Lajmet

Nagavci për mësimin e së shtunës: Nuk besoj se do të ketë ndalesa në paga

Por që, sipas saj, sot gjatë ditës priten të mblidhen të dhënat për mbajtjen e mësimit ditën e shtunë.

Published

3 years ago

October 17, 2022

UBT news

Ministrja e Arsimit, Arbërie Nagavci ka deklaruar se pjesa më e madhe e mësimdhënësve kanë qenë në vendet e tyre të punës të shtunën, për të kompensuar orët e humbura si pasojë e grevës, ani pse mësimi nuk është mbajtur në të gjitha shkollat e Kosovës.

Ajo ka thënë se nuk beson që do të ketë ndalesa në pagat e mësimdhënësve, por që sot gjatë ditës priten të mblidhen të dhënat për mbajtjen e mësimit ditën e shtunë.

Ajo para mediave ka shtuar se realizimi i mësimit në disa shkolla nuk ka shkuar sipas planifikimit, për shkak të mungesës së informacionit.

Pas certifikimit të drejtorëve të shkollave dhe koordinatorëve për sigurimin e cilësisë, Nagavci është deklaruar ka përsëritur domosdoshmërinë për zëvendësimin e orëve.

“Mendoj se kjo ditë e shtune, për arsyeje të ndryshme nuk është arritur të realizohet 100 për qind sipas planifikimit. Besoj se kjo ka ndodhur edhe për shkak të mungesës së informimit të mjaftueshëm nga ana e jonë dhe shkollave. Por edhe për shkak të hutimit nga deklaratat e ndryshme apo tensioneve që kanë pasur prindërit. Vend për rishikim nuk ka më, sepse jemi munduar ta përcjellim porosinë dhe e shfrytëzoj edhe këtë mundësi që të bëjë apel edhe te prindërit edhe te mësimdhënësit që të organizohemi për të kompensuar të gjitha humbjet e shkaktuara te nxënësit. Sikur të lihet deri në fund të vitit të shkollor, do të fillojë gjysmë vjetori i dytë deri në gjysmën apo në fund të korrikut, që është e vërtetuar se as për së afërmi efikasiteti sikurse nëse organizohet tani”, ka thënë Nagavci.

Nagavci ka shtuar se realizimi i zëvendësimit të orëve ka ndryshuar nga shkolla në shkollë edhe brenda komunës.

“Situata ka dalluar nga komuna në komunë, prej shkollës në shkollë. Aty ku informatat kanë qenë të mjaftueshme nga ana e shkollës është realizuar mësimi. Madje edhe brenda të njëjtës komunë, për shembull në Prishtinë ka dalluar situata prej shkollës në shkollë. Përfaqësuesit e Këshillit të Prindërve me deklaratat e tyre shpesh të pamatura dhe të paqëndrueshme konsideroj që kanë krijuar huti. Dhe shfrytëzoj këtë mundësi që t’i lus edhe përfaqësuesit e Këshillit të Prindërve, ata që po thirren në emër të Këshillit të Prindërve, që të kenë në vëmendje interesin më të mirë të fëmijëve. Janë tre muaj të humbur dhe nuk qëndron fakti se fëmijët janë të lodhur e të ngarkuar, përkundrazi atyre iu nevojitet që tashmë gjithë ne, edhe ministria edhe prindërit dhe mësimdhënësit të jemi bashkë me fëmijët që të japim maksimumin për t’iu kompensuar humbjet e shkaktuara”, ka shtuar Nagavci.

Më tej, ajo ka përsëritur se takimet me SBASHK-un për zgjidhjen e kërkesave të tyre kanë qenë të vazhdueshme dhe se qëllim duhet të jetë koordinimi dhe jo takimet pa rezultat.

“Hartimi i kalendarit të vitit shkollor është përgjegjësi dhe kompetencë e Ministrisë së Arsimit. Vendimet e tilla ekzekutive sidomos në rastet kur kemi të bëjmë me fëmijët, duhet të sigurohemi që të përmbushim të gjithë bashkërisht. Unë nuk kam asnjë brengë dhe shqetësim për t’u takuar me këdo qoftë”, ka deklaruar Nagavci.

Ajo ka pohuar se në pagat avancë që janë ekzekutuar për mësimdhënësit ka pasur raste të cilat kanë qenë në minus.

Ministrja e Arsimit ka treguar edhe nëse do të ketë ndalesa për mësimdhënësit që nuk kanë mbajtur mësim të shtunën.

