Gjatë 24 orëve të fundit, Policia e Kosovës ka ndërhyrë në tri raste të ndara të dhunës në familje, të cilat kanë rezultuar me arrestimin e disa personave në Podujevë dhe Rahovec.

Në Podujevë janë raportuar dy raste. Në orët e hershme të mëngjesit të djeshëm, dy vëllezër janë arrestuar pasi janë përleshur fizikisht pas një mosmarrëveshjeje.

Të dy kanë marrë trajtim mjekësor, ndërsa me vendim të prokurorit, njëri është dërguar në mbajtje dhe tjetri është liruar në procedurë të rregullt.

Po në këtë qytet, rreth orës 10:30, një person është arrestuar pasi ka dëbuar bashkëshorten nga shtëpia. Pas intervistimit, i dyshuari është liruar, ndërsa rasti po trajtohet në procedurë të rregullt.

Ndërkohë, një incident më i rëndë ka ndodhur në Rahovec pak para mesnatës.

Një person, nën ndikimin e alkoolit, ka ushtruar dhunë fizike ndaj bashkëshortes dhe vajzës së tij, duke u shkaktuar lëndime trupore. Viktimat kanë pranuar ndihmë mjekësorë në QKMF-në e Rahovecit, ndërsa i dyshuari, me urdhër të prokurorit, është dërguar në qendrën e mbajtjes.

Prokuroria Themelore në Prishtinë ka njoftuar se pas një pune intensive në bashkëpunim me Policinë e Kosovës, është bërë i mundur lokalizimi dhe arrestimi i të pandehurit me iniciale M.G., i cili ishte në kërkim për veprën penale “Vrasje e Rëndë”.

Gjatë operacionit të arrestimit, policia ka sekuestruar dy armë, një sasi të narkotikëve si dhe dokumente të falsifikuara, të cilat i dyshuari i kishte përdorur gjatë kohës sa ishte në arrati për t’iu shmangur identifikimit. Me urdhër të prokurorit, M.G. është dërguar në mbajtje për 48 orë.

Përveç të dyshuarit kryesor, në këtë aksion është arrestuar edhe një person i dytë, i cili dyshohet për veprën penale “Dhënia e ndihmës kryerësit pas kryerjes së veprës penale”.

“Prokurori i shtetit me kohë do të vazhdojë ndërmarrjen e veprimeve hetimore të nevojshme, si dhe do të shqyrtojë mundësinë e paraqitjes së kërkesës për masën e sigurisë së të pandehurit në procedurë penale,” thuhet në njoftimin e Prokurorisë.

Institucioni i akuzës ka rikonfirmuar përkushtimin për t’i vendosur para drejtësisë të gjithë kryerësit e veprave penale, duke siguruar se hetimet për këtë rast do të vazhdojnë deri në zbardhjen e plotë të rrethanave.

Policia e Kosovës ka arrestuar një person në Skenderaj, pasi i njëjti ka shkelur urdhrat e gjykatës duke shkuar në shtëpinë e bashkëshortes së tij, sipas raportit 24 orësh.

Sipas policisë, i dyshuari ka shkaktuar shqetësim tek viktima duke mos respektuar masat e sigurisë.

Pas arrestimit, me vendim të prokurorit, i dyshuari është dërguar në mbajtje për procedime të mëtejshme.

Në Policinë e Kosovës janë raportuar tri raste të dhunës në familje brenda një dite në rajone të ndryshme të vendit.

Në Lipjan, një grua ka raportuar se ka pasur dhunë psikike nga bashkëshorti i saj.

Pas intervistimit të palëve në stacionin policor, prokurori ka vendosur që rasti të shkojë në procedurë të rregullt.

Një rast tjetër ka ndodhur në Mitrovicë, ku po ashtu një grua ka pësuar dhunë nga bashkëshorti i saj. Pas konsultimit me prokurorin, palët janë liruar dhe rasti vazhdon të trajtohet në procedurë të rregullt.

Ndërkaq, në Malishevë është arrestuar një person nën dyshimin se ka sulmuar fizikisht të fejuarën e tij. Edhe në këtë rast, me vendim të prokurorit, i dyshuari është liruar, ndërsa procesi ndaj tij do të zhvillohet në procedurë të rregullt.