Lajmet

​Opozita kërkon dorëheqje morale për vrasjen e shtatzënës para Klinikës së Gjinekologjisë

Këtë kërkesë ata e paraqitën në Komisionin për Shëndetësi dhe Mirëqenie Sociale.

Published

3 years ago

on

Dorëheqje morale për rastin e vrasjes së 35-vjeçares shtatzënë para Klinikës së Gjinekologjisë kanë kërkuar sot deputetët e dy partive opozitare, Partisë Demokratike të Kosovës dhe Lidhjes Demokratike të Kosovës. Sipas tyre kjo vrasje ka ndodhur brenda këtij institucioni publik të ShSKUK-së.

Këtë kërkesë ata e paraqitën në Komisionin për Shëndetësi dhe Mirëqenie Sociale para të cilit sot po raportonte ushtruesja e detyrës së ministritë të Shëndetësisë, Dafina Gexha-Bunjaku bashkë me ushtruesin e detyrës së drejtorit të Shërbimit Spitalor Klinik Universitar të Kosovës, Pranvera Zejnullahu.

Përkundër që në komision çështje diskutimi ishte ndarja buxhetore për Buxhetin e Kosovës për 2023 për dikasterin e shëndetësisë, ishte vetë ushtruesja e detyrës së kreut të shëndetësisë kosovare, Dafina Gexha-Bunjaku e cila fjalimin e saj para ligjvënësve e nisi duke shprehur ngushëllime për vrasjen e shtatzënës para Gjinekologjisë.

Por, me këtë ngushëllim nuk u mjaftua, pasi deputeti i LDK-së, Armend Zemaj i cili u shpreh se jo për shkak të përgjegjësisë, por pasi vrasja ka ndodhur brenda hapësirave të QKUK-së duhet të ketë dorëheqje morale.

Zemaj madje kërkoi dorëheqje dhe për rastin e keqtrajtimit psikologjik nga një logoped, për të cilin sipas tij si rast ShSKUK u munda ta mbajë të fshehtë.

“Rasti i mbrëmshëm do të ishte pak thirrje morale dhe thirrje të ndërgjegjes morale të pozitave çfarë mbani, sepse është privuar nga jeta një zonjë në pritje të fëmijës në derë të Klinikës, jo në oborrin e QKUK ashtu siç e keni thënë në deklaratë dhe që keni thënë se ka ndodhur një vdekje, fatkeqësisht, kështu nuk duhet të apostrofohen gjërat as me nguti…Pavarësisht peshës së rëndë, mendoj që njëra pozitë do të duhej sot të dorëhiqej ose dje në kuptim e asaj që ka ndodhur, jo në atë të përgjegjësisë të drejtpërdrejtë që e keni, por të përgjegjësisë morale brenda institucionit të shëndetësisë që ju e udhëhiqni”, u shpreh Zemaj.

Por ishte kryetarja e Komisionit për Shëndetësi, Fatmire Kollçaku që ia ndërpreu fjalën Zemajt duke i thënë të fokusohet te çështja për çka është ftuar kjo mbledhje.

Kërkesë për dorëheqje morale kishte edhe deputeti i PDK-së, Bekim Haxhiu i cili tha se dorëheqje morale do të duhej të jepte drejtori i Klinikës së Gjinekologjisë, por edhe ushtruesi i detyrës së drejtorit të SHSKUK-së. Sipas tij, kjo paciente, e cila kishte ardhur për ndihmë mjekësore, u vra në dorën e mjekëve.

“Një paciente e pranuar në Klinikën e Gjinekologjisë në prag të lindjes, e cila është vrarë bashkë me fëmijën e pa lindur, a ka ndonjë përgjegjësi të drejtorit? Si lihet një nënë e pacientit vetëm, e cila ka qenë nën mbrojtje të shtetit nëse nuk ka përgjegjësi dhe dorëheqje morale të drejtorit të Gjinekologjisë të tuajën se nuk po e kërkoj prej ushtrueses së detyrës, sepse kjo nga dorëheqja është zëvendësministër, por të kishte pasur ministër të Shëndetësisë do t’ia kërkoja dorëheqjen morale, sepse në kujdesin e shtetit ku pacientja ka shkuar të merr shërbimin e nevojshëm, kujdesin e nevojshëm shëndetësor është vrarë në dorën e mjekëve”, tha ai.

Sa i takon çështjes së buxhetit, ushtruesja e detyrës së ministrit të Shëndetësisë, Dafina Gexha-Bunjaku se buxheti i këtij dikasteri për vitin 2023 është rritur për mbi 27% dhe si i tillë është koncentruar kryesisht në përmirësim të cilësisë së shërbimeve aktuale, por edhe në ofrim të shërbimeve të reja.

