Lajmet

​Kosova s’i shpëton dot Omicronit, Krasniqi: I rëndësishëm vaksinimi dhe respektimi i masave

Krasniqi flet edhe për situatën pandemike, rëndësinë e vaksinimit dhe kërkesat e punëtorëve shëndetësorë për Ligjin e pagave.

Publikuar

2 vjet më parë

më

Kosova nuk pritet të shpëtojë nga varianti Omicron i COVID-19 që ka vënë në vështirësi shumë vende të botës. Drejtori i SHSKUK-së, Valbon Krasniqi, thotë se mundësia e paraqitjes është evidente pasi edhe rrugët e përhapjes së këtij varianti janë të njëjta sikurse variantet e tjera. Në një intervistë për KosovaPress, Krasniqi flet edhe për situatën pandemike, rëndësinë e vaksinimit dhe kërkesat e punëtorëve shëndetësorë për Ligjin e pagave.

Mali i Zi është vendi i fundit në rajon që është prekur zyrtarisht nga varianti Omicron. Por, tashmë rrezikon edhe Kosova, sidomos kur në këtë periudhë shtohen lëvizjet e qytetarëve për festa por edhe grumbullimet në ambiente të mbyllura.

Pikërisht, për Krasniqin këto janë arsyeje se pse po vazhdohen që të mbahen në fuqi masat e njëjta anti-COVID.

“Është virusi i njëjtë dhe ato çka kemi parë është se çdo variant i paraqitur në shtetet e tjera është se herë ose vonë ka arritur në pothuajse të gjitha shtetet. Mundësia e paraqitjes së Omicronit në Kosovë normalisht që është evidente dhe është e vështirë të paramendohet se nuk do ketë raste edhe në Kosovë pasi po them që virusi është i njëjtë dhe rrugët e përhapjes janë të njëjta”, tha Krasniqi.

Krasniqi thotë se në Kosovë është një situatë e qetë pandemike, ku vetëm gjatë këtij muaji numri i të hospitalizuarve nuk ka kaluar shifrën 50 pacientë.

“Ka javë të tëra, madje dhe muaj, që është i vogël dhe po përjetojmë një situatë jashtëzakonisht të volitshme pandemike sa i përket pandemisë COVID-19. Si rezultat i kësaj edhe numri i pacientëve të shtrirë në Klinikat e QKUK dhe spitalet ka rënë ndjeshëm prej më shumë se dy muaj numri i pacientëve është nën 100, madje këtë muajin e fundit asnjëherë nuk kemi kaluar mbi 50 pacientë që kanë qenë të shtrirë në klinikat e QKUK dhe spitalet e përgjithshme. Por sigurisht që kjo situatë është rezultat i masave të ndërmarra nga ana e qeverisë dhe institucioneve shëndetësore dhe në veçanti dua të potencoj këtu respektimin dhe zbatimin e masave nga ana e qytetarëve”, u shpreh ai.

Tashmë në vendin tonë jepet edhe doza përforcuese dhe ajo e treta anti-COVID për personat mbi 18 vjeç, prandaj drejtori i SHSKUK-së e konsideron moment të duhur që qytetarët të imunizohen edhe me këto doza të vaksinave.

“Është koha më e mirë që ta shfrytëzojmë tashmë po futemi edhe në sezonin e dimrit edhe më shumë përforcohet nevoja për ta marrë dozën e tretë dhe dozën përforcuese, tashmë njerëzit fillojnë të mbyllen në ambiente të mbyllura, në grupe, qoftë familjare apo edhe më të mëdha, ku rreziku i ekspozimit është më i madh prandaj, po them ta shfrytëzojmë këtë situatë të qetë në mënyrë të vazhdojmë të ruajmë këtë imunitet kolektiv që është formuar qoftë me kalimin e COVID, qoftë edhe me krijimin e imunitetit si rezultat i vaksinimit”, u shpreh Krasniqi.

Krasniqi shpreson që sa më shpejt të miratohet edhe Ligji për paga, pasi siç u shpreh ai, ky ligj është shtylla kryesore për rregullimin e pagave të profesionistëve shëndetësorë dhe trajtimin e tyre në mënyrë të dinjitetshme. Ai u shpreh se mjekët e infermierët nuk duhet të trajtohen si heronj vetëm nëpër situata pandemike, por kanë nevojë për trajtim e pagë të dinjitetshme në çdo kohë.

