Paga minimale, duke nisur nga data 1 janar e vitit të ardhshëm, do të rritet në 500 euro si në sektorin publik ashtu edhe në atë privat, ndërsa biznesi do të subvencionohet për 9 muaj për mbulimin e kostos së kontributeve.

Kryeministri i Shqipërisë, Edi Rama, në podkastin “Flasim-Kandidati”, bëri të ditur se nga kjo rritje e pagës minimale do të përfitojnë rreth 10600 punonjës të shërbimeve.

“Sipas projektbuxhetit 2026, do të ketë një rritje të rëndësishme të zotuar gjatë fushatës zgjedhore dhe që do të zbatohet nga 1 janari 2026. Kjo rritje do të përfshijë 307850 punonjës të regjistruar, në sektorin shtetëror dhe privat, të cilët do të marrin një pagë minimale prej 500 eurosh. Me ligj, askush nuk do të ketë më një pagë më të ulët se kjo. Nuk do të jetë rritja e fundit, por vetëm e para, pasi gjatë mandatit të katërt paga minimale do të arrijë në 700 euro, ashtu siç kemi premtuar”, u shpreh Rama.

Kreu i qeverisë theksoi gjithashtu se qeveria do të mbështesë bizneset për përballimin e kostove që sjell kjo politikë për 9 muajt e parë, shkruan ATSh.

“Qeveria do të subvencionojë për 9 muajt e parë me 90 milionë euro shtesën e kostos së sigurimeve për të punësuarit në sektorin privat, të cilët do të kenë një pagë minimale prej 500 eurosh”, tha ai./KP

Nga 4 nëntori deri më sot është zhvilluar në Prishtinë vizita e parë në terren e përfaqësuesve të RCAG, kompanisë fituese për hartimin e projektit për Lojërat Mesdhetare 2030.

Qëllimi kryesor i kësaj vizite ishte nisja e bashkëpunimit praktik në fazën përgatitore të projektit dhe krijimi i një kuptimi të përbashkët mes palëve për pritshmëritë dhe drejtimin që duhet të marrin punët që duhet të përfundohen.

Delegacioni në fjalë ka parë nga afër infrastrukturën aktuale sportive në Kosovë duke inspektuar disa prej impianteve kryesore sportive si stadiumin “Fadil Vokrri”, Pallatin e Rinisë dhe Sporteve, Bulevardet e Prishtinës (lokacioni i garave të 3×3 basketbollit), Lokacionin e kompleksit olimpik të notit, Parkun Kombëtar të Gërmisë, Zonën e parashikuar për Fshatin e Sportistëve, Qendrën e Komitetit Olimpik të Kosovës, si dhe hotelet e parashikuara për “Games Family”.

“Janë dy nivele kyçe në të cilat ata do të fokusohen. Numër një është plani i operimeve dhe i shërbimeve të cilat ne do t’i ofrojmë familjes mesdhetare e cila sot ta vizitojë Kosovën dhe natyrisht ajo pa të cilën nuk mundemi dhe kjo është infrastruktura sportive dhe infrastruktura e përgjithshme e cila duhet të krijohet për t’i organizuar Lojërat Mesdhetare. Një nga temat shumë të rëndësishme do të jenë burimet njerëzore, pra si do ta arrijmë nivelin që sa më shumë staf profesional lokal të jetë i kyçur në Lojërat Mesdhetare dhe plani ynë dhe parashikimet tona janë që mbi 500 persona të rinj nga Kosova do të jenë të angazhuar në nivele të ndryshme të memaxhmentit të organizimit të Lojërave Mesdhetare”, bëri të ditur Aliti.

Rekomandimet e dala nga kjo vizitë, sipas Fidan Shatrit nga Ministria e Sportit, do të përfshihen në masterplanin e Lojërave Mesdhetare.

“Ideja e vizitës është nga kompania përfituese e masterplanit që të jenë fizikisht këtu për t’u informuar për detaje të ndryshme që të marrin sa më shumë informata që hyjnë në funksion të hartimit të masterplanit për Lojërat Mesdhetare ‘Prishtina 2030’. Në këtë kontekst ne e kemi një bazë pasi që marrja e këtyre lojërave është një dokument i cili fillimisht është hartuar në atë kohë, pra libri i kandidimit dhe pastaj kontrata e kryeqytetit që është njëkohësisht edhe garanci e qeverisë së Kosovës për zhvillimin ose kandidimin në atë kohë dhe marrjen e Lojërave Mesdhetare ‘Prishtina 2030′”, theksoi Shatri.

Ndërsa shefi i kabinetit të kryetarit të Komunës së Prishtinës Vllaznim Osmani theksoi se pas kësaj vizite, do të bëhet më e qartë se në cilat pika infrastrukturore sportivet duhet të intervenohet menjëherë.

“Ky është takim fillestar dhe normal është e kuptueshme që disa prej objekteve ekzistuese në kryeqytet dhe jo vetëm është mirë të shikohen se cilat janë intervenimet që duhet të bëhen për të pasur mundësi që këto arena të shfrytëzohen për këto lojëra. Mirëpo ne e dimë prej studimeve që i kemi bërë vet si kryeqytet që këto nuk janë të mjaftueshme dhe janë shumë të limituara, mirëpo është mirë që të bëhet një analizë e mirëfilltë prej kompanisë e cila ka eksperiencë të madhe në këtë fushë për ta kuptuar se cilat janë ato elemente që ne duhet t’i rregullojmë për të pasur mundësi t’i shfrytëzojmë dhe cilat janë nevojat adekuate për të investuar në infrastrukturë të re”, deklaroi Osmani.