Sipas saj, krahas investimeve kanë paraparë edhe shtim të 299 profesionistëve shëndetësorë, por edhe të 42 trupave inspektues me qëllim të rriten inspektimet në institucionet shëndetësore.

“Pra, kemi një rritje 27.62%, në ngritjen e kapaciteteve të infrastrukturës dhe pajisjeve për vitin 2022 kanë qenë 10 milionë e 63 mijë për investime kapitale, për vitin 2023 do të jetë 18 milionë e 403 mijë që kemi një rritje prej 83%… Do t’i shtohen edhe 42 inspektorë shëndetësorë dhe farmaceutikë, dhe me këtë synohet të rritet dhe trefishohet edhe numri i inspektimeve, duke bërë inspektime të rregullta dhe permanente në institucione shëndetësore. Po ashtu, nga lista esenciale e barnave për MSH buxheti në 2022 ka qenë 11 milionë e 180 mijë, ndërsa për vitin 2023 është 21 milionë e 161 mijë e 734 dhe kjo rritje e buxhetit krahasuar me vitin 2022 është 89.9%… Sa i përket listës së pritjes dhe diagnostikës, ky buxhet parasheh përmirësimin e cilësisë së shërbimeve aktuale por edhe për sa na lejon buxheti edhe krijimi i shërbimeve të reja. Lista e pritjes do të jetë, por për ofrim të cilësisë kur rritet cilësia sigurisht që nuk ofrohen shërbimi për 5 minuta që ta zvogëlojmë listën e pritjes”, u shpreh ajo.

Ndërsa, ushtruesja e detyrës së drejtorit të ShSKUK-së, Pranvera Zejnullahu u shpreh se në vitin 2023 ky institucion gëzon buxhetin më të madh, i cili kryesisht është i koncentruar në modernizimin dhe funksionalizimin e Klinikave.

Sipas saj, në vitin e ardhshëm synojnë edhe funksionalizimin e Spitalit të Podujevës, derisa u shpreh se investime po planifikojnë edhe në spitalet tjera regjionale. Ajo si projekt të reja ajo përmendi spitalin e nefrologjisë dhe hematonoligjisë, pastaj përfundim të objektit të Ortopedisë por edhe investime në Klinikën e Gjinekologjisë.

Si risi u.d. e drejtorit të ShSKUK-së përmendi edhe shërbime me IVF-së dhe Klinikën Ditore.

Si plan i ShSKUK është që në vitin e ardhshëm t’i vënë në shërbim 5 aparatura të rezonancës magnetike, për çka Zejnullahu si sfidë paraqiti trajnimet e profesionistëve shëndetësor në këtë aspekt, por edhe mirëmbajtjen e tyre.

“Si ShSKUK buxheti i alokuar 10 milionë më tepër me theks të veçantë në listën esenciale të barnave që është kruciale. Plus edhe 100 numra shtesë për funksionalizimin në vitin e ardhshëm të spitalit të Podujevës që do të jetë i ri… Planifikimi për bunkerin për akselerator, sepse e kemi bërë kontratën dhe e kemi futur në kuadër të buxhetit, por për shkak të bunkerit e kemi futur dhe do ta përfundojmë edhe bunkerin dhe kjo pjesë në Onkologji do të përfundohet… Është një risi që kem bë planifikim bashkë me menaxherët e klinikave dhe si domosdoshmëri dhe vizion tjetër është krijimi i spitaleve për trajtim ditor, të cilët do të punohet në kuadër të kodit buxhetor për modernizimin e QKUK. Këtu nënkupton fillimi i Klinikës ditore për pacientët klinikë-urologjikë, atyre me sëmundje të mushkërive dhe në gjinekologji do të fillohet me renovim të spitalit… Çka janë risi edhe të cilat janë buxhetuar është pjesa e parë e projektit të IVF-së siç e dini ndërtesa ka përfunduar dhe këtë vit do të filloj ardhja e pajisjeve për IVF dhe risi tjetër është fillimi i aktivizimit të njësisë spinale është bërë edhe buxhetimi”, u shpreh ajo.

Pas shpalosjes së planeve për buxhetin 2023 në shëndetësi nga u.d. e udhëheqësve në këtë sektor, ishin deputetët kryesisht të opozitës që kritikuan qeverisjen me këtë sektori dhe ngritën si shqetësim ikjen e mjekëve, mungesën e investimeve, listën e gjatë të pritjes por edhe mungesën e barnave nga lista esenciale.

Ishte deputeti i AAK-së, Shemsedin Dreshaj i cili u shpreh se ajo që është shpalosur si plan për vitin 2023 është më shumë dëshirore, por mungon strategjia.

