Lajmet

IKD identifikon fotografim të votës dhe prishje të heshtjes zgjedhore

Published

5 years ago

February 14, 2021

Betim Gashi

Fotografim i votës, prishje e heshtjes zgjedhore dhe tentim për të votuar me letërnjoftim me afat të skaduar, janë disa nga shkeljet që ka identifikuar Instituti i Kosovës për Drejtësi, në monitorimin që është duke i bërë procesit zgjedhor.

Ylli Zekaj nga IKD tha se kanë 51 monitorues në teren e të cilët po raportojnë për shkeljet në vendvotime. Ai tha se në disa raste kanë vërejtur që në qendra të vendvotimeve janë parë qytetarë me logo të partive politike.

“Gjatë këtyre orëve të para të monitorimit nga ana e monitoruesve tonë që i kemi në terren janë hasur disa shkelje të procesit zgjedhor dhe ato kanë pasur të bëjnë kryesisht me fotografim të votës që tani është vetëm dyshime për shkak se disa raste kanë kaluar në prokurori dhe prokuroria pritet t’i konfirmojë. Pastaj kemi pasur prishje të heshtjes zgjedhore nga ana e disa përfaqësues të partive politike, qoftë përmes kamuflimeve përmes mbajtjes së maskave me logo të partive politike. Kemi pasur edhe disa raste që janë identifikuar nga monitoruesit tanë që votuesve u kanë shkuar sms nga ana e partive politike më të cilat i kanë drejtuar apo orientuar për cilën parti të votojnë. Të gjitha këto përbëjnë shkelje të procesit zgjedhor dhe si të tilla janë paraqitur edhe në organet e policisë”, tha ai.

Zekaj tha se në disa qendra të votimit kanë hasur në qytetarë të cilët kanë tentuar të votojnë me letërnjoftime me afat të skaduar.

“Kemi hasur kryesisht edhe mohimin e të drejtës së votës për shkak se një numër i qytetarëve janë paraqitur me letërnjoftime të skaduara dhe kjo paraqet një pamundësi për të votuar. Kështu që bëjmë apel të të gjithë qytetarët që të mos përdorin letërnjoftim apo dokument identifikimi të skaduar për arsye se është e pamundshme që të votohet me të njëjtat dhe të njëjtit duhet të kenë dokument valid të identifikimit me qëllim që ta shfrytëzojnë të drejtën e tyre të votës”, tha ai.

Sipas Komisionit Qendror të Zgjedhjeve ka bërë të ditur se deri në orën 11:00 kanë votuar 8.3 për qind e votuesve, apo 145 mijë e 650 votues.

Lajmet

Rutte në takim me Ramën: Shqipëria është një aleat i dedikuar

Published

20 minutes ago

September 17, 2025

UBTnews

Sekretari i Përgjithshëm i NATO-s, Mark Rutte, ka nisur sot bashkëbisedimet me kryeministrin e Shqipërisë, Edi Rama, në selinë e NATO-s, në Bruksel.

Përpara mediave Rutte pohoi se Shqipëria vazhdimisht paraqet një partner të besusheshëm, në të cilin NATO mund të mbështetet. Ai theksoi përpjekjet e Shqipërisë për të rritur mbrojtjen e shtetit, por edhe mbrojtjen e saj përtej territorit shqiptar.

Rutte: “Shqipëria është një aleat i dedikuar. Shqipëria do të arrijë 2 për qindëshin e shpenzimeve të mbrojtjes këtë vit. Shqipëria po zhvillon bazën e industrisë së mbrojtjes, duke përfshirë ndërmarrjen e saj shtetërore. Je duke ndihmuar shumë me Ukrainën përmes delegacionit shqiptar, por, gjithashtu përmes trajnimit të gjuhës. Jashtë Shqipërisë, merrni pjesë në ushtritë e tokëve të huaja në Letoni dhe në Bullgari, jeni aktivë në Kosovë me KFOR. Pra, po shkoni përtej pritshmërive. NATO mund të mbështetet në Shqipëri dhe anasjelltas”.

Ndërkohë, Rama përmendi rilindjen e industrisë ushtarake të Shqipërisë, bashkëpunimin për portin ushtarak në Portin Romano dhe mundësinë për t’u anëtarësuar në programet e sigurisë së Bashkimit Evropian.

