Sport

​Kuka dhe të artat e Kosovës vlerësojnë Qendrën Nacionale të Xhudos

“Infrastruktura e re, suksese të reja”.

Published

5 years ago

on

Qendra Nacionale e Xhudos e inauguruar sot në Pejë po vlerësohet si një hap i madh në avancimin e mëtutjeshëm të këtij sporti që deri më tani i ka sjellë medalje të shumta në arenën ndërkombëtare.

Nora Gjakova e cila fitoi medaljen e artë në Tokio tha se kjo qendër do të jetë vazhdimësi e sukseseve të reja përtej atyre që janë arritur deri më tani.

“Me të vërtetë ka qenë e nevojshme, sidomos tani që kemi arritur në një nivel më të lartë. Ndoshta kur kemi qenë më të ri ka qenë më e lehtë sepse jemi mësuar të ushtrojmë në kushte të tilla por tani duke u rritur niveli i sportit normal që ke dëshirë të ushtrosh në kushte më të mira sepse kemi udhëtuar dhe e kemi parë se si ushtrojnë sportistët tjerë, por me rëndësi që ne nuk jemi ankuar kurrë dhe në ato kushte që kemi ushtruar kemi arritur në nivelin më të lartë botëror, kemi arritur në majat e sportit, kemi arritur tri medalje olimpike të arta, por prapë se prapë kjo qendër nacionale do të jetë vazhdimësi e suksese të reja”, tha Gjakova.

Xhudistja tjetër Distria Krasniqi tha se është shumë e lumtur me inaugurimin e kësaj qendre duke u shprehur se nga këtu do të dalin edhe shumë gjenerata të suksesshme që di ta përfaqësojnë denjësisht Kosovën.

“Sot jam shumë e lumtur që është hapur Qendra Nacionale e Xhudos. Është shumë me rëndësi për ne. Ne kemi ushtruar në ato kushte por prapë kemi arritur ti marrim tri medalje olimpike por tani me këtë sallën nacionale të xhudos besoj se rezultatet do të rriten dhe do të kemi më motiv më të madh…Besoj që po vjen një gjeneratë shumë e mirë e xhudistëve të reja si vajza si djem dhe shpresoj që nuk do të mbetemi vetëm me tri medalje olimpike por do të vazhdojmë që në çdo lojëra olimpike të kemi disa gjenerata që do të na përfaqësojnë shtetin në mënyrë dinjitoze”, u shpreh Krasniqi.

Trajneri i xhudos Driton Kuka deklaroi se kjo qendër duhet të jetë vetëm si një nismë për rregullimin e infrastrukturës së xhudos dhe se kjo do t’i shërbejë atij për ta rritur cilësinë gjatë stërvitjeve me gjeneratat e reja.

“Është një moment i rëndësishëm, është mirë që të gjithë protagonistët, njerëzit që e kanë përkrahur ndërtimin e qendrës nacionale ishin këtu prezent përfshirë qeverinë, mandej kryetarin e Federatës Botërore, komunën, Komitetin Olimpik, federatën e xhudos…Është me shumë rëndësi që gjatë stërvitjes secili garues ta ketë afër trajnerin dhe hapësirën e duhur për të stërvitur ato çka duhet, aspektin teknik e sidomos aspektin tatim për të cilin sportistët kanë nevojë dhe ky ka qenë problemi im i madh si trajner”, theksoi Kuka.

I pyetur rreth deklaratës së kryeministrit të Shqipërisë, Edi Rama në lidhje me atë se xhudistet elitare të Kosovës do t’i bashkohen ushtrisë shqiptare, Kuka tha se këtë pyetje duhet t’ia bëni atij.

“Edi Ramës bëjani këtë pyetje. Pyeteni Ramën për këtë”, u shpreh shkurtimisht Kuka.

Ndërsa ish-kampionja olimpike Majlinda Kelmendi tha se infrastruktura e mirë është faktori kryesor në sukseset e një sportisti dhe se kjo sallë ofron kushte shumë të mira për ta bërë këtë.

