Lajmet

Haxhiu paralajmëron vizitë në Hagë tek ish-krerët e UÇK-së

Vizita do të realizohet gjatë këtij muaji.

Published

4 years ago

March 23, 2022

Betim Gashi

Ministria e Drejtësisë, Albulena Haxhiu, sot ka prezantuar punën njëvjeçare të ministrisë që ajo drejton. Ajo në një konferencë për media tha se kanë arritur të realizojnë reforma në drejtësi dhe të përmirësojnë kornizën ligjore, teksa fokusi kryesor vazhdon të mbetet vettingu në drejtësi.

E para e drejtësisë kosovare tregoi se në fund të këtij muaji do të realizojë një vizitë në Hagë, derisa ka shtuar se gjatë një viti të qeverisjes së saj kanë dëshmuar se një qeveri në Kosovë mund të veprojë dhe të punojë në përmbushjen e qëllimeve, dhe pa e keqpërdorur buxhetin e shtetit.

“Sot bëhen një vit kur kam pranuar detyrën si ministre e Drejtësisë. Gjatë këtij viti kemi dëshmuar se në Kosovë mund të ketë qeveri të pa korruptuar, pa skandale, e cila është e përkushtuar në përmirësimin e jetës së qytetarit dhe krijimit të shtetit të së drejtës. Gjatë këtij viti kemi dëshmuar se një qeveri në Kosovë mund të veprojë dhe mund të punojë në përmbushjen e qëllimeve për të mirën e përgjithshme, pa keqpërdorur buxhetin e shtetit dhe taksat e qytetarëve duke u minimizuar shpenzimet. Në këtë vit qeverisje Ministria e Drejtësisë ka punuar vazhdimisht për reformën në drejtësi duke hartuar politika dhe kemi përmirësuar kornizën ligjore në vend me qëllim të luftimit të korrupsionit dhe krimit të organizuar përfshirë pakon ligjore të korrupsionit dhe që lidhen me ligjin për deklarimin e pasurisë dhe ligji për byronë shtetërore për konfiskimin e pasurisë së fituar në mënyrë të pajustifikuar”, tha ajo.

Haxhiu foli edhe për reformat në sistemin prokurorial ku tha se do të trajtohet me prioritet, derisa në Kuvend është proceduar projektligji për Këshillin Prokurorial të Kosovës me qëllim të zhdukjes së parregullsive. Ajo ka folur edhe mbi procesin e vettingut për të cilin tha se mbetet prioritet kryesor i ministrisë që ajo drejton dhe se për këtë çështje ka kërkuar takim edhe me partitë opozitare, por që këta të fundit nuk i janë përgjigjur

“Vettingu është kërkesë shoqërore, është i vetmi çelës që ne e kemi në duar për ta bërë Kosovën shtet të së drejtës. Por gjatë kësaj kohe ka pasur sfida sidomos në drejtim të konsensusit politik për këtë çështje, pra edhe përkundër faktit që ne kemi thirrur në disa takime subjektet opozitare me qëllim të njoftimit të tyre për procesin e vettingut, qoftë me koncept-dokumentin, qoftë me amendamentin kushtetuese deri tani këto takime nuk kanë ndodhur, për faktin se është e rëndësishme se për reformën në drejtësi pavarësisht dallimeve që mund të kemi me subjektet e tjera politike për çështje të ndryshme besoj që reforma në drejtësi do të duhej të kishte konsensus politik edhe brenda Kuvendit të Kosovës”, tha ajo.

Ndërsa mosvotimin e projekt-kodit civil në Kuvend, ministrja Haxhiu e ka parë si një gjë jo të mirë, por për të cilin dokument tha se do të procedohet sërish në Kuvend.

“Mosvotimi i kodit civil në Kuvend nuk ka qenë lajm i mirë, sepse sipas Kushtetutës konsiderohet një dokument shumë i rëndësishëm, andaj edhe do ta riprocedojmë në Kuvend për faktin se rregullorja nuk parasheh ndonjë afat në rastet kur Kuvendi nuk voton një dokument, andaj duke pasur parasysh që nuk ka afat ne do ta riprocedojmë kodin civil”, tha Haxhiu.

Derisa ka folur për punët e përfunduara gjatë këtij njëvjeçari, ministrja e Drejtësisë ka bërë të ditur se do të zhvillojë një vizitë në Hagë së bashku me Komisionin e Legjislacionit, një anëtar të saj dhe nënkryetaren e Kuvendit Saranda Bogujevci.