Rama: “Ne po në lançojmë rilindjen e industrisë ushtarake, jemi shumë entuziastë të bisedojmë me ty për punën që mund të bëjmë më tej për portën ushtarake ‘greenfield’ në Portin Romano. Gjithashtu, jemi këtu të flasim për se si mund të anëtarësohemi në programin e sigurt të Bashkimit Evropian. Siguria shkon përtej parametrave të shteteve të BE-së, shtetet e NATO-s në Evropë mund të përfitojnë gjithashtu nga ajo”./D.B/KP

Lajmet

FIFA ndan një shumë rekorde për klubet në Kupën e Botës 2026

Published

1 hour ago

September 17, 2025

UBT News

FIFA ka njoftuar se do të shpërndajë një shumë rekord prej 355 milionë dollarësh për klubet në mbarë botën në kuadër të Programit të Përfitimeve për Klubet (CBP) të lidhur me Kupën e Botës 2026.

Për herë të parë, pagesat do të përfshijnë jo vetëm lirimin e lojtarëve për fazën finale të turneut, por edhe për ndeshjet kualifikuese.

Ky vendim është rezultat i një marrëveshjeje të arritur mes FIFA-s dhe Shoqatës Evropiane të Klubeve (ECA) në mars të vitit 2023, me synim që sistemi të jetë më i drejtë dhe gjithëpërfshirës, duke siguruar përfitime për klubet në të gjitha kontinentet.

Shuma e ndarë është rreth 70% më e lartë krahasuar me 209 milionë dollarët e shpërndarë pas Kupës së Botës 2022 në Katar.

“Një shumë rekord prej 355 milionë dollarësh do t’u shpërndahet klubeve për lirimin e lojtarëve të tyre. Kjo përforcon bashkëpunimin tonë me ECA-n dhe klubet në mbarë botën, teksa presim një edicion inovativ e globalisht gjithëpërfshirës të Kupës së Botës FIFA vitin e ardhshëm,” deklaroi presidenti i FIFA-s, Gianni Infantino.

Edhe presidenti i ECA-s, Nasser Al-Khelaifi, përshëndeti marrëveshjen, duke theksuar se kjo nismë vlerëson rolin e klubeve në zhvillimin e futbollit ndërkombëtar dhe garanton që gjithnjë e më shumë prej tyre të shpërblehen për kontributin e tyre.

Në edicionin e fundit, Katar 2022, 209 milionë dollarë u shpërndanë për 440 klube nga 51 shoqata anëtare të FIFA-s.

Ndërkohë, edicioni i ardhshëm i Kupës së Botës do të zhvillohet nga 11 qershori deri më 19 korrik 2026 në Shtetet e Bashkuara, Meksikë dhe Kanada./S.K/KP/

Aktualitet

Profesoresha e UBT-së, Jeta Kiseri – Kubati, me publikim në revistën ndërkombëtare IJBM

Published

1 hour ago

September 17, 2025

Driton Iseni

Prof. Asoc. Dr. Jeta Kiseri – Kubati, profesoreshë në UBT, ka botuar punimin e saj të fundit në revistën shkencore ndërkombëtare International Journal of Biomedicine (IJBM), e indeksuar në Scopus, një prej databazave më prestigjioze shkencore në botë.

Artikulli i titulluar: “Retention Practices of Orthodontists in the Western Balkans”, është rezultat i një bashkëpunimi ndër-rajonal mes UBT-së, Fakultetit të Stomatologjisë në Universitetin e Rijekës dhe Fakultetit të Stomatologjisë në Shkup.

Ky studim origjinal përfshiu një hulumtim të gjerë me mbi 450 ortodontë nga Kroacia, Maqedonia e Veriut dhe Kosova, duke analizuar praktikat dhe protokollet e mbajtjes pas trajtimit ortodontik. Rezultatet zbuluan dallime të rëndësishme mes vendeve sa i përket përdorimit të pajisjeve, ndjekjes së pacientëve dhe faktorëve që ndikojnë në zgjedhjen e metodave të mbajtjes.

Studimi thekson se:

Ortodontët në Kosovë i kushtojnë më shumë rëndësi moshës së pacientëve dhe rritjes biologjike,
Në Kroaci dhe Maqedoninë e Veriut përzgjedhja bazohet kryesisht në llojin e malokluzionit,
Praktikat e kujdesit dhe dhënies së udhëzimeve të shkruara për pacientët ndryshojnë dukshëm mes vendeve.

Ky publikim jo vetëm që pasuron literaturën shkencore ndërkombëtare në fushën e ortodonciës, por gjithashtu nënvizon rëndësinë e bashkëpunimit akademik rajonal dhe potencialin që ka UBT për të kontribuar në shkencë dhe inovacion.

Për më shumë, punimi është publikuar më 5 shtator 2025 dhe mund të lexohet në linkun zyrtar: Retention Practices of Orthodontists in the Western Balkans – IJBM