Lajmet

​Mustafi: Me presidenten Osmani diskutuam për regjistrimin e popullsisë në Luginë

Ai ka përsëritur kërkesën për trajtim të barabartë të shqiptarëve të Luginës.

Publikuar

2 vjet më parë

më

Regjistrimi i popullsisë dhe përfshirja e Luginës së Preshevës në dialogun Kosovë-Serbi, kanë qenë temat që u trajtuan në takimin mes presidentes e udhëheqësit e tri komunave.

E para e shtetit, Vjosa Osmani gjatë së hënës priti në takim deputetin shqiptar në Parlamentin e Serbisë, Shaip Kamberi, kryetarin e Preshevës, Shqiprim Arifi, atë të Bujanocit, Nagip Arifin, kryetarin e Këshillit Kombëtar Shqiptar, Ragmi Mustafi dhe përfaqësues tjerë të luginës.

Kryetari i Këshillit Kombëtar Shqiptar, Ragmi Mustafi ka thënë se ky ishte takimi i parë që presidentja ka ftuar tri komunat, ku ishin prezent të gjithë udhëheqësit politikë të Luginës së Preshevës.

“Diskutuam bashkërisht për çështje aktuale në të cilën gjendet Lugina e Preshevës, me theks të veçantë sa i përket regjistrimit të popullsisë në Luginë. Ajo çfarë është e vërteta është se në Preshevë e Bujanoc, regjistrimi i popullsisë është duke shkuar sipas ritmeve dhe dinamikës së vet. Përderisa ka disa mangësi sa i përket regjistrimit të popullsisë në Medvegjë”, ka thënë Mustafi.

Ai ka përsëritur kërkesën për trajtim të barabartë të shqiptarëve të Luginës, ashtu siç ndodh me serbët e Kosovës.

“Kërkesa jonë e patjetërsueshme është që çështja e Luginës së Preshevës nuk ka asnjë arsyeje të jetë e padiskutueshme, të jetë e pazgjidhur në procesin e dialogut Kosovë-Serbi, sepse ajo është pjesë e kontekstit Kosovë-Serbi. Madje, nuk mund të ketë një zgjidhje që vendos paqen e qëndrueshme pa e trajtuar edhe çështjen e Luginës së Preshevës”, ka thënë ai.

Kryetari i Këshillit Kombëtar Shqiptar ka ftuar të gjithë shqiptarët e tri komunave të insistojnë për regjistrim, pasi që në këtë mënyrë do të dihet edhe numri i saktë i shqiptarëve në tri komunat. Ai theksoi se deri më tani kanë evidentuar mangësi në procesin e regjistrimit në Medvegjë, ku janë vetëm tre shqiptarë.

“Problemi ishte që ata ishin vendosur në vendbanime të serbëve dhe nuk ishin vendosur në vendbanimet shqiptare. Madje, tani kemi arritur që të sigurojmë që të kenë asistentë sa i përket regjistrimit të popullsisë, në mënyrë që shqiptarët e Medvegjës të deklarohen në gjuhën shqipe ndaj regjistruesve. Mirëpo, ka edhe probleme të karakterit softuerik, sepse është një problem i kompleksuar. Ajo që na bën besim plot për të vazhduar edhe më tej sa i përket regjistrimit të popullsisë, është se ky proces monitorohet nga Eurostat-i dhe është i financuar nga BE. Ne kemi adresuar të gjitha këto çështje edhe Ambasadës të Bashkimit Evropian edhe OSBE-së”, ka thënë Mustafi.

Mustafi tregon se edhe për numrin e deritanishëm të qytetarëve të regjistruar në Preshevë, Bujanoc e Medvegjë.

“Në Medvegjë janë regjistruar 5 mijë e 708 qytetarë, prej tyre sa janë shqiptarë është problem të dihet për shkak se numër i konsiderueshëm i vendbanimeve është i përzier. Përderisa në Preshevë janë regjistruar mbi 50 mijë qytetarë, numri i konsiderueshëm dhe kapital është shqiptarë. Dhe diku në komunë të Bujanovcit rreth 48 mijë qytetarë”, ka përfunduar ai.

Shqiptarët po marrin pjesë në proces të regjistrimit pas një dekade. 83 regjistrues janë në Bujanoc, 73 regjistrues në Preshevë dhe 24 regjistrues në Medvegjë.

Etiketa
Vazhdo të lexosh

Lajmet

Shfaqet një lloj i ri i virusit mpox në Kongo

Publikuar

2 orë më parë

më

26 Qershor, 2024

nga

Një lloj i ri i virusit mpox që përhapet me shpejtësi përgjatë kufirit lindor të Republikës Demokratike të Kongos është “tepër shqetësues”, thonë zyrtarët shëndetësorë që monitorojnë përhapjen e tij.

Virusi mund të shkaktojë plagë në të gjithë trupin dhe në shumë raste mund të jetë edhe vdekjeprurës.

Përhapja aktuale është nxitur nga transmetimi seksual, por ka prova që ky lloj mund të transmetohet edhe përmes kontaktit të ngushtë lëkurë me lëkurë.

