Lajmet

KFOR ende pa përgjigje për kërkesën e Serbisë për dërgimin e trupave

Duke folur për stërvitjen në Novosellë, KFOR thotë se e kanë të rëndësishme për t’u trajnuar dhe testuar aftësitë e njësive të saj.

Published

3 years ago

December 21, 2022

Betim Gashi

KFOR është ende duke e analizuar kërkesën e Serbisë për dërgimin e 1 mijë trupave policore e ushtarake në veri të vendit. Kjo u bë e ditur vetë nga ky mision që tha se do të vazhdojnë të ofrojnë një mjedis të sigurt duke inkurajuar dialog konstruktiv mes Kosovës dhe Serbisë për zgjidhje afatgjata dhe të qëndrueshme.

“Aktualisht jemi duke analizuar kërkesën e fundit të Qeverisë së Serbisë. Ne do të vazhdojmë të ofrojmë një mjedis të sigurt dhe të ofrojmë lirinë e lëvizjes që inkurajon dialogun produktiv, duke u dhënë udhëheqësve aftësinë për të krijuar zgjidhje afatgjata dhe të qëndrueshme, për të mirën e të gjitha komuniteteve që jetojnë në Kosovë”, thonë nga KFOR.

Duke folur për stërvitjen në Novosellë, KFOR thotë se e kanë të rëndësishme për t’u trajnuar dhe testuar aftësitë e njësive të saj për të garantuar lirinë e lëvizjes duke përdorur mjetet në dispozicion në rast se marrëveshjet politike nuk përmbushen dhe iu kërkohet ndërhyrja.

“Për shkak të kompleksitetit të mjedisit aktual operativ, është thelbësore që këto sisteme dhe aftësi të testohen pasi që ato zvogëlojnë rrezikun kolektiv nëse marrëveshjet e ardhshme politike nuk mund të përmbushen. Ka shumë akterë në terren të përkushtuar për të bërë përparim, por KFOR-i mbetet vigjilent dhe i gatshëm për të reaguar. Ne jemi të përgatitur të ndërhyjmë, nëse është e nevojshme ta parandalojmë përshkallëzimin, në përputhje me mandatin tonë të OKB-së”, vijon KFOR.

Komanda Rajonale Lindore e KFOR-it ka shtuar prezencën në kufi në Jarinje duke pasur parasysh protestën e organizuar nga grupet kriminale që erdhën nga Beogradi, me qëllim, sipas autoriteteve të Kosovës, djegien e pikës doganore të Jarinjës. Mirëpo, KFOR thotë se ngjarja u mbyll pa të lënduar.

“KFOR-i tregoi ekuilibër dhe vendosmëri gjatë gjithë ngjarjes. Nuk raportohet për të lënduar dhe tensionet janë ulur për shkak të koordinimit ndërmjet partive zyrtare dhe udhëheqjes së KFOR-it”, bëri të ditur ky mision.

Komandanti i KFOR-it, gjeneralmajor Angelo Michele Ristuçia, deklaroi se KFOR-i ka aftësitë dhe mjetet e duhura për të penguar dhunën në rajon dhe për të siguruar kushte që inkurajojnë dialogun e mëtejshëm politik ndërmjet Prishtinës dhe Beogradit për të ecur përpara, nën lehtësimin e BE-së.

KFOR-i beson fuqishëm se përdorimi i dhunës dhe sjelljes agresive për të ndikuar në vendimet politike në Kosovë është i papranueshëm dhe perceptohet si provokim. Sipas KFOR, është përgjegjësi e të gjithëve për të garantuar mbrojtjen dhe sigurinë kolektive të rajonit.

Misioni i KFOR-it i udhëhequr nga NATO përbëhet nga më shumë se 3700 personel nga 27 vende – duke përfshirë aleatët e NATO-s dhe partnerët e angazhuar për të ofruar një mjedis të sigurt dhe për të ofruar lirinë e lëvizjes për të gjitha komunitetet në Kosovë, në përputhje me mandatin e bazuar në Rezolutën 1244 të Këshillit të Sigurimit të OKB-së të vitit 1999.

Aktualitet

UBT në mesin e 5 institucioneve finaliste në botë për çmimet Triple E

Published

9 hours ago

August 20, 2025

Driton Iseni

Vetëm pesë institucione në botë janë përzgjedhur si finalistët e Triple E Awards – Universiteti i Angazhuar i Vitit (Kategoria Globale), dhe UBT është një prej tyre. Ky vlerësim e vendos UBT-në krah institucioneve më të njohura ndërkombëtare, duke treguar përkushtimin e tij ndaj arsimimit, inovacionit dhe ndikimit shoqëror në nivel global.

Përcaktimi si finalist është rezultat i viteve të përkushtimit për të integruar arsimin, kërkimin dhe ndikimin në komunitet në një model unik angazhimi që krahasohet me universitetet më të mira në botë.

