Lajmet

Mbi 60% e gastronomëve të vaksinuar, presin masat e reja

Published

3 years ago

August 11, 2021

Betim Gashi

Qeveria e Kosovës mbajti mbledhje paraditen e së mërkurës, por asgjë nuk u diskutua rreth masave të reja të cilat janë paralajmëruar. Ndër masa, u përmenden zgjatja e orarit të punës për lokalet e gastronomisë e klubet e natës, si dhe kufizime për qytetarët e pavaksinuar. Hyrja në këto lokale nga 20 gushti u paralajmërua se do të jetë i mundur vetëm me librezën që dëshmon se qytetari të paktën ka marrë dozën e parë të vaksinës anti-COVID. Infektologët shpresojnë që të njëjtat masa të funksionojnë, pasi aktualisht në klubet e natës ka shumë njerëz dhe pa distancë.

Siç bëhet e ditur, identifikimi i qytetarëve të vaksinuar pritet të bëhet edhe përmes QR Code. Këto masa janë mirëpritur nga Oda e Hotelerisë dhe Turizmit dhe Shoqata e Gastronomëve të Kosovës, të cilët premtojnë se po bëjnë të pamundurën nga ana e tyre që masat kurdo që ato zyrtarizohen të respektohen dhe të parandalojnë një mbyllje të serishme të ekonomisë.

Me hyrjen në fuqi të këtyre masave të paralajmëruara, klubeve të natës do t’u mundësohet operimi përtej orës 23:00, më saktë deri në orën 03:00 pas mesnate, ndërsa zgjatje të orarit të punës do të ketë edhe për lokalet e gastronomisë.

Visar Demolli, drejtor ekzekutiv në Odën e Hotelerisë dhe Turizmit, tregon se është paraparë edhe vaksinimi i tërësishëm i stafit të cilët punojnë në sektorin e gastronomisë. Ai thotë se këto masa janë përkrahur edhe nga vet ata, me qëllimin e vetëm që të shmanget një tjetër mbyllje.

“Gastronomë, hotelierë, kamerierë, banakierë, kuzhinierë, shefa, duhet të kenë të paktën dozën e parë të vaksinës. Është shumë e lehtë dhe kemi bërë apel. Jemi duke bërë një fushatë vetëdijesimi që duhet t’i kenë ato për shkak të shëndetit dhe për shkak të mundësisë së rimbylljes të serishme në shtator apo tetor. E dyta, është edhe për klientët, për mysafirët të cilët i frekuentojnë restorantet, baret, diskotekat, klubet e natës me një fjalë edhe salla dasmash nga data 20 gusht duhet ta kenë edhe ata të paktën dozën e parë të vaksinimit që të hyjnë në këto ambiente. E treta është që jemi dakorduar që për klube nate ta zgjatim orarin nga ora 23:00 deri në orën 03:00 pas mesnate”, u shpreh Demolli.

Deri më tash, Demolli potencon se janë mbi 60 përqind e stafit të sektorit të gastronomisë të vaksinuar, derisa thekson se një rimbyllje e sërishme do të ishte fatale për ta.

“Mbi 63 përqind e stafit është vaksinuar … po shpresojmë që shumë shpejt do të kryhen dozat e para, se kemi dalë edhe vet në vizita dhe jemi duke bërë një vetëdijesim se pse duhet të bëhet vaksinimi. Shkurt, qëllimi ynë është që të mos ketë më një vendim të rimbylljes së sërishme se ajo do të ishte fatale për ne, ishim mbështetur për muri se nuk kishim mundur t’ia dalim”, thekson ai.

Këto masa janë mirëpritur edhe nga Shoqata e Gastronomëve të Kosovës, ku përfaqësuesi nga kjo shoqatë Arian Vranica, potencon se janë pajtuar që vetëm vaksinimi mund të eliminojë opsionin e mbylljes pas rritjes së rasteve të reja me COVID-19.

Sa i përket verifikimit të qytetarëve të vaksinuar që frekuentojnë lokalet e gastronomisë, Vranica thotë se secili lokal duhet ta caktojë një përgjegjës që do të kryejë këtë verifikim.

