Lajmet

Kurti: Duam ta ndalim hajninë – nuk ka kushëri të mi nëpër institucione

Published

5 years ago

May 27, 2021

Betim Gashi

Kryeministri i Kosovës, Albin Kurti ka thënë se me qeverisjen e tij nuk do të ketë familjarë të politikanëve që do të favorizohen. Ai në seancën e sotme parlamentare ka thënë se nuk ka kushëri të tij në institucionet e Kosovës.

“Ajo që është e të gjithëve e bëhet veç e dikujt ajo është hajni, si mos të jetë hajni, një fabrikë, shpejtë e shpejtë vendosin disa njerëz që na qenka barrë për ekonominë e Kosovës dhe duhet të ja japin njërit, e aty kanë qenë ilaket, jo tash nuk ka Kurti në qeveri, asnjë me mbiemrin Kurti nuk ka në qeveri përveç meje, a e kuptoni, kujtoni të kaluarën dhe shihni qysh është sot, nuk ka kushëri të mi nëpër institucione”, ka thënë ai.

Kurti ka thënë se vendit i duhet prokurori aktive dhe gjyqësor efikas, që sipas tij, aktualisht nuk ekziston asnjëra. Ai ka thënë se prokuroria nuk po merret me personat që kryejnë krime pasi Kosova ka elemente të shtetit të kapur.

“Prokuroria do të duhej të merrej me krimet. Po çka të bëjmë kur nuk po merret? Ne duam shtetin e së drejtës, prokuroria duhet t’i gjurmojë, hetojë, hulumtojë, të ngritë aktakuza për kriminelë, por nuk po e bën, sepse diagnoza jonë ka qenë e qartë – Republika e Kosovës ka elemente të shtetit të kapur. Dhe kjo është e shprehur në sistemin e drejtësisë, prandaj nuk punon Prokuroria, sepse në Kosovë ka vende të punës dhe mos të punohet, në Kosova ka njerëz që paguhen që të rrinë, të jenë pasivë, e këtë ne duam ta ndryshojmë dhe do ta ndryshojmë. Na nevojitet prokurori aktive dhe gjyqësor efikas, asnjërin prej këtyre aktualisht nuk i kemi”, ka thënë Kurti.

Kurti ka folur edhe për lirinë e fjalës së deputetëve në seancë, për çka edhe ka pasur sot kritika nga ana e opozitës.

“Ne nuk duam t’ia ndalim fjalën askujt, askush asnjëherë nuk do t’ua ndalojë fjalën. Ne duam ta ndalim hajninë, dhe ne kemi ardhur në qeverisje për ta ndalë hajninë – jo fjalën e lirë. Rrjedhimisht, flisni sa të doni, mbani seanca shpesh sa të mundi, nuk ka kurrfarë problem absolutisht, por është interesante se si njerëzit që vazhdimisht e marrin fjalën dhe flasin, ankohen se s’ka liri të fjalës”, ka thënë Kurti.

Lajmet

Profesorët e UBT-së publikojnë punim të ri shkencor në revistën ndërkombëtare “Pharmacoepidemiology”

Published

14 minutes ago

September 22, 2026

UBTNews

Profesorët e UBT-së kanë shënuar një tjetër arritje të rëndësishme shkencore me publikimin e punimit të tyre më të ri me titull “Evaluation of Systemic Pharmacotherapy in Bacterial Skin Infections: Adherence to Clinical Guidelines and Factors Associated with Treatment Outcomes” në revistën prestigjioze ndërkombëtare Pharmacoepidemiology (MDPI).

Kjo revistë është me Impact Factor 1.6, e indeksuar në platformat shkencore Scopus dhe Web of Science (ESCI), si dhe e renditur në kuartilin Q2 sipas SCImago Journal Rank (SJR).

Studimi trajton farmakoterapinë sistemike të infeksioneve bakteriale të lëkurës, nivelin e zbatimit të udhëzimeve klinike dhe faktorët kyç që ndikojnë në rezultatet e trajtimit. Përmes të dhënave nga praktika reale klinike, ky punim jep një kontribut të rëndësishëm në promovimin e përdorimit racional të antibiotikëve dhe forcimin e parimeve të antimicrobial stewardship në mjekësi.

