Lajmet

​Borovci në Hagë: Në UÇK nuk ka pasur dallime partiake e fetare

Borovci është dëshmitari i katërt i mbrojtjes së Mustafës.

Published

4 years ago

on

Hazir Borovci ka thënë se Salih Mustafën e ka parë në fillim të prillit të vitit 1999 në fshatin Butovc të Prishtinës, ku sipas tij ata anë takuar edhe herë të tjera aty gjatë mesit të muajit prill të atij viti.

Borovci, i cili është dëshmitari i katërt i mbrojtjes së Mustafës, ka thënë para trupit gjykues në Hagë, se Mustafa i ka këshilluar të mos i braktisin civilët shqiptarë dhe se këtyre të fundit u ka dhënë mbështetje morale.

Gjatë dëshmisë së tij, ndër të tjera, Borovci ka thënë se UÇK-ja nuk kanë ndikuar dallimet politike apo fetare.

Derisa është përgjigjur në pyetjet e avokatit Julius Von Bone, Borovci ka thënë se ishte kyçur në Lidhjen Demokratike të Kosovës që prej fillimeve të saj. Ai ka treguar se gjatë luftës ka banuar në rrugën “Isa Kastrati” pranë Velanisë në Prishtinë dhe se aty ka qëndruar deri në fillimin e bombardimeve të NATO-s.

“Në atë periudhë isha veprimtar i Lidhjes Demokratike, gjegjësisht nënkryetari i Degës së Tretë, isha po ashtu pjesë e Këshillit të Emergjencës së Prishtinës, dhe ndjehem mirë para jush kur them isha pjesë e Ushtrisë Çlirimtare të Kosovës, se isha një prej ushtarëve, gjegjësisht çlirimtarëve të Ushtrisë Çlirimtare të Kosovës. Kisha angazhime në degën time, në LDK, kisha angazhime në Këshillin Komunal të Emergjencës, gjegjësisht solidaritetit, dhe po ashtu me nder dhe kënaqësi e them para jush isha ushtar i Ushtrisë Çlirimtare të Kosovës”, ka thënë Borovci.

Ai ka bërë të ditur se në atë periudhë ka qenë edhe pjesë e Këshillit Komunal të Emergjencave në Prishtinë, deri më 24 mars ku bashkë me civilët janë detyruar të shpërngulen nga kryeqyteti.

“Arrestoheshin, maltretoheshin fizikisht, merreshin në biseda, mbaheshin në biseda, dhe në çdo pjesë të lagjes nuk mund të hynte kush dhe të dilte kush pa i kontrolluar me përjashtim disa vijave që i kemi shfrytëzuar me shumë kujdes. Në Prishtinë kemi qëndruar deri nga fundi i marsit kur është rrethuar lagjja në tri drejtime, në momentin kur është rrethuar lagja në tri drejtime kemi dalë bashkërisht me popullatën”, ka thënë ai.

Borovci ka thënë se më 31 mars janë larguar nga kryeqyteti për në Butovc, një vend malor afër Prishtinës. Ai ka thënë se është vendosur në shtëpitë e familjes Reçica, të familja e Mustafë Sopit e Sinan Sopit, ndërsa një pjesë e popullit kishte shkuar në drejtim të lagjes Suteskë.

Në Butovc, ai ka thënë se kanë qëndruar deri më 12 qershor të vitit 1999. Aty, Borovci ka thënë se ka bërë edhe roje.

Avokati Von Bone e ka pyetur atë nëse është takuar ndonjëherë me Salih Mustafën për çka Borovci ka thënë se e ka parë atë rreth datës 2 apo 3 prill 1999 në Butovc.

“Vendi ku unë kam ruajtur në atë pikën ku thashë. Afër është shtëpia e Mustafë Sopit, ku kanë qëndruar disa familje aty, dhe unë pasi e përfundova rojën, erdhëm për të pushuar, kaluam nga shtëpia e Mustafë Sopit, dhe aty e kam takuar Salih Mustafën. Më herët nuk e kam njohur Salih Mustafën por aty kur bënin Bajram dhe në bazë të asaj që më ka treguar profesor Sopi, edhe në bazë të fjalëve që u thoshte popullatës civile dhe na u drejtua edhe neve e kuptova që është fjala për Salih Mustafën”, ka thënë Borovci.

