Lajmet

​Çitaku: Kurti bën sehir para aferave, prokuroria të hetojë të gjitha rastet

Ajo tha se çdo ditë e më shumë po konfirmohet se partia e Kurtit nuk ka lënë sektor pa e shtrirë rrjetin e korrupsionit.

Published

3 years ago

on

Partia Demokratike e Kosovës (PDK) ka ftuar organet e rendit që të hetojnë të gjitha aferat të cilat po publikohen në media nga zyrtarë të lartë të Qeverisë së Kosovës. Në një konferencë për media, nënkryetarja e PDK-së, Vlora Çitaku, deklaroi se çdo ditë e më shumë po konfirmohet se partia e Kurtit nuk ka lënë sektor pa e shtrirë rrjetin e korrupsionit.

Çitaku pati kritika edhe për mënyrën se si këto afera të zyrtarëve qeveritarë po shpërfillen nga kryeministri Albin Kurti, ndërsa u shpreh se disa prej tyre edhe i ka mbrojtur në mënyrë të pashpjegueshme. Ajo tha se prokuroria duhet të hetojë secilin rast dhe të sjellë drejtësi pasi janë qytetarët ata që po e pësojnë.

“Përballë kësaj situate, më skandaloze se aferat, është mënyra se si kryeministri Kurti dhe Qeveria e Kosovës po i qaset dhe si po reagojnë ata karshi aferave të zbuluara. Në rastin më të mirë ka pasur indiferencë, shpërfillje dhe në rastin më të keq ka pasur një mbrojtje të pashpjegueshme të akterëve të përfshirë në korrupsion dhe një sulm histerik kundër prokurorisë dhe mediave. Ftojmë institucionet e rendit, policinë dhe prokurorinë që urgjentisht të hetojnë të gjitha aferat e kësaj Qeverie dhe të mos lejojnë prishjen dhe humbjen e provave sikurse që ka humbur vaji dhe gruri”, deklaroi Çitaku.

Çitaku, duke përmendur emrat u shpreh se largimi nga detyra i këtyre funksionarëve do të duhej të ishte vetëm fillimi ndërsa ballafaqimi me drejtësinë është përgjigjja e duhur.

“Largimi nga detyra do të duhej të ishte fillimi por jo fundi. Ballafaqimi me drejtësinë është përgjigjja e duhur në situata të tilla. Ka përgjegjësi publike, morale dhe ligjore. Kryeministri duhet të jap përgjigje përgjegjësisë publike dhe morale. Përgjegjësinë ligjore pastaj e kanë organet e rendit. Por çfarë ka bërë kryeministri Kurti? Kryeministri Kurti në Parlamentin e Kosovës ka goditur prokurorinë në vend që t’i jep mbështetje institucioneve të drejtësisë, kryeministri Kurti dhe eksponentët e lartë të qeverisë kanë goditur gazetarët në vend se t’i mbrojnë dhe t’i promovojnë ata. Pra çdo gjë që po bëhet gabim nga një njëri me pushtet është bërë gabim”, shtoi Çitaku.

Nënkryetarja e PDK-së tha se çdo ditë e më shumë po rrënohet edhe “aura e epërsisë morale” të cilën VV ia kishte veshur vetes si parti me duar të pastra. Ajo tha se edhe shërbyesit civilë janë duke u përballur me presione të jashtëzakonshme.

Çitaku akuzoi Kurtin se në këto vite pushtet ka prodhuar vetëm kriza që po shkaktojnë dëme edhe në raportet me aleatët por edhe ne aspektin ekonomik.

“E vetmja gjë që ka prodhuar kryeministri Kurti tani pothuajse tre vite në pushtet është një cikël i pafund i krizave të cilat kanë rezultuar në polarizime të brendshme dhe në acarimet e skajshme me aleatët tanë. Kjo vetëm Kosovës nuk i konvenon, vetëm interesit publik nuk i konvenon dhe nuk po flas këtu vetëm për dëmin politik, po flas edhe për dëmin në fushën e ekonomisë, frikën që ka ndjellë kjo qeveri tek investitorët, frikën që kemi ndjellë tek aleatët si partnerë kredibilë dhe të besueshëm. E vetmja gjë konsistente tek kryeministri Kurti ka qenë mungesa e konsistencës, sot e thotë një gjë, i rendit dhjetë parime, nesër i shkel ato”, vijon Çitaku.

Në konferencën e Çitakut ishte shpallur edhe një baner me siç i quajti ajo, skandalet e Qeverisë aktuale të Kosovës, ndërsa nënkryetarja e PDK-së u shpreh se në fund janë edhe tri pika pasi nuk ka baner që i zë të skandalet e ekzekutivit të udhëhequr nga Albin Kurti.

Related Topics:
Continue Reading

Vendi

IQMT kryen inspektime mbi shërbimet postare në gjithë Kosovën

Published

12 minutes ago

on

November 6, 2026

By

Inspektorati Qendror i Mbikëqyrjes së Tregut (IQMT) po vazhdon aktivitetet intenzive inspektuese ndaj bizneseve që operojnë online, me fokus të veçantë te produktet që ndodhen në transport drejt konsumatorëve.

Aksioni po realizohet nga 10 ekipe inspektuese në bashkëpunim me Policinë e Kosovës, Administratën Tatimore të Kosovës (ATK) dhe Autoritetin Rregullativ të Komunikimeve Elektronike dhe Postare (ARKEP). Deri më tani janë kryer mbi 24 inspektime të shërbimeve postare në të gjithë territorin e vendit.