“Kanë qenë ndalesa për muajin gusht, por janë adresuar edhe të gjitha të dhënat. Besoj që kjo çështje tashmë është përmirësuar… Në bazë të informatave që kemi pasur nga inspektorët e arsimit gjatë ditës së shtunë, pjesa më e madhe e mësimdhënësve dhe shkollave kanë qenë në vendet e tyre të punës. Sot gjatë ditës do të mbledhim të gjitha të dhënat dhe unë besoj që nuk do të ketë nevojë që të ketë ndalesa, sepse pjesa më e madhe kanë qenë në vendet e tyre të punës”, ka përfunduar ministrja Nagavci.

Ndryshe, për shkak të grevës në arsim, Ministria e Arsimit ka vendosur për kompensimin e orëve të humbura për vitin shkollor 2022/23. Këshilli i Prindërve është deklaruar kundër kompensimit të orëve të humbura mësimore, pasi kjo do ta dëmtojë procesin mësimor.

Pas një muaj grevë, më 3 tetor ka nisur viti i ri shkollor në Kosovë. SBASHK-u mori vendim që ta pezullojë grevën deri në janar2023.

Përveç punëtorëve të arsimit, që nga 25 gushti në grevë ishin edhe punëtorët e administratës publike, si dhe shërbyesit civilë në institucione lokale dhe qendrore.

Këshilli grevist kërkon 100 euro shtesë për mësimdhënësit deri në hyrjen në fuqi të ligjit të pagave, por kjo është refuzuar nga Qeveria e Kosovës.

Rajoni

Mesazhi i Ramës për Beogradin: Nëse preket Kosova, preket Shqipëria

Published

22 minutes ago

March 12, 2026

UBTNews

Kryeministri i Shqipërisë, Edi Rama, i ka dërguar mesazhe të qarta presidentit të Serbisë, Aleksandër Vuçiq, duke i cilësuar si të pabaza pretendimet e tij për një aleancë ushtarake Shqipëri–Kosovë–Kroaci. Rama i karakterizoi deklaratat e Vuçiqit si një frikë që buron nga paaftësia e Serbisë për të pranuar realitetin.

Në një intervistë për “Turkiye Today”, Rama u shpreh se Kosova mbetet “makthi” i Vuçiqit. Ai hodhi poshtë edhe pretendimet e presidentit serb se Turqia ka ambicie “neo-osmane” në rajon, duke marrë si shembull vonesat në projektet e restaurimit nga agjencia turke TIKA në Shqipëri. Sipas Ramës, nëse Turqia do të kishte ambicie të tilla, projektet do të përfundonin shumë më shpejt.

“Çfarë neo-osmanizmi? Jam i sigurt që presidenti i Serbisë mund ta shohë se Turqia ka investuar më shumë në Serbi sesa në Shqipëri dhe Kosovë së bashku”, deklaroi Rama. Kjo ishte një përgjigje ndaj akuzave të Vuçiqit të tetorit të kaluar, i cili pretendonte se Turqia po “ëndërron Perandorinë Osmane” pas shitjes së dronëve Skydagger Kosovës, duke e portretizuar këtë si kërcënim për integritetin territorial të Serbisë.

Rama ironizoi qasjen e Vuçiqit, duke vlerësuar njohuritë e tij, por duke theksuar se emocionet ndaj Kosovës po ia humbin arsyen. “Presidenti Vuçiq është dikush me njohuri të mëdha dhe intuitë të shkëlqyer, por ai ka makthin e tij: Kosovën. Kaq është. Pikë. Kur makthi i pushton emocionet, ai arrin të thotë gjëra që sinqerisht nuk kanë kuptim”, deklaroi kryeministri shqiptar.

Megjithatë, Rama nënvizoi se pavarësisht mosmarrëveshjeve për Kosovën, Vuçiqi mbetet një lider me të cilin mund të bisedohet dhe të ndërtohet bashkëpunim mbi objektiva të përbashkëta rajonale.

Në fund, kryeministri rikonfirmoi mbështetjen e palëkundur të Tiranës zyrtare: “Kosova është e pavarur; është republikë dhe ky proces është i pakthyeshëm. Nëse Kosova preket, preket edhe Shqipëria. Nëse Kosova gjendet nën një kërcënim ekzistencial, edhe Shqipëria është nën një kërcënim ekzistencial”, raporton Ekonomia online.

/Ekonomia online/

Rajoni

Arrestohet në Prishtinë një shtetas kosovar i kërkuar nga INTERPOL-i

Published

53 minutes ago

March 12, 2026

UBTNews

Policia e Kosovës ka njoftuar se mbrëmjen e datës 11 mars 2026, rreth orës 23:00, ka arrestuar shtetasin kosovar me inicialet M. Sh., i cili kërkohej me urdhërarrest ndërkombëtar.

Operacioni u realizua nga Drejtoria për Bashkëpunim Ndërkombëtar Policor në bashkëpunim me njësite të tjera relevante.

