Lajmet

​Kosova zgjeron pakon e sanksioneve ndaj Rusisë e Bjellorusisë

Këto sanksione u bënë të ditura sot në mbledhjen e Qeverisë së Kosovës.

Published

on

Qeveria e Kosovës ka zgjeruar pakon e masave sanksionuese ekonomike-financiare ndaj Rusisë dhe Bjellorusisë, pas pushtimit të Ukrainës. Këto sanksione u bënë të ditura sot në mbledhjen e Qeverisë së Kosovës. Përmes këtyre sanksioneve kryeministri Albin Kurti tha se Qeveria e Kosovës po rreshtohet me partnerët ndërkombëtarë në zbatimin e masave dhe sanksioneve të reja përfshirë edhe pakon e katërt të sanksioneve të BE-së.

Po në këtë mbledhje të Qeverisë së Kosovës janë ndarë edhe 100 mijë euro për dërgimin e kontingjentit të parë të ndihmave humanitare për popullin e Ukrainës.

“Në vazhdimësi të bashkëpunimit të ngushtë me BE dhe SHBA-në dhe partnerët tjerë Ministria e Punëve të Jashtme dhe Diasporës e ka propozuar vendimin për zbatimin e të gjitha sanksioneve ekonomik dhe financiare të përcaktuara nga BE ndaj Rusisë dhe Bjellorusisë. Përmes këtij vendimi, qeveria jonë do të vazhdojë të rreshtohet me partnerët në zbatimin e masave dhe sanksioneve të reja përfshirë edhe pakon e katërt të sanksioneve të BE-së. Kjo pako konsiston me masa restriktive tregtare, ekonomike, financiare, energjetike, industri të mbrojtjes si dhe ndaj individëve dhe aktiviteteve shtesë”, tha Kurti.

Ministrja e Punëve të Jashtme dhe Diasporës, Donika Gërvalla u shpreh se pakoja e katërt e sanksioneve ekonomike-financiare ndaj Rusisë dhe Bjellorusisë përfshinë ngrirje të aseteve bankare, institucionet financiare dhe individë, ndalimin e qasjes së tyre në tregjet financiare, ndalimin e transmetimit të mediave propaganduese, materiale të ndryshme që mund të përdoren në makinerinë e luftës etj.

“MPJD propozim për shqyrtim dhe miratim vendimin për zbatimin e të gjitha sanksioneve ekonomike dhe financiare të përcaktuara nga Bashkimi Evropian ndaj Rusisë dhe Bjellorusisë. Pothuajse të gjitha sanksionet deri më tani janë miratuar në koordinim intensive dhe të plotë në mes të SHBA-së, BE-së dhe partnerëve të tjerë në përpjekje për ta kundërshtuar fuqimisht luftën pushtuese ruse në Ukrainë. Sanksionet e zgjeruara përfshijnë gjithashtu ngrirje të aseteve bankare, institucionet financiare dhe individë ndalimin e qasjes së tyre në tregjet financiare, ndalimin e transmetimit të mediave propaganduese, materiale të ndryshme që mund të përdoren në makinerinë e luftës, restriksionet e Bjellorusisë për largimin e mundësisë së importeve të mallrave teknologjike si kundërpërgjigje e mbështetjes së luftës së Rusisë në Ukrainë dhe masa të tjera restriktive që shënjestrojnë ndërmarrjet e rëndësishme ruse, elita dhe akterë politik të përfshirë në invazionin rus në Ukrainë. Individët gjithashtu do t’i nënshtrohen ndalimit të udhëtimit apo transitit në vendet që i zbatojnë këto sanksione”, theksoi Gërvalla.

Qeveria e Kosovës ka ndarë 100 mijë euro për dërgimin e kontingjentit të parë të ndihmave humanitare për popullin e Ukrainës.

Ministrja Gërvalla në arsyetimin e këtij vendimi u shpreh se kjo po bëhet për t’i dal në mbështetje popullit ukrainas.

