Superliga e futbollit do të vazhdojë në këtë mesjavë me ndeshjet e xhiros së 29-të. Pa dyshim, dueli kryesor i kësaj xhiroje do të jetë ai mes Dritës dhe Prishtinës.

Gjilanasit vijnë nga gabimi kundër Malishevës, me ç’rast distanca me Ballkanin u ngushtua në 10 pikë.

Prandaj, “Intelektualët” kanë nevojë për fitore në shtëpi për ta ruajtur këtë diferencë për të qenë të qetë.

Nga ana tjetër, kryeqytetasit e mposhtën në mesjavën e kaluar pikërisht Dritën në Kupën e Kosovës, ndërsa vazhduan më pas me një tjetër performancë spektakolare kundër Suharekës në Superligë, për ta konfirmuar këndelljen me trajnerin e ri, Arsim Thaqi.

Për këtë, dueli i së enjtes mes rivalëve të moçëm pritet të jetë “i zjarrtë”.

FC Basel po marshon drejt titullit kampion në Zvicër, falë një Xherdan Shaqiri në superformë.

“Në fakt, nuk kam pse t’u përgjigjem pyetjeve; rezultati foli vetë. Ishte një deklaratë e pastër,” u shpreh i entuziazmuar Xherdan Shaqiri pas fitores 4-0 ndaj FC Zürich. Kapiteni i FCB-së shkëlqeu sërish në “klasiken” e futbollit zviceran.

Me një gol spektakolar që e çoi rezultatin në 2-0 dhe më pas një goditje dënimi perfekte për të realizuar të tretin, Shaqiri i dha Baselit fitoren e katërt radhazi, duke e afruar edhe më shumë me titullin e parë kampion që nga viti 2017.

I pyetur në zonën mikse nëse kontrata e tij përfshin një bonus për titullin kampion, 33-vjeçari u përgjigj me buzëqeshje: “Nëse fiton, meriton një bonus. Është krejtësisht normale, edhe në jetën e përditshme.”

Përveç një bonusi të mundshëm për titullin, kapiteni i Baselit mund të përfitojë edhe një tjetër, nëse arrin të shpallet golashënuesi më i mirë i kampionatit. Pas golit të fundit, ai është barazuar me Dereck Kutesën e Servette me 13 gola. Megjithatë, ndryshe nga Shaqiri, Kutesa ka pasur paraqitje më të luhatshme në javët e fundit.

“Është gjithmonë kënaqësi të shënosh. Si lojtar sulmues, kjo është pjesë e misionit tim. Shpresoj të ketë edhe më shumë gola,” tha Shaqiri, përpara se të zhvendosej drejt dhomave të zhveshjes, ku skuadra e Baselit festoi jo vetëm fitoren kundër FCZ, por edhe 60-vjetorin e trajnerit të tyre.

Mundësi me origjinë ruse, por që përfaqëson Shqipërinë, Chermen Valiev ka folur për incidentin me kreun e Federatës Ruse të Mundjes dhe njëkohësisht zëvendëspresidentin e Federatës Botërore të Mundjes, Mikhail Mamiashvili, gjatë dorëzimit të medaljeve në Kampionatin Evropian.

Duke folur për televizionin rus, “Match TV”, Valiev tha se Mamiashvili e quajti atë “tradhtar të atdheut”, si dhe tregoi se si ndodhi ndryshimi i shtetësisë sportive.

Të mërkurën, Mamiashvili mori pjesë në ceremoninë e ndarjes së çmimeve në Kampionatin Evropian në Sllovaki. Gjatë nderimit të sportistëve në kategorinë 74 kg, ku Valiev mori medaljen e artë, Mamiashvili iu afrua mundësit dhe shkëmbeu fjalë me të, pas së cilave i vuri në mënyrë të vrazhdë një medalje atletit dhe i kapi duart.

“Kur u transferova për të luajtur për një vend tjetër, respektova të gjithë kuadrin e një transferimi ndërkombëtar, gjithçka ishte firmosur zyrtarisht. Kam paguar një tarifë prej pesë mijë eurosh për federatën ndërkombëtare dhe pesë mijë euro për Federatën Ruse të Mundjes”, tha Valiev-i.

