Lidhja e Shkrimtarëve e Kosovës dhe Lidhja e Shkrimtarëve dhe e Artistëve të Shqipërisë organizojnë edicionin e radhës të Festivalit Ndërkombëtar të Poezisë “Drini Poetik”.

Festivali mbahet sot dhe nesër në Prishtinë, Prizren dhe Kukës, duke mbledhur poetë, shkrimtarë dhe krijues letrarë nga hapësira të ndryshme shqiptare dhe ndërkombëtare.

Në Prishtinë, festivali nis me ceremoninë e hapjes, sesione letrare dhe promovime veprash, ndërsa aktivitetet do të vazhdojnë më 10 qershor në Prizren dhe Kukës. Atje do të zhvillohen takime kulturore, vizita në monumente historike dhe manifestimi tradicional poetik “Valët e Drinit”, ku do të shpallen edhe çmimet letrare të festivalit.

Sipas raportit policor të 24 orëve të fundit janë regjistruar dy raste të ndara të sulmit ndaj zyrtarëve policorë në Kosovë.

Rasti i parë ka ndodhur në Deçan, rreth orës 16:09, ku është arrestuar një i dyshuar mashkull kosovar nën dyshimin se ka kanosur dhe sulmuar dy zyrtarë policorë, në shenjë revolte për shqiptimin e një tikete për kundërvajtje. Gjatë arrestimit është përdorur sprej ndaj të dyshuarit, ndërsa policët kanë pësuar lëndime të lehta dhe kanë marrë tretman mjekësor. Me vendim të prokurorit, pas intervistimit i dyshuari është liruar në procedurë të rregullt.

Rasti i dytë është raportuar në Klinë, në rrugën “Abedin Rexha”, rreth orës 23:13, ku i dyshuari mashkull kosovar ka sulmuar zyrtarët policorë gjatë arrestimit. Si pasojë, policët kanë pësuar lëndime të lehta dhe janë trajtuar mjekësisht. Gjatë kontrollit, tek i dyshuari është gjetur dhe konfiskuar një armë zjarri – pistoletë me një karikator me nëntë fishekë. Me vendim të prokurorit, pas intervistimit, i dyshuari është dërguar në mbajtje.

Sipas raportit policor, të dy rastet janë duke u trajtuar nga organet kompetente.

Ariana Grande dhe Ethan Slater i kanë dhënë fund lidhjes së tyre pas tre vitesh së bashku.

Sipas burimeve pranë çiftit, ndarja ka ndodhur disa muaj më parë dhe ka qenë tërësisht miqësore, me të dy që vazhdojnë të ruajnë marrëdhënie të mira. Vendimi raportohet se ka ardhur pas një periudhe të gjatë reflektimi.

Këngëtarja 32-vjeçare, sipas të njëjtave burime, po e përballon mirë këtë fazë të re në jetën e saj dhe aktualisht është e fokusuar në turneun “Eternal Sunshine”, i cili nisi më 6 qershor në Kaliforni dhe pritet të përfundojë në shtator në Londër. Ajo po punon gjithashtu edhe për albumin e ri “Petal”, që pritet të publikohet më 31 korrik.

Romanca mes saj dhe Slater nisi gjatë xhirimeve të filmit “Wicked”, ku Grande luajti rolin e Galindës, ndërsa Slater interpretoi Boq. Lidhja e tyre u bë publike në korrik të vitit 2023, pak kohë pas ndarjeve të tyre nga partnerët e mëparshëm.

Megjithëse marrëdhënia ka përfunduar, burimet theksojnë se mes tyre nuk ka konflikte dhe se ata vazhdojnë të mbështesin njëri-tjetrin në aspektin profesional.

Presidenti i SHBA-së, Donald Trump, ka deklaruar se një marrëveshje që synon t’i japë fund konfliktit me Iranin mund të arrihet brenda dy deri në tre ditësh.

Duke folur për gazetarët pas pjesëmarrjes në finalet e NBA-së në Madison Square Garden, Trump tha se marrëveshja eventuale do të ndalonte Iranin nga zhvillimi i armëve bërthamore dhe do të çonte në rihapjen e menjëhershme të Ngushticës së Hormuzit.

Sipas tij, Irani dhe Izraeli kanë rënë dakord të ndalin sulmet ndaj njëri-tjetrit pas përshkallëzimit të fundit të tensioneve.

“Ata po bënin lëvizje para dhe mbrapa, dhe tani të dy ranë dakord, nëpërmjet meje, të ndalen,” tha Trump para se të nisej me Air Force One.

Ai shtoi se marrëveshja është në fazat përfundimtare dhe se nuk do të lejojë në asnjë formë që Irani të pajiset me armë bërthamore.

“Ngushtica do të hapet menjëherë pas nënshkrimit, që mund të ndodhë brenda dy ose tre ditësh,” theksoi ai.

Trump u shpreh gjithashtu se nuk sheh ndonjë pengesë serioze në negociata dhe se palët janë shumë afër arritjes së një marrëveshjeje. Megjithatë, ai njihet për deklarata optimiste edhe në të kaluarën, gjatë negociatave që më pas kanë dështuar.

Situata mbetet e tensionuar mes Iranit dhe Izraelit, të cilët kanë ndalur përkohësisht sulmet ndaj njëri-tjetrit pas shkëmbimeve të fundit, ndërsa Teherani ka paralajmëruar reagim nëse sulmet vazhdojnë.