“Bazuar në qëndrimin e Kosovës për harmonizimin e qëndrimeve me aleatët SHBA-në dhe BE-në lidhur me zhvillimet e fundit në Ukrainë në përgjigje të thirrjes publike të Ukrainës për ndihma humanitare përmes përfaqësive të saj diplomatike dhe me qëllim të shprehjes së solidaritetit për popullin ukrainas viktimë e agresionit rus, MPJD propozim për shqyrtim dhe miratim vendimin për ndarjen e mjeteve buxhetore në vlerë prej 100 mijë eurosh në emër të dërgimit të kontingjentit të ndihmave nga Kosova për popullin e Ukrainës. Kosova edhe përmes kësaj ndihme solide ofron mbështetje dhe shpreh solidaritetin e saj të pakursyer me Ukrainën dhe popullin e saj si dhe seriozitetin e saj si pjesë e botës më të mirë dhe demokratike”, tha Gërvalla.

Sot kabineti qeveritar po ashtu ka miratuar edhe propozim-vendimin për nevojën e ofrimit të mbrojtjes së përkohshme dhe të menjëhershme nga Kosova për 20 gazetarë ukrainas dhe familjarët e ngushtë të tyre.

Arsyetimin për këtë vendim e dha ministri i Punëve të Brendshme, Xhelal Sveçla i cili tha se votimi i sotëm këtij vendimi i jep karakter institucional.

“Propozoj para jush propozim-vendimin për nevojën e ofrimit të mbrojtjes së përkohshme dhe të menjëhershme nga Kosova për 20 gazetarë ukrainas dhe për familjarët e ngushtë të tyre. Ky propozim është njëherësh edhe një përpjekje që ta ofrojë ndihmën duke respektuar parimet e të drejtës ndërkombëtare për kategorinë e personave në rrezik… Ky vendim i hap rrugë gazetarëve për një vend ku do të qëndrojnë sigurt përkohësisht, të gëzojnë të drejta themelore sipas legjislacionit tonë, përkrahjen institucionale dhe ushtrimin e profesionit të tyre. Kjo përpjekje është detyrim moral i vendit tonë dhe parim njerëz që kërkohet t’i jepet karakter institucional”, tha ai.

Qeveria ka miratuar edhe Projektligjin për themelimin e Fondit Kosovar për Garanci Kreditor, përmes të cili synohet krijimi i bazës ligjore për garanci kreditore përveç në nivel të kredive dhe nivel të portofolios kreditore me qëllim të zhvillim të ndërmarrësisë.

Po ashtu është shqyrtuar edhe propozim-vendimi për aprovimin e Deklaratës së Prioriteteve Afatmesme 2023-2025 si pjesë e kornizës afatmesme të Shpenzimeve 2023-2025.

Ndërsa, në këtë mbledhje të Qeverisë së Kosovë e cila shënon edhe fillimin e vitit të dytë të qeverisjes Kurti, u shqyrtua edhe projekt-udhëzimi administrativ për ndryshim-plotësimin e udhëzimit administrativ për masat e veçanta për regjistrimit të pronës së paluajtshme të përbashkët në emër të bashkëshortëve.

Lajmet

​City ia kërkon yllin kryesor skuadrës së Atleticos

Published

on

Sipas raportimeve të fundit të mediave angleze, skuadra e Liverpoolit duke se ia ka vënë syrin sportistit Julian Alvarez.

Sulmuesi i Atlético Madridit shënoi dy gola në derbin e fundjavës së kaluar kundër Real Madridit.

Të Kuqtë e kanë monitoruar atë për njëfarë kohe, por Colchoneros nuk janë të gatshëm të bëjnë kompromise.

Po ashtu, çmimi i kërkuar nga spanjollët aktualisht është 100 milionë dollarë , një shifër që realisht duket se po i dekurajon kampionët anglezë./S.K/KP/

Continue Reading

Lajmet

Vetaksidentohet automjeti i KFOR-it në Malishevë

Published

on

By

Një automjet i KFOR-it është vetaksidentuar të hënën në dalje të fshatit Ostrozub të Malishevës.

