Lajmet

LDK dërgon në ZRrE komentet kundërshtuese për rritjen e tarifave të rrymës

Nga kjo parti kërkojnë që të mos ketë ngritje të tarifave deri në vitin 2023.

Published

4 years ago

January 31, 2022

Betim Gashi

Lidhja Demokratike e Kosovës (LDK) ka dërguar komentet e veta kundërshtuese në Zyrën Rregullatorit të Energjisë (ZRRE), për rritjen e tarifave të energjisë elektrike. Nga kjo parti kërkojnë që të mos ketë ngritje të tarifave deri në vitin 2023, ndërsa konsiderojnë që Qeveria e Kosovës duhet të subvencionojë të gjithë qytetarët e Kosovës për shpenzimet për energji elektrike dhe të ulë në zero vlerën e tatimit për energji elektrike.

Kjo u bë e ditur në një konferencë për medie nga anëtari i kryesisë së këtij subjekti, Xhafer Tahiri dhe deputetja, Hykmete Bajrami, e cila prezantoi edhe propozimet e këtij subjekti politik për ZRRE-në dhe Qeverinë e Kosovës lidhur me tejkalimin e krizës energjetike.

“LDK sapo ka nisur komentet e saja në ZRRE lidhur me raportin vlerësues për ngritjen e tarifave për energjinë elektrike. Për LDK-në mbrojtja e interesave të qytetarëve është jetike përmes mekanizmave institucionalë në këtë rast, duke i dërguar komentet e veta në Zyrën e Rregullatorit të Energjisë, duke kundërshtuar rritjen e tarifave për energjinë elektrike”, tha Tahiri.

Deputetja e Lidhjes Demokratike të Kosovës, Hykemte Bajrami tha se Qeveria e Kosovës ka dështuar në menaxhimin e krizës energjetike e cila ka sjellë humbje për Kosovën deri tani 120 milionë euro.

Bajrami u shpreh se LDK-ja do të ndjekë të gjitha rrugët institucionale përfshirë edhe Gjykatën Kushtetuese për të kundërshtuar vendimin për shtrenjtim të energjisë elektrike.

“LDK do e vazhdojë kontributin me këtë betejë me rrugë institucionale. Ne sot kemi dorëzuar komentet tona, ndërsa nëse propozimi, i cili është publik kalon, LDK do të ndjek rrugën institucionale nëse është nevoja ne edhe në Gjykatën Kushtetuese do të mbrojmë të drejtat e qytetarëve të Kosovës. Mënyra se si ZRRE ka paraparë ngritjen e tarifave të energjisë elektrike dhe mënyra se si qeveria e ka propozuar shpërndarjen e 75 milionëve për subvencionimin e tarifave është tepër diskriminuese. Qeveria ka vendosur që 75 milionë euro t’i subvencionojë tarifat e të gjitha amvisërive që shpenzojnë deri në 600 kËh dhe gjithashtu të subvencionojë të gjitha tarifat për të gjithë komunitetin e biznesit, duke përshirë edhe veprimtaritë më profitabile të cilat ata me ngulm i kishin kundërshtuar në kohën kur qeveria paraprake i kishte mbështetur përmes subvencionimit të pagave”, tha ajo.

Tutje ajo tha se ngritja e tarifave të energjisë elektrike do të rëndonte edhe më tej jetën e qytetarëve, prandaj siç tha ai, propozojnë që në vitin 2022 të mos ketë ngritje të këtyre çmimeve.

Krahas propozimit që të subvencionohen tarifat e energjisë elektrike për të gjithë qytetarët e Kosovës pa dallim, LDK i ka propozuar Qeverisë së Kosovës që të ulë në zero tatimin mbi vlerën e shtuar për energji elektrike.

