Lajmet

Mjeku: Turbullirat në kanalin e Ibrit, disa vende mbesin pa ujë të pijshëm

Published

5 years ago

January 11, 2021

Betim Gashi

Lagjia “Kalabria” në Prishtinë, 75 përqind e komunës së Fushë Kosovës dhe disa vende të tjera të cilat furnizohen nga kanali i Ibrit po kanë telashe me furnizimin me ujë të pijshëm. Kjo pasi që Kompania Rajonale e Ujësjellësit “Prishtina” ka zvogëluar prodhimin e ujit në fabrikën e trajtimit të ujit në Shkabaj, pasi aty është turbulluar uji.

Kështu bëri të ditur për KosovaPress, zëdhënësja e KRU “Prishtina”, Arjeta Mjeku. Mjeku thotë se reshjet e mëdha të shiut kanë rritur nivelin e ujit në Liqenin Batllavës dhe Badovcit në dy metra.

“E rëndësishme menjëherë pas vërshimeve në vendin tonë për shkak të reshjeve të dendura atmosferike të shiut dhe borës, është se ne si kompani fillimisht përveç furnizimit me ujë të pijshëm për qytetarë e para është që ta ruajmë kualitetin e ujit të pijshëm pasi e kemi edhe rekomandim nga IKSHPK. Me këtë rast ne kemi zvogëluar prodhimin e ujit në Shkabaj në fabrikën e trajtimit të ujit në Shkabaj për shkak që është turbulluar në masë të madhe nga rrjedhat fushore që vijën direkt në kanalin e Ibrit për shkak të turbullirës që është krijuar nga këto reshura. Vështirësi në furnizim me ujë të pijshëm kanë lagja Kalabria në Prishtinë, 75 përqind e Fushë Kosovës që furnizohet nga gypi i shkabajve dhe po ashtu dhe në pjesë të tjera e jemi munduar që të bëjmë një zgjidhje kemi bërë një bay pass me gyp kështu që dhe disa lagje ndoshta mund të kenë reduktime të ujit”, tha Mjeku për KosovaPress.

Mjeku tregon edhe se departamenti për kualitetin e ujit është duke monitoruar gjendjen në terren dhe cilësinë e ujit.

“Për shkak që të ruajmë kualitetin ne patjetër është dashur që ta zvogëlojmë edhe prodhimin e ujit me rekomandime të institutit, në të njëjtën kohë, departamenti i kualitetit të ujit është duke monitoruar gjendjen edhe në terren edhe në laboratorin e akredituar brenda kompanisë, janë duke monitoruar cilësinë e ujit të pijshëm 24 orë pandërprerë. Po ashtu ekipet e ujësjellësit janë në teren ditë e natë, janë duke punuar 24 orë pa ndërprerë dhe në të njëjtën kohë edhe ekipet e mirëmbajtjes së rrjetit të kanalizimit sepse ka pas raste të shumta që iu kanë dalë ndihmë qytetarëve me këto mundësi. Edhe gjatë ditës së sotme janë në teren. Ne çka kërkojmë nga qytetarët në këto momente është që të kenë durim”, tha Mjeku.

Mjeku tregon për rritjen e nivelit të ujit në Liqenin e Batllavës dhe Badovcit.

“Një e mirë nga këto vërshime është që liqenet akumuluese Badovci dhe Batllavë po mbushen me ujë të cilat garantojnë një furnizim stabil për periudhat vijuese. Nivele i ujit në të dyja liqenet ka pas rritje prej 2 metra mirëpo edhe ardhjet nga lumenjtë, përroskat, përrojet që janë duke ardhur direkt në liqeje ardhjet janë shumë të mëdha dhe kjo është një laj i mirë për furnizim me ujë të pijshëm për periudhat vijues. Por fatkeqësisht vërshimet po e bëjnë të vetën në shumë zona. Është fatkeqësi që këto vërshime e kanë kapluar vendin tonë në shumë zona, është e dhimbshme për ne”, tregoi Mjeku.