“Mikhail më quajti tradhtar të atdheut. Isha konfuz…”  “Unë iu afrova atij, por organizatorët më morën”, tha Valiev për “Match TV”.

Kujtojmë se Valiev-i ndryshoi shtetësinë ruse në shqiptare në qershor 2024. Në Lojërat Olimpike 2024 në Paris, ai fitoi një medalje bronzi, e cila ishte e para për Shqipërinë në një Olimpiadë.

Megjithatë, reagim ka pasur edhe nga Mamiashvili, një ish-mundës i Bashkimit Sovjetik me origjinë gjeorgjiane dhe i lindur në Ukrainë, por që ka vendosur të zhvillojë karrierën e tij në Rusi.

“Kjo nuk është shumë e vërtetë”, tha kreu i Federatës Ruse të Mundjes, kur u pyet nëse e kishte quajtur Valiev-in tradhetar të atdheut.

“Unë thashë se rruga që ai zgjodhi ishte rruga e një tradhtari. Që kur po largohej. Unë heshta, por nëse ai thoshte kështu… Unë përcaktova rrugën që ai zgjodhi”, tha Mamiashvili për “Match TV”.

Çfarë ndodhi mes Valiev-it dhe Mamiashvili-t?

Komiteti Olimpik Kombëtar Shqiptar (KOKSH) ka zbuluar skandalin, duke publikuar një video të incidentit të ndodhur në Bratisllavë mes Valiev-it dhe Mamiashvili-t.

“Sporti i mundjes është përfshirë në një skandal të vërtetë gjatë ceremonisë së dorëzimit të medaljeve në Kampionatin Evropian të zhvilluar në Bratislavë të Sllovakisë”, shkruan KOKSH-i.

“Presidenti i Federatës Ruse të Mundjes dhe Zv/Presidenti i Federatës Botërore të Mundjes, Mikhail Mamiashvili, në momentin e dorëzimit të medaljes së Artë për Chermen Valiev, si Kampion Evrope për Shqipërinë, ka bërë një gjest skandaloz, duke ushtruar forcë teksa i vendoste në qafë medaljen dhe më pas duke e shtyrë me duar”.

“Gjatë këtij momenti është dëgjuar edhe fjala ‘tradhëtar’ për Chermen Valiev-in, që ka zgjedhur të garojë për Shqipërinë”, përfundon denoncimi i KOKSH-it.

Chermen Valiev shpallet kampion Evrope

Chermen Valiev u shpall kampion i Evropës në mundje për peshat deri në 74 kilogramë pasdite e djeshme, 9 prill. Ishte një arritje e jashtëzakonshme e mundësit me origjinë ruse, i cili garon për ngjyrat kuqezi, duke marrë një rezultat maksimal, pas suksesit me medalje bronzi në Lojërat Olimpike të Parisit.

Valiev triumfoi në finale ndaj bashkëkombasit të tij, rusit Zaurbek Sidakov.

Sa i takon rrugëtimit të Valiev-it, në gjysmëfinale, ai triumfoi 6-0 ndaj azerit Aghanazar Novruzov, ndërsa në çerekfinale kaloi 10-0 Ramazan Ramazanov.

Zelimhan Abakarov rrëmben medalje bronzi

Edhe mundësi tjetër rus, por me origjinë çeçene, që përfaqëson Shqipërinë, Zelimhan Abakarov la gjurmë në Kampionatin Evropian të mundjes, duke rrëmbyer medaljen e bronzit.

Evropiani po zhvillohet në Bratislavë të Sllovakisë, ku Abakarov fitoi medalje bronzi, pasi triumfoi 11-0 në finalen për vendin e tretë. Një sukses i rëndësishëm ky për mundësin çeçen me pasaportë shqiptare, i cili u zhgënjye në Lojërat Olimpike, duke mos marrë një medalje, ndryshe nga shokët e tij të ekipit, Islam Dudav dhe Chermen Valiev, të cilët arrin shkallën e tretë të podiumit.

Ky është një rikthim i Abakarov-it te medalja, në një kampionat ku përballen më të mirët. Ai pati shans edhe të kalonte në finale për medaljen e artë, u mund nga armeni Arsen Harutyunyan me rezultatin 5-2.