“Ne kemi parë që Qeveria e Kosovës ka zotuar 75 milionë me të cilat ajo ka vendosur të subvencionojë ekonomitë familjare deri 600 kËH dhe sektorin e biznesit, ne konsiderojmë që shpërndarja e subvencionimit të qeverisë duhet të bëhet për të gjithë qytetarët pa dallim sepse ndarja deri në 600 kËh as nuk është ndarje në bazë të standardit të jetës dhe as nuk është kurrfarë kriteri, i cili tregon në fakt, e ne do të kontribuojmë në përmirësimin e jetë së qytetarëve. Ne konsiderojmë që ky 75 milonësh duhet të subvencionojë tarifat e energjisë elektrike për të gjithë qytetarët e Kosovës pa dallim. Kemi propozuar që faktikisht, Qeveria e Kosovës ta ulë tatimin mbi vlerën e shtuar mbi energjinë elektrike në zero, do të thotë le të jetë një ndihmë edhe kjo sepse nuk ka kurrfarë kuptimi që në njërën anë ZRRE të ngritë tarifat e energjisë elektrike dhe në anën tjetër kjo të rëndohet edhe mëtutje nga inkasimi i tatimit mbi vlerën e shtuar në energjisë elektrike. Nëse qeveria heq dorë nga tatimi mbi vlerën e shtuar për komplet vitin atëherë barra apo pjesa që mbetet për tu mbuluar nga tarifat është rreth 21 milionë euro, ne kemi konsideruar se meqenëse Qeveria e Kosovës duhet me patjetër të gjejë rreth 43 milionë për të mbuluar energjinë elektrike të katër komunave veriore, Qeveria duhet të gjejë edhe 21 milionë të tjera në mënyrë që të mbulojë tarifat për të gjithë qytetarët e Kosovës”, tha Bajrami.

Bajrami tha se si LDK kanë propozuar që në qershor të hapet diskutim publik për tarifat e reja, të cilat më pastaj do të mund të hynin në fuqi në vitin 2023.

“Kemi propozuar që në qershor, kur përfundon komplet sezona e ftohtë ZRRE, t’i hap diskutimet publike për diskutim të tarifave të reja dhe t’i paralajmëroj qytetarët që të ketë një periudhë tranzitore dhe përgatitore për të kaluar në sisteme alternative të ngrohjes, për tarifat e reja do të mund të merrej vendimin në gjysmën e dytë të vitit 2022, të cilat ne propozojmë që duhet të hyjnë në fuqi në vitin 2023”, u shpreh ajo.

Lidhja Demokratike e Kosovës (LDK) në kuadër të propozimeve për ZRRE-në dhe Qeverinë e Kosovës ka propozuar edhe krijimin e Fondit për Përkujdesje për konsumatorët në nevojë si dhe zhbllokimin e të gjitha investimeve në sektorin e energjisë.

Bordi i Zyrës së Rregullatorit për Energji ka mbajtur mbledhje sot, kur është edhe afati i fundit që ky institucion do t’i pranojë komentet për çështjen e shtrenjtimit të rrymës, të propozuar përmes një raporti konsultativ që u publikua më 17 janar.

Aktualitet

ZRRE: Liberalizimi i tregut të energjisë elektrike, detyrim ligjor

Published

3 hours ago

August 20, 2025

UBT News

Zyra e Rregullatorit për Energji (ZRRE) përmes një komunikate për media sqaron se procesi i liberalizimit të tregut të energjisë elektrike është një detyrim ligjor, i përcaktuar me ligjet e miratuara nga Kuvendi i Republikës së Kosovës në vitin 2016.

“Në atë kohë, Kuvendi i Republikës së Kosovës në ligjet e sektorit të energjisë ka transpozuar direktivat Evropiane për energjinë, duke përcaktuar se duhet të bëhet liberalizimi i tregut të energjisë elektrike. Pra, procesi i derregullimit dhe liberalizimit të tregut të energjisë elektrike në ligjet e sektorit të energjisë derivon nga obligimet kontraktuale që ka Republika e Kosovës si palë nënshkruese e Traktatit të Komunitetit të Energjisë” thuhet në komunikatë.

Duhet theksuar se nga viti 2017, ZRRE ka ndërmarrë të gjitha veprime ligjore dhe rregullative për krijimin e kushteve për liberalizimin e tregut të energjisë elektrike, dhe në funksion të saj në vitin 2017 ka filluar procesin e derregullimit dhe liberalizimit të tregut të energjisë, me daljen në treg të konsumatorëve industrial.

Megjithatë, zbatimi i mëtutjeshëm i procesit të liberalizimit të tregut të energjisë për shkak të rrethanave të jashtëzakonshme ka pasur vonesa, si pasojë e pandemisë COVID-19 dhe krizës energjetike ndërkombëtare.