“Ligji i pagave është jetik nëse mund ta them për funksionimin e sistemit shëndetësor në Kosovë, normalisht që nuk është i vetmi sepse ka edhe shumë punë të tjera për t’u bërë, por do të ishte një nga shtyllat kryesore ku do të rregullonte çështjen e pagave të profesionistëve shëndetësorë dhe me këtë ligj besoj se do gjendej edhe një qetësi shpirtërore e punëtorëve shëndetësorë sa i përket vlerësimit që iu bëhet. Ne nuk kemi nevojë që të vlerësohemi si heronj vetëm në situata të pandemisë ose në situata të caktuara, por kemi nevojë për pagë të dinjitetshme dhe unë po shpresoj shumë që Ligji i pagave do të ec me një ritëm më të shpejtë”, theksoi ai.

Ligji i Pagave ka qenë shkas edhe i dy grevave që profesionistët shëndetësorë kanë mbajtur në javët e kaluara. Ndonëse, edhe Federata e Sindikatave të Shëndetësisë së Kosovës (FSSHK) kishte paralajmëruar grevë edhe më 21 dhjetor, gjatë ditës së djeshme ata kanë njoftuar se kanë pezulluar përkohësisht grevat për nevojat që kanë pacientët në këtë kohë kur vendi po përballet me gripin sezonal.

Etiketa
Vazhdo të lexosh

Lajmet

Sipas një hetimi të OKB-së, Izraeli dhe Hamasi kanë kryer krime lufte që nga 7 tetori

Publikuar

3 minuta më parë

më

12 Qershor, 2024

nga

Sipas një hetimi të Kombeve të Bashkuara për muajt e parë të luftës në Gaza, rezulton se si Izraeli ashtu edhe Hamasi kanë kryer krime lufte dhe shkelje të rënda të ligjit ndërkombëtar. Ky është hetimi i parë i thellë për sulmet e 7 tetorit dhe konfliktin që pasoi.

Raporti që u publikua të mërkurën vlerëson se të dyja palët kanë shpërfillur ligjin ndërkombëtar në konfliktin i cili ka nisur qe më shumë se tetë muaj dhe i cili rriti tensionet në Lindje të Mesme.

Raportet e Komisionit Hetimor të Kombeve të Bashkuara fillojnë më 7 tetor, ditën kur Hamasi dhe grupet e tjera të armatosura palestineze filluan vrasjet dhe rrëmbimet në jug të Izraelit, duke lënë mbi 1 mijë e 200 njerëz të vrarë, kryesisht civilë. 250 njerëz të tjerë janë marrë peng./UBTNews/

Vazhdo të lexosh

Lajmet

​Kurti: Liria e Kosovës erdhi përmes gjakut të dëshmorëve

Publikuar

10 minuta më parë

më

12 Qershor, 2024

nga

Kryeministri Albin Kurti në ceremoninë e parakalimit të ushtarëve të FSK-së dhe policisë së Kosovës për nder të 25-vjetorit të çlirimit të vendit tonë, tha se Ushtria e Kosovës e ka origjinën nga UÇK-ja e e cila e kishte prijës komandantin legjendar, Adem Jashari.

Në fjalën e tij, Kurti tha se është i lumtur të shoh përparimin e madh të FSK-së, duke shtuar se kjo ka ndodhur falë dyfishimit të buxhetit dhe trefishimit të investimeve në armatim.

“Jam shumë i gëzuar që të shoh përparimin e madh të FSK-së. Kjo është arritur falë më shumë se dyfishimit të buxhetit, rekrutimit të ushtarëve të rinj, trefishimit të investimit në armatim, me dronët Bajraktar. Ushtria e Kosovës e ka origjinën nga UÇK, ku prijës e kishte Adem Jasharin”, deklaroi ai.

Në ceremoninë shtetërore të shënimit të 25-vjetorit të çlirimit të Kosovës, Kurti shtoi se 1/3 e ushtarëve do të parakalojnë në sheshet e kryeqytetit.

“Do të doja që në këtë ditë kjo paradë e ushtarëve dhe policëve të na shërbente si nxitje për të përtërirë ndjesitë tona për liri. Liria e Kosovës erdhi përmes gjakut të dëshmorëve dhe martirëve, liria u arrit mes vuajtjesh të burgosurve politikë, në krye me Adem Demaçin”, shtoi ai.

