Lajmet

​“Edhe n’shtet, edhe n’familje”, marshohet në përkrahje të komunitetit LGBTI

U tha se shteti dhe familja janë dy institucionet që po diskriminojnë më së shumti komunitetin LGBTI.

Published

on

“Edhe n’shtet, edhe n’familje”, ishte slogani i edicionit të gjashtë të javës së krenarisë. Nga sheshi “Skënderbeu” në drejtim të Katedrales e pastaj në Pallatin e Rinisë, me qindra qytetarë kanë marshuar në përkrahje të këtij komuniteti.

Në “Paradën e Krenarisë” u tha se shteti dhe familja janë dy institucionet që po diskriminojnë më së shumti vajzat dhe djemtë e komunitetit LGBTI.

Po ashtu, organizatorët e marshit kanë kritikuar qeverinë, meqë sipas tyre, janë në listën e fundit të prioriteteve. Ndërkaq, ministrja e Drejtësisë ka deklaruar se do të procedojnë sërish Kodin Civil, në organin më të lartë legjislativ.

Shemsije Çerkini thotë se është krenare me të birin e saj që i takon komunitetit LGBTI. Ajo pas përfundimit të marshit ka mbajtur fjalimin para masës, duke kërkuar që shtëpia të jetë vend i pranimit dhe dashurisë.

“Qëndroj sot para juve si një nënë krenare. Qëndroj sot para juve si një nënë krenare e djalit tim “gay”. Si nëna e çdo personi LGBTI që nuk e ka dashurinë e përkrahjen e familjes. Një fjalë e urtë popullore thotë se ‘evladi është bujashka e zemrës’. Edhe po, është shumë e vërtetë. Evladi është pika e dobët, zemra e çdo prindit. Çdo evlad, çdo fëmijë, qoftë vajzë, djalë a çka do, gay, lesbike apo trans, rehatia e djalit tim është më e rëndësishme se sa çdo gjë tjetër në këtë botë. Unë jam shumë krenare për djalin tim, për personalitetin e tij, seksualitetin, jam krenare që është ai që është”, u shpreh ajo.

Organizatori i kësaj parade, Lend Mustafa tha se familja e shteti nuk po përkrahin komunitetin.

“Mesazhi iu drejtohet dy institucioneve kryesore bazë të një fëmije dhe pjesëtari të komunitetit LGBTI, janë shteti edhe familja. Janë institucionet që më së shumti po e diskriminojnë komunitetin tonë… Ne tashmë e kemi kuptuar se komuniteti LGBTI gjithmonë është në listën e fundit të prioriteteve të shtetit tonë të Kosovës. Edhe kësaj here kemi qenë të dëshpëruar me vendimet që kanë dashur të merren sa i përket Kodit Civil, për shkak se nuk janë të drejta që na takojnë neve. Janë të drejta që po donë qeveria të na jap, ato nuk garantojnë asgjë për komunitetin LGBTI”, ka deklaruar ai.

Ambasadori Jeffrey Hovenier, i cili ishte nga të parët që iu bashkua paradës, tha se sot është bashkë me një grup nga Ambasada e Shteteve të Bashkuara të Amerikës për të treguar mbështetjen për këtë komunitet.

“Ne jemi këtu për të treguar mbështetjen për të drejtat e komunitetit LGBTI+, sepse besojmë fuqimisht që të drejtat e komunitetit LGBTI+ janë të drejta të njeriut. Por, shpresoj që unë nuk do të bëhem storia e sotme, rrëfimi i sotëm, por do t’i shohim kolegët e mi, pjesëtarë të shoqërisë civile, korpusit diplomatik dhe qytetarët e Kosovës, të cilët janë këtu për të marshuar këtu dhe për të siguruar që gjithë qytetarët e popullit të Kosovës, pa marrë parasysh veçoritë e tyre të ndryshme, përfshirë edhe orientimin seksual që i gëzojnë të drejtat e tyre. Do ta them edhe një herë që të drejtat e komunitetit LGBTI+, janë po ashtu të drejta të njeriut”, ka thënë ai.