Mjeku thotë se deri më tani nuk është raportuar për ndonjë dëm të madh, por megjithatë ajo thekson se janë mobilizuar për të reaguar në çdo situatë.

“Nuk kemi të raportuar ndonjë dëme të madh material. Por edhe po të shkaktonte ne ekipet i kemi në terren, kemi sjellë edhe ekipe shtesë. Psh ekipet e Prishtinës shkojnë në Obiliq, Fushë Kosovës, pra aty ku është e nevojshme. Ne jemi mobilizuar qoftë për cilësinë e ujit të pijshëm qoftë për furnizimin me ujë të pijshëm. Por përshkak të një çrregullimi të krijuar përshkak turbullirës në kanalin e Ibrit, kenë pak durim qytetarët deri në stabilizimin e situatës po shpresojmë që me ndërprerjen e reshjeve të shiut do të largohet edhe turbullira nga kanali i Ibrit”, është shprehur Mjeku.

Kujtojmë që reshjet e pandërprera të shiut kanë shkaktuar vërshime në shumë vende të Kosovës, madje ka vërshuar dhe disa shtëpi, lokale afariste e ka shembur edhe ura në disa zona.

Live

Izraeli nis sulmin kundër Iranit, shpall gjendje të jashtëzakonshme në vend

Published

1 hour ago

February 28, 2026

ubtnews

Izraeli nisi atë që e quajti një “sulm parandalues” kundër Iranit të shtunën në mëngjes, sipas Ministrit të Mbrojtjes, Israel Katz, dhe shpalli gjendje të jashtëzakonshme në të gjithë vendin. Një burim izraelit i tha CNN se sulmi ishte i koordinuar me Shtetet e Bashkuara.

Sulmi vjen pasi Presidenti i SHBA-së Donald Trump kaloi javë duke kërcënuar se do ta godiste Iranin për programin e tij bërthamor , si dhe një shtypje të brendshme që ka vrarë mijëra protestues.

Izraeli mbylli hapësirën ajrore të shtunën në mëngjes, tha Ministria e Transportit, pasi vendi kreu sulme ajrore ndaj Iranit, shkruan CNN.

Ende nuk është e qartë se si do të reagojë Irani. Zyrtarët iranianë kanë paralajmëruar më parë se trupat amerikane në rajon mund të jenë në shënjestër nëse sulmohet.

(more…)

Vendi

“Ishte gjenocid” – Prof. Dr. Salih Krasniqi rrëfen tmerrin e spitaleve gjatë luftës dhe shpëtimin e qindra të plagosurve

Published

1 hour ago

February 28, 2026

ubtnews

Kirurgu i përgjithshëm Prof. Dr. Salih Krasniqi ka rrëfyer në UBT podcast periudhën e luftës në Kosovë, ku përveç punës në Qendrën Klinike Universitare të Kosovës, ai shërbeu edhe në spitalet ushtarake të Ushtrisë Çlirimtare të Kosovës (UÇK), duke trajtuar qindra ushtarë dhe civilë të plagosur. Ai e cilëson atë periudhë si një ndër më të vështirat e jetës së tij, duke e quajtur hapur “gjenocid” atë që ndodhte në spitalet e kohës.

Sipas Krasniqit, vetëm rreth 10 për qind e stafit shqiptar kishte mbetur në punë në spitalet publike, ndërsa ai dhe kolegët e tij punonin paralelisht: gjatë javës në QKUK, ndërsa fundjavave në spitalet ushtarake në terren. Lufta, tha ai, mori përmasa të mëdha pas rënies së familjes Jashari, kur filloi të shtohej ndjeshëm numri i të plagosurve.

Ai ka dokumentuar 1,239 pacientë të trajtuar gjatë asaj periudhe, prej të cilëve 120 kanë vdekur në spital, sidomos pas fillimit të bombardimeve, kur – sipas tij – u rritën keqtrajtimet ndaj pacientëve shqiptarë në QKUK.

