Të paktën 19 persona u vranë dhe qindra të tjerë u plagosën pasi një tërmet me magnitudë 6.3 ballë goditi Afganistanin verior rreth orës 1 të mëngjesit sipas orës lokale të hënën (20:30 GMT të dielën), thanë zyrtarët.

Shumica e viktimave u raportuan në provincat veriore Samangan dhe Balkh, sipas Shoqatës së Gjysmëhënës së Kuqe Afgane, shkruan Anadolu.

Thuhet se tërmeti shkaktoi gjithashtu humbje të mëdha financiare. Operacionet e kërkim-shpëtimit po vazhdojnë për të kërkuar të mbijetuar./S.K/KP/Anadolu/

E përditësuar:

08:30

Rrjeti i OJQ-ve AVONET ka njoftuar se sot, më 3 nëntor 2025, do të dorëzojë padi në Gjykatën Themelore në Prishtinë – Departamentin për Çështje Administrative, për anulimin e vendimit të Qeverisë në detyrë të Republikës së Kosovës, që ka të bëjë me aprovimin e projektligjit mbi ndarjet buxhetore për vitin 2026.

Sipas njoftimit, së bashku me padinë do të dorëzohet edhe propozimi për vendosjen e masës së përkohshme të sigurisë, me qëllim pezullimin e ekzekutimit të këtij vendimi.

Dorëzimi do të bëhet në Pallatin e Drejtësisë, në Departamentin për Çështje Administrative, me fillim nga ora 10:30.

Pas dorëzimit të padisë, drejtori ekzekutiv i AVONET, Kenan Gashi, do të mbajë një deklaratë për media, ku do të shpjegojë qëllimin e kësaj padie, e cila, sipas njoftimit, lidhet me respektimin e Kushtetutës së Republikës së Kosovës, Ligjit për Qeverinë, si dhe parimet e ndarjes së pushteteve dhe sundimit të ligjit.

Njoftimi i plotë:

Dorëzimi i padisë ndaj Qeverisë në detyrë të Republikës së Kosovës për anulimin e vendimit mbi projektligjin për ndarjet buxhetore 2026

Të nderuara media,

Rrjeti i OJQ-ve AVONET ju fton të merrni pjesë në aktivitetin mbi dorëzimin e padisë në Gjykatën Themelore në Prishtinë – Departamentin për Çështje Administrative, për anulimin e vendimit të Qeverisë në detyrë të Republikës së Kosovës (nr. 02/273, datë 31.10.2025), për aprovimin e projektligjit mbi ndarjet buxhetore të Republikës së Kosovës për vitin 2026, si dhe së bashku me padi do të dorëzohet edhe propozimi vendosjen e masës së përkohshme të sigurisë për pezullimin e ekzekutimit të këtij vendimi.

Dorëzimi i padisë do të bëhet në Gjykatën Themelore në Prishtinë- Departamenti për Çështje Administrative (Pallati i Drejtësisë), Hajvali, Prishtinë me fillim nga  Ora 10:30.

Pjesëmarrja dhe përcjellja e këtij aktiviteti nga ana juaj do të kontribuonte në informimin e drejtë të publikut dhe transparencën për një çështje me interes të lartë publik./S.K/EO/

Sot mbushen tri dekada nga shkuarja në amshim e plakut të urtë Anton Çetta, figurë që mbahet mend për urtësinë e tij, punën e madhe që ka bërë në mbledhjen e folklorit shqiptar, si dhe në Lëvizjen e pajtimit të gjaqeve

Kjo lëvizje u zhvillua në fund të viteve 1980 dhe fillim të viteve 1990 dhe arriti për një kohë të shkurtër të shuante pjesën më të madhe të hasmërive mes shqiptarëve në Kosovë dhe trevat tjera shqiptare.

Kjo Lëvizje e udhëhequr nga ai u përkrah nga studentët dhe intelektualët e kohës. Anton Çetta kujtohet si “njeriu i pajtimit”, simbol i urtësisë, kulturës dhe humanizmit shqiptar./S.K/KP/

Qytetarët në Maqedoninë e Veriut votuan më 2 nëntor në raundin e dytë të zgjedhjeve për kryetar komune në 33 komuna. Pas përfundimit të procesit të votimit pjesëmarrja sipas Komisionit Shtetëror të Zgjedhjeve ishte rreth 45 për qind.

Partia në pushtet, VMRO-DPMNE, ka kryesuar në 19 nga 33 komunat ku u mbajt balotazhi i zgjedhjeve lokale. Ndër vendet ku  kryesoi kjo parti është kryeqyteti Shkup, por edhe Kërçova dhe Koçani, si dhe komunat e kryeqytetit, Karposh dhe Aerodrom.

Ndërkohë, partneri i tij në qeveri, koalicionit shqiptar VLEN, kryeson në pesë komuna: Bogovinë, Brvenicë, Dibër, Dollneni dhe Tetovë.

Kandidatët nga LSDM-ja opozitare kryesojnë në Qendër të Shkupit, si dhe në Krushevë, Zërnovc dhe Makedonska Kamenicë.

Komunat:

Kandidati i VLEN në Tetovë, Bilall Kasami, fitoi në garën e balotazhi, duke siguruar 21 mijë e katër vota ose 53.75 për qind kundrejt kandidatit tjetër shqiptar Bajram Rexhepi nga Aleanca Kombëtare për Integrim AKI me 15 mijë e 958 vota ose 40.84 për qind.

Dollnen

Kandidati i koalicionit VLEN Blerim Islami ka fituar bindshëm në raundin e dytë ndaj kundërkandidatit të tij nga radhët e koalicionit Maqedonia Jote, udhëhequr nga VMRO-DPMNE, Sasho Velanovski.

Blerim Islami ka marrë 3 mijë e 979 vota ose 57.38 për qind, kur Komisioni Shtetëror i Zgjedhjeve ka numëruar të gjitha 40 vendvotimet në Dollnen.

Bogovinë

Ndërkaq, kandidati i koalicionit VLEN Feti Abazi ka fituar garën për kryetar të komunës Bogovinë në balotazhin e 9 nëntorit.

Ai ka marrë 6 mijë e 371 vota ose 54.87 për qind, ndaj kandidatit tjetër shqiptar Besnik Emshi nga Aleanca Kombëtare për Integrim AKI me 5 mijë e 38 vota ose 43.39 për qind.

Studeniçan

Kandidati i Aleancës Kombëtare për Integrim AKI Ejup Abazi ka fituar balotazhin për kryetar në Studeniçan.

Pas numërimit të votave në të gjitha 31 vendvotimet e kësaj komune, Ejup Abazi ka marrë 4.353 vota ose 49.92 për qind.

Kandidati i pavarur Azem Sadiku ka marrë 4.159 vota ose 47.69 për qind.

Strugë

Mendi Qyra, kandidat i pavarur, ka fituar betejën për kryetarin e komunës së Strugës në balotazhin e 9 nëntorit.

Ai mori më shumë vota se kundërkandidati i tij Arsim Dalim nga Aleanca për Integrim Kombëtar – AKI.

Sipas rezultateve zyrtare nga numërimi i gjithsej 101 vendvotimeve, Komisioni Shtetëror Zgjedhor ka bërë të ditur se Mendi Qyra mori gjithsej 12.463 vota ose 49.47 për qind, ndërsa Arsim Dalipi 11.946 vota ose 47.42 për qind./S.K/KP/