Zëdhënësi i Policisë për rajonin e Gjakovës, Lumni Graishta, ka thënë për KOHËN se nga ky vetaksident nuk ka të lënduar.

Sipas Graishtës, të përfshirë kanë qenë ngasësi dhe një pasagjer.

Bëhet fjalë për vetaksident në dalje të fshatit Ostrozub drejtimi Malishevë-Rahovec, në automjet kanë qenë ngasësi dhe një pasagjer. Nuk ka të lënduar ndërkohë që vendin e ngjarjes po e procedojnë njësitet e trafikut rajonal të DRP Gjakovë”, ka thënë ai./D.B/EO

Continue Reading

Lajmet

Reagimi i Agim Ademit pasi Hajdari zgjodhi Kosovën para Zvicrës

Published

on

Albain Hajdari është futbollisti më i ri i Kombëtares së Kosovës në futboll i cili ka zgjedhur dardanët para Zvicrës, edhe pse për këtë të fundit kishte luajtur për të gjitha grupmoshat.

Presidenti i Federatës së Futbollit të Kosovës, Agim Ademi ka thënë se vendimi i lojtarit erdhi për shkak të lidhjes së tij të fuqishme me vendin tonë si dhe edhe për shkak të roli kyç të prindërve të tij.

“Albian Hajdari ka vendosur me zemër, ka vendosur për Kosovën, ka vendosur për shtetin e prejardhjes së tij. Unë i falënderoj prindërit e tij të cilët e kanë rritur në frymën e atdheut me dashur për Kosovën edhe pse ka lindur atje, edhe pse jetojnë atje, edhe pse ka qenë i Zvicrës, por sigurisht që Zvicra e kupton çfarë do të thotë lidhja e gjakut dhe prejardhja dhe shteti…Është një prurje e mirë e radhës dhe ne sigurisht që do të vazhdojmë pasi është fat për ne që kemi shumë futbollistë të tillë, kemi futbollistë kulminant tashmë të nivelit më të lartë. Është shumë mirë që është bashkë me Fisnik Asllanin he Leon Avdullahun ne Hoffenhaim. Uroj që të jenë të tre po ashtu siç janë duke luajtur në Hoffenhaim të jenë edhe në formacion të Kosovës”, theksoi Ademi.

Kjo është ardhja e dytë te Kosova pas Leon Avdullahit i cili vetëm pak javë më parë poashtu i tha po Kosovës duke u larguar nga helvetikët.

Por, përkundër këtyre zhvillimeve, Ademi thotë se nuk ka përplasje ndërmjet dy federatave.

“Absolutisht nuk ka përplasje as nuk jemi duke u përplasur, kjo është gjithçka mediale, ne jemi në raporte jashtëzakonisht të mira me Zvicrën. uroj suksese Zvicrës, sigurisht që Zvicra i zgjedhë më të mirët e mundshëm por edhe ne Kosova i zgjedhim më të mirët të mundshëm. Tani është radha jonë sepse kemi shumë futbollistë e shumë talentë nëpër gjithë Kosovën dhe do të vazhdojmë kështu”, shtoi Ademi.

Gjithashtu, Ademi shtoi se Hajdari nuk vjen për ta zëvendësuar kapitenin Amir Rrahmanin.

“Duhet ta kuptojmë që Albioni është një 21 vjeçar dhe sigurisht që e kemi për gjatë kohë në kombëtare. Do të jetë për dhjetë vite e më shumë që do të jetë një futbollist i cili mund ta kenë një karrierë dhjetë vjeçare në kombëtare. Por, gjithsesi është më mirë të themi se është në duet se sa si zëvendësim sepse nuk do të zëvendësohet Rrahmani tani”, tha në fund Ademi.