“Kanë qenë disa variante të ndryshme të masave të cilat mund të aplikoheshin dhe duke dashur të evitojmë një mbyllje eventuale ne jemi pajtuar se vaksinimi është e vetmja zgjidhje, në mënyrë që të dalim nga kjo gjendje me pasoja sa më të lehta si për shëndetin publik, si për shëndetin ekonomik. Ndoshta nuk ka qenë më e lehta si lloj kompromisi që të bëhet në raport me këto masa, sepse kemi një kohë relativisht të shkurtër për të mundësuar operimin e të gjithë sektorit të gastronomisë dhe të pajisjes së tyre me vaksina… Ka qenë një masë e cila ndër të gjitha variantet ka qenë varianti më i mirë dhe më i përshtatshëm për funksionimin e ekonomisë në përgjithësi”, thotë Vranica.

Duke qenë se ditëve të fundit është rritur numri i rasteve të reja me COVID-19, e sidomos shtimi i rasteve me variantin Delta, marrja e këtyre masave sipas infektologut Ilir Tolaj është e vetmja zgjidhje që të frenohet infektimi i popullatës. Ai tërheq vëmendjen se nuk ka distancë në klube nate si dhe duhet të shmanget qëndrimi për kohë të gjatë në një ambient të mbyllur i shumë njerëzve njëkohësisht.

“Çfarë kishin mundur të bëjnë autoritetet në këtë rast për pengimin e përhapjes masive të variantit Delta ndoshta që të kufizohej në vendet ku po grumbullohen me mijëra njerëz për kohë të gjatë në ambiente të mbyllura siç janë klubet e natës, të cilat edhe me gjasë janë vendi kryesor ku tash po përhapen këto infeksione. Në anën tjetër gjithashtu të kufizojnë edhe numrin në lokale, në kafiteri ku po shihet që nuk ka asnjë lloj kufizimi as të distancës. Në qoftë se këto pak veprime do të bëheshin atëherë mendoj që rrjedhimisht do ta ngadalësonin përhapjen e variantit delta dhe do t’i jepte kohë vaksinimit që ta bëjë punën e vet”, potencon Tolaj.

Të martën në Kosovë janë shënuar 562 raste të reja me COVID-19 dhe janë shënuar edhe dy raste të vdekjes.

Bota

Komiteti i OKB-së: Metodat e luftës të Izraelit ngjasojnë me gjenocid

Published

7 hours ago

November 14, 2024

UBT NEWS

Komiteti i posaçëm i Kombeve të Bashkuara ka akuzuar Izraelin për përdorimin e metodave lufte që përkojnë me karakteristikat e gjenocidit gjatë operacioneve të tij ushtarake në Rripin e Gazës. Në një raport të publikuar më 14 nëntor 2024, komiteti theksoi se veprimet e Izraelit, përfshirë “përdorimin e urisë si metodë lufte” dhe shkatërrimin e shërbimeve themelore, po shkaktojnë një katastrofë të madhe humanitare dhe mjedisore në këtë rajon.

Komiteti, i cili ka hetuar për dekada shkeljet e të drejtave të njeriut në territoret palestineze, shprehu shqetësimin e tij për numrin e madh të viktimave civile dhe kushtet e jetesës për palestinezët. Sipas raportit, Izraeli ka shkaktuar vdekje, uri dhe lëndime të rënda përmes rrethimit të Gazës, pengimit të ndihmave humanitare dhe sulmeve të shënjestruara, pavarësisht thirrjeve të vazhdueshme nga OKB-ja dhe urdhrave të Gjykatës Ndërkombëtare të Drejtësisë.

Në raport, Komiteti i OKB-së tha se metodat e luftës që përdor Izraeli “përkojnë me karakteristikat e gjenocidit”, duke përfshirë përdorimin e urisë si një “armë” dhe ndëshkimin kolektiv të popullsisë palestineze. Dëshmitë nga terreni tregojnë se veriu i Gazës është përfshirë nga një situatë ekstreme urie, e cila po përkeqësohet me kalimin e kohës.