Pas kësaj, ZRRE ka vendosur që nga data 1 Qershor 2025 të vazhdoj zbatimin e liberalizimit të tregut të energjisë elektrike, si detyrim ligjor dhe në të mirë të konsumatorëve fundor. Duhet theksuar se liberalizimi i tregut të energjisë elektrike është i rëndësishëm jo vetëm për përafrimin me Direktivat Evropiane, por edhe sepse krijon konkurrencë në një treg që deri më tani ka funksionuar si monopol.

ZRRE ka të licencuar 23 kompani për aktivitetin e furnizimit me energji elektrike. Aktualisht, në tregun e hapur të energjisë elektrike janë 23 kompani të licencuara për furnizim me energji elektrik, prej të cilave 7 furnizues janë aktivë, të cilët kanë nënshkruar kontrata me konsumatorët.

Sqarojmë opinionin publik se 9963 pika matëse të ndërmarrjeve ekonomike i plotësojnë kriteret ligjore për të dalur në tregun e hapur të energjisë elektrike, ku prej tyre:

9212 pika matëse (92%) janë duke u furnizuar me kontrata komerciale;

751 pika matëse (8%) ende janë pa furnizues.

Duhet theksuar se edhe këto pika matëse të cilët kanë mbetur pa furnizues, kanë qenë duke u furnizuar me energji elektrike që nga data 1 Qershor 2025, dhe se nga ajo periudhë kanë pasur mundësi të zgjedhin furnizuesin me energji elektrike dhe të nënshkruajnë kontratë.

Për të lehtësuar kalimin e konsumatorëve që i plotësojnë kriteret për të dal në treg të hapur, ZRRE sipas dispozitave ligjore të Ligjit për Energji Elektrike, ka përcaktuar Korporatën Energjetike të Kosovës (KEK) si Furnizues i Mundësisë Fundit (FMF), dhe këta konsumator që deri më 1 Qershor 2025 nuk kishin lidhur ende kontrata komerciale, janë furnizuar përmes FMF për një periudhë gjashtëdhjetë (60) ditore.

Gjithashtu, duhet njoftuar se sipas dispozitave ligjore të Ligjit për Energjinë Elektrike, konsumatorët të cilët dështojnë të hyjnë në marrëveshje me një nga furnizuesit e licencuar, operatori i sistemit është i obliguar të ndërpresë furnizimin me energji elektrike për ta.

ZRRE do të vazhdojë mbikëqyrjen e procesit dhe inkurajon të gjithë konsumatorët që i plotësojnë kriteret për të dal në treg të hapur, e të cilët ende nuk kanë nënshkruar kontrata komerciale, sa më shpejt të lidhin kontratë me njërin nga furnizuesit e licencuar, për të garantuar furnizim të qëndrueshëm.

Aktualitet

Vdes drejtoresha e Shëndetësisë në Kamenicë, Greta Kryeziu

Published

3 hours ago

August 20, 2025

UBT News

Ka ndërruar jetë drejtoresha e Shëndetësisë në komunën e Kamenicës, Greta Kryeziu i cila ka qenë duke u ballafaquar me një sëmundje të rëndë kohët e fundit.

Lajmin e hidhur e kanë konfirmuar vetë familjarët e Kryeziut me mëngjes.

Për faktin që ajo ishte duke u përballur me këtë sëmundje të rëndë, fondi humanitar ishte i hapur edhe për dërgim jashtë vendit.

Aktualitet

Elezi: Edhe 10 ditë afat për regjistrimin e votuesve jashtë Kosovës

Published

4 hours ago

August 20, 2025

UBT News

Zëdhënësi i KQZ-ë, Valmir Elezi ka thënë se vetëm edhe 10 ditë kanë mbetur deri në përfundimin e afatit për regjistrimin e votuesve jashtë Kosovës, të cilët do të mund të votojnë përmes postës në zgjedhjet për kryetarë të komunave dhe për kuvende komunale.

“Prej gati një muaji është duke vazhduar periudha për regjistrimin e votuesve jashtë Kosovës për votim me postë në zgjedhjet lokale për kryetarë të komunave dhe për kuvende komunale, e cila do të përfundojë pas 10 ditësh. Nga data 23 korrik dhe deri të martën, më 19 gusht, përmes platformës elektronike janë pranuar 9961 aplikime për regjistrim për votim me postë, prej të cilave janë aprovuar 7681, ndërkaq janë refuzuar 2280”, tha Elezi.

Sipas tij, në shumicën e rasteve, aplikuesit nuk kanë paraqitur dëshmi për adresën e tyre jashtë Kosovës.