Ushtruesja e detyrës së shefes së Grupit Parlamentar të Lëvizjes Vetëvendosje, Mimoza Kusari-Lila ka thënë se sot po festojnë të drejtat për personat e komunitetit LGBTI.

“Si popull që kemi qenë të robëruar, cenuar duhet të dimë më së miri se çfarë do të thotë të mohohet një e drejtë. Ajo çfarë ka ndodhur në Parlamentin e Kosovës uroj të mos përsëritet, në kuptimin e procesit i cili duhet të rregullojë një të drejtë tjetër legjitime për të qenë bashkë në një union civil apo martesë të gjinisë së njëjtë. Pa koloritin e vet, shoqëria nuk mund të jetë shoqëri e drejtë dhe barabartë, demokratike dhe në funksion të të gjithëve”, ka thënë ajo.

Në një deklaratë, ministrja e Drejtësisë, Albulena Haxhiu u shpreh se deri më tani institucionet nuk kanë respektuar të drejtat e komunitetit.

“Në kohën kur është dashur që të tregojmë që jemi për respektimin e të drejtave të njeriut dhe këto nuk janë vetëm deklarative, por edhe me veprime konkrete me mundësinë për të votuar kodin civil, në këtë rast deputetët e opozitës sikurse edhe disa nga GP i LVV-së, nuk dhanë votën për një dokument që ishte jashtëzakonisht i rëndësishëm. Unë mund të kuptoj mendimet ndryshe për çështje të ndryshme, por konsideroj që është roli i deputetit që duhet të punojë në emancipim të shoqërisë. Ai duhet të jetë shembull se si respekton të drejtat e njeriut”, tha ajo.

Po ashtu, ajo deklaroi se do të procedojnë sërish në parlament Kodin Civil.

“Ne do ta procedojmë sërish draftin e Kodit Civil dhe jemi të interesuar të bashkëpunojmë me deputetët që kanë një mendim tjetër që të shohim se cila është rruga për ta shtyrë përpara. Por që të drejtat e njeriut nuk mund të negociohen”, ka thënë ajo.

Gjatë marshimit, është evidentuar një rast kur në drejtim të qytetarëve është hedhur një mjet piroteknik. Drejtori i përgjithshëm i Policisë së Kosovës, Samedin Mehmeti tha se qëllimi i vizitës është që të tregojnë mbështetjen për të grupet që jetojnë në Kosovë.

“Ne si Polici e Kosovës e respektojmë çdo diversitet që e kemi në shoqëri, natyrisht që e mbështesim çdo event që ka të bëjë me promovimin e kulturën e diversitetit… Deri më tani nuk kemi ndonjë problem, përveç një incidenti që patëm te “Hotel Grand” ku u hedh një mjet piroteknik, por nuk kemi pas diçka që është serioze dhe që e dëmton imazhin dhe respektin ndaj diversitetit”, ka përfunduar Mehmeti.

Më tej, ai tha se nuk ka shifra se sa ka qenë numri i pjesëmarrësve në “Paradën e Krenarisë”.

Në marshin e gjashtë në përkrahje të këtij komuniteti kanë marrë pjesë edhe ambasadorë të akredituar në vendin tonë, kryetari i Prishtinës Përparim Rama, Vlora Çitaku nga Partia Demokratike e Kosovës, ish-presidentja Atifete Jahjaga, deputetë të Lëvizjes Vetëvendosje dhe pjesëtarë të shoqërisë civile. 

Lajmet

​Vrasja e gjyqtarit Astrit Kalaja, lihen në burg Gjon Shkambi

Published

on

Në Gjykatën e Apelit sot u mbajt seanca për vrasjen e gjyqtarit Astrit Kalaja.

Gjykata e Apelit ka vendosur të lë në burg Gjon Shkambin dhe punonjësin e sigurisë, Banush Koxhaj.

Ndërkohë vrasësi i gjyqtarit Elvis Shkambi nuk e ka apeluar masën e arrestit me burg.