“Unë bashkë me komisionin për legjislacion, kryetarin e komisionit për legjislacion dhe një anëtarë të komisionit për legjislacion, kryetaren e Kuvendit, Saranda Bogujevci, kemi planifikuar ta kemi një vizitë në Hagë dhe është e vërtetë që disa prej tyre nuk kanë pritur Ministrinë e Drejtësisë vitin e kaluar, mirëpo si Ministri e Drejtësisë kemi për obligim të bëjmë kërkesa për të gjithë, pavarësisht dallimeve politike për çështje që i kemi e që kanë ndodhur pas luftës, sepse sa i përket luftës së UÇK-së ne kemi unifikim. Lufta e UÇK-së ka qenë luftë e drejtë për çlirim andaj problemet e pasluftës pulitke me ta nuk më bëjnë mua të mos i vizitoj, por mbetet në vullnetin e tyre nëse duan ta presin apo jo Ministrinë e Drejtësisë”, tha Haxhiu.

Lajmet

Berisha: Të mohosh gjenocidin serb në Kosovë është të mohosh veten si shqiptar

Published

21 seconds ago

October 16, 2025

UBTnews

Kuvendi po shqyrton sot kërkesën për zhvillimin e mocionit me debat të finalizuar me rezolutë në lidhje me njohjen e gjenocidit serb në Kosovë dhe detyrimet përkatëse të qeverisë së Shqipërisë, propozuar nga një grup deputetësh të PD-së.

Kryetari i Partisë Demokratike, Sali Berisha në fjalën e tij, u shpreh se, “gjatë periudhës 1998-1999 forcat barbare serbe kryen në Kosovë rreth 100 masakra të evidentuara ndaj popullsisë të pambrojtur të saj. Kështu u vranë rreth 1400 fëmijë”, shkruan ATSH.

Berisha më pas renditi viktimat e shkaktuara nga serbët në Kosovë.

“Ata që shkelin mbi gjakun, sakrificën e tyre, këtij gjenocidi të tmerrshëm, ata nuk janë jo shqiptarë, por ata nuk janë njerëz, ata janë në nivelin e njeriut primitiv ose të kafshës. Po ju të tillë nuk mund ta paraqisni veten.”

“Këto shifra që ju dhashë janë të rezolutës së parlamentit të Kosovës, të cilën ne duhet ta adaptonim menjëherë”, theksoi Berisha.

“Të mohosh gjenocidin serb në Kosovë, të mohosh veten si shqiptarë, të mohosh ndërgjegjen e kombit, do të thotë të jesh një qenie pa ndërgjegje as shoqërore, as njerëzore, as kombëtare”, tha Berisha.

Pas fjalës së Berishës, u miratua propozimi i grupit të PS për ta kaluar në fund të seancës votimin për rezolutën./KP

Lajmet nga UBT

UBT shënon Tetorin Rozë me aktivitet edukativ dhe debat mbi kancerin e gjirit

Published

19 minutes ago

October 16, 2025

Driton Iseni

Në kuadër të Tetorit Rozë, Fakulteti i Psikologjisë në UBT, në bashkëpunim me UBT International Smart Schools dhe United Hospital, organizoi një aktivitet të veçantë informues, edukativ dhe diskutues, i cili ofroi mundësi të gjera për studentët, stafin akademik dhe komunitetin për të njohur rëndësinë e diagnostikimit të hershëm dhe parandalimit të kancerit të gjirit.

Ngjarja shërbeu si një platformë e hapur për informim, debat dhe diskutim interaktiv, ku pjesëmarrësit patën mundësinë të ndërvepronin direkt me ekspertë të fushës së shëndetit publik, kirurgjisë dhe radiologjisë.

Në këtë aktivitet morën pjesë ekspertë të shëndetësisë nga fusha të ndryshme:

Dr. Shkendije Nuza – Drejtore e Radiologjisë, ShSUK

Dr. Saud Maliqi – Kirurg Torakal

Dr. Mejreme Bajqinovci – Specialiste e Shëndetësisë Publike, IKSHPK

Dr. Elfije Krasniqi – Specialiste e Shëndetësisë Publike, QRSHP-Prishtinë, Koordinatore për Edukim dhe Promovim Shëndetësor

Ligjërues të veçantë ishin:

Dr. Saud Maliqi, nga United Hospital, i cili ndau njohuri mbi diagnostikimin dhe trajtimin kirurgjikal të kancerit të gjirit, duke theksuar sfidat dhe benefitet e ndërhyrjeve të hershme.