Ai ka thënë se me Mustafën është takuar edhe disa herë të tjera, përfshirë pjesën e dytë të muajit prill.

“Gjatë kësaj periudha e kam parë disa herë dhe kemi biseduar jo shumë herë, por më shumë herë e kam parë sesa që kemi biseduar, sepse edhe na këshillonte, na sugjeronte na këshillonte, kur e kam parë për herë të parë e kam dëgjuar çka i këshillonte popullatën civile, atëherë më është kujtuar çka më ka thënë profesor Mustafë Sopi për të dhe e kam ditur që është Salih Mustafa. Java e parë e prillit deri pjesa e dytë e prillit, nëse më kujtohet 15,16,17 prilli, për këtë periudhë e pata fjalën. Kur e pash herën e parë i këshillonte, u jepte moral popullatës civile si të ndihmohen njëri me tjetrin, si t’i ndihmojnë fëmijët, ne na sugjeronte mos ta lëmë popullatën vetëm”, ka thënë ai.

Kur i është kërkuar të përshkruajë Salih Mustafën, Borovci ka thënë se i njëjti kishte xhaketë të ngjyrës së gjelbër duke shtuar se nuk ka pasur diçka të veçantë në dukjen e tij.

Borovci ka thënë se ai vetë është kyçur në UÇK që prej janarit 1998, ndërsa ka shtuar se nuk ka pasur dallime politik apo fetare brenda.

“Sikur të kishte dallime, unë atëherë isha nënkryetar i degës së LDK-së, nuk ka pasur dallime as në aspektin partiak, as në aspektin fetar. Janë munduar të inskenojnë, të improvizojnë për të na përçarë, por kur është në pyetje liria, atdheu e vendi, të gjithë janë bërë bashkë dhe kanë qenë bashkë. Edhe LDK, edhe UÇK, edhe subjekte të tjera, dhe nuk ka pasur dallim as në aspektin fetar, as në aspektin partiak”, ka thënë dëshmitari Borovci.

Hazir Borovci është dëshmitari i katërt i mbrojtjes së Salih Mustafës i cili është arrestuar më 24 shtator 2020 me pretendimin për krime lufte.

Related Topics:
Continue Reading

Lajmet

Ditari: Lajmet kryesore që shënuan datën 12 shtator 1993-1998

Published

2 hours ago

on

September 12, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 

12 shtator 1994

 

Në Nekoc e Kishnarekë vazhdon represioni i policisë serbe

 

Tash disa ditë, policia serbe vazhdon t’i keqtrajtoi banorët e fshatrave Nekoc e Kishnarekë të Gllogovcit, nën pretekst të vrasjes së paradoditshme të rojes së pyllit, Milaim Gashi në rrethana ende të panjohura, njofton Komisioni për Informim i Degës së LDK-së në Gllogovc.

Më 9 shtator, prej orës 11:00 deri në mbrëmje rreth orës 18:00, një ekspeditë e policisë serbe defiloi tërë ditën nëpër fshatrat e lartëshënuara. Policia ishte e pajisur me një llandrover dhe dy vetura.

Njoftohet se gjatë tërë ditës mbi fshatrat Nekoc e Kishnarekë fluturoi edhe një helikopter i policisë serbe.

Në fshatin Nekoc, policia kërkoi Bajram A.Rukiqin, i cili nuk gjendej në shtëpi. Bajram A.Rukiqi gjendet i shtrirë në spital, pasi ai ditë më parë është keqtrajtur brutalisht nga ana e policisë serbe, me ç’rast mori plagë të rënda trupore.

Ndërkaq, në fshatin Kishnarekë, policia serbe i provokoi nxënësit dhe arsimtarët e shkollës fillore “7 Marsi” duke i “përshëndetur” me dy gishtat lart.