“Po kjo nuk është asgjë e çuditshme kur shembull jemi pa ministër të Shëndetësisë dhe kjo e definon hapur që MSh nuk ka qenë prioritet i kësaj qeverie. Përshëndes rritjen e buxhetit, por buxheti nuk është rritur në segmentet e identifikuara nga shoqëria civile që janë identifikuar si probleme. Shkaku kryesor që 69% e mjekëve e kanë lëshuar institucionet publike dhe kanë dal në private ose e kanë lëshua krejt Kosovën 69% ka qenë problem paga”, tha ai.

Deputetja e Lëvizjes Vetëvendosje, e cila kryeson Komisionin për Shëndetësi, Fatmir Kollçaku kërkoi më shumë inspektim në spitalet private, derisa tha se ato me pagat e larta që po ua ofrojnë profesionistëve shëndetësor po e shantazhojnë shtetin.

“Normal që me një shumë 3000-5000 euro ky është shantazh ndaj shtetit nëse t’i e ofron një pagë me kushte të Kosovës”, u shpreh ajo.

Kritika pati edhe anëtari i Komisionit për Shëndetësi nga radhët e LDK-së, Armend Zemaj i cili tha se dy komponentët kryesore si sistemi informativ shëndetësor SISH-i dhe Fondi për Sigurime Shëndetësore nuk janë përfshirë në buxhet.

“Kjo përqindje është e barabartë me vitin 2009, atëherë kur ka qenë 3.2 projektbuxheti për shëndetësisë në përqindje të GDP në vend. E thamë edhe te MSH, e potencuat se fare nuk potencohet sistemi informativ shëndetësor (SISH) as ju në fjalën tuaj, por as Fondi për Sigurime Shëndetësore dhe këto janë dy elemente kyçe edhe në avancim të shërbimeve por edhe në realizim të sistemit shëndetësor në vend edhe planifikimet, edhe investimet do të ishin të karakterizuara në koordinim të plotë edhe të SISH edhe të Fondit këtu nuk ka… Të gjitha projektet janë vazhdimësi e viti 2022 po të kishte qenë viti 2022 efikas sigurisht që kishte me pas më shumë projekte të reja”, tha ai.

Po ashtu edhe deputeti tjetër opozitar, Bekim Haxhiu nga radhët e PDK-së tha se me këtë rritje buxhetore për shëndetësinë më shumë po bëhet propagandë me shifra.

“296 milionë euro buxhet më i madhi ndonjëherë siç po thonë këta të pushtetit, por a keni shikuar buxhetin e vitit 2021 seriozisht a keni shikuar këtë buxhet sa ka qenë 296 milionë e 300 mijë euro, buxheti 272 milionë euro buxheti i viti 2020. Ky buxhet është rritur për 38 milionë krahasuar me vitin 2022. Propaganda bëni, e drejtë e juaja është, por mos ejani t’ua fyeni inteligjencën këtyre deputetëve të mazhorancës, mua kurrë, që e përcjelli këtë sektor me shifra dhe të dhëna”, tha ai. 

Related Topics:
Continue Reading

Lajmet

Prokuroria nis hetimet ndaj KEDS-it për njehsorët elektrikë: Dyshime për mashtrim me faturat

Published

12 seconds ago

on

April 3, 2026

By

Prokuroria Themelore në Prishtinë njofton se ka nisur zyrtarisht grumbullimin e informatave lidhur me dyshimet për parregullsi në njehsorët elektrikë të kompanisë KEDS.

Sipas organit të akuzës, ekziston një dyshim i bazuar se këto pajisje nuk po bëjnë matjen e saktë të energjisë elektrike të shpenzuar nga konsumatorët.

Në këtë drejtim, Prokuroria dyshon se është kryer vepra penale “Mashtrimi”, sipas nenit 323 të Kodit Penal të Republikës së Kosovës. Për të zbardhur rastin, Prokurori i Shtetit ka autorizuar Policinë e Kosovës që të ndërmarrë të gjitha veprimet e nevojshme hetimore me qëllim sigurimin dhe grumbullimin e provave shtesë.

“Prokurori i Shtetit ka autorizuar Policinë e Kosovës për ndërmarrjen e të gjitha veprimeve të nevojshme hetimore, me qëllim të sigurimit dhe grumbullimit të provave shtesë lidhur me këtë rast, përfshirë edhe veprimet ndaj zyrtarëve të KEDS-it”, thuhet në njoftimin zyrtar.

Hetimet vijnë pas shqetësimeve se njehsorët nuk pasqyrojnë realisht shpenzimet, duke dëmtuar kështu qytetarët. Prokuroria ka theksuar se mbetet e përkushtuar në ushtrimin e kompetencave ligjore për të garantuar zbatimin e ligjit.

