Lajmet

​Lajçak: Dialogu është përgjegjësi e të gjithëve, marrëveshja brenda mandatit të Qeverisë Kurti 2

Published

5 years ago

on

Emisari special i Bashkimit Evropian për dialogun Kosovë-Serbi, Miroslav Lajçak është shfaqur optimist se dialogu me Serbinë do të përfundojë nën mandatin e qeverisë së ardhshme.

Pas takimit me ushtruesen e detyrës së presidentit, Vjosa Osmani, Lajçak tha se ka marrë mesazhe të qarta nga fituesit e zgjedhjeve të 14 shkurtit se dialogu do të vazhdojë.

Duke dhënë disa mesazhe të tija, Lajçak sqaroi edhe paraqitjen e tij prapa një harte ku Kosova shihet vetëm me vijë administrative në kufirin me Serbinë.

“Mesazhi i parë është që të uroj institucionet e Kosovës për zgjedhjet parlamentare të rregullta të cilat për herë të parë janë mbajtur pa ndonjë rol aktiv të komunitetit ndërkombëtar. E po ashtu t’i përgëzojë partitë politike për pranimin e rezultateve menjëherë pas përfundimit të zgjedhjeve. Mesazhi i dytë është që Bashkimi Evropian dhe ShBA janë në një partneritet dhe me ardhjen e administratës Biden, marrëdhënia është më e afërt dhe dëshirojmë që ta arrijmë qëllimin e njëjtë që është e ardhmja evropiane për Kosovën dhe Ballkanin Perëndimor. Mesazhi i tretë është mbështetja e programit elektoral të zotëri Kurtit dhe zonjës Osmanit. BE është e gatshme të mbështesë dhe të krijojë vende të reja të punës, investimet e reja dhe luftimin e korrupsionit. Mesazhi i katërt është që vendet e BE-së dhe ShBA presin vazhdimin e procesit të dialogut. Nga dy takimet e mia me zotëri Kurtin dhe Osmanin për atë se ku jemi me procesin e dialogut dhe çka kemi arritur, posaçërisht pas vazhdimit në korrik dhe cilat janë hapat e tjerë që i parashohim. Përfundimi i këtyre takimeve është se dialogu do të vazhdojë, duhet të krijohen disa procedura, por ka mirëkuptim për vazhdimin e dialogut. Mesazhi i pestë është për unitetin politik në Kosovë për dialogun pasi është përgjegjësi e të gjitha partive”, tha ai.

Lidhur me afatet kohore për përfundimin e dialogut, Lajçak përmes një konference për medie tha se varet nga Kosova dhe Serbia.

“Besoj se do ta kompletojmë këtë proces me një marrëveshje gjatë mandatit të zotëri Kurtit dhe Osmanit. Nuk shoh pengesa në këtë rrugë”, tha ai.

Sa i përket paraqitjes së tij prapa një harte ku Kosova paraqitet vetëm me vijë administrative në kufirin me Serbinë, Lajçak tha ajo është harta zyrtare që i është dhënë nga institucionet e Bashkimi Evropian.

“Për çështjen e hartës e kam sqaruar. Një zyrtar i BE-së duhet të përdorë vetëm harta zyrtare të BE-së. Kjo është harta që na kanë dhënë. Ndarja ndërmjet Kosovës dhe Serbisë në atë hartë është e qartë. Kjo ka krijuar një reaksion emocional, por do të ishte jo serioze nëse unë do të vendosja harta të tjera. Duhet të respektoj pozitën e BE-së. Kjo është dëshmi se kemi nevojë për dialog”, tha ai.

Në ditën e dytë të qëndrimit në Kosovë, Lajçak takoi edhe liderët e tjerë politikë dhe institucionalë.

Related Topics:
Continue Reading

Lajmet

Izraeli: Vramë komandantin e inxhinierisë së Hezbollahut gjatë sulmeve në jug të Libanit

Published

18 minutes ago

on

June 5, 2026

By

Ushtria e Izraelit ka pretenduar se ka eliminuar një komandant të njësisë së inxhinierisë së Hezbollahut.

Në një postim në platformën “X”, Forcat Mbrojtëse të Izraelit (IDF) kanë bërë të ditur se javën e kaluar kanë goditur dhe kanë vrarë Abed Harb, të cilin e cilësojnë si pjesëtar të lartë të grupit.

Sipas IDF-së, Harb ka udhëhequr njësinë e inxhinierisë përgjegjëse për montimin dhe vendosjen e eksplozivëve, të cilët, sipas pretendimeve të ushtrisë izraelite, janë përdorur për të synuar ushtarët izraelitë në jug të Libanit.

“Harb ka qenë përgjegjës për disa sulme që nga viti 2006”, thuhet në deklaratën e IDF-së.

Po ashtu, ushtria izraelite ka njoftuar se Forcat Ajrore të saj kanë shkatërruar edhe një lëshues raketash që, sipas tyre, është përdorur nga Hezbollahu për sulme ndaj forcave izraelite që veprojnë në jug të Libanit.

