Lajmet

​Komisioni për Legjislacion voton Projektligjin për Institutin e krimeve të kryera gjatë luftës

Gjatë këtij muaji Qeveria e Kosovës e votoi Projektligjin për Institutin e krimeve të kryera gjatë luftës në Kosovë.

Published

4 years ago

on

Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit, ka votuar pro Projektligjit për Institutin e krimeve të kryera gjatë luftës në Kosovë.

Ministrja e Drejtësisë, Albulena Haxhiu tha se është vendosur që një institucion i tillë të jetë në kuadër të Zyrës së Kryeministrit për shkak të ndjeshmërisë, por edhe mirëfunksionimit. Mbështetje për këtë projektligj u ofrua edhe nga opozita.

Sipas saj, ky Institut krahas dokumentimit dhe hulumtimit të krimeve të kryera gjatë luftës kryesisht në periudhën 1 janar 1998 – 20 qershor 2022.

Haxhiu tha se votimi i këtij projektligji paraqet përmbushjen e një prej objektivave më të rëndësishme të mandatit qeverisës, derisa ka ripërsëritur se për herë të parë një Institut i tillë po themelohet me ligj.

“Pas përmbylljes së dokumentimit të krimeve të luftës do të merret edhe me dokumentin e krimeve që ndërlidhet para dhe pas periudhës së luftës me qëllim të prezantimit sa më të qartë të pasojave dhe dëmeve të luftës… Ishte themeluar në atë kohë Instituti me një vendim dhe jo sikurse tani po adresohet tani me një projektligj dhe që nuk mundet se çfarëdo qeverie që vjen në të ardhmen ta ndryshojë sipas rrethanave dhe nevojave. Pra, hulumtimi dhe dokumentimi i krimeve të kryera gjatë luftës do të bëhet nga aspekte të ndryshme përfshirë aspektin historik, ushtarak, ekologjik, ekonomik, kulturor dhe të tjera duke siguruar të dhëna dhe dëshmi për t’i bërë të qasshme ato për publikun. Për mua si ministre e Drejtësisë është shqetësuese se si kanë kaluar pothuajse dy dekada të pasluftës në Kosovës dhe ende nuk kemi të dhëna zyrtare për krimet e luftës, krimet kundër njerëzimit dhe gjenocidit”, tha Haxhiu.

Haxhiu tha se krijimi i Institutit ndihmon edhe Prokurorinë Speciale për adresimin e krimeve të luftës, por edhe përgatitjet për padi kundër Serbisë për gjenocid.

“Konsideroj se ky institucion është i rëndësishëm edhe për dy aspekte të tjera së pari edhe si ndihmë e institucioneve të vendit kryesisht Prokurorisë Speciale për adresimin e krimeve të luftës, por së dyti siç jeni në dijeni në programin tonë qeverisës është edhe padia për gjenocid, mirëpo kjo është duke u adresuar nga Zyra e Kryeministrit, andaj mendoj se edhe në këto dy aspekte do të ndikojë puna që do të bëhet në hulumtimin dhe dokumentimin e krimeve të kryera gjatë luftës në Kosovës”, tha ajo.

Driton Selmanaj nga LDK-ja, ndonëse shprehu mbështetjen për këtë projektligj, ai adresoi edhe disa çështje për fushë-veprimtarinë e këtij Instituti, por edhe kompetencat e tij ekzekutive, si dhe mënyrën e përzgjedhjes së drejtorit të kësaj agjencie.

“Pse po mendoni se si agjenci ekzekutive mund të jetë me efikase sesa një mekanizëm brenda MD-së a ka qenë problem statusi i këtij mekanizmi apo angazhimi konkret për t’i dhënë përgjigje dhe për të nxjerrë dokumente të caktuara të nevojshme për shtetin e Kosovës… A po i bie që po e rithemelojmë apo po e normojmë me ligj të veçantë diçka që ka qenë edhe në të kaluarën tash nëse e normojmë diçka që ekzistuar në të kaluarën nuk mund të themi se po e themelojmë… Sa i përket mënyrës së përzgjedhjes, drejtori emërohet nga Zyra e kryeministrit me mandat 5-vjeçar, por nuk janë përcaktuar procedurat e zgjedhjes dhe më pas i mbetet kryeministrit ta riemërojë nëse vlerëson se puna e tij është bërë mirë. Ne sikur përsëri po dalim kundër idesë që të mos ia lëmë secilës qeveri këtë çështje, prandaj e kemi rregulluar me ligj. Ky mandat nëse i lihet kryeministrit të emërojë njerëz të tillë në krye të kësaj agjencie, i bie sikur po i lihet një gjë e tillë secilës qeveri”, theksoi ai.