Sipas autoriteteve, personi në fjalë ishte shpallur në kërkim nga INTERPOL-i me kërkesë të autoriteteve të Maqedonisë, nën dyshimet për kryerjen e veprave penale “bashkim kriminal”, “evazion fiskal” dhe “mashtrim”.

Me vendim të prokurorit kujdestar, i arrestuari është dërguar në mbajtje për 48 orë, për të vazhduar me procedurat e mëtejshme ligjore.

Rajoni

REL: Çfarë parashihet në strategjinë e miratuar për zgjerim të BE-së?

Published

3 hours ago

March 12, 2026

UBTNews

Deputetët e Parlamentit Evropian e kanë miratuar një strategji për zgjerim të Bashkimit Evropian, në të cilën thuhet se zgjerimi është përgjigje strategjike ndaj realiteteve gjeopolitike që po ndryshojnë dhe investim në sigurinë dhe stabilitetin e bllokut evropian.

Sipas dokumentit të miratuar më 11 mars, kostoja e moszgjerimit do ta tejkalonte koston e anëtarësimit të vendeve të reja në BE, dhe do të rrezikonte krijimin e zonave gri gjeopolitike të ndjeshme ndaj ndikimit të huaj antagonist.

Për strategjinë votuan 385 deputetë, 147 ishin kundër dhe 98 abstenuan.

Autori i dokumentit, eurodeputeti Petras Austrevicius, tha se marrë parasysh sfidat e sotme, modeli i integrimit të BE-së duhet të përmirësohet në mënyrë që të pasqyrojë më mirë interesat e BE-së dhe pritjet nga vendet kandidate.

“Zgjerimi i BE-së duhet të shkojë krah për krah me reformat e brendshme për të mbrojtur funksionimin e BE-së dhe për t’i përmirësuar proceset e vendimmarrjes, duke përfshirë shfrytëzimin më të madh të votimit me shumicë të kualifikuar. BE-ja duhet t’i përfundojë këto reforma deri në kohën kur vendet kandidate t’i plotësojnë kriteret e anëtarësimit dhe janë gati të bashkohen me BE-në”, tha eurodeputeti Austrevicius.

Sipas dokumentit të miratuar, Shqipëria dhe Mali i Zi kanë vendosur tashmë objektiva ambicioze për përfundimin e negociatave të anëtarësimit deri më 2026-2027.

Kosova ka aplikuar për anëtarësim në Bashkimin Evropian në vitin 2022, mirëpo aplikimi i saj nuk është shqyrtuar ende.

Kështu, ajo është e vetmja në Ballkanin Perëndimor që nuk e gëzon statusin e vendit kandidat.

Kur përmendet Kosova në raport, aty theksohet rëndësia e dialogut të saj me Serbinë për avancim në rrugën drejt anëtarësimit.

Mes tjerash në raport bëhet thirrje që të nisin negociatat e anëtarësimit me Ukrainën dhe Moldavinë sa më shpejt që të jetë e mundur dhe që asnjë vend të mos trajtohet si pjesë e një pakete.

“Sundimi i ligjit, reformat demokratike, liria e medias, të drejtat e pakicave, pavarësia e gjyqësorit dhe lufta kundër korrupsionit duhet të mbeten në krye të prioriteteve të procesit të zgjerimit, me mbështetje të qëndrueshme për shoqërinë civile”, thuhet në dokument.

Ai, gjithashtu, nënvizon domosdoshmërinë e përafrimit me politikën e përbashkët të jashtme dhe të sigurisë të BE-së, e cila vlerësohet si “një tregues kyç i orientimit gjeostrategjik të vendit kandidat”.

Në këtë drejtim, Serbia është kritikuar shpesh për mospërputhje të politikës së jashtme me atë të bllokut, meqë është vendi i vetëm në Ballkan që nuk e ka sanksionuar Rusinë për nisjen e luftës në Ukrainë.

Para votimit të këtij raporti, në Parlamentin Evropian është zhvilluar një debat, në të cilin mori pjesë edhe Komisionerja për Zgjerim e BE-së, Marta Kos, e cila tha se BE-ja nuk do të lejojë anëtarësimin e vendeve që mund t’i minojnë fshehurazi vlerat ose institucionet e BE-së.

“Nuk ka kuaj të Trojës. Vendet që do të na minonin nga brenda nuk mund të bëhen anëtarë të BE-së. Duhet të jemi absolutisht të sigurt për këtë. Vendet që i bashkohen BE-së duhet të jenë demokraci të forta dhe të afta t’i rezistojnë ndikimit toksik të Rusisë dhe të të tjerëve”, tha mes tjerash Kos.

Bashkimi Evropian është zgjeruar herën e fundit më 2013, me pranimin e Kroacisë. /REL/