“Në shumicën e rasteve të refuzuara, aplikuesit nuk kanë paraqitur njërin nga dokumentet që dëshmon adresën e tij jashtë Kosovës. KQZ është duke e informuar individualisht çdo aplikues të refuzuar për arsyet e refuzimit të kërkesës së tyre dhe se do të mund të riaplikojnë duke bashkëngjitur dokumentet e nevojshme në përputhje me udhëzimet e KQZ-së”, tha Elezi.

Sipas KQZ-së, votimi përmes postës do të fillojë më 17 shtator dhe do të përfundojë më 11 tetor 2025.

Ky proces do të vlejë vetëm për votuesit që arrijnë të regjistrohen deri më 29 gusht.

Aktualitet

Raporti 24 orësh nga Policia e Kosovës

Published

4 hours ago

August 20, 2025

UBT News

Në raportin e fundit 24 orësh nga Policia e Kosovës, në disa qytete të Kosovës ka pasur incidente kriminale dhe shifra të larta të gjobave të shqiptuara në kundërvajtje.

AKSIDENTE TRAFIKU DHE GJOBA

Gjatë 24 orëve të fundit janë shqiptuar 2239 tiketa trafiku, janë shkaktuar 72 aksidente me dëme materiale dhe 19 aksidente me të lënduar. Zyra e Informimit nga PK ka njoftuar se 20 persona janë arrestuar, kurse 15 janë dërguar në mbajtje.

INCIDENTET KRIMINALE-PRISHTINË

POSEDIM I PAAUTORIZUAR I NARKOTIKËVE

Rr. Ahmet Krasniqi, Prishtinë 19.08.2025 – 00:20. Njësiti policor ka ndaluar një automjet, gjatë kontrollit tek një pasagjer është gjetur dhe konfiskuar një sasi me substancë narkotike dyshohet marihuanë me peshë rreth 11.6 gram. Me vendim të prokurorit i dyshuari është liruar në procedurë të rregullt.

Rr. Aziz Kelmendi, Prishtinë 19.08.2025-11:00. Raportohet se me vendim të prokurorit është bastis shtëpia e të dyshuarit mashkull kosovar, ku janë gjet dhe sekuestruar 99.4 gr marihuanë dhe një peshore. Me vendim të prokurorit pas intervistimit rasti shkon në procedurë të rregullt.

LËNDIM I LEHTË TRUPOR

Fsh. Tërstenik, Gllogoc 18.08.2025-18:40. Raportohet se datë 19.08.2025 janë arrestuar dy të dyshuar meshkuj, pasi që të njëjtit kishin sulmuar fizikisht viktimën mashkull kosovar. Viktima ka pësuar lëndime trupore dhe është dërguar në QKUK. Me vendim të prokurorit të dyshuarit dërgohen në mbajtje.

DHUNË NË FAMILJE

Prishtinë,19.08.2025-20:00. Është raportuar se viktima femër kosovare, është kanosur nga i dyshuari mashkull bashkëshorti i saj dhe e njëjta ndjehet e frikësuar dhe e rrezikuar prej tij. Lidhur me rasti nuk është intervistuar i dyshuari për shkak të gjendjes së tij shëndetësore dhe mbetet që në ditët në vijim të intervistohet. Ankuesja pas përfundimit të procedurave është vendosur në një vend ku ndihet e sigurt.

VJEDHJE

Rr. Hysen Gjakolli-Fushë Kosovë,19.08.2025-10:59. Ankuesi mashkull kosovar ka lajmëruar se nga vetura e tij i është vjedhur një çantë me dokumente personale si dhe para. Lidhur me rastin është identifikuar dhe arrestuar i dyshuari i mitur që dyshohet se ka kryer vjedhjen. Pas intervistimit, me aktvendim të prokurorit kujdestar i dyshuari dërgohet në qendrën e mbajtjes për 24 orë.

PERSON I ZHDUKUR

Rr. Dardania Fushë Kosovë 18.08.2025 – 21:00. Ankuesi mashkull kosovar ka raportuar se djali i tij ka dalë nga shtëpia dhe ende nuk dihet vendndodhja e tij. Rasti është duke u hetuar.

Rr.Lidhja e Prizrenit-Prishtinë,19.08.2025-21:20. Ankuesja femër kosovare ka lajmëruar se më datën 19.08.2025, vajza e saj e mitur është larguar nga shtëpia dhe deri me tani nuk është kthyer në shtëpi.