“Për mendimin tim një ndër faktorët kryesor në këtë mozaikun e një karriere të sportistit është edhe kushtet e mira për të ushtruar…Kjo sallë në krahasim me atë ku unë kam ushtruar si fëmijë sigurisht që është larg më e mirë”, tha ajo.

Majlinda gjithashtu zbuloi se tashmë e ka filluar karrierën e saj si trajnere e xhudos pas i dha fund karrierës si xhudiste aktive pas Lojërave Olimpike Tokio 2020.

“Po e kam filluar një muaj pas lojërave olimpike dhe realisht jam në sallë me shumë se kur kam ushtruar vetë. Toni në fillim kur kemi biseduar më ka thënë se do të merrem me juniorë seniorë por tani jam duke u marr me fëmijë, me kadet, junior, senior e ne të gjithë. Kështu që po e shijojë xhudo është ajo çka e kam bërë gjithë jetën edhe është nder dhe kënaqësi që Toni më beson”, tha Kelmendi.

Në përurimin e Qendrës Nacionale të Xhudos në Pejë morën pjesë edhe presidentja e Kosovës Vjosa Osmani dhe kryeministri Albin Kurti.

Related Topics:
Continue Reading

Sport

Real Madridi nuk heq dorë nga Michael Olise, por transferimi këtë verë duket i pamundur

Published

5 hours ago

on

July 17, 2026

By

Anësori francez Michael Olise nuk pritet të largohet nga Bayern Munich gjatë kësaj vere, pavarësisht interesimit të madh të Real Madridit për ta transferuar.

Sipas gazetarit gjerman Christian Falk, kampioni gjerman nuk ka ndërmend të lejojë largimin e 23-vjeçarit në afatin aktual kalimtar. Megjithatë, situata mund të ndryshojë verën e ardhshme, nëse Olise vendos të mos rinovojë kontratën me Bayernin, çka do ta detyronte klubin bavarez të shqyrtonte mundësinë e shitjes së tij.

Raportohet se vetë futbollisti e sheh Real Madridin si destinacionin ideal për karrierën e tij, por pozita e fortë e Bayernit në negociata dhe shuma e lartë që klubi gjerman do të kërkonte për kartonin e tij e bëjnë transferimin këtë verë pothuajse të pamundur.

Ndërkohë, presidenti i Real Madridit, Florentino Perez, vazhdon ta konsiderojë Olisen si një nga objektivat kryesorë të klubit. Perez thuhet se është mahnitur nga zhvillimi i shpejtë i francezit te Bayerni, si dhe nga paraqitjet e tij mbresëlënëse në Kupën e Botës.

Edhe pse një marrëveshje nuk pritet të realizohet këtë verë, Real Madridi mbetet i interesuar dhe mund të rikthehet me një ofertë serioze në afatin kalimtar të verës së ardhshme, nëse krijohen kushtet për transferimin e sulmuesit francez.

D.L

Continue Reading

Sport

Slavko Vinçiç do të gjykojë finalen e Kupës së Botës mes Spanjës dhe Argjentinës

Published

7 hours ago

on

July 17, 2026

By

FIFA ka zyrtarizuar ekipin e arbitrave që do të drejtojë finalen e madhe të Kupës së Botës 2026 mes Spanjës dhe Argjentinës, e cila do të zhvillohet më 19 korrik në stadiumin “New York New Jersey Stadium”, i njohur edhe si “MetLife Stadium”.

Përballja që do të përcaktojë kampionin e ri të botës do të drejtohet nga gjyqtari slloven Slavko Vinçiç, një prej arbitrave më të vlerësuar në skenën ndërkombëtare. FIFA i ka besuar atij përgjegjësinë për të udhëhequr ndeshjen më të rëndësishme të turneut.

Vinçiç do të ketë në krah dy bashkëkombësit e tij, Tomaz Klancnik dhe Andraz Kovacic, të cilët do të shërbejnë si gjyqtarë anësorë.