Për këto çështje të ngritura nga deputeti Selmanaj, e para e drejtësisë kosovare, Albulena Haxhiu tha se ideja e përzgjedhjes së drejtorit nga kryeministri ka synim që kryeministri ta merr përgjegjësinë edhe në rast të funksionimit apo jo të këtij Instituti.

“Ideja ka qenë te zgjedhja e drejtorit. Kryeministri e merr përgjegjësinë në rast të funksionimit të duhur të këtij Instituti dhe pasojat nëse Instituti nuk funksionin mirë. Duke qenë që është obligim i qeverisë, ne kemi dashur që personi përgjegjës do të jetë në krye të këtij institucioni të ndërlidhet me po ashtu me përgjegjësinë e qeverisë në kuptim të dështimit apo të suksesit në të ardhmen. Unë mendoj se është e rëndësishme që në këtë institucion të kenë vetëm persona të profilizuar… Arsyeja kryesore se pse ne kemi për mua do të ishte natyrisht shumë më mirë të jetë në MD, por ne duhet të gjejmë zgjidhjen më të mirë dhe si e fuqizojmë Zyrën e kryeministrit… Ka peshë më të madhe kur një institucion i tillë i ndjeshëm do të jetë në kuadër të Zyrës së kryeministrit, shumë më lehtë do të ketë mbështetje buxhetore dhe kapacitet njerëzore”, theksoi ajo.

Sa i takon periudhës së funksionimit të këtij Instituti, Haxhiu konsideron se Kosova çdo herë duhet të ketë këtë Institut ku do të dokumentonte krimet e luftës.

“Për bindjen time Instituti duhet të veprojë në vazhdimësi për faktin se nëse shohim mandatin që ka jam shumë e bindur se na duhen edhe disa vite derisa t’i hulumtojmë dhe dokumentojmë të gjitha krimet e luftës dhe periudhat që i përmenda. Pra, unë mendoj që Kosova çdo herë duhet të ketë Institutin ku do të dokumentohen krimet e luftës”, u shpreh ajo.

Përkrahje për Projektligjin për Institutin e krimeve të kryera gjatë luftës në Kosovë ofroi edhe deputeti i PDK-së, Hajdar Beqa, i cili tha krijimin e këtij Instituti e konsideron më shumë si rithemelim.

“Ideja ka qenë rritja e nivelit dhe të dërgohet te Zyra e kryeministrit. Në raport me Ministrinë e Drejtësisë dëshiroj të mos keni institut, pasi që nuk po e shpjegon mënyrën e zgjedhjes, por thotë emërohet, e tash nëse zgjedhim emërues politik , nuk e dimë sa kemi arritur qëllimin e ligjit hulumtues, sepse ky ligj ka karakter hulumtues si Institut dhe jo karakter politik”, theksoi Beqa.

Adnan Rrustemi, kryetari i këtij Komisioni, u shpreh se krijimi i mekanizmit për dokumenton krimet e luftës ndonëse i vonuar, por është i domosdoshëm të themelohet sa më shpejt.

“Ky mekanizëm shtetëror i ka munguar vendit tonë, ndonëse është i vonuar në kohë, është i domosdoshëm që të themelohet sa më parë”, u shpreh Rrustemi.

Gjatë këtij muaji Qeveria e Kosovës e votoi Projektligjin për Institutin e krimeve të kryera gjatë luftës në Kosovë, i cili parashihet të funksionojë në kuadër të Zyrës së kryeministrit.

Related Topics:
Continue Reading

Vendi

Kuvendi ratifikon shtatë marrëveshje ndërkombëtare

Published

7 minutes ago

on

April 2, 2026

By

Në seancën e parë të Kuvendit të Kosovës pas një pauze rreth njëmujore, deputetët ratifikuan shtatë marrëveshje ndërkombëtare nga 12 sa ishin paraparë në rendin e ditës.