INCIDENTET KRIMINALE-GJILAN

ASGJËSIMI, DËMTIMI OSE HEQJA E PAJISJEVE MBROJTËSE DHE RREZIKIMI I SIGURISË NË VENDIN E PUNËS

Rr. Metush Krasniqi, Gjilan 18.08.2025 – 12:00. Me 19.08.2025 lidhur me rastin është raportuar se viktima i cili ka qenë i lënduar dhe duke u trajtuar në QKUK, ka ndërruar jetë. Me vendim të prokurorit trupi i pa jetë është dërguar në IML për obduksion.

INCIDENTET KRIMINALE-FERIZAJ

SULM NDAJ PERSONIT ZYRTAR

Rr. Gjon Sereqi-Ferizaj,19.08.2025-21:15. Deri sa njësia policore e biçikletave ka tentuar të ndalojë një motoçiklistë, i njëjti nuk kishte përfillur shenjat e ndalimit. Ai kishte rritur shpejtësinë dhe kishte goditur dy zyrtarët policorë duke u shkaktuar lëndime trupore dhe ishte larguar nga vendi i ngjarjes. Dy zyrtarët policorë të lënduar janë dërguar në Emergjencën e Spitalit në Ferizaj për tretman mjekësor. Lidhur me rastin është identifikuar i dyshuari pasi në vendin e ngjarjes i kishte rënë telefoni celular dhe i dyshuari së bashku me prindin e tij janë paraqitur në stacion të policisë. Pas intervistimit, me urdhër të prokurorit kujdestar i dyshuari lirohet në procedurë të rregullt.

Rr. Gjon Sereqi-Ferizaj,19.08.2025-21:20. Deri sa njësia e trafiku të qytetit ka tentuar që të ndalojë një grup të rinjsh me motoçikleta drejtuesi i një motoçiklete ka goditur zyrtarin policor, i cili ka pësuar lëndime trupore. Dy personat të cilët kanë qenë ne këtë motoçikletë janë arrestuar. Në lidhje me rastet është njoftuar prokurori kujdestar. Pas intervistimit, me urdhër të prokurorit kujdestar, të dyshuarit janë liruar në procedurë të rregullt.

POSEDIM I PAAUTORIZUAR I NARKOTIKËVE

Rr. Enver Topalli, Ferizaj 19.08.2025 – 00:05. Janë arrestuar dy të dyshuar meshkuj kosovarë pasi që gjatë kontrollit u është gjetur një sasi prej 4.9 gr dyshohet kokainë. Gjatë arrestimit njëri nga të dyshuarit dhe një zyrtar policor kanë pësuar lëndime të lehta trupore për të cilat kanë marrë raport mjekësor. Me vendim të prokurorit njëri nga të dyshuarit është dërguar në mbajtje ndërsa tjetri është liruar në procedurë të rregullt.

SHKAKTIM I RREZIKUT TË PËRGJITHSHËM & ARMËMBAJTJE PA LEJE & LËNDIM I LEHTË TRUPOR

Rr. Rexhep Bislimi-Viti,19.08.2025-23:20. Janë arrestuar dy te dyshuar meshkuj kosovarë pasi që pas një mosmarrëveshje në mes vete janë përleshur fizikisht dhe njëri prej të dyshuarave kishte shtënë me armë zjarri një herë në ajër dhe ishte larguar prej vendit të ngjarjes. Njësia policore kishte hasur dhe konfiskuar një gëzhojë në vendin e ngjarjes si dhe në shtëpinë e njërit prej të dyshuarve kishte sekuestruar një armë revole me dy fishekë si dhe lejen e posedimit të armës. Pas intervistimit të dyshuarve, me urdhër të prokurorit kujdestar njëri i dyshuar është liruar në procedurë të rregullt, ndërsa i dyshuari tjetër është dërguar në qendrën e mbajtjes për 48 orë.