Ekipi i arbitrimit do të kompletohet nga zyrtarë nga Jordania. Adham Makhadmeh është caktuar si gjyqtar i katërt, ndërsa Mohammad Alkalaf do të jetë gjyqtari ndihmës rezervë.

Me këtë vendim, FIFA i ka besuar një prej sfidave më të mëdha të futbollit botëror një ekipi arbitrash me përvojë ndërkombëtare, për të garantuar drejtësi në finalen ku Spanja dhe Argjentina do të luftojnë për trofeun prestigjioz.

D.L

Continue Reading

Sport

Trump do të jetë i pranishëm në finalen e Kupës së Botës mes Spanjës dhe Argjentinës

Published

8 hours ago

on

July 17, 2026

By

Presidenti i Shteteve të Bashkuara të Amerikës, Donald Trump, do të marrë pjesë në finalen e Kupës së Botës, ku të dielën do të përballen Spanja dhe Argjentina. Prania e tij në stadium është konfirmuar nga Shtëpia e Bardhë.

Më herët, presidenti i FIFA-s, Gianni Infantino, kishte bërë të ditur se Trump do të ketë një rol në ceremoninë e mbylljes dhe do t’ia dorëzojë trofeun ekipit që do të shpallet kampion i botës.

Pjesëmarrja e liderëve shtetërorë në finalet e Kupës së Botës është një traditë e njohur, ndërsa në disa edicione ata kanë qenë pjesë e ceremonisë së dorëzimit të trofeut. Kjo ka ndodhur edhe në finalet e Botërorit “Rusia 2018” dhe “Katar 2022”.

Kjo do të jetë paraqitja e parë e Trumpit në stadium gjatë këtij Botërori, pasi ai nuk ka qenë i pranishëm në asnjë nga ndeshjet e mëparshme të turneut.

Ndërkohë, ka pasur reagime të shumta edhe për përfshirjen e tij në rastin e futbollistit amerikan Folarin Balogun. Pas një kërkese për pezullimin e dënimit të lojtarit, Balogun u lejua të luante ndaj Belgjikës, pavarësisht se kishte marrë karton të kuq në ndeshjen paraprake. Ky vendim shkaktoi kritika ndaj FIFA-s dhe ngriti diskutime mbi ndikimet e jashtme në vendimet sportive.

D.L

Foto: Reuters

Continue Reading

Sport

FIFA prezanton një tjetër shpërblim për kampionët e botës

Published

10 hours ago

on

July 17, 2026

By

Trofeu i Kupës së Botës dhe medaljet e arta nuk do të jenë shpërblimet e vetme për ekipin që do të shpallet kampion i botës. FIFA ka prezantuar edhe një dhuratë të veçantë, duke sjellë në futboll një nga traditat më të njohura të sportit amerikan.

Për herë të parë, kampionët e botës do të marrin unaza të personalizuara, të cilat do të simbolizojnë triumfin në ngjarjen më të madhe të futbollit.

Çdo unazë do të jetë pjesë e një edicioni të kufizuar prej vetëm 2.026 copësh, secila me numër individual. Nga to, 30 unaza do t’u dhurohen anëtarëve të ekipit fitues, ndërsa 1.996 do të dalin në shitje për tifozët në mbarë botën.

Në njërën anë të unazës do të jetë i gdhendur trofeu i Kupës së Botës, ndërsa ana tjetër do të personalizohet për të pasqyruar identitetin e kombëtares fituese.

Menjëherë pas finales, kapiteni dhe trajneri kryesor i ekipit kampion do të marrin unaza të përkohshme, ndërsa më vonë do të prodhohen dhe dorëzohen 30 unazat e personalizuara për skuadrën fituese.

Finalja e Kupës së Botës do të zhvillohet të dielën, ku për titullin kampion do të përballen Spanja dhe Argjentina.

D.L

Continue Reading

Të kërkuara