Në sallë ishin të pranishëm 81 deputetë, të cilët votuan pro shtatë marrëveshjeve të para. Mirëpo, seanca u përcoll me debate dhe largime, pasi deputetët e PDK-së lëshuan sallën në fillim të punimeve, meqë u refuzua kërkesa e tyre që draft-rezoluta për mbrojtjen e të vërtetës historike të vendosej si pikë e parë e rendit të ditës.

Nga ana tjetër, edhe pse ishin në sallë, deputetët e Listës Serbe nuk votuan as për prezencë e as për marrëveshjet në fjalë.

Ndërkaq, katër marrëveshjet e mbetura nuk u votuan nga deputetët e Lidhjes Demokratike të Kosovës (LDK), me arsyetimin se ato kishin nevojë për shqyrtim paraprak.

Ndër vendimet më të rëndësishme që kaluan këtë të enjte ishte edhe marrëveshja e kredisë prej 33 milionë eurosh ndërmjet Kosovës dhe Bankës Evropiane për Investime, e dedikuar për projektin “Energjia Diellore Fotovoltaike” në Korporatën Energjetike të Kosovës (KEK).

Marrëveshjet e ratifikuara:

  • Marrëveshja për qasje në arsimin e lartë dhe pranim për studime në Ballkanin Perëndimor.
  • Marrëveshja financiare ndërmjet Republikës së Kosovës dhe Bashkimit Evropian, për Programin IPA 2018.
  • Marrëveshja financiare ndërmjet Republikës së Kosovës dhe Bashkimit Evropian, për Programin IPA 2017.
  • Marrëveshja e kredisë mes Republikës së Kosovës dhe Bankës Evropiane për Investime për Projektin Energjia Diellore Fotovoltaike në KEK – Porta Globale.
  • Marrëveshja e Kredisë ndërmjet Republikës së Kosovës, e përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim (BERZh) për Projektin e efiçencës së energjisë në ndërtesa publike.
  • Marrëveshja e kredisë “Projekti i Rrugës me Shpejtësi të Lartë Prishtinë – Mitrovicë” (Kredi shtesë) ndërmjet Fondit Saudit për Zhvillim dhe Republikës së Kosovës.
  • Marrëveshja e kredisë ndërmjet Republikës së Kosovës dhe Bankës Evropiane për Rindërtim dhe Zhvillim për Projektin “Impianti për Trajtimin e Ujërave të Zeza në Podujevë”.

Vlera e katër prej këtyre marrëveshjeve, duke përfshirë edhe atë me Bankën Evropiane për Investime, shkon në 121 milionë euro.

Continue Reading

Vendi

Studentët e Mekatronikës në UBT përfitojnë përvojë praktike në teknologjitë më të avancuara në ITP Prizren

Published

37 minutes ago

on

April 2, 2026

By

Fakulteti i Inxhinierisë së Mekatronikës në UBT vazhdon të dëshmojë qasjen e tij moderne dhe të orientuar drejt praktikës, duke organizuar aktivitete që i lidhin studentët drejtpërdrejt me industrinë dhe teknologjitë më të avancuara.

Në këtë kuadër, studentët e vitit të tretë realizuan një vizitë studimore në qendrën ITP në Prizren, të udhëhequr nga Prof. Ass. Dr. Betim Shabani dhe Ass. Ylli Rexhaj, MSc Cand., ku patën mundësinë të njihen nga afër me proceset më të reja të prodhimit dhe inovacionit teknologjik.

Gjatë vizitës, studentët u njohën në mënyrë të detajuar me teknologjinë e printimit 3D, duke ndjekur të gjithë ciklin e zhvillimit, nga skanimi dhe modelimi digjital i objekteve, deri te realizimi i tyre fizik dhe procesi i post-procesimit si fazë përfundimtare.

Kjo eksperiencë praktike përfaqëson një nga elementet kyçe të programit të Mekatronikës në UBT, i cili është i ndërtuar mbi ndërthurjen e teorisë me praktikën, duke përgatitur studentët për sfidat reale të industrisë moderne.

