Mesfushori i Manchester Cityt, Rodri, mund të përballet me një vendim të madh për të ardhmen e tij, pasi interesimi për shërbimet e tij po rritet nga dy gjigantët spanjollë, Real Madridi dhe Barcelona.

Sipas raportimit të BBC, 30-vjeçari ndodhet në vitin e fundit të kontratës me Manchester Cityn dhe ende nuk ka arritur marrëveshje për rinovimin e saj, duke shtuar spekulimet për një largim të mundshëm.

Real Madridi prej kohësh e ka në listën e dëshirave reprezentuesin spanjoll, por burime të BBC-së bëjnë të ditur se edhe Barcelona tashmë i është bashkuar garës për transferimin e fituesit të “Topit të Artë”.

Rodri ka kaluar dy sezone të vështira për shkak të problemeve me lëndimet. Ai mungoi në pjesën më të madhe të sezonit 2024/25 pas një dëmtimi serioz në gju, ndërsa edhe sezoni pasues u ndikua nga problemet fizike.

Megjithatë, mesfushori spanjoll riktheu formën e tij më të mirë në Kupën e Botës, ku ishte një nga protagonistët kryesorë të Spanjës në rrugën drejt triumfit. Paraqitjet e tij u shpërblyen edhe me çmimin Lojtari më i Mirë i Turneut.

Mbetet të shihet nëse Rodri do ta vazhdojë karrierën në “Etihad” apo do të rikthehet në La Liga, ku Real Madridi dhe Barcelona po e ndjekin nga afër situatën e tij kontraktuale.

D.L

Qeveria e Spanjës vazhdon të jetë e bindur se finalja e Kupës së Botës 2030 duhet të zhvillohet në territorin spanjoll, pavarësisht raportimeve të fundit se FIFA ia ka premtuar Marokut organizimin e ndeshjes më të madhe të futbollit botëror.

Ministrja spanjolle e Sportit, Milagros Tolón, deklaroi se Spanja ka të gjitha arsyet për të pritur finalen, duke theksuar sukseset sportive dhe rolin udhëheqës që ka pasur në kandidaturën për organizimin e turneut.

“Jemi kampionë në fuqi të botës si te meshkujt, ashtu edhe te femrat. Spanja dhe Portugalia ishin vendet që udhëhoqën ofertën për Kupën e Botës 2030, ndërsa Maroku iu bashkua më vonë. Kemi shumë përparësi dhe pika të forta si vend”, u shpreh Tolón.

Kupa e Botës 2030 do të organizohet bashkërisht nga Spanja, Portugalia dhe Maroku, ndërsa gara për të pritur finalen mbetet ende e hapur.

Maroku synon që finalja të zhvillohet në stadiumin e ri “King Hassan II”, pranë Kasablankës, i cili pritet të ketë një kapacitet prej rreth 115 mijë spektatorësh. Në anën tjetër, Spanja ka propozuar dy arena ikonike për këtë ndeshje – “Santiago Bernabéu” në Madrid dhe “Camp Nou” në Barcelonë.

Reagimi i ministres spanjolle erdhi pas raportimeve se presidenti i FIFA-s, Gianni Infantino, ia kishte premtuar Marokut organizimin e finales. Megjithatë, FIFA i ka mohuar këto pretendime.

“Gjëja më e rëndësishme është që FIFA tashmë e ka mohuar këtë. Ne po punojmë ngushtë me FIFA-n dhe kemi takimin e radhës në shtator. Nga FIFA kanë qenë të qartë në mohimin e këtij lajmi. Do të vazhdojmë punën, sepse duam dhe besojmë se finalja e Botërorit duhet të zhvillohet në Spanjë”, përfundoi Tolón.

D.L

Kampionia olimpike dhe krenaria e sportit kosovar, Distria Krasniqi, ka hedhur një tjetër hap të rëndësishëm në rrugëtimin e saj akademik.

Pasi përfundoi me sukses studimet bachelor në Fakultetin e Shkencave të Sportit në UBT, xhudistja e njohur tashmë ka regjistruar edhe studimet e nivelit master në të njëjtin institucion.

Krahas sukseseve të jashtëzakonshme në arenën ndërkombëtare, ku ka fituar medalje olimpike, botërore dhe evropiane, Distria po dëshmon se i kushton rëndësi edhe arsimimit dhe zhvillimit profesional.

Regjistrimi në studimet master përbën një tjetër etapë në rrugëtimin e saj, duke dëshmuar se sporti elitar dhe angazhimi akademik mund të ecin paralelisht.

Me këtë hap, Distria Krasniqi vazhdon të jetë një shembull frymëzues për të rinjtë, duke treguar se suksesi ndërtohet jo vetëm në sport, por edhe në arsim dhe zhvillim personal.

D.L

Sulmuesi kosovar Mirlind Daku ka dhënë një intervistë të gjatë për faqen zyrtare të Spartak Moskës, pas prezantimit të tij si përforcimi më i ri i klubit rus.

Në intervistën e publikuar nga Spartaku, Daku foli për pritshmëritë e tij te skuadra e re, objektivat personale dhe mesazhin që ka për tifozët e klubit.

I pyetur se çfarë do t’u thoshte mbështetësve të Spartakut, sulmuesi kosovar kërkoi nga ta që ta vlerësojnë për atë që do të tregojë në fushë me fanellën e re.

“Do të kërkoja të mos më gjykojnë për atë se si kam qenë te Rubin. E kuptoj që ndoshta jam dukur shumë arrogant dhe agresiv. Por më besoni, që nga minuta e parë te Spartaku do të jap gjithçka që kam për t’ju bërë të lumtur, për të festuar fitoret me ekipin dhe për të mos u shqetësuar për asgjë tjetër”, ka thënë Daku.

Transferimi i tij te Spartaku ka hasur edhe në kundërshtime nga një pjesë e tifozëve të klubit, të cilët njihen për qëndrimet e tyre proserbe. Megjithatë, Daku ka theksuar se kalimi nga Rubin Kazani te Spartaku përbën një hap të madh në karrierën e tij dhe se zgjedhja për t’iu bashkuar këtij klubi ishte e lehtë.

Sipas tij, në Rusi ka dashur të luajë vetëm për Spartakun, të cilin e konsideron si një nga klubet më të mëdha të vendit. Sulmuesi kosovar ka thënë se është impresionuar nga madhësia, historia dhe ambiciet e klubit.

Objektivi i Dakut me skuadrën e re është i qartë: rikthimi i titullit kampion në Moskë pas një periudhe të gjatë pritjeje.

“Kam ardhur këtu për të fituar trofe dhe për t’i bërë njerëzit të lumtur. Klubi dhe tifozët i meritojnë titujt. Jam i gatshëm të jap gjithçka për këtë”, është shprehur ai.

Daku pret gjithashtu që stili më ofensiv i Spartakut t’i krijojë më shumë mundësi për të shënuar. Ndryshe nga Rubin Kazani, që shpesh është fokusuar në një qasje më defensive, Spartaku karakterizohet nga një lojë më sulmuese, gjë që sulmuesi kosovar beson se do ta ndihmojë të rrisë numrin e golave.

D.L