Institucionet finaliste të tjera krahas UBT-së janë:

Jönköping University – School of Engineering (Suedi)
King Fahd University of Petroleum and Minerals (Arabia Saudite)
McGill University – Dobson Centre for Entrepreneurship (Kanada)
Fuzhou Melbourne Polytechnic (Australi/Kinë)

Të qëndrosh përkrah institucioneve kaq të njohura ndërkombëtare është një dëshmi e ekselencës dhe reputacionit ndërkombëtar në rritje të UBT-së. Fituesit përfundimtarë do të shpallen në ceremoninë e ndarjes së Çmimeve Triple E.

UBT është përzgjedhur në këtë finale globale kryesisht falë përkushtimit të tij të palëkundur ndaj dijes, inovacionit dhe përgjegjësisë shoqërore, të mishëruar përmes Strategjisë së Integruar të institucionit.

Me një rrjet në rritje të qendrave kërkimore – si 5G Innovation Hub, Instituti RIED, dhe Qendra Kombëtare për Monitorimin e SDG-ve në Kosovë – UBT forcon infrastrukturën kombëtare të kërkimit, nxit bashkëpunimin ndërdisiplinor dhe lidh akademinë me vendimmarrjen. Iniciativa si Pro-Academia, shërbimet falas për komunitetin dhe një program bursash i trefishuar që nga viti 2019, sigurojnë qasje, barazi dhe mobilitet shoqëror, veçanërisht për grupet e margjinalizuara.

UBT gjithashtu shfaq lidership humanitar gjatë krizave, e përfshin qëndrueshmërinë përmes Strategjisë së SDG-ve dhe Planit të Veprimit për Kampusin e Gjelbër, si dhe promovon rezistencën përmes bashkëpunimit ndërkombëtar dhe diplomacisë arsimore. Duke e transformuar kampusin e vet në një laborator të gjallë, të zgjuar, gjithëpërfshirës dhe të qëndrueshëm, UBT përfaqëson më së miri mënyrën se si arsimi i lartë mund të mobilizojë dijen për të mirën publike – me rrënjë lokale, i lidhur globalisht dhe i orientuar drejt së ardhmes.

Bota

Kriza demografike në sisteme arsimore, shkak emigrimi i grekëve të rinj

Published

11 hours ago

August 20, 2025

UBT News

Një krizë demografike po kërcënon sistemin arsimor grek në numrin ndjeshëm më të ulët të lindjeve në të gjithë vendin.

Shifrat nga mbi 118.000 në vitin 2008 në 62.500 vitin e kaluar, po përkeqësohen nga emigrimi i grekëve të rinj dhe një rënie në numrin e migrantëve që dëshirojnë të vendosen në Greqi raportojnë mediat lokale.

Kriza tashmë ka detyruar mijëra klasa dhe shkolla të mbyllen në të gjithë vendin, ndërsa regjistrimi në shkollat fillore dhe të mesme po tkurret.

Christos Bouras, rektori i Universitetit të Patras në Greqinë Perëndimore, paralajmëroi për një kolaps të afërt të hartës akademike për shkak të problemit demografik.

Regjistrimi i studentëve të vitit të parë në universitete ra nga gati 115.000 në vitin 2010 në rreth 71.000 këtë vit.

Humbja kumulative e studentëve të rinj ka arritur në 330.000”, tha ai.

Aktualitet

Deri në tri orë janë pritjet në dalje të pikës në Merdarë

Published

11 hours ago

August 20, 2025

UBT News

Pas përditësimit të të dhënave në pikat kufitare, pritjet e gjata në disa pika vetëm se kanë filluar të zgjasin më shumë në dalje, të paktën deri në tri orë.

Sipas Qendrës Kombëtare për Menaxhimin Kufitar, pritjet deri në tri orë janë në dalje të pikës kufitare në Merdarë.

Pritjet janë duke vazhduar edhe tek Dheu i Bardhë dhe Jarinje deri në 20 minuta. Kurse, dhjetë minuta pritje janë në Mutivodë.

Aktualitet

Nis fushata për mospërdorim të armëve në ahengje

Published

11 hours ago

August 20, 2025

UBT News

Në Kosovë ka nisur fushata me thirrjen që të mos përdoren armët në ahengje dhe rastet e tilla të raportohen për të parandaluar tragjedi të mundshme.

Në një njoftim të lëshuar nga Ministria e Punëve të Brendshme thuhet se kjo fushatë është përgatitur me mbështetje financiare nga Gjermania, Suedia, Holanda, Franca, Mbretëria e Bashkuar dhe Norvegjia përmes Fondit të Mirëbesimit për Kontrollin e AVL-ve në Ballkanin Perëndimor.

Kjo fushatë është mbështetur edhe nga Bashkimi Evropian.

MPB shton se bashkëpunimi është thelbësor në parandalimin e tragjedive që mund të shkaktohen nga gjuajtjet me armë zjarri.