Gjatë kontrolleve, ekipet e terrenit kanë evidentuar parregullsi të ndryshme, duke përfshirë rastet kur produktet nuk posedonin kupon fiskal, si dhe mungesën e deklaracionit të prejardhjes e dokumentacionit përcjellës.

Në përputhje me kuadrin ligjor, inspektorët u kanë dhënë afat subjekteve përkatëse për prezantimin e dokumentacionit të nevojshëm. Në rast të mospërmbushjes së kërkesave, do të ndërmerren masa administrative e ligjore, përfshirë sekuestrimin e mallit dhe shqiptimin e gjobave.

Përveç tetë qendrave kryesore, aksioni është shtrirë edhe në komunat e rajonit të Dukagjinit dhe më gjerë, si në Klinë, Istog, Deçan, Junik, Rahovec, Malishevë, Suharekë dhe Dragash. Ky proces përfshin gjithashtu monitorimin e faqeve online, reklamave si dhe trajtimin e ankesave të konsumatorëve. /E.A/

Continue Reading

Vendi

Procesi në Hagë: Grupi strategjik mblidhet të shtunën, procedurat e apelit mbahen në konfidencialitet

Published

1 hour ago

on

November 6, 2026

By

Gjashtë vjet pas dërgimit në Hagë të katër ish-udhëheqësve të Ushtrisë Çlirimtare të Kosovës (UÇK), institucionet shtetërore dhe subjektet politike në Kosovë kanë intensifikuar veprimet për mbështetjen e procesit të apelit, pas vendimit me të cilin ata u dënuan me gjithsej 81 vjet burgim.

Të shtunën pritet të mbajë takimin e radhës grupi strategjik për hartimin dhe zbatimin e strategjisë shtetërore lidhur me procesin gjyqësor në Dhomat e Specializuara. Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, ka bërë të ditur se punimet e këtij grupi do të zhvillohen në mënyrë të plotë konfidenciale me synim koordinimin e saktë institucional.

Konjufca konfirmoi se grupi është konstituuar gjatë javës së kaluar, ku janë përcaktuar rregullat e punës dhe është formalizuar edhe trupa punuese.

Paralelisht me këtë proces, Partia Demokratike e Kosovës (PDK) ka kërkuar një angazhim të përbashkët politik dhe institucional në mbrojtje të procesit të apelit.

Nga ana tjetër, platforma “Liria ka Emër” u është drejtuar zyrtarisht institucioneve të Bashkimit Evropian me gjashtë kërkesa specifike, përmes të cilave kërkohet shqyrtimi i menjëhershëm i shqetësimeve lidhur me respektimin e të drejtave të njeriut dhe standardeve për një gjykim të drejtë e të paanshëm në Gjykatën Speciale. /E.A/

Continue Reading

Vendi

Mot me diell dhe vranësira: Temperaturat sot deri në 13°C

Published

1 hour ago

on

November 6, 2026

By

Dita e sotme parashikohet të vijë me mot me diell dhe vranësira gjatë orëve të mëngjesit, ndërsa në orët në vijim vranësirat do të tërhiqen gradualisht.

Sipas njoftimit nga MeteoKosova, era do të fryjë nga drejtimi i veriut dhe veriperëndimit me një shpejtësi prej 5 deri në 19 km/h.

Temperaturat minimale do të lëvizin ndërmjet 3 dhe 6 gradë Celsius, ndërsa ato maksimale të ditës pritet të arrijën nga 10 deri në 13 gradë Celsius. /E.A/

 

Continue Reading

Lajmet

KESCO apelon për kursim të energjisë elektrike, paralajmëron rritje të konsumit

Published

17 hours ago

on

November 5, 2026

By

Kompania për Furnizim me Energji Elektrike (KESCO) u ka bërë thirrje konsumatorëve që të shfrytëzojnë me kujdes energjinë elektrike gjatë muajve të dimrit, pas rritjes së ndjeshme të konsumit.

Sipas të dhënave të publikuara nga KESCO, gjatë periudhës 1 shtator – 31 tetor, konsumi i energjisë elektrike është rritur për 4.1 për qind krahasuar me periudhën e njëjtë të vitit të kaluar.

Ndërkohë, ditët e para të nëntorit kanë shënuar një rritje edhe më të madhe, me afro 25 për qind më shumë konsum krahasuar me muajin paraprak.

KESCO thekson se kursimi i energjisë nuk nënkupton heqjen dorë nga ngrohja apo rehatia në shtëpi, por shmangien e shpenzimeve të panevojshme dhe përdorimin më racional të pajisjeve elektrike.

“Mbajtja e temperaturave të arsyeshme në ambientet e banimit, ngrohja e hapësirave që përdorim, shfrytëzimi efikas i pajisjeve elektrike dhe fikja e tyre kur nuk nevojiten janë veprime të thjeshta që mund të sjellin ndryshim”, thuhet në komunikatën e KESCO-s.

Sipas kompanisë, përdorimi i kujdesshëm i energjisë ndihmon në uljen e shpenzimeve familjare, zvogëlimin e ngarkesës në rrjet gjatë periudhave të konsumit të lartë dhe shfrytëzimin më efikas të burimeve energjetike.

Në fund, KESCO u ka bërë thirrje të gjithë konsumatorëve që gjatë këtij dimri të tregojnë kujdes në përdorimin e energjisë elektrike, duke shmangur shpenzimet e panevojshme.

D.L

Continue Reading

Të kërkuara