Gjon Shkambi akuzohet se kishte dijeni mbi planin e nipit, akuza të cilat i ka mohuar. Koxhaj dyshohet se shpërdoroi detyrën duke mos kontrolluar dhe mos vlerësuar alarmin e detektorit që tregoi se vrasësi po hynte me një pistoletë./S.K/KP/

Continue Reading

Lajmet

Fillon periudha për votimin me postë nga jashtë Kosovës për raundin e dytë të zgjedhjeve

Published

on

Komisioni Qendror i Zgjedhjeve ka njoftuar se sot ka filluar periudha e votimit jashtë Kosovës për votim me postë në raundin e dytë të zgjedhjeve për Kryetarë të Komunave.

KQZ njofton se kjo periudhë e votimit (27 tetor – 8 nëntor 2025) do të vlejë vetëm për 29,712 shtetasit e Republikës së Kosovës që janë regjistruar me sukses si votues jashtë vendit gjatë afatit të përcaktuar për regjistrim (23 korrik- 29 gusht 2025).

“Këta votues i takojnë komunave, të cilat, sipas rezultateve ende të pacertifikuara, janë pjesë e raundit të dytë të zgjedhjeve për Kryetarë të Komunave, si: Gjakovë (3,141), Gjilan (2,066), Dragash (2,770), Kaçanik (1,149), Klinë (2,230), Fushë Kosovë (489), Mitrovicë e Jugut (1,188), Obiliq (220), Rahovec (1,902), Pejë (1,895), Prishtinë (1,727), Prizren (2,870), Suharekë (3,325), Viti (1,970), Vushtrri (1,019), Junik (1,363), Mamushë (356) dhe Kllokot (49)”, thuhet në njoftim.

KQZ thotë se ka nisur procesin e votimit jashtë vendit para certifikimit të rezultateve për të shmangur vonesat në procesin zgjedhor dhe për të siguruar që çdo qytetar i regjistruar të ketë mundësinë të ushtrojë të drejtën e tij kushtetuese për të votuar në kohë.

Me qëllim të ofrimit të mundësisë për votim për shtetasit që janë regjistruar për të votuar përmes postës, kutitë postare janë funksionale në këto shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedonia e Veriut, Mbretëria e Bashkuar, Norvegji, ShBA, Shqipëri, Slloveni, Suedi, Turqi dhe Zvicër./S.K/KP/

Continue Reading

Lajmet

Presidentja Osmani arrin për vizitë pune në Riad, pritet me nderime ushtarake

Published

on

Presidentja e Kosovës, Vjosa Osmani ka arritur në Riad të Arabisë Saudite, me ftesë të Princit të Kurorës së Arabisë Saudite, Muhamed bin Salman, për të marrë pjesë në Future Investment Initiative (FII).

Ky forum, i njohur si një nga ngjarjet më prestigjioze globale për investime dhe inovacion, mbledh udhëheqës botërorë, drejtues të korporatave më të mëdha ndërkombëtare, investitorë, dhe ekspertë të teknologjisë e politikave publike, për të diskutuar idetë dhe strategjitë që do të formësojnë ekonominë dhe shoqëritë e së ardhmes.

Presidentja Osmani kur arriti u prit me nderime ushtarake në Riad të Arabisë Saudite./S.K/UBTNews/

Continue Reading

Lajmet

Aksidentoi dy turistët francezë, arrestohet 35-vjeçari në Korçë

Published

on

Policia e qarkut Korçë ka vënë në pranga një 35-vjeçar nga fshati Grabovicë, pasi u përfshi në një aksident rrugor ku u plagosën dy turiste franceze.

Sipas njoftimit zyrtar të Policisë, E. C., 35 vjeç, u arrestua në flagrancë për veprën penale “Shkelja e rregullave të qarkullimit rrugor”.

Ngjarja ndodhi një ditë më parë në aksin rrugor “Korçë–Pogradec”, ku automjeti që drejtohej prej tij u përplas me mjetin në të cilin ndodheshin dy shtetaset franceze.

Të plagosurat u dërguan fillimisht në Spitalin Rajonal të Korçës, dhe më pas u transportuan për trajtim të specializuar në Spitalin e Traumës në Tiranë, ku ndodhen nën kujdesin e mjekëve, në gjendje shëndetësore të stabilizuar.

Policia bën me dije se grupi hetimor po vijon punën për të përcaktuar me saktësi shkakun dhe rrethanat e aksidentit./S.K/KP/

Continue Reading

Të kërkuara