Përmes aktiviteteve të tilla, UBT synon të zhvillojë te studentët aftësi konkrete profesionale, mendim inovativ dhe gatishmëri për tregun e punës, duke e bërë programin e Mekatronikës një nga drejtimet më atraktive dhe të kërkuara për të rinjtë që synojnë të ndërtojnë karrierë në teknologji, automatizim dhe industri të avancuara.

Vizita në ITP Prizren është vetëm një nga shumë aktivitetet praktike që organizohen në kuadër të këtij programi, duke e pozicionuar UBT-në si një institucion lider në përgatitjen e profesionistëve të së ardhmes në fushën e mekatronikës dhe teknologjisë.

Continue Reading

Vendi

Gjermania ndan 3 milionë euro donacion për FSK-në

Published

1 hour ago

on

April 2, 2026

By

Gjermania ka konfirmuar edhe një herë mbështetjen e saj të palëkundur për transformimin dhe modernizimin e Forcës së Sigurisë së Kosovës përmes një donacioni të ri prej 3 milionë eurosh.

Ministri i Mbrojtjës Ejup Maqedonci, ka njoftuar se ky donacion vjen në kuadër të programit gjerman “Enable and Enhance”, i cili do të fokusohet në pesë projekte jetike, me synim kryesor fuqizimin e flotës së transportit ushtarak dhe ngritjen e kapaciteteve për mbështetje mjekësore brenda forcës.

Gjatë ceremonisë së zyrtarizimit të kësaj mbështetjeje, Ministri Maqedonci, priti ambasadorin gjerman në Kosovë, Rainer Rudolph, me të cilin diskutoi mbi ecurinë e reformave në mbrojtje dhe nevojën për zgjerimin e bashkëpunimit dypalësh.

Ministri Maqedonci e vlerësoi lart kontributin e qeverisë gjermane, duke theksuar se ky investim ndikon drejtpërdrejt në gatishmërinë operacionale të FSK-së.

“Republika Federale e Gjermanisë po vazhdon të mbështesë zhvillimin dhe rritjen e kapaciteteve të Forcës së Sigurisë së Kosovës,” u shpreh ministri Maqedonci, duke shtuar se ky donacion është i dedikuar për projekte konkrete që përmbushin standardet më të larta ushtarake.

Sipas krerëve të mbrojtjes, bashkëpunimi mes dy vendeve pritet të thellohet edhe më tej në të ardhmen, duke u fokusuar në trajnime të përbashkëta dhe asistencë teknike për të siguruar një forcë moderne dhe të ndërveprueshme me partnerët ndërkombëtarë.

Continue Reading

Lajmet

Studentet e masterit në Psikologji në UBT, Shqipe Shala dhe Drenusha Krasniqi mbajnë ligjëratë mbi autizmin

Published

1 hour ago

on

April 2, 2026

By

Në kuadër të aktiviteteve akademike dhe ndërgjegjësuese, studentet e programit master në psikologji, Shqipe Shala dhe Drenusha Krasniqi, mbajtën një ligjëratë tematike mbi çrregullimin e spektrit të autizmit.

Ligjërata u fokusua në prezantimin e koncepteve bazë mbi autizmin, duke përfshirë karakteristikat kryesore, shenjat e hershme të identifikimit dhe sfidat që shoqërojnë këtë çrregullim në aspektin e zhvillimit dhe ndërveprimit social. Një rëndësi e veçantë iu kushtua ndërhyrjes së hershme dhe rolit të saj në përmirësimin e cilësisë së jetës për personat në spektrin e autizmit.

Gjatë prezantimit u trajtuan gjithashtu aspektet praktike të mbështetjes, duke përfshirë qasjet bashkëkohore në punën me fëmijët me autizëm, si dhe roli i familjes, institucioneve arsimore dhe profesionistëve në krijimin e një mjedisi gjithëpërfshirës.

Ky aktivitet synoi të kontribuojë në rritjen e vetëdijes dhe njohurive profesionale mbi autizmin, si dhe të nxisë një qasje më të ndjeshme dhe mbështetëse ndaj personave me këtë çrregullim në shoqëri.

Ligjërata u vlerësua pozitivisht nga pjesëmarrësit, duke reflektuar interesin dhe rëndësinë e trajtimit të temave të tilla në kuadër të formimit akademik dhe profesional.

Continue Reading

Të kërkuara