E njëjta ekspeditë e policisë serbe, vazhdoi rrugën për në fshatin Llapushnik, me ç’rast morën Ferat Sopin dhe djalin e tij (emrin e të cilit nuk arritëm ta mësojmë, si dhe veturën e tyre të markës “Reno 4”).

Pardje, në fshatin Kishnarekë, policia kërkoi Rexhep A.Hykollin, i cili nuk gjendej në shtëpi. Më pas, policia legjitimoi çdo kalimtar të rastit, i cili kalonte nëpër fshatin Kishnarekë.

 

 

12 shtator 1995

 

 

Tragjedi e rëndë e pasagjerëve në një barkë shqiptare

 

Në një barkë që transportonte refugjatë nga Shqipëria për në Itali, ndodhi një tragjedi e rëndë në të cilën humbën jetën së paku 3 udhëtarë, ndërsa 12 konsiderohen të humbur.

Barka u përmbys për shkak të valëve të larta të shkaktuara nga një trajekt që kaloi fare pranë barkës.

Korrespondenti i BBC-së nga Roma, Ilir Gurakuqi, tha se edhe 10 pasagjerë të tjerë janë të lënduar.

Kjo ngjarje do të ishte edhe më tragjike sikur mos të ndërhynte një anije amerikane që patrullon në ujërat e Adriatikut, në kuadër të embargos ndaj ish-Jugosllavisë.

 

 

12 shtator 1997

 

Vatikani: Nënë Tereza mund të shpallet e shenjtë në kohë rekorde

 

Sekretari i Shtetit i Vatikanit Angjelo Sodano deklaroi sot se Papa Gjon Pali e donte shumë Nënën Tereze dhe se të gjithë në Kishën Katolike shpresojnë se ajo mund të kanonizohet shumë shpejt. “Procesi i shndërrimit të nënës Tereze në shenjtore mund të realizohet brenda një kohe rekorde – deklaroi ai.

Me rastin e mëparshme të shenjtërimit, zakonisht afati ka qenë i gjatë deri në 30 vjet. Sipas praktikës së deritashme së pari të caktohet një komision nga Vatikani i cili e vlerëson deri në hollësi veprën dhe shëmbëlltyrën e kandidatit për të shenjtë, e pastaj ai vlerësim i dorëzohet Papës. Pikërisht pse shëmbëlltyra dhe vepra e Nënës Tereze është tejet humane, dhe e pastër, mund të pritet që ajo të shpallet e shenjtë në kohë rekorde, thuhet në njoftimin e “Bujkut”.

 

12 shtator 1998

 

Gjatë sulmeve të djeshme në fshatrat e Skënderajt janë vrarë 3 dhe janë plagosur 16 shqiptarë

 

Dje, që në orët e hershme të mëngjesit, një konvoj i madh i forcave të ushtrisë dhe të policisë serbe i përbërë nga 58 tanksa, 38 kamionë dhe automjete të tjera të motorizuara nga Mitrovica arritën në Llaushë, ndërsa menjëherë nga këto forca filluan të granatohen fshatrat Rezallë, Ticë, Plluzhinë, Likoc e Makërmal, i tha sot QIK-ut Fadil Ymeri, përgjegjës i Këshillit për Informim në fshatin Qirez të Skënderajt.

Bëhet e ditur se gjatë kësaj ofensive, janë zhvendosur shumë banorë, të cilët e kaluan natën nën qiellin e hapur dhe gjendja e tyre është shumë e rëndë.

Edhe sot, që në orët e hershme të mëngjesit, forcat e ushtrisë dhe të policisë serbe, filluan t’i granatojnë fshatrat e lartpërmendura dhe fshatrat tjerë si Vërbovcin, Abrinë, Açarevën, Polluzhën e Kryshecin. Këto fshatra po sulmohen me artileri të rëndë, duke filluar nga minahedhësit deri te raketat e tipit tokë-tokë.

Gjatë këtrye dy ditëve, forcat e UÇK-së kanë bërë një rezistencë të fuqishme dhe me heroizëm po u kundërvihen forcave armike.