“Lidhur me rastin e parregullsive të dyshuara në njehësorët elektrikë të KEDS-it, ekziston dyshimi se këta njehësorë nuk bëjnë matjen e saktë të energjisë elektrike të shpenzuar… Prokuroria Themelore në Prishtinë mbetet e përkushtuar në ushtrimin e kompetencave ligjore, duke garantuar zbatimin e ligjit dhe mbrojtjen e interesit publik”, përfundon njoftimi i Prokurorisë.

Continue Reading

Lajmet

DITARI: Çfarë lajmesh kemi lexuar në çdo 3 prill, në vitet nëntëdhjetë

Published

24 minutes ago

on

April 3, 2026

By

3 prill 1993

Lajm i plotë: Tre gazetarët ferizajas sërish në polici

Dje, në qendrën e sigurimit serb në Prishtinë, u morën përsëri tre gazetarët ferizajas, Rrahim Sadiku, Haki Braha dhe Avni Shabani. Ata u mbajtën në polici tri orë dhe u morën në pyetje për përmbajtjen e revistës “Zgjimi”, e cila u konfiskua para disa ditësh.

Këtyre gazetarëve iu tha që përsëri të paraqiten të hënën, në qendrën e policisë në Ferizaj.

 

Lajme të tjera:

“Bujku” edhe sot nuk u botua

Vazhdon aksioni “Ta mbrojmë ambientin”

U promovua romani “Udhëtimi arbdhetar” i Zejnullah Rrahmanit

Në Ferizaj tubime përkujtimore për të vrarët

Manifestim kushtuar 90-vjetorit të vdekjes së De Radës

Tubim proteste i studentëve ferizajas kundër burgosjes së rektorit dr.Ejup Statovci

Ahmet Gajtani u ftua në polici

Në Prishtinë bombat u gjetën në kontejnerë të mbeturinave

Në Prishtinë u plaçkitën 60 tonë miell

Policia maqedonase gjobit vozitësit shqiptarë

Kosova e përfaqësuar në kampionatin evropian në “full-kontakt”

Në Podujevë arritën pesëdhjetë policë financiarë nga Serbia

Në komunë të Pejës – keqtrajtime të përditshme

NATO bën kontrollin mbi qiellin e Bosnjës

Mas-mediumet serbe i japin publicitet “Traktit” të shpërndarë në Kosovë

 

 

3 prill 1995

Lajm i plotë: Dhuna e përditshme në Kosovë

Kamenicë: – Më 25 mars, policia serbe mori në rrugë të fshatit Rogaçicë, Samet Baxhakun të cilin e dërgoi në stacionin e policisë në Gjilan, nën prtetekst të dorëzimit të armës. Njoftohet se nga inspektorët Ramadan Sermaxhaj dhe njëfarë Sërgjani ai u keqtrajtua fizikisht për disa orë.

Më 20 mars, policia nën preteskt të kërkimit të armëve mori Hevzi Hotin nga Muçivërci, i cili dorëzoi një revole, ndërsa pas kësaj atij policia po i kërkon edhe një automatik.

Më 27 mars, policia mori Vehbi Klaiqin, sekretar i SHHB “Nënë Tereza” në Kamenicë, i cili u dërgua në stacionin e policisë në Gjilan dhe u pyet për kinse vizitën e një delegacioni të jashtëm humanitar.

Më 30 mars policët ndalën në rrugë veprimtarët Isa Kallubën, Skënder Canën dhe mjekun Naser Fetahu, të cilët i dërguan në stacionin e policisë në Kamenicë. Në polici ata u mbajtën rreth dy orë dhe u pyetën për angazhimin e tyre në ambulancën e SHBH “Nëna Terezë” në Kamenicë. Policët u interesuan edhe për mënyrën e sigurimit të barnave për këtë ambulancë dhe për çështje të tjera të aktivitetit politik shqiptar në Kamenicë.

Më 30 mars policia serbe, me pretekst të kërkimit të armëve, mori në shtëpitë e tyre Mehdi M.Morinën dhe Hamëz A.Morinën nga fshati Topanicë. Ata u dërguan në stacionin e policisë ku policët i urdhëruan që të dorëzojnë nga një revole.

Vushtrri: – Më 1 prill, në stacionin e policisë në Vushtrri u malretua rëndë fizikisht Ragip Krasniqi nga Vushtrria. Për shkak të lëndimeve që pësoi nga rrahja ai u detyrua të kërkojë ndihmë mjekësore.

Gjilan:- Më 3 mars, rreth orës 12:30 minuta, policia serbe ndërpreu një turnir futbolli në Gjilan. Turniri ishte organizuar në kuadër të aksionit “Vullneti 95” nga FR i LDK-së, Dega në Gjilan. Policët morën me vete delegatin e ndeshjes Shemsedin Mustafën dhe një refer.

