatitjes është mungesa e informacioneve për energjinë që shpenzojnë bizneset, të cilat po dalin në tregun e hapur”, thotë Dalladaku për Radion Evropa e Lirë.

Në raportin vjetor të ZRRE-së thuhet se vitin e kaluar mbi 5.400 gigavatë në orë (GWh) ka qenë sasia e përgjithshme e energjisë së shitur te të gjithë konsumatorët në Kosovë. Nga kjo sasi, 3.156 GWh apo 58.4 për qind janë shpenzuar nga konsumatorët familjarë, kurse pjesa tjetër, 2.041 apo mbi 37 për qind, është shpenzuar nga konsumatorët jofamiljarë dhe në këtë kategori përfshihen të gjitha bizneset.

Palushi: Ende nuk kemi oferta konkrete për energjinë

Kompania për prodhimin e lëngjeve Frutex në Suharekë është një nga kompanitë që nga qershori do gjejë vetë kompaninë furnizuese për rrymë.

Pronari i saj, Shaqir Palushi, thotë se kanë dërguar kërkesë për takim në të gjitha kompanitë e licencuara për furnizim me energji, në mënyrë që të negociojnë për çmimin. Megjithatë, Palushi ende nuk ka pranuar ndonjë përgjigje nga to.

“Po pres në ditët në vazhdim… por, nuk besoj se ato janë të përgatitura për këtë proces, sidomos në kushtet e turbulencës që kanë mbizotëruar vitet e fundit lidhur me çmimet e energjisë elektrike”, thekson ai.

Palushi tregon se për një muaj shpenzon energji në vlerë deri në 40 mijë euro. Në rast të rritjes së çmimit për 30 për qind, për sasinë e njëjtë të shpenzuar ai do të paguante mbi 52 mijë euro.

“Sigurisht se kjo rrit shpenzimet operative, por do bëjmë përpjekje të ketë ndikim në uljen e profitit të kompanisë dhe jo të rrisim çmimet”, thotë ai.

Kompanitë e licencuara, të papërgatitura?

Odat ekonomike në Kosovë kanë kërkuar shtyrjen e këtij vendimi, pasi sipas tyre, edhe pse kompanitë janë të licencuara, shumica prej tyre nuk kanë pasur klientë fundorë dhe kanë ekzistuar vetëm “në letër”, pa veprimtari reale tregtare.

Ky tranzicion, sipas tyre, do të destabilizojë furnizimin dhe do të ndikojë në rritjen e çmimeve të produkteve të tjera.

Më 21 mars, Oda Ekonomike e Kosovës kërkoi nga Avokati i Popullit që të iniciojë këtë çështje në Gjykatën Kushtetuese dhe të kërkojë pezullimin e vendimit për të paktën një vit. Avokati i Popullit konfirmoi për Radion Evropa e Lirë se e ka pranuar ankesën e Odës Ekonomike të Kosovës dhe është duke e shqyrtuar.

“Për Avokatin e Popullit kjo është një situatë komplekse për faktin se këto zhvillime janë bërë në kohën kur institucionet kryesore janë në krijim e sipër”, thuhet në përgjigje, ku shtohet se shtrenjtimi i tarifave të rrymës do të ketë pasoja në të drejtat socio-ekonomike për qytetarët.

Megjithatë, ZRRE-ja përsëriti se kapacitetet ekzistuese janë të mjaftueshme për t’i furnizuar bizneset me energji pas liberalizimit të tregut.

“Shumica e furnizuesve janë duke bërë përgatitjet e nevojshme teknike dhe administrative për të qenë funksionalë në treg”, thuhet në një përgjigje që ZRRE-ja i dërgoi Radios Evropa e Lirë.

ZRRE-ja thotë se është duke zhvilluar takime të rregullta dhe informuese me të gjithë furnizuesit e licencuar me qëllim që të informohen në mënyrë sa më të qartë rreth hapave dhe mundësive që ofron liberalizimi i tregut.

Continue Reading

Aktualitet

Punëtorët e KEK-ut protestojnë më 1 maj

Published

on

Sindikata e Re e Korporatës së Energjisë së Kosovës njoftoi për organizimin e një proteste më 1 Maj, Ditën Ndërkombëtare të Punëtorëve, për të kërkuar paga më dinjitoze dhe kushte më të mira pune për punëtorët e sektorit energjetik.

Protesta do të mbahet të mërkurën, në ora 12:00, në sheshin “Skënderbeu” në Prishtinë.

Në njoftimin e bërë publik, Sindikata thekson se puna e tyre përmban lodhje ekstreme, rrezik të përhershëm dhe sakrificë të përditshme, duke theksuar se “kjo punë nuk ka para që mund ta paguajë”.

Për të ilustruar realitetin e vështirë, sindikata ka shpërndarë edhe një fotografi të një punëtori me fytyrë të mbuluar nga pluhuri i zi, simbol i kushteve të rënda në të cilat punojnë minatorët dhe teknikët e KEK-ut.

“Protestojmë për një pagë dinjitoze dhe respekt për punën tonë”, thuhet në thirrjen publike, ku organizatorët ftojnë qytetarët dhe përfaqësuesit sindikalë të solidarizohen me kërkesat e tyre.

Continue Reading

Aktualitet

Zhduket një person në Shtime

Published

on

Një person është raportuar i zhdukur në Shtime tash e dy ditë.

Sipas njoftimit nga Policia, babai i viktimës ka raportuar në polici të hënën pasdite se djali i tij është  larguar nga shtëpia dhe nuk është kthyer më.

Rasti vazhdon të hetohet.

Continue Reading

Të kërkuara