INCIDENTET KRIMINALE-PRIZREN

ORGANIZIMI I SKEMAVE PIRAMIDALE DHE BIXHOZIT TË PALIGJSHËM

Rr. Haxhi Zeka-Prizren,19.08.2025-20:00. Pas një pune hetimore njësitë policore kanë kryer urdhër kontroll në disa lokacione ku dyshohej se pronarët dhe punëtorët e disa lokaleve mundësojnë zhvillimin e lojërave të fatit. Gjatë kontrollit janë gjetur dëshmi dhe fakte mbi kryerjen e këtyre veprave penale të cilat janë sekuestruar përkohësisht. Lidhur me rastin prokurori kujdestar ka lëshuar aktvendim mbi ndalimin për dy të dyshuar meshkuj kosovarë, ndërsa tre të dyshuar të tjerë janë liruar në procedurë të rregullt.

ARMBAJTJE PA LEJE

Rr. Transiti i Vjetër, Prizren 16.08.2025-00:30. Njësiti i hetuesisë ka identifikuar dhe arrestuar të dyshuarin mashkull kosovar, i cili kishte shtënë në një sall dasmash me armë zjarrit në ajër. Nga i dyshuari është konfiskuar një pistoletë. Me vendim të prokurorit i dyshuari pas intervistimit dërgohet në mbajtje.

INCIDENTET KRIMINALE-PEJË

NXITJA E PËRQARJES DHE MOS DURIMIT

Pejë ,16.08.2025 NN. Viktima mashkull kosovar, ka njoftuar se një person në rrjetin social Facebook i kishte komentuar me disa shkrime duke nxitur përçarje dhe mos durim e më pas ka pasur edhe komente të tjera nga disa persona të tjerë të cilët kanë përdorë fjalë fyese dhe denigruese duke e mbështetur komentin e personit të dyshuar. Rasti duke u hetuar.

DHUNË NË FAMILJE

Istog,19.08.2025-21:30. Është arrestuar i dyshuari mashkull kosovar, pasi që i njëjti nën ndikim të alkoolit kishte shkuar te viktima motra e tij dhe pas një mosmarrëveshje kishte dëmtuar derën e banesës së saj. Pas intervistimit, me aktvendim të prokurorit kujdestar i dyshuari dërgohet në qendrën e mbajtjes për 48 orë.

INCIDENTET KRIMINALE-GJAKOVË

HETIM I VDEKJES

Rr. Avdyl Krasniqi, Malishevë 19.08.2025-14:10. Raportohet se viktima mashkull kosovar, është gjetur pa shenja jete. Vdekjen e viktimës e ka konstatuar mjeku kujdestar. Me vendim të prokurorit trupi i pa jetë dërgohet në obduksion.

DHUNË NË FAMILJE

Rahovec,19.08.2025-19:40. Është raportuar se viktima femër kosovare ka pësuar dhunë nga i dyshuari mashkull kosovar (vjehrri i saj). Lidhur me rastin, viktimës i është ofruar ndihmë mjekësore dhe e njëjta është vendosur në shtëpinë e prindërve të saj dhe nuk ka dëshiruar urdhër mbrojtës. Ndërsa i dyshuari është intervistuar dhe me urdhër të prokurorit kujdestar është liruar në procedurë të rregullt.

INCIDENTET KRIMINALE-MITROVICË VERI

SHANTAZH

Fsh.Korilë, Zveqan 18.08.2025-20:59. Ankuesi mashkull kosovar ka njoftuar se e dyshuara femër kosovare e kishte shantazhuar se do t’i publikonte video intime nëse nuk i paguan shuma të caktura parash. Rasti duke u hetuar.

VJEDHJE

Rr. Kolashini-Mitrovicë Veri,23.07.2025-08:30. Lidhur me rastin e lajmëruar më datën e lartcekur, më datë 19.08.2025 është arrestuar i dyshuari mashkull kosovar dhe pas intervistimit me aktvendim të prokurorit kujdestar është dërguar në qendrën e mbajtje për 48 orë.

INCIDENTET KRIMINALE-DEPARTAMENTI I POLICISË KUFITARE

VJEDHJE E PYLLIT

Fshati Kashicë-Istog,19.08.2025-20:00. Njësia patrullues gjatë patrullimit kanë ndaluar një kamionetë me targa vendore të cilën e drejtonte i dyshuari mashkull kosovar dhe gjatë kontrollimit të dokumenteve dhe ngarkesës është vërejtur se në automjet kishte ngarkuar dru për djegie rreth 4m kub për të cilat i dyshuari nuk posedonte dokument si dhe drunjtë nuk ishin të damkosura. Me urdhër të prokurorit kujdestar, i dyshuari është liruar në procedurë të rregullt.