 

Lajme të tjera:

Tubim i madh i shqiptarëve në Bruksel

U nënshkruan dy marrëveshje mes Shqipërisë dhe Suedisë

Beogradi po përgatit “institucionalizimin” e dominimit serb mbi shqiptarët në Kosovë

Intensifikohen planet dhe aksionet e spastrimit etnik të Kosovës

Një program serb për kolonizimin e Kosovës

Kanali TV turk HBB: Pse nuk njihet Kosova?

U ndihmuan 42 familje

Rudina Hatipi kampione e Suedisë në vallëzim

Kërkohet Shpejtim Thaçi

 

 

3 prill 1997

Lajm i plotë: U kthyen rreth 100 azilkërkuesit e parë nga Gjermania në Kosovë

Paralajmërimet e palës gjermane për kthimin e azilkërkuesve shqiptarë nga ky vend, mbrëmë filluan të zbatohen me kthimin e organizuar të tyre në Kosovë. Në orën 19. 15 minuta, në aeroportin e Prishtinës arriti fluturakja e parë nga Gjermania me afro 100 azilkërkues shqiptarë. Ky është kontigjenti i parë që kthehet nga Gjermania në mënyrë të organizuar, njofton gazeta “Bujku”.

Reporteri i kësaj gazete arriti të mësojë nga disa azilkërkues të kthyer se ky kontigjent është nga rethina e Shtutgarit. Në mesin e të kthyerve kishte edhe shumë fëmijë e gra, por kryesiht ishin të rinj. Një azikërkues nga rethi i Suharekës tha se gruaja dhe fëmijët kishin mbetur në Gjermani dhe nuk dinin asgjë për fatin e tij. Po ashtu, të kthyerit thanë ata ishin kapur nga policët gjermanë në rastësi dhe ishin mbajtur në aeroportin e Shtutgardit që nga mëngjesi i ditës së martë. Shumica prej tyre nuk kishin asgjë me vete.

Në aeroportin e Prishtinës nuk pati keqtrajtime të të kthyerve. Ata vazhduan rrugën për në shtëpit e tyre.

 

Lajme të tjera:

Ushtria e Shqipërisë krijon “forcën speciale” për bashkëveprim me forcën ndërkombëtare

Parlamenti shqiptar rishqyrtoi dhe miratoi projektligjin për një amnisti të gjerë

BE konfirmon dërgimin e ndihmave për Shqipërinë

Leka I kthehet në Shqipëri

Merren në pyetje aktivistë të LDK-së në Baran

 

 

3 prill 1997

Lajmet kryesore:

Kryetari Rugova priti ambasadorin e Spanjës

Pala shqiptare e përjashtuar plotësisht nga kthimi i refugjatëve të Kosovës

Demaçi priti diplomatë amerikanë

Në Pacaj të Gjakovës policia bastisi një familje dhe keqtrajtoi katër të rinj

Ndihmuan Shkollën Fillore të Vidishiqit me 550 DM

 

 

Edicioni i parë (Ora 11:30)

Lajmet kryesore:

Konferencë për gazetarë e kryetarit të Republikës së Kosovës dr. Ibrahim Rugova

Një anëtar i Kryesisë së Degës së LDK-së në Shtime u keqtrajtua nga policia

Hungarezët e Vojvodinës nuk duan të shërbejnë në forcat serbe në Kosovë

Serbia shprehet me referendum për (mos)pjesëmarrjen e përfaqësuesve të huaj në zgjidhjen e problemeve në Kosovë

Kaçanik: Policia konfiskon armët me leje

Istog: Tri familje u bastisën për armë

Lipjan: Të mos bihet nën ndikimin e dezinformatave

Nga Lipjani u larguan 20 refugjatë serbë

 

 

Edicioni i dytë (Ora 15:30)

Lajm i plotë: Ia vizatuan me thikë kryqin në këmbë

Dje rreth orës 11, dy policë serbë arrestuan në rrugë Driton Hazir Brahimin (18), nga Korrotica e Ulët, nxënës i vitit IV të shkollës së mesme teknike në Gllogoc.

KI i Degës së LDK-së në Gllogoc njofton se policët e ndaluan Dritonin, që po shkonte në shkollë, dhe e dërguan në postbllokun e Komoranit ku e keqtrajtuan rëndë fizikisht. Policët gjithashtu, duke e gërvishur me thikë, ia “vizatuan” atij kryqin mbi gjurin e këmbës së majtë.

Më pas Dritoni u lirua.