Një tjetër çështje e ngritur nga komiteti është shkatërrimi i infrastrukturës thelbësore të Gazës, përfshirë sistemet e ujit, kanalizimeve dhe furnizimin me ushqime. Raporti nënvizon se bombardimet ajrore izraelite kanë shkatërruar mbi 25,000 tonë mjete shpërthyese, një sasi që është e barabartë me dy bomba bërthamore, duke shkaktuar një krize mjedisore dhe shëndetësore që do të ketë pasoja afatgjata për brezat e ardhshëm.

Komiteti shprehu gjithashtu shqetësim për përdorimin e inteligjencës artificiale nga Izraeli për avancimin e sistemeve të tij të shënjestrimit gjatë operacioneve ushtarake. Ky përdorim i teknologjisë ka ngritur pyetje rreth ndikimit të saj në shkallën dhe precizitetin e sulmeve, që shpesh kanë shënjestruar civilët dhe objektet civile.

Në fund, Komiteti i OKB-së bëri thirrje për një reagim urgjent nga shtetet e tjera për të ndërprerë luftën dhe për të ushtruar presion ndaj Izraelit, duke theksuar se disa shtete po vazhdojnë të ofrojnë mbështetje ushtarake dhe ndihmë tjetër, pavarësisht shkeljeve të drejta të njeriut dhe shkatërrimeve të shkaktuara në Gaza./REL/

Bota

Kroacia planifikon të blejë 394 raketa HIMARS me rreze veprimi deri në 80 km

Published

7 hours ago

November 14, 2024

UBT NEWS

Kroacia ka njoftuar planet për blerjen e një sërë raketash GMLRS, me rreze veprimi deri në 80 km, për sistemin raketor HIMARS, një hap i rëndësishëm në modernizimin e forcave të saj të armatosura. Sekretari i Shtetit në Ministrinë e Mbrojtjes, Branko Hrg, ka bërë të ditur se do të blihen gjithsej 394 raketa GMLRS, që janë pjesë e një marrëveshjeje të mundshme për forcimin e kapaciteteve ushtarake të Kroacisë.

Hrg shpjegoi se ky prokurim është pjesë e një iniciative më të gjerë për modernizimin e ushtrisë kroate, duke theksuar rëndësinë e rritjes së ndarjes së fondeve për mbrojtjen. Ai bëri një krahasim me vitin 2016, duke theksuar se buxheti për mbrojtjen ka pësuar një rritje prej 142% që nga ajo periudhë. “Aktualisht, ne jemi në përputhje me standardet e NATO-s për ndarjen e fondeve, me 2% të GDP-së për mbrojtjen dhe 20% për pajisjet ushtarake,” tha Hrg.

Në lidhje me blerjen e raketave për HIMARS, Hrg nënvizoi se sistemi HIMARS është një nga teknologjitë më moderne dhe se, si pjesë e bashkëpunimit me Shtetet e Bashkuara, procesi i prokurimit është i qartë dhe i njohur. Ai e përshkroi HIMARS si një sistem shumë efikas dhe të besueshëm për forcën e tij raketore.

Kur u pyet se pse Kroacia nuk ka vendosur të blejë raketa me rreze më të gjatë, si ER GMLRS apo ATACMS, Hrg e sqaroi këtë duke theksuar se Kroacia nuk ka “afinitete sulmi” dhe nuk ka nevojë për raketa me rreze të gjata që mund të mbulonin territore të largëta. Megjithatë, ai nuk e përjashtoi mundësinë e blerjes së këtyre raketave në të ardhmen, duke lënë hapësirë për mundësi të tjera nëse situata strategjike kërkon një ndryshim të kursit.

Ky hap i Kroacisë për të forcuar kapacitetet e saj ushtarake është një pjesë e përpjekjeve të vazhdueshme të vendit për të rritur standardet e mbrojtjes dhe për të kontribuar më shumë në sigurinë e përgjithshme të Aleancës së NATO-s, duke i dhënë prioritet teknologjive moderne dhe sistemeve raketore efikase./UBTNews/

Lajmet

BE-ja e gjobit Meta-n me gati 800 milionë euro për praktika “abuzive”

Published

7 hours ago

November 14, 2024

UBTnews

Komisioni Evropian e ka gjobitur të enjten Meta-n, kompaninë që zotëron Facebook-un, me 797.72 milionë euro, për shkak të praktikave abuzive nga të cilat përfitoi tregu online në Facebook, i njohur si Martkerplace.