Ekspertët globalë të shëndetit thonë se varianti i ri rrezikon përhapjen ndërkufitare dhe ndërkombëtare të virusit. Madje konsiderohet si “lloji më i rrezikshëm” i përhapur ndonjëherë./UBTNews/

Vazhdo të lexosh

Lajmet

Sulmi terrorist në Banjskë, tre të dyshuarve iu vazhdohet paraburgimi edhe nga dy muaj

Publikuar

2 orë më parë

më

26 Qershor, 2024

nga

Gjykata Themelore në Prishtinë ka marrë vendim, me të cilin aprovuar kërkesën e Prokurorisë Speciale të Republikës së Kosovës (PSRK), ashtu që ua ka vazhduar masën e paraburgimit edhe nga dy muaj (secilit veç e veç) tre të dyshuarve Vladimir Toliq, Blagoje Spasojeviq dhe Dushan Maksimoviq, për sulmim terrorist ndaj Policisë së Kosovës në Banjskë.

Lajmin për “Betimi për Drejtësi” e ka konfirmuar bashkëpunëtorja profesionale nga zyra e kryetares së kësaj gjykate, Medina Gashi.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve V.T, B.S dhe D.M, Gjykata themelore në Prishtinë – Departamenti Special me datë 21.06.2024 ka marrë Aktvendim dhe ka aprovuar kërkesën e Prokurorisë Speciale të Republikës së Kosovës, ashtu që masa e paraburgimit tre të pandehurve iu është vazhduar në kohëzgjatje prej 2 (dy) muaj”, thuhet në përgjigjen e gjykatës.

Toliq, Spasojeviq dhe Maksimoviq gjenden nën masën e paraburgimit nga data 26 shtator 2023.

Ata dyshohen për veprat penale “Veprat e rënda kundër rendit kushtetues dhe sigurisë së Republikës së Kosovës”, “Sulm kundër rendit kushtetues të Republikës së Kosovës”, “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” dhe “Mbajtja në pronësi, kontroll ose posedim të paautorizuar të armëve”.

Në Bajsnkë të Zveçanit, në orët e hershme të 24 shtatorit 2023, ishte vrarë rreshteri Afrim Bunjaku si dhe ishin plagosur dy të tjerë. Pastaj, të vrarë kishin mbetur edhe tre sulmues, kurse të tjerët ishin larguar pasi ishin strehuar për disa orë në Manastirin e Bajnskës.

Ministri  i Punëve të Brendshme, Xhelal Sveçla kishte publikuar pamje të Milan Radoiçiq, ku kishte theksuar se Radoiçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku. E vetë Radoiçiq e kishte marrë përsipër përgjegjësinë për sulmin terrorist.

Vazhdo të lexosh

Lajmet

Pas vendimit të Kushtetueses, veteranët paralajmërojnë protesta

Publikuar

2 orë më parë

më

26 Qershor, 2024

nga

Ushtruesi i detyrës së kryetarit të Organizatës së Veteranëve të Luftës së Ushtrisë Çlirimtarë të Kosovës (OVL-UÇK), Faton Klinaku ka reaguar pas vendimit të Gjykatës Kushtetuese për mospërfshirjen e veteranëve në ligjin për pagën minimale.

Përmes një postimi në llogarinë e tij në Facebook, Klinaku ka paralajmëruar protesta kundër pushtetit të Kurtit, i cili sipas tij po punon kundër veteranëve të UÇK-së.

“Qëndrimet tona se do t’i vazhdojmë protestat kundër këtij pushteti i cili vazhdimisht ka punuar kundër veteranëve të luftës së UÇK-së dhe shtresave tjera të shoqërisë, mbeten të pandryshueshme”, ka shkruar ai.

Kujtojmë se sot gjatë ditës, Gjykata Kushtetuese i dha të drejtë qeverisë për Ligjin për Pagën Minimale i cili nuk i përfshin pensionet e veteranëve të luftës së UÇK-së.

Sipas njoftimit, Kushtetuesja e ka vlerësuar kërkesën e kryetarit të grupit parlamentar të AAK-së, Besnik Tahirit dhe nëntë deputetëve të tjerë, ku konstatoi se neni 2 i Ligjt për Veteranët e Luftës së UÇK-së nuk është në kundërshtim më Ligjin për Ndryshimin dhe Plotësimin e Ligjeve që Përcaktojnë Shumën e Beneficionit në Lartëri të Pagës Minimale.

Vazhdo të lexosh

Lajmet

Stoltenberg me lëvdata për Rutten: Po e lë NATO-n në duar të sigurta

Publikuar

3 orë më parë

më

26 Qershor, 2024

nga

Shefi aktual i NATO-s, Jens Stoltenberg e ka lavdëruar pasardhësin e tij në krye të Aleancës, Mark Rutte.

“Marku është një transatlanticist i vërtetë, një lider i fortë dhe një ndërtues i konsensusit. I uroj atij çdo sukses ndërsa ne vazhdojmë ta forcojmë NATO-n. E di që po e lë NATO-n në duar të sigurta”, tha ai.

Mark Rutte, kryeministri holandez në largim, është zgjedhur zyrtarisht si sekretari i ardhshëm i përgjithshëm i NATO-s.

Aleanca ushtarake tha në një deklaratë se “Këshilli i Atlantikut të Veriut vendosi ta emërojë kryeministrin holandez Mark Rutte si Sekretarin e Përgjithshëm të ardhshëm të NATO-s, duke pasuar Jens Stoltenberg”.

“Rutte do të marrë funksionet e tij si Sekretar i Përgjithshëm nga 1 tetori 2024, kur mandati i Stoltenberg përfundon pas dhjetë vjetësh në krye të Aleancës”, u tha në njoftim.

Vazhdo të lexosh

Të kërkuara