

Aktualitet
Mosmiratimi i buxhetit pamundëson organizmin e zgjedhjeve dhe zbatimin e Ligjit për Rimëkëmbje
Published
5 years agoon
By
Betim GashiAktgjykimi i Gjykatës Kushtetuese për rrëzimin e Qeverisë Hoti me çka edhe zyrtarisht vendin e çon drejt zgjedhjeve të reja të parakohshme, ka gjetur vendin në këtë fundvit pa miratimin e projektbuxhetit për vitin 2021.
Njohës të zhvillimeve ekonomike dhe biznesmenë vlerësojnë se nuk duhet të shkohet në zgjedhje pa e miratuar buxhetin e vitit 2021, pasi që në rast të prolongimit të procesit zgjedhor, do të ketë kolaps financiar në vend.
Eksperti i ekonomisë, Safet Gërxhaliu, ka thënë për KosovaPress se pa e miratuar buxhetin 2021 nuk mund të ketë zgjedhje dhe financim të zgjedhjeve dhe nuk mund të zvogëlohen pasojat e pandemisë COVID-19.
Veç kësaj Gërxhaliu thotë se miratimi i buxhetit është në interes të qytetarëve, prandaj sipas tij ekziston mundësia e rishikimit të buxhetit nga qeveria e re.
“Nëse kjo qeveri dhe ky kabinet qeveritar së bashku me parlamentin do të largohen nga skena politike pa e miratuar ligjin për buxhetin për vitin 2021 nuk mund të ketë zgjedhje dhe financim të zgjedhjeve në vitin 2021 pa miratim të buxhetit. Nuk mund të minimizohen pasojat e pandemisë COVID-19. Prandaj, besoj që më e pakta që ishte dashur në parlamentin Kosovës të bëhet që t’iu lihet një gjurmë pozitive në interes të shtetit dhe qytetarëve është miratimi i këtij buxheti. Nga miratimi i këtij buxheti ekziston mundësia e rishikimit të buxhetit nga qeveria eventuale që do të vijë në të ardhmen. Prandaj, është koha që të reflektohet për shtet, jo vetëm të kalkulohet për vota dhe të mbrohen interesat e grupeve të caktuara të interesit”, theksoi Gërxhaliu.
Ndërsa, Blend Hyseni nga Instituti GAP ka thënë për KosovaPress se nëse nuk miratohet buxheti, dëmi ekonomik për vitin e ardhshëm do të jetë edhe më i madh, pasi është i ndërlidhur edhe me zbatimin e Ligjit për Rimëkëmbje Ekonomike.
“Miratimi i buxhetit për vitin e ardhshëm do të jetë një pengesë tjetër e situatës politike në rimëkëmbjen ekonomike. Nëse kjo ndodhë atëherë edhe dëmi ekonomik në vitin e ardhshëm do të jetë më i madh, edhe vonesat në rimëkëmbje do të tej zgjaten që do të ishte me pasoja shumë të rënda për qytetarët e Kosovës”, thekson Hyseni.
Edhe bizneset në vend kërkojnë nga Kuvendi që buxheti për vitin 2021 të bëhet para se të shpërndahet parlamenti.
Pronari i kompanisë “Jysk”, Fatmir Zymberi thotë për KosovaPress se vonesa e miratimit të buxhetit do ta rëndojë edhe më tej gjendjen ekonomike në vend, sipas të cilit kompanitë sot janë në krizë.
“Shpresoj që buxheti do të aprovohet para se të futemi në zgjedhje, ngase kjo mund të zgjatë, sikur që ka ndodhur në të kaluarën. Kjo vonesë e bënë edhe më të rëndë situatën. Besoj që të gjendet një zgjidhje, që së paku të zgjidhet ana ekonomike e këtij vendi, të krijojmë një stabilitet… Shpresoj që nuk do të vonohet buxheti ashtu si është vonuar edhe votimi i pakos së rimëkëmbjes. Lutemi që të bëhet së më shpejt kjo, sepse ne sot derisa po diskutojmë, kompanitë në Kosovë kanë krizë. Kjo vonesë e bën më të rëndë e pasojat do të jenë shumë më të rënda”, thotë ai.
Gjatë ditës së sotme, kryeministri në detyrë i Kosovës, Avdullah Hoti ka kontaktuar grupet parlamentare për diskutuar rreth çështjes së buxhetit për vitin 2021.
Hoti thotë se është në pritje të përgjigjes nga grupet parlamentare, ndërkohë që ai thekson se presin bashkëpunim nga të gjithë për buxhetin, pasi siç tha ai është një situatë specifike dhe nuk duhet vendi të hyjë në janar pa miratim të buxhetit.
“Presim nga të gjitha grupet parlamentare pa asnjë përjashtim. Jemi në një situatë tani specifike, në prag të zgjedhjeve, nuk është mirë të hyhet më në janar pa buxhet të miratuar. Një draf buxhet i përgatitur në mënyrë më të mirë mundshme është në Kuvend. Le të urdhërojnë grupet parlamentare nëse kanë sugjerime të ndryshme për të bërë ndryshime në atë draft buxhet dhe ta miratojnë”, deklaroi Hoti.
Edhe Odat ekonomike gjatë një diskutimi me kryeministrin në detyrë, kanë kërkuar të miratohet buxheti para shkuarjes në zgjedhje./KP
Bota
Numri i viktimave nga tërmeti i fuqishëm në Afganistan arrin në 2200
Published
14 hours agoon
September 4, 2025By
UBTnews
Operacionet e kërkim-shpëtimit nga tërmeti i fuqishëm i së dielës në Afganistanin lindor po vazhdojnë, me numrin e të vdekurve që tejkalon 2.200, sipas zyrtarëve.
Hamdullah Fitrat, zëvendës zëdhënës i administratës së përkohshme, tha në kompaninë amerikane të mediave sociale X se numri i të vdekurve u rrit në 2,205, ndërsa numri i të plagosurve arriti në 3.640, vetëm në provincën Kunar.
“Me shumë njerëz ende të bllokuar nën rrënoja, numri i të vdekurve mund të rritet më tej ndërsa operacionet e kërkimit për të mbijetuarit vazhdojnë“, tha më parë Rahimullah Hamzala, zëdhënës i forcave lokale të sigurisë në provincën Kunar.
Autoritetet në Kabul kanë frikë gjithashtu se numri i të vdekurve mund të rritet, ndërsa ndajnë të dhëna nga provincat Nangarhar, Laghman dhe Panjshir, të cilat u goditën gjithashtu. Të paktën 12 vdekje janë raportuar tashmë në Nangarhar.
Agjencitë humanitare paralajmërojnë se shkalla e shkatërrimit kërkon mbështetje urgjente ndërkombëtare për të parandaluar një krizë të përkeqësuar.
Turqia këtë javë dërgoi 25 ton ndihma në vend, duke përfshirë materiale strehimi, pako higjienike dhe kuti ushqimore.
Pakistani fqinj gjithashtu ka dërguar 105 ton ndihma, ndërsa Irani, Kina dhe India, si dhe vendet perëndimore, janë zotuar të dërgojnë ndihmë./D.B/KP
Bota
Rutte thekson garanci të forta sigurie për Ukrainën, të mbështetura nga Evropa, Kanadaja e SHBA
Published
14 hours agoon
September 4, 2025By
UBTnews
Sekretari i Përgjithshëm i NATO-s, Mark Rutte, tha se presidenti amerikan Donald Trump e theu bllokimin me presidentin rus Vladimir Putin dhe “tani Evropa dhe Kanadaja me SHBA-në duhet të hartojnë garanci sigurie për të siguruar që Ukraina të ketë mbështetje të plotë në bisedime”.
Duke folur në konferencën e përbashkët për shtyp me kryeministrin çek Peter Fiala në Pragë, Rutte theksoi se bashkësia ndërkombëtare po koordinohet ngushtë për të përgatitur garanci sigurie që do të siguronin që Ukraina të ketë mbështetjen e plotë të anëtarëve dhe partnerëve të NATO-s jashtë aleancës, së bashku me një mbrojtje të fortë kombëtare, raporton KosovaPress.
Shefi i NATO-s tha se pas takimit të 15 gushtit në Alaska midis Trump dhe Putin, “tani është për ne të hartojmë garancitë e sigurisë si evropianë dhe Kanadaja me SHBA-në për t’u siguruar që kur të fillojnë bisedimet, presidenti ukrainas e di se ka mbështetjen e plotë të SHBA-së, të Kanadasë, evropianëve, të gjithë neve në NATO, por edhe të vendeve tona jashtë NATO-s”.
Ai shtoi se themeli i këtyre garancive duhet të jetë forcimi i forcave të armatosura të Ukrainës.
Fiala theksoi qëndrimin e unifikuar të aleatëve të NATO-s, duke vënë në dukje nevojën për të vazhduar mbështetjen për Ukrainën në mënyrë që ajo të mund të mbrohet dhe të mbajë presionin mbi Rusinë, duke krijuar njëkohësisht kushte për një paqe të qëndrueshme.
Duke iu referuar takimit të koalicionit të të vullnetshmëve në Paris, udhëheqësi çek tha se ekziston gjithashtu një konsensus i fortë se duhet të ketë garanci të forta sigurie, të cilat do ta dekurajonin Rusinë nga agresioni i mëtejshëm.
Lajmet
Ademi: Avdullahu mund të bëhet Xhaka i Kosovës
Published
15 hours agoon