Në fund Ademi shtoi se FFK do të vazhdojë të hulumtojë dhe kërkojë futbollsitë të cilët mund ta ndihmojnë Kosovën drejt synimeve të mëdha./S.K/KP/FFK/

Continue Reading

Lajmet

Mali i Zi i dërgon notë verbale Ambasadës së Kosovës për të shtënat në kufi

Published

on

By

Ministria e Punëve të Jashtme e Malit të Zi i ka dërguar më 17 shtator notë verbale Ambasadës së Kosovës në Podgoricë, lidhur me të shtënat me armë zjarri që dyshohet se u erdhën nga pjesa e Kosovës në zonën pranë qendrës malazeze të skijimit, Hajlla-Shtedim, afër kufirin mes dy shteteve.

Nga organet kompetente të Republikës së Kosovës është kërkuar që t’i identifikojnë dhe t’i procedojnë autorët e këtyre incidenteve, si dhe të njoftojnë Malin e Zi për të gjitha masat dhe veprimet e ndërmarra”, thuhet në njoftimin e Ministrisë së Malit të Zi, për Radion Evropa e Lirë (REL).

Nga dikasteri i udhëhequr nga Ervin Ibrahimoviq vlerësojnë se bëhet fjalë për incidente të izoluara.

Të paktën në dy raste janë regjistruar dëmtime në infrastrukturën e qendrës së skijimit Hajlla-Shtedim në Mal të Zi, e cila ndodhet rreth një kilometër e gjysmë nga kufiri me Kosovën.

Në të dyja rastet, organet kompetente malazeze dyshojnë se të shtënat janë shkrepur nga territori i Kosovës.

Incidenti i parë ndodhi në korrik të vitit të kaluar, kur u vërejtën dëmtime në kabinën e qendrës së skijimit. Prokuroria e Rozhajës ka hapur lëndë për këtë rast.

Ndërsa, incidenti i dytë ndodhi më 24 gusht të këtij viti, kur pati të shtëna në drejtim të një objekti të qendrës së skijimit. Prokuroria pritet të hapë lëndë pas përfundimit të hetimeve të Policisë.

Notë verbale është dërguar pas incidenteve të përsëritura që janë regjistruar nga Policia në Rozhajë, njoftoi Ministria e Punëve të Jashtme e Malit të Zi, e cila shton se për incidentet u njoftua më 22 shtator edhe ambasadorja e Kosovës.

Besojmë se rastet e izoluara nuk e reflektojnë përkushtimin e qartë të dy shteteve tona për forcimin e bashkëpunimit rajonal dhe përmirësimin e mëtejmë të marrëdhënieve bilaterale”, thuhet në përgjigjen e Ministrisë për REL.

Po ashtu, theksohet se palës kosovare i është tërhequr veçanërisht vëmendja për rëndësinë e zbatimit të tri marrëveshjeve ndërmjet shtetesh – për kufirin shtetëror ndërmjet Malit të Zi dhe Kosovës, hapjen e pikës së përbashkët kufitare Kotlovi–Kuqishtë dhe rregullimin e regjimit të qarkullimit kufitar.

Fadil Gashi nga Policia e Kosovës për rajonin e Pejës i tha Radios Evropa e Lirë se nuk ka asnjë informacion për incidente të sigurisë në kufirin me Malin e Zi, duke theksuar se policia rajonale është më shumë e angazhuar “për ruajtjen e rendit dhe qetësisë publike”, e jo për incidente ndërkombëtare.

Radio Evropa e Lirë i është drejtuar edhe drejtorisë qendrore të Policisë së Kosovës me pyetjen nëse kanë ndonjë informacion lidhur me rastin dhe është në pritje të përgjigjes. Për të njëjtën çështje, përgjigje pritet edhe nga Qeveria e Kosovës.

Mali i Zi dhe Kosova në vitin 2015 e nënshkruan Marrëveshjen për demarkacionin. Mali i Zi e ratifikoi atë në të njëjtin vit, ndërsa Kuvendi i Kosovës tre vjet më vonë./D.B/KP

Continue Reading

Të kërkuara