Ky botim është rezultat i bashkëpunimit shkencor të profesorëve të UBT-së me kolegë nga University of Maribor dhe Jacksonville University. Autorë të studimit janë Lirim Shefki Mustafa, Arieta Hasani Alidema, Mirlinda Havolli, Linda Connelly dhe Fitim Bexhet Alidema.

Punimi është publikuar në Pharmacoepidemiology (2026, Volume 5, Article 38).

Punimi i plotë mund të lexohet këtu.

Lajmet

Sekuestrohen 9.4 kg marihuanë në Gjakovë

Published

17 minutes ago

September 22, 2026

UBT News

Policia e Kosovës ka njoftuar se të hënën ka sekuestruar 9.4 kilogramë substancë narkotike të llojit marihuanë që është gjetur në fashitin Popoc në Gjakovë.

Lënda narkotike dyshohet se ishte fshehur aty të dielën nga persona të dyshuar derisa ishin në ndjekje nga patrulla policore kufitare.

“Me datën 21 shtator 2026, gjatë patrullimit dhe punës intensive në terren të njësiteve policore të Drejtorisë Rajonale të Policisë Kufitare “Perëndimi” Gjakovë, është arritur që të identifikohet dhe të lokalizohet vendi ku ishin fshehur disa lëndë narkotike. Persona të dyshuar, një natë më parë, përderisa ishin nën ndjekje nga patrullat policore kufitare, kishin fshehur lëndën narkotike dhe kishin braktisur automjetin”, thuhet në njoftimin e Policisë.

Tutje thuhet se në vendin e ngjarjes që është zonë e brezit kufitar, persona të dyshuar kanë fshehur dhe kanë braktisur tri çanta dhe një qese, të mbushura me lëndë narkotike.

Një i dyshuar, shtetas turk, pasi ishte identifikuar thuhet se është arrestuar nga njësitë policore në Prishtinë dhe Mitrovicë e Jugut, të cilët ishin në asistim policor.

“Lidhur me rastin janë njoftuar njësitet relevante dhe prokurori kujdestar i Prokurorisë Themelore në Gjakovë, me urdhër të të cilit është iniciuar rasti ‘blerje, posedim, shitje e paautorizuar e lëndëve narkotike’, përderisa pas intervistimit personi është liruar dhe rasti vazhdon në procedurë të rregullt”, thuhet në njoftim. /A.K/

Lajmet

Të paktën 8 të plagosur nga të shtënat me armë afër një shkolle në Turqi

Published

46 minutes ago

September 22, 2026

UBTNews

Të paktën tetë persona kanë mbetur të plagosur, prej të cilëve njëri në gjendje të rëndë, pasi një person i armatosur hapi zjarr të martën në afërsi të një shkolle të mesme në Turgutlu të provincës Manisa, në perëndim të Turqisë.

Sipas zyrës së guvernatorit lokal, sulmi ndodhi rreth orës 07:59. I dyshuari shtëni pranë hapësirës së shkollës dhe u largua nga vendngjarja, por u kap dhe u arrestua me shpejtësi nga forcat e sigurisë. Në vendin e ngjarjes kanë dalë menjëherë ekipet mjekësore dhe ato policore, ndërsa autoritetet kanë rritur masat e sigurisë përreth zonës.

Motivet e këtij sulmi mbeten ende të panjohura.

Ky incident pason një seri ngjarjeve të ngjashme tragjike në shkollat e Turqisë. Në prill, një 14-vjeçar vrau 9 nxënës dhe një arsimtar në provincën Kahramanmaraş, ndërsa në një tjetër rast në Şanlıurfa, një ish-nxënës plagosi 16 persona para se të kryente vetëvrasje. Ngjarjet kanë nxitur reagime të forta publike, duke shtyrë presidentit Recep Tayyip Erdoğan të paralajmërojë masa të reja ligjore për kufizimin e posedimit të armëve.