E përfaqësuesi i kompanisë RCAG, Rob Clarke, thotë se është momenti që Kosova të nis menjëherë me punët konkrete në terren për Lojërat Mesdhetare.

“Mendoj se përshtypja jonë është se koha është e mirë. Tani është momenti për të filluar me strategjinë dhe planin e zbatimit. Besoj se periudha prej katër deri në katër e gjysmë vjet ofron një mundësi të mirë për të menduar në mënyrë të hollësishme për ndikimin që do të ketë trashëgimia e Lojërave. Pra, jo vetëm planifikimi për Lojërat, por edhe mendimi për trashëgiminë. Kjo përfshin aspektin fizik, trashëgiminë infrastrukturore. Së fundi, ne kemi diskutuar pikërisht planet e zhvillimit të infrastrukturës për lojërat. Po ashtu, duke menduar edhe nga aspekti ekonomik, cilat janë mundësitë e mundshme të biznesit për kompanitë vendore që të ndihmojnë me ofrimin e mallrave dhe shërbimeve për lojërat.”, tha Clark.

Agjenda përfshinte prezantimin e palëve kryesore të përfshira në projekt, njohjen me qytetin dhe ambientet sportive, si dhe harmonizimin e objektivave për fillimin e zbatimit të fazave të ardhshme të planifikimit./S.K/KP/

Astrit Isufi i dyshuari për vrasjen e dy vëllezërve Driton dhe Naim Morina në Gollubovc të Malishevës është transferuar për trajtim të mëtutjeshëm në Klinikën Abdominale.

Këtë e ka bërë të ditur drejtori i Emergjencës, Naser Syla, i cili tha se në orën 08:30 në QKUK nga Policia e Kosovës është sjellë pacienti i cili ka plagë skllaputare me armë zjarri.

“Rreth orës 08:30 afërsisht është pranuar një pacientë mashkull i sjellë nga Policia e Kosovës, i lindur më 1984 me plagë skllaputare me armë zjarri gjerë tani janë kryer të gjitha ekzaminimet e nevojshme në qendrën emergjente dhe ka vazhduar trajtimin gjerë pak më herët. Pas ekzaminimeve të kryera dhe pas konsultimeve pacienti është transferuar në Klinikën Abdominale për trajtim të mëtutjeshëm”, tha ai.

Tashme nga hapësirat e Klinikën Emergjente janë larguar edhe pjesëtaret policor.

Policia e Kosovës ka njoftuar për arrestimin e personit të dyshuar në lidhje me rastin e vrasjes së dyfishtë që ndodhi dje në fshatin Gollubovc të Malishevës, ku viktima ishin dy vëllezër të moshës madhore.

Sipas njoftimit zyrtar, rasti është raportuar më 6 nëntor 2025, rreth orës 11:30, ku njësitë policore kanë dalë menjëherë në vendin e ngjarjes.

Gjatë ekzaminimit, janë gjetur dhe sekuestruar dy armë zjarri, të cilat dyshohet se janë përdorur në këtë ngjarje tragjike.

Pas hetimeve intensive dhe bashkëpunimit të ngushtë me Prokurorin e Shtetit, sot më 7 nëntor 2025, rreth orës 06:25, policia ka arritur të arrestojë të dyshuarin A. I./KP

Aleanca për Ardhmërinë e Kosovës (AAK) do ta mbështesë Lëvizjen Vetëvendosje në Komunën e Vitisë, për balotazhin e 9 nëntorit.

Këtë e ka bërë të ditur ish-kandidati i AAK-së për kryetar të Komunës së Vitisë, Labinot Bislimi, i cili në raundin e parë të votimit ka marrë 2.89 për qind të votave.

Kandidati i LVV-së për kryetar të Vitisë, Arsim Ademi, është në garë në balotazh me kandidatin e Lidhjes Demokratike të Kosovës (LDK), Sokol Haliti, i cili është edhe kryetar aktual.

Bislimi ka thënë se ky koalicion është rrjedhojë e natyrshme e situatës dhe e vetë pozicionimit të tyre, siç ka thënë, “pozicionimit të tyre karshi të keqes së komunës së Vitisë”.

“Pasi u përafruan vlerat, idetë dhe programet, pasi e morëm vendimin brenda strukturave tona, sot në mëngjes nënshkruam marrëveshjen e koalicionit në nivel të degëve dhe i zgjatëm dorën njëri-tjetrit me kandidatin për kryetar, z. Arsim Ademi. Ky koalicion është rrjedhojë e natyrshme e situatës dhe e vetë pozicionimit tonë karshi të keqes së komunës së Vitisë, që me emër thërrasim Sokol Haliti. Aleanca Dega në Viti nuk ka qëndruar asnjëherë indiferente ndaj proceseve dhe nuk ka pasur asnjëherë pozicion neutral përballë të keqes. Ajo ka pasur dhe gjithmonë do të ketë qëndrime dhe pozicione politike, duke iu përgjigjur situatave të kohës. Situata e tanishme kërkon guxim, mobilizim dhe pozicionim. Ky koalicion e shpreh edhe njëherë guximin tonë për të qenë pjesë e proceseve politike; për t’i ndihmuar dinamikat shoqërore dhe për t’i shtyrë përpara vlerat, idetë dhe projektet e nevojshme për qytetarët e komunës tonë”, ka shkruar ai në rrjetin social “Facebook”.

Në raundin e parë të votimit më 12 tetor, kandidati i LDK-së, Sokol Haliti, ka marrë 38.01 për qind të votave, kurse kandidati i LVV-së, Arsim Ademi, ka marrë 33.46 për qind./KP