“Komisioni Evropian e gjobiti Meta-n… për shkeljen e rregullave të BE-së duke e lidhur shërbimin e vet online për reklama të klasifikuara, Facebook Marketplace, me rrjetin e vet social personale, Facebook, dhe duke vendosur kushte të padrejta komerciale ndaj shërbimeve të tjera online për reklama të klasifikuara”, tha Komisioni Evropian.

Meta njoftoi se do të ankohet ndaj këtij vendimi, por në ndërkohë, do të bashkëpunojë dhe do të punojë pa humbur kohë për të gjetur zgjidhje për adresimin e çështjeve të ngritura.

Ky vendim i Komisionit Evropian vjen dy vjet pasi ai e kishte akuzuar gjigantin amerikan të teknologjisë se i kishte dhënë përparësi të padrejtë shërbimit të vet për reklama të klasifikuara, Facebook Marketplace, duke i bashkuar dy shërbimet.

Bashkimi Evropian nisi një hetim formal ndaj dyshimeve për sjellje kundër konkurrencës nga Facebook në qershor 2021. Në dhjetor 2022, BE-ja ngriti shqetësime se Meta e lidh rrjetin e vet social mbizotërues, Facebook, me shërbimet e veta online për reklama të klasifikuara.

Facebook e lansoi tregun online Marketplace në vitin 2016 dhe e zgjeroi atë në disa vende evropiane një vit më pas.

BE-ja argumenton se Meta ua imponon Facebook Marketplace njerëzve të cilët e përdorin Facebook-un me një “lidhje” të jashtëligjshme, por Meta tha se ky argument e shpërfill faktin se përdoruesit e Facebook-ut mund të zgjedhin nëse duan të shkojnë në Marketplace, dhe shumë prej tyre nuk e bëjnë.

Meta tha se Komisioni Evropian pretendoi se Marketplace ka mundësi ta pengojë rritjen e tregjeve të mëdha të reja online në BE, por nuk gjeti prova për të dëshmuar se kjo i dëmton konkurrentët.

Lajmet

Etiopia regjistron 7.3 milionë raste malarie për gati 10 muaj

Published

7 hours ago

November 14, 2024

UBTNews

Më shumë se 7.3 milionë njerëz u diagnostikuan me malarie dhe 1.157 vdekje u raportuan në Etiopi nga 1 janari deri më 20 tetor, sipas Organizatës Botërore të Shëndetësisë (OBSH).

Në raport thuhet se ky është numri më i lartë i rasteve vjetore të regjistruara në shtatë vjetët e fundit të shkaktuara nga pickimi i mushkonjave femra të infektuara Anopheles.

Transmetimi i malaries është gjithashtu i mundur përmes transfuzionit të gjakut, transplantimit të organeve ose ndarjes së gjilpërave ose shiringave të kontaminuar me gjak të infektuar. Sëmundja gjithashtu mund të transmetohet nga nëna te fëmija para ose gjatë lindjes.

Malaria paraqet një sfidë të rëndësishme të shëndetit publik në Etiopi, ku afërsisht 75% e masës tokësore konsiderohet të jetë endemike e sëmundjes, tha OBSH.

“Rreth 69% e popullsisë në këto zona përballen me rrezikun e infeksionit ku shpërthimet periodike kontribuojnë në deri në 20 për qind të vdekjeve në mesin e fëmijëve nën moshën pesë vjeç,” thuhet në raport.

OBSH tha se po ofron mbështetje për Ministrinë e Shëndetësisë së Etiopisë në koordinimin e përpjekjeve të reagimit ndaj malaries përmes platformave të integruara së bashku me një strukturë të menaxhimit të incidenteve shumë emergjente.