Si pasojë e bombardimeve të forcave serbe, deri tash janë vrarë tre shqiptarë, në mesin e të cilëve dy fëmijë dhe kanë plagosur 16 civilë të tjerë.

Bëhet e ditur se forcat serbe kanë vrarë, Leutrim Ahmetin (9), Xufë Ahmetin (8) dhe Ramë Ahmetin (42), ndërsa kanë plagosur Fatmire Malush Ahmetin (18), Gjyle Racin (30), Brahim Ahmetin (29), Makfirete Ahmetin (14), Bajram Ahmetin (11), Shpresa Ahmetin (9), Naser Gashin (15), Feti Musliun (22), Nuredin Bacajn (39), Xheladin Behramin (53), Rifat Smakiqin (34), Fatmire Ahmetin (35), Arben Makollin (24), Tahir Lladrovcin (22), Jahir Dërgutin (44) dhe Skënder Ahmetin (39).

Gjithashtu, si pasojë e bombardimeve të forcave serbe, deri në Bëhet e ditur se nga pasojat e bombardimeve serbe deri tash janë shkatërruar e djegur qindra shtëpi shqiptare dhe objekte të tjera ndihmëse.

 

Continue Reading

Lajmet

Gjithçka gati për “Marshin për Liri”

Published

3 hours ago

on

September 12, 2026

By

Në sheshin “Skënderbeu” në Prishtinë kanë përfunduar përgatitjet e fundit për “Marshin për Liri”, i cili nis sot në orën 14:00 në mbështetje të ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, raporton Ekonomia Online.

Nga platforma “Liria Ka Emër” kanë bërë thirrje për pjesëmarrje masive të qytetarëve, ndërsa marshi zhvillohet para shpalljes së aktgjykimit të Gjykatës Speciale, të paralajmëruar për 16 shtator.

Ismail Tasholli nga kjo platformë ka thënë se bazuar në interesimin dhe gatishmërinë e qytetarëve, pritet që marshi të jetë masiv.

“Marshi me siguri do të jetë shumë masiv, edhe në bazë të asaj se çka kemi parë në terren edhe entuziazmit edhe gatishmërisë së njerëzve, në thirrjen tonë qytetare që të marshojnë për liri nën moton ‘Kosova po pret’”, tha ai.

Tasholli ka bërë të ditur se në sheshin “Skënderbeu” janë duke u përfunduar detajet e fundit të përgatitjeve, ndërsa bina tashmë është gati për nisjen e aktivitetit.

“Tashmë e shihni, bina është gati, në përfundim janë do të thotë detajet e fundit, që e rrumbullakësojnë edhe nisjen e këtij marshi qytetar, që ka për qëllim të përçojë një mesazh shumë të rëndësishëm, që Kosova me të vërtetë po pret, po i pret çlirimtarët në shtëpinë e tyre”, tha Tasholli.

Ai u ka bërë thirrje qytetarëve që të nisen më herët drejt Prishtinës, në mënyrë që në orën 14:00 të përcillet mesazhi i organizatorëve.

“Po, i ftoj le të vijnë sa më herët, Prishtina e ka zemrën e madhe, po i uron mirëseardhje të gjithë qytetarëve të saj, edhe le të nisen sa më herët sepse është shumë e rëndësishme që sot të përçojmë një mesazh bashkë në ora 14:00, që Kosova po pret. Jemi duke i pritur të gjithë”, tha ai.

Continue Reading

Lajmet

Kurti i bën thirrje Hamzës për takim, do ta votojmë një deputet të PDK-së për nënkryetar të Kuvendit

Published

21 hours ago

on

September 11, 2026

By

Kryeministri në detyrë, Albin Kurti, ka thënë se Lëvizja Vetëvendosje do ta votojë një deputet të PDK-së për nënkryetar të Kuvendit.

Ai ka kërkuar që emrat e kandidatëve të diskutohen në takimet mes partive dhe ka thënë se ende nuk është tepër vonë për të arritur marrëveshje.

“