 

Lajme të tjera:

Idriz Rrecaj: Nevojitet ndërhyrje ndërkombëtare me qëllim të largimit të njësive speciale serbe nga Skenderaj

U arrestua Kryetari i Degës së LDK-së në Gllogoc

Medlin Ollbrajt: “Territori i Kosovës mbahet i okupuar nga një forcë armiqësore”

Shqipëria përshëndet Rezolutën e Këshillit të Sigurimit të OKB-së për vendosjen e embargos së armëve ndaj Beogradit

Bërns: “Autoritetet serbe menjëherë duhet të fillojnë bisedimet me shqiptarët e Kosovës”

Kofi Anan i shkruan presidentit Meidani lidhur me Kosovë

Shtypi amerikan për zhvillimet e fundit në Kosovë

U lirua objekti i gjimnazit në Podujevë

Për një koordinim sa më të mirë në grumbullimin dhe shpërndarjen deri në destinacion të ndihmave për Drednicën

Një kontigjent me ndihma u nis nga Gjakova për Drenicë

Vazhdojnë të arrijnë ndihmat për Drenicën

Në Australi vazhdon muaji i solidaritetit për Kosovën

Shqiptarët në Mal të Zi pa të drejta në shumë fusha

Edhe një gazetë e re shqipe në Maqedoni

Doli nga shtypi revista “Theatri”

 

Edicioni i tretë (Ora 16:00)

Lajm i plotë: Nuk është hequr asnjë postbllok i policisë

Duke filluar nga shkurti i këtij viti, policia serbe ka vendosur në komuna të shumta të Kosovës postblloqe të reja policore, krahas postblloqeve të vendosura që nga pushtimi i Kosovës. Në këto postblloqe, të gjithë kalimtarët ndalohen, kontrollohen rreptësisht dhe shpesh keqtrajtohen fizikisht.

Sipas shënimeve të grumbulluara nga degët e LDK-së në Kosovë, postblloqe policore janë vendosur në këto komuna:

Skënderaj – Në Klinë të Epërme, në Runik, në Tërnoc dhe në Skënderaj. Në komunën e Skënderajt koncentrime të përhershme të forcave të reja serbe ka mbi kodrën mbi fshatin Llaushë, në Tërnoc, në Skënderaj, në Fabrikën e Municionit të Gjuetisë, në Kopiliq të Ulët, në Brojë e tjerë;

Mitrovicë – postblloqe janë vendosur në të gjitha hyrje-daljet e qytetit dhe në Shipol në rrugën Mitrovicë-Skënderaj. Koncentrime të forcave serbe ka edhe në ndërtesën e Shoqatës së Zjarrfikësve, në garnizonin e ushtrisë serbe, në hotelin “Tre” në Zveçan dhe në fshatin Frashër;

Vushtrri – postblloku është i vendosur në fshatin Nedakoc në magjistralen Prishtinë-Mitrovicë;

Prizren – postblloku policor në fillim të shkurtit u vendos në Lubizhdë afër Prizrenit, ndërsa postblloqet të herëpashershme policore vendosen në Landovicë, Dushanovë, në Gjonaj e tjerë;

Junik – vendoset herë pas herësh një postbllok policor në vendin e quajtur “Kulla e Malokut” në afërsi të vendbanimit të refugjatëve, ndërsa koncentrime të forcave policore ka pasur në tërë teritorin e Junikut dhe në fshatrat që shtrihen në zonën kufitare;

Çabër – postblloku policor është i vendosur tash sa vite në Gazivodë, ndërsa koncentrime të herëpashershme të forcave policore ka në poligonin rezervë ushtarak po në Gazivodë.

Klinë – pos dy postblloqeve në lagjen “Përlika” të Klinës dhe në rrugën Klinë-Skënderaj, postblloqe policore janë vendosur pas shkurtit edhe në rrugën Pogragjë-Jashanicë, në magjistralën Pejë-Prishtinë – në Dollc, si dhe në Kijevë. Koncentrime të forcave ka në Pogragjë, në objektin e Kombinatit Bujqsor “Malishgani” – rreth 1000 sish;

Suharekë – postbllok është vendosur te stacioni i policisë;

Gllogoc – postblloqe ka në Komoran e Morinë, ndërsa koncentrime të forcave policore ka në Komoran dhe në Gllogoc;

Kamenicë – postbllok ka në vendin e quajtur “Crepane”, në trekëndëshin rrugor Kamenicë-Bujanoc-Gjilan, ndërsa postblloqe të reja janë vendosur pas shkurtit, në vendin e quajtur “Dheu i bardhë”, në Katushnicë, midis fshatrave Hodonoc, Rogaçicë dhe Novosellë, dhe në Koretin, te Fabrika e Pllakave, midis Berivojcës dhe Koretinit. Koncentrime të forcave serbe ka në fshatrat e banuara me serbë në Ranillugë, Rapotovë, Bozhec, Rajnoc etj. Fshati Bozhevc ruhet me pizgauerë e autoblinda. Ndërkohë janë hequr postblloqet te “Dheu i bardhë” dhe në Koretin;

Kaçanik – postblloku policor është i vendosur në rrugën Ferizaj-Kaçanik në fshatin Gërlicë;