Kurti gjithashtu shtoi se liria e Kosovës erdhi edhe nga ndihma e forcave e të NATO-s, për çka theksoi se Kosova çdo ditë është më afër anëtarësimit në këtë aleancë.

Vazhdo të lexosh

Lajmet

​Osmani: Luftëtarët e UÇK-së dhe ushtarët e NATO-s, dhimbjen dhe lotët na i kthyen në shpresë

Publikuar

13 minuta më parë

më

12 Qershor, 2024

nga

Presidentja e vendit, Vjosa Osmani deklaroi se 12 qershori është një nga ditët më domethënëse për shtetësinë e Kosovës. Në ceremoninë e parakalimit të ushtarëve të FSK-së dhe policisë së Kosovës për nder të 25-vjetorit të çlirimit të vendit tonë, tha se UÇK-ja ishte shtylla më e fuqishme e rezistencës dhe e shpresës.

“Në këtë luftë, UÇK-ja ishte shtylla jonë më e rëndësishme e shpresës. Lufta e tyre nuk ishte vetëm për token, por për vet shpirtin e Kosovës. Guximi i UÇK është një histori heroizmi që do të tregohet brez pas brezi. Ne u detyrohemi atyre me një mirënjohje”, tha ajo.

Ajo përmendi edhe komandantin legjendar, Adem Jashari dhe familjen Jashari, duke shtuar se Kosova u mbështet edhe nga aleatët ndërkombëtarë.

“Më 12 qershor luftëtarët e UÇK dhe ushtarët e NATO-s, dhimbjen dhe lotët na i kthyen në shpresë. Sot festojmë edhe lidhjet e miqësisë. 25 vjet më pas po ndërtojmë arkitekturën e sigurisë kombëtare dhe po e bëjmë këtë që të zëmë vendin në aleancën e NATO-s”, shtoi ajo.

Në ceremoninë shtetërore për nder të 25-vjetorit të çlirimit të Kosovës do të parakalojnë 16 kuadrate të FSK-së, shtatë të Policisë së Kosovës, ku janë mbi 1500 pjesëtarë.

Vazhdo të lexosh

Lajmet

​Nikolla: Lufta për çlirimin e Kosovës është fituar me ndihmën e aleatëve

Publikuar

1 orë më parë

më

12 Qershor, 2024

nga

Kryetarja e Kuvendit të Shqipërisë, Lindita Nikolla, ka thënë se lufta për çlirimin e Kosovës është fituar me ndihmën e aleatëve dhe partnerëve të kombit shqiptar.

Ajo në seancën e solemne të Kuvendit të Kosovës për nder të 25-vjetorit të çlirimit nga forcat pushtuese serbe, tha se Kosova e zhvilluar, demokratike dhe paqësore do të vijojë të ndërtohet po me ndihmën e miqve dhe aleatëve.

Nikolla tha se Shqipëria mbështet fuqishëm zhvillimin, demokratizmin dhe shtimin e njohjeve të reja për Kosovën.

“Lufta për çlirimin e Kosovës u fitua me ndihëm e aleatëve, partnerë dhe miqve të çmuar të kombit shqiptar. Kosova e zhvilluar, demokratike dhe paqësore do të vijojë të ndërtohet po me ndihmën e miqve dhe aleatëve. Me mbështetjen e tyre e ardhmja euro-atlantike e Kosovës është e sigurt. Pa ndihmën e tyre asgjë nuk është e garantuar. Shqipëria e Kosova janë sot dy shtete të pavarura me aleatë të mëdhenj. ShBA-të, BE-ja, NATO-në dhe botën e qytetëruar që aspirojmë familjen evropiane. Shqipëria mbështet fuqimisht zhvillimin, demokratizmin dhe shtimin e njohjeve dhe fuqizimin e rolit ndërkombëtar të Kosovës. Çdo sukses i Kosovës është edhe i Shqipërisë. Çdo sukses i Shqipërisë është sukses edhe i Kosovës”, tha ajo.

Gjatë ditës së sotme Kuvendi i Kosovës ka organizuar seancë solemne në nder të 25 vjetorit të çlirimit nga forcat pushtuese serbe, ku pjesëmarrës ishin edhe personalitete dhe figura të rëndësishme rajonale dhe ndërkombëtare.

Vazhdo të lexosh

Të kërkuara