Ngjarja vjen në një kohë kur raportimet ndërkombëtare bëjnë të ditur për tensione të vazhdueshme në rajon, ndërsa Hezbollahu së fundi ka refuzuar një propozim për armëpushim të mbështetur nga Shtetet e Bashkuara të Amerikës mes Libanit dhe Izraelit.

Continue Reading

Lajmet

Studentët e UBT-së sjellin shfaqjen muzikale “DREAM” në kuadër të Javës së Dizajnit

Published

35 minutes ago

on

June 5, 2026

By

Studentët e Fakultetit të Muzikës Moderne në UBT kanë prezantuar me sukses shfaqjen muzikale “DREAM”, e cila u realizua në kuadër të aktiviteteve të Javës së Dizajnit në këtë institucion.

Performanca artistike u zhvillua si pjesë e lëndës “Performance në Skenë” dhe u interpretua nga studentët e grupit të Vokalit të vitit të parë dhe të dytë, nën mentorimin dhe udhëheqjen e profesoreshës Fatlume Bunjaku.

Shfaqja solli para publikut një program të pasur muzikor dhe artistik, ku studentët patën mundësinë të shfaqin talentin e tyre, kreativitetin dhe aftësitë skenike të fituara gjatë procesit të studimeve. Përmes interpretimit live, ata demonstruan jo vetëm përgatitjen akademike, por edhe zhvillimin e tyre artistik në skenë.

Në këtë aktivitet morën pjesë studentë, profesorë dhe dashamirës të artit, të cilët patën mundësi të ndjekin një performancë që ndërthurte muzikën, interpretimin vokal dhe shprehjen artistike, duke krijuar një atmosferë të veçantë kulturore në kuadër të Javës së Dizajnit.

Shfaqja “DREAM” shërbeu gjithashtu si një projekt përmbyllës për studentët e përfshirë, duke shënuar finalizimin e një etape të rëndësishme të vitit akademik dhe duke u ofruar atyre eksperiencën e drejtpërdrejtë të performancës para publikut.

Përmes këtij aktiviteti, studentët patën mundësinë të përjetojnë nga afër dinamikën e skenës profesionale, duke forcuar aftësitë e tyre artistike dhe vetëbesimin në interpretim.

UBT, përmes aktiviteteve të tilla, vazhdon të promovojë zhvillimin kreativ dhe profesional të studentëve, duke krijuar hapësira ku ata mund të shfaqin potencialin e tyre në fusha të ndryshme artistike dhe kulturore.

Continue Reading

Lajmet

Oda Ekonomike Amerikane: Gazi amerikan duhet të bëhet prioritet strategjik për Kosovën

Published

1 hour ago

on

June 5, 2026

By

Oda Ekonomike Amerikane në Kosovë i ka bërë thirrje Qeverisë së Kosovës që qasjen në gazin e lëngshëm natyror (LNG) nga Shtetet e Bashkuara të Amerikës dhe zhvillimin e infrastrukturës përkatëse ta trajtojë si prioritet strategjik kombëtar.

Sipas Odës, një orientim i tillë do të kontribuonte në forcimin e sigurisë energjetike të vendit, por edhe në thellimin e bashkëpunimit strategjik me SHBA-në.

Në reagim theksohet se sistemi energjetik i Kosovës vazhdon të mbështetet kryesisht në termocentralet me linjit dhe në importin e energjisë elektrike, çka sipas tyre paraqet barrë për ekonominë dhe rrit ndjeshmërinë ndaj luhatjeve të tregut.

Oda Amerikane vlerëson se zhvillimi i infrastrukturës së gazit dhe integrimi në rrjetet rajonale të LNG-së do të ndihmonte në diversifikimin e burimeve energjetike, uljen e kostove të importit dhe rritjen e konkurrueshmërisë së ekonomisë së Kosovës.

Po ashtu, theksohet se vendet e rajonit tashmë po pozicionohen në korridoret e reja energjetike, ndërsa Kosova rrezikon të mbetet jashtë këtyre zhvillimeve nëse nuk vepron me kohë.

Në fund, Oda Amerikane i bën thirrje institucioneve që të ndërmarrin hapa konkretë drejt integrimit në infrastrukturën rajonale të gazit, duke paralajmëruar se mosveprimi mund të rrisë cenueshmërinë energjetike të vendit.

Continue Reading

Lajmet

“Dardanet” luajnë sot ndaj Kroacisë në “Fadil Vokrri”

Published

1 hour ago

on

June 5, 2026

By

Përfaqësuesja e Kosovës në futboll të femrave, “Dardanet”, do të zhvillojnë sot ndeshje miqësore ndaj Kroacisë.

Takimi nis nga ora 19:00 në stadiumin “Fadil Vokrri” në Prishtinë dhe pritet të sjellë atmosferë sportive në kryeqytet.

Ndeshja do të transmetohet drejtpërdrejt në Art Sport, ndërsa hyrja në stadium është falas.

Organizatorët kanë bërë thirrje për mbështetje nga tifozët, duke theksuar rëndësinë e përkrahjes së përfaqësueses së Kosovës në futboll të femrave.

Continue Reading

Të kërkuara