Dr. Valbona Maloku, Koordinatore për Edukim dhe Promovim Shëndetësor në QRSHP-Prishtinë, e cila trajtoi strategjitë e ndërgjegjësimit të publikut, rëndësinë e kontrolleve periodike dhe promovimin e shëndetit të grave.

Pjesëmarrësit u angazhuan në pyetje, diskutime dhe debate të drejtpërdrejta me ekspertët, duke përfituar njohuri të thella mbi parandalimin, diagnostikimin dhe trajtimin e hershëm të sëmundjes, si dhe mbi rolin e edukimit shëndetësor në komunitet.

Ky aktivitet i UBT-së është një dëshmi e përkushtimit të institucionit për shëndetin dhe edukimin shëndetësor të komunitetit, duke mbështetur iniciativat kombëtare dhe ndërkombëtare për vetëdijesimin mbi kancerin e gjirit dhe fuqizimin e grave. Përmes këtij bashkëpunimi ndërinstitucional, UBT vazhdon të krijojë ura mes arsimit, shëndetit dhe komunitetit, duke u bërë një model për edukim dhe promovim shëndetësor në rajon.

Lajmet

KQZ-ja me detaje për verifikimin e rezultateve, përmbyllet procesi në 13 komuna

Published

3 hours ago

October 16, 2025

UBTnews

Zëdhënësi i Komisionit Qendror të Zgjedhjeve, Valmir Elezi ka thënë se deri më tani janë verifikuar rezultatet për 1 mijë e 531 vendvotime nga votimet për kryetarë të 12 tetorit.

Ai njëherësh ka treguar edhe për verifikimin e rezultateve për asamble.

“Sipas informacioneve nga Qendrat Komunale të Numërimit, deri në orën 10:00 të ditës së sotme, janë verifikuar rezultatet për 1,531 vendvotime nga zgjedhjet për Kryetarë të Komunave dhe rezultatet për subjektet politike nga zgjedhjet për Kuvende Komunale nga 1,494 vendvotime”.

“Nga po kaq vendvotime, 1,494, janë numëruar votat e kanidatëve nga zgjedhjet për Kuvendet Komunale. Pra, deri më tani, nga 5,142 kuti votimi që i takojnë dy llojeve të zgjedhjeve, janë procesuar 3,025”, tha ai.

Elezi bëri me dije më tutje se deri më tani aktivitetet në Qendrën Komunale të Numërimit sa i përket numërimit të votave janë përmbyllur në 13 komuna.

“Deri më tani (e enjte, ora 10:00), aktivitetet në QKN janë përmbyllur në 13 komuna: Hani i Elezit (e hënë), Junik, Mamushë, Zveçan (e martë), Mitrovicë e Veriut, Zubin Potok, Deçan, Shtime, Klinë, Shtërpcë, Obiliq, Istog dhe Skenderaj (e mërkurë). Në përgjithësi, në Qendrat Komunale të Numërimit zhvillohen 3 aktivitete të rëndësishme: verifikimi i rezultateve nga zgjedhjet për Kryetarë të Komunave; verifikimi i rezultateve të subjekteve politike nga zgjedhjet për Kuvende Komunale; dhe numërimi i votave të kandidatëve për anëtarë të Kuvende Komunale”, shtoi Elezi.

Në zgjedhjet e së dielës votuan 811 mijë e 984 qytetarë nga 2milionë e 25mijë e 105 me të drejtë vote./EO

Lajmet

Kapen dy kosovarë me mbi 27 mijë euro të padeklaruara në kufi me Shqipërinë

Published

3 hours ago

October 16, 2025

UBTnews

Dy shtetas nga Kosova janë kapur në Pikën e Kalimit Kufitar në Morinë, teksa tentonin të futnin në territorin e Shqipërisë 27 mijë e 550 euro pa i deklaruar në doganë.

Policia shqiptare bëri të ditur se në hetim janë vënë dy persona me inicialet A. G., njëri 51-vjeçar nga Kosova me vendbanim në Suedi, të cilit iu gjetën 12 mijë e 550 euro, dhe tjetri 44-vjeçar nga Suhareka, me 15 mijë euro në posedim.

Shuma e parave është sekuestruar, ndërsa ndaj të dyve janë nisur procedurat hetimore në Prokurorinë pranë Gjykatës së Kukësit për veprime të mëtejshme.
“Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme”./EO