Zhur – pos postblloqeve në Vlashnjë, Zhur e Vërnicë, pas shkurtit të sivjemë është vendosur edhe një postbllok në rrugën për Biluzhë, Vlashnjë, Zhur, Shkozë e Vërmicë, ndërsa ka koncentrime të forcave serbe si dhe lëvizje të forcave ushtarake në brezin kufitar me Shqipërinë;

Fushë-Kosovë – ndonëse nuk është vendosur ndonjë postbllok policor, vërehet prani e shpeshtë e policisë në Sllatinë në rrugën për në aeroport;

Podujevë – postblloku policor është vendosur para disa vitesh në magjistralen Prishtinë-Nish në hyrje të Podujevës;

Leposaviq – postbllok ka në lokalitetin e quajtur “Ballaban”. Ky postbblok qe vendosur në tetor të vitit të kaluar, u hoq në dhjetor dhe u vendos sërish në shkurt të këtij viti. Forca ushtarako-policore janë të stacionuara në fabrikën e këmishave në Banjskë. Vazhdon kontrolli i rreptë policorë ndërsa banorëve të fshatit Koshtovë u është tërheuqr vërjejtja që të mos kalojnë kodrave përballë vendit ku janë vendosur forcat serbe;

Dragash – që nga viti 1989 postblloku policor është vendosur në fshatin Zym. Vërehet koncentrim i një numri më të madh ushtarësh në karakollin në fshatin Bresanë;

Istog – postblloku policor është vendosur në Gurrakoc në rrugën Pejë-Mitrovicë-Klinë;

Njëkohësisht burime të degëve të LDK-së në komunat e Kosovës njoftojnë se, përkundër kërkesave të Grupit të Kontaktit për tërheqjen e forcave të policisë speciale nga Kosova, ditëve të fundit është shtuar numri i postblloqeve si dhe numri i këtyre forcave, ndërsa ato nuk janë tërhequr nga asnjë postbllok.

 

Lajme të tjera:

Gjendje e rëndë në komunën e Deçanit

Klinë: Një qytetar u keqtrajtua brutalisht

U themelua Këshilli Organizativ i Protestave në nivel republikan

Policia serbe keqtrajton shqiptarët me pretekst të pjesëmarrjes në protesta

Foto: Ballina e gazetës “Bujku”

Continue Reading

Lajmet

Miratohet projektligji për Lojërat Mesdhetare “Prishtina 2030”, hapet rruga për organizimin e ngjarjes madhore

Published

25 minutes ago

on

April 3, 2026

By

Qeveria e Kosova ka miratuar projektligjin për organizimin e Lojërat Mesdhetare Prishtina 2030, duke shënuar një hap të rëndësishëm drejt zhvillimit sportiv dhe afirmimit ndërkombëtar të vendit.

Institucionet e kanë cilësuar këtë nismë si projekt me interes të lartë publik dhe kombëtar, që pritet të ndikojë drejtpërdrejt në zhvillimin ekonomik, përmirësimin e infrastrukturës sportive dhe rritjen e imazhit të shtetit në arenën ndërkombëtare.

Kryeministri Albin Kurti theksoi rëndësinë strategjike të projektligjit, duke nënvizuar standardet që synohen me organizimin e kësaj ngjarjeje:
“Ky projektligj, i bazuar në marrëveshjen për organizimin e Lojërave Mesdhetare ‘Prishtina 2030’, është projekt me interes të lartë publik dhe kombëtar. Ai garanton që organizimi i kësaj ngjarjeje madhore të bëhet me përgjegjësi të plotë institucionale, me standarde të larta transparence, integriteti dhe menaxhimi efikas të fondeve publike. Ky është një investim në rininë tonë, në sportin tonë dhe në imazhin ndërkombëtar të shtetit”.

Nga ana tjetër, ministri i Rinisë dhe Sportit, Blerim Gashani, dha detaje mbi aspektin financiar dhe organizativ të projektit:
“Përmes këtij ligji, qeveria do të miratojë shfrytëzimin e fondeve publike në shumën prej të paktën 253 milionë euro. Burimi kryesor i financimit do të jetë buxheti i shtetit, ndërsa projektligji rregullon edhe kompetencat e institucioneve përkatëse, përfshirë Komitetin Olimpik të Kosovës dhe komunat që do të përfshihen në organizim”.

Projektligji përcakton qartë rolet dhe përgjegjësitë e institucioneve shtetërore, duke krijuar një kornizë të plotë ligjore për organizimin e kësaj ngjarjeje të madhe sportive.

Pas votimit në Kuvend, pritet të nisin përgatitjet konkrete për Lojërat Mesdhetare Prishtina 2030, me synimin që Kosova të radhitet ndër organizatorët e rëndësishëm të eventeve sportive ndërkombëtare.

Continue Reading

Lajmet

Qeveria miraton Projektligjin për Çmimet Tavan

Published

1 hour ago

on

April 3, 2026

By

Lajm në zhvillim:

Qeveria e Kosovës në mbledhjen e mbajtur sot me 3 prill ka miratuar edhe Projektligjin për masat e përkohshme të produkteve bazë në raste të veçanta të destabilizimit në treg, një nismë kjo që synon të vendosë kontroll mbi rritjen e pakontrolluar të çmimeve.

Ministrja e Industrisë, Ndërmarrësisë dhe Tregtisë, Mimoza Kusari-Lila, bëri të ditur se ky ligj vjen si mbrojtje direkte për qytetarët, duke u fokusuar veçanërisht te produktet esenciale.

Gjatë prezantimit, ministrja theksoi se pas vërejtjeve të mëparshme, projektligji marrë parasysh rekomandimet e Gjykatës Kushtetuese.

Sipas saj, ligji i ri do të operojë përmes dy masave kryesore: caktimin e marzhës tregtare (fitimit të lejuar) për shitësit me shumicë e pakicë dhe përcaktimin e çmimit maksimal për produktet bazë.

“Ky projektligj ka për qëllim të përcaktojë kornizën ligjore për vendosjen e masave të përkohshme dhe proporcionale për produktet themelore,” deklaroi Kusari-Lila, duke shtuar se synimi kryesor mbetet mbrojtja e interesit publik në kohë krizash.

Në kuadër të këtij ligji është edhe krijimi i një mekanizmi të ri mbikëqyrës që garanton paanësi në vendimmarrje.

Bord i Pavarur Institucional do të jetë përgjegjës për menaxhimin e situatave kur tregu pëson luhatje të theksuara dhe ky bord do të emërohet direkt nga Kuvendi i Kosovës dhe do t’i raportojë atij për çdo masë të ndërmarrë, sipas ministres.

Ministrja përfundoi duke thënë se ky ligj do të parandalojë spekulimet në treg që bëhen në kurriz të konsumatorëve. Tashmë, projektligji pritet të kalojë në Kuvend për shqyrtim dhe miratim final, duke i dhënë shtetit mjetet e nevojshme ligjore për të ndërhyrë sa herë që stabiliteti i çmimeve rrezikohet.

 

Qeveria miraton Projektligjin për Sigurime Shëndetësor; Vitia: Synojmë qasje universale dhe cilësi në shërbime

Ekzekutivi i Kosovës i ka dhënë “dritën e gjelbër” Projektligjit për Sigurimet Shëndetësore gjatë mbledhjes së mbajtur këtë mëngjes.

Pas prezantimit nga ministri i Shëndetësisë, Arben Vitia, ky projektligj është miratuar për procedim të tutje, duke shënuar një hap drejt njërës prej reformave më të diskutuara në sektorin e shëndetësisë publike.

Gjatë fjalimit të tij, ministri Vitia vuri theksin te rëndësia e kësaj nisme pas një periudhe të gjatë sfidash. Ai bëri të ditur se për hartimin e tij janë analizuar mangësitë e sistemit aktual dhe janë studiuar praktikat ndërkombëtare për të krijuar një ligj që i përgjigjet realitetit ekonomik dhe social në vend.

“Është me rëndësi të veçantë të theksoj që ky projektligj vjen pas një periudhe të gjatë sfidash dhe diskutimesh,” u shpreh ministri Vitia, duke shtuar se synimi është krijimi i një ligji të zbatueshëm që u përgjigjet nevojave të qytetarëve.

Sipas ministrit, ky projektligj rregullon disa çështje kyçe që prekin drejtpërdrejt popullatën:

  • Gjithëpërfshirja: Ligji synon qasje universale për të gjithë qytetarët dhe ngritjen e cilësisë së shërbimeve.
  • Financimi: Rregullohen kontributet për sigurime si burim shtesë financimi, krahas buxhetit aktual.
  • Paketa e përfitimeve: Parashihet një paketë adekuate shërbimesh që do të përditësohet çdo vit.

Ministri Vitia sqaroi se ligji siguron kushte të barabarta për të gjithë dhe rregullon mbarëvajtjen e sistemit.

“Ky ligj e përfshin gjithë popullatën duke synuar qasje universale dhe ngritjen e cilësisë në shërbimet shëndetësore,” deklaroi ai, duke nënvizuar se përmes këtij rregullimi do të ketë një performancë më të lartë në të gjithë sistemin shëndetësor në Kosovë.

Miratimi i këtij projektligji në Qeveri konsiderohet si një kthesë drejt funksionalizimit të sigurimeve shëndetësore, proces ky që ka qenë pezull prej vitesh.

Continue Reading

Të kërkuara