Krasniqi ka shërbyer në disa zona lufte, përfshirë Malishevën, Gradicën dhe Llapin. Në korrik të vitit 1998, ai mori pushimin vjetor për t’u angazhuar në Malishevë, ku numri i të plagosurve ishte shumë i madh. Në vitin 2001, ai u angazhua edhe në zonën e Likovës, ku për 43 ditë trajtoi rreth 375 të plagosur.

Rreziku më i madh, sipas tij, ishte rruga drejt spitaleve. “Na dilnin prita. Kishin mundësi të na likuidonin apo të na rrihnin,” rrëfen ai, duke përmendur raste kur mjekë shqiptarë janë keqtrajtuar fizikisht.

Ai ndau edhe dëshmi tronditëse për torturat ndaj pacientëve shqiptarë në spital: rrahje, lidhje për radiatorë, djegie me cigare dhe etiketime si “terrorist” në dokumente mjekësore. Në disa raste, ai arriti të shpëtojë pacientë duke i nxjerrë fshehurazi nga spitali dhe duke i dërguar në vende më të sigurta.

Prof. Dr. Salih Krasniqi e përshkruan atë që ndodhte në sistemin shëndetësor gjatë luftës si një përpjekje të organizuar për shkatërrimin e shëndetësisë shqiptare dhe frikësimin e popullatës civile. Ai thekson se largimi i stafit mjekësor shqiptar nga repartet kyçe, si gjinekologjia, kishte për qëllim pengimin e trajtimit dhe detyrimin e popullsisë për t’u larguar nga vendi.

Rrëfimi i tij mbetet një dëshmi e drejtpërdrejtë e sakrificës së mjekëve shqiptarë gjatë luftës dhe një dokumentim i rëndësishëm i asaj periudhe të errët të historisë së Kosovës.

Ju ftojmë të ndiqni episodin e parë të këtij podcasti: Podcasti

Vendi

Kurti takon kryetaren e Akademisë së Shkencave dhe Arteve të Kosovës

Published

21 hours ago

February 27, 2026

UBTNews

Kryeministri i Kosovës, Albin Kurti, priti në takim kryetaren e Akademisë së Shkencave dhe Arteve të Kosovës, Justina Shiroka Pula, me të cilën diskutoi për punën dhe prioritetet e institucionit.

Gjatë takimit u theksua rëndësia e bashkëpunimit ndërmjet Qeverisë dhe Akademisë, veçanërisht në fushën e arsimit dhe zhvillimit të vendit. Palët u dakorduan për komunikim të rregullt dhe thellim të bashkëpunimit në të ardhmen.

Në takim ishte i pranishëm edhe zëvendësministri i Arsimit dhe Shkencës, Përparim Kryeziu, si dhe nënkryetari i Akademisë, Fejzullah Krasniqi, dhe sekretari shkencor, Bardh Rugova.

Lajmet

Supremja lë në fuqi burgimin e përjetshëm për Dardan Krivaqën

Published

22 hours ago

February 27, 2026

UBTNews

Gjykata Supreme ka vërtetuar dënimin me burgim të përjetshëm ndaj Dardan Krivaqës për vrasjen e Marigona Osmanit, duke lënë në fuqi vendimet e shkallës së parë dhe të dytë.

Sipas Supremes, gjykatat më të ulëta kanë analizuar në detaje të gjitha provat, përfshirë dëshmitë, raportet e ekspertizës, provat materiale dhe video-incizimet nga banesa ku qëndronin i akuzuari dhe viktima. Nga këto prova është konstatuar se viktima kishte pësuar lëndime të rënda si pasojë e dhunës së ushtruar nga i akuzuari.

Raporti i autopsisë dhe ekspertët mjeko-ligjorë kanë vërtetuar se vdekja erdhi si pasojë e lëndimeve të shumëfishta trupore të shkaktuara me mjet të fortë, duke mbështetur kualifikimin e veprës si vrasje e kryer në mënyrë mizore.

Gjykata Supreme rrëzoi edhe pretendimet e mbrojtjes për parregullsi procedurale, ekspertizë psikiatrike dhe ndikim të substancave narkotike, duke theksuar se i akuzuari ka qenë i aftë të kuptojë veprimet e tij në momentin e kryerjes së krimit.