September 4, 2025By
UBT News
President i Federatës së Futbollit të Kosovës, Agim Ademi, ka folur para ndeshjes kualifikuese mes Zvicrës dhe Kosovës, duke shpjeguar pse Leon Avdullahu vendosi të përfaqësojë Kosovën.
Ademi tha se Zvicra nuk ka arsye të frikësohet, pasi marrëdhëniet mes dy federatave janë të mira.
Ai theksoi në një intervistër për medium zviceran ‘Blick’ se Avdullahu e mori vendimin me zemër dhe është pjesë e një projekti afatgjatë për të ndërtuar një gjeneratë të re lojtarësh që synon Kampionatin Evropian, ku mes tyre ai shihet si lider i ardhshëm.
“Ne kemi sjellë shumë lojtarë të rinj midis 17 dhe 20 vjeç për të formuar ekipin tonë për dhjetë vitet e ardhshme. Qëllimi është të arrijmë Kampionatin Evropian. Dhe Leoni luan një rol veçanërisht të rëndësishëm si udhëheqës. Ne e shohim atë si pjesë të brezit të ri që do të formojë themelin. Ne besojmë se ai mund të bëhet Granit Xhaka i Kosovës. Sigurisht, ai është ende i ri – dhe nuk duam t’i bëjmë shumë presion. Por mendojmë se ai ende mund të zhvillohet shumë mirë”, ka thënë Ademi.
Duke folur për raportet me Zvicrën, kreu i FFK-së nënvizoi mirënjohjen ndaj këtij vendi për kontributin në zhvillimin e futbollistëve shqiptarë dhe tha se Kosova respekton çdo zgjedhje të lojtarëve me dy shtetësi. Ai nuk përjashtoi që në të ardhmen edhe talente të tjerë si Albian Hajdari të bashkohen me Kosovën.
“Ne nuk e detyrojmë askënd të luajë për ne. Kushdo që ndjehet kosovar dhe dëshiron të kontribuojë është i mirëpritur”, përfundoi Ademi.
Bota
Tregtia me pakicë e eurozonës bie më shumë se sa pritej në korrik
Published
15 hours agoon
September 4, 2025By
UBTnews
Shitjet me pakicë në zonën e euros ranë 0.5% në korrik nga një muaj më parë, më shumë se pritjet e tregut, sipas të dhënave zyrtare të publikuara sot nga Eurostat.
Në BE, shitjet ranë gjithashtu 0.4% në të njëjtin muaj. Pritja e tregut për zonën e euros ishte një rënie mujore prej 0.3% në korrik.
Rënia më e lartë e vëllimeve të shitjeve në zonën e euros u pa në shitjet e karburantit për automjete në dyqane të specializuara, me 1.7% më pak në bazë mujore.
Vëllimet e shitjeve në korrik ranë gjithashtu 1.1% për ushqimin, pijet dhe duhanin.
Nga ana tjetër, vëllimet e shitjeve për produktet jo-ushqimore (përveç karburantit për automjete) u rritën 0.2% në korrik.
Midis anëtarëve të BE-së për të cilët ka të dhëna të disponueshme, rëniet më të mëdha mujore u panë në Kroaci (-4%), Estoni (-2%) dhe Gjermani (-1.5%).
Në anën tjetër, rritjet më të mëdha ishin në Lituani (rritje prej 1.5%), Letoni (1.4%) dhe Holandë (1.1%) në korrik.
Në bazë vjetore, shitjet me pakicë u rritën 2.2% në eurozonë dhe 2.4% në BE në korrik, nën parashikimet e tregut./D.B/KP

Hulumtimi 75 vjeçar nga Harvardi zbulon faktorin më të rëndësishëm për lumturinë e njerëzve

Gjashtë gjëra që nuk duhet t’ia thoni kurrë një fëmije

Publiku e injoron! “With Love, Meghan” jashtë top listës së Netflix

Lidhja midis dhimbjes së kokës dhe sëmundjes së diabetit – Si t’i parandaloni?

Filmi për vajzën e vrarë në Gaza thyen rekord në Festivalin e Venecias, publiku duartrokiti për 23 minuta

Ambasadori Hargreaves i shkon në zyrë Dimal Bashës

Vdes kreatori i njohur italian Giorgio Armani

Numri i viktimave nga tërmeti i fuqishëm në Afganistan arrin në 2200

Më 22 shtator shpallet konkursi për pranimin e 60 ushtarëve nga radhët e komuniteteve jo shumicë
Të kërkuara
-
Lajmet nga UBT3 months ago
UBT organizon debat rreth zgjerimit të BE-së dhe ruajtjes së vlerave evropiane
-
Aktualitet2 weeks ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA
-
Aktualitet1 month ago
BSc në Shëndet Publik dhe Shkenca Mjekësore në UBT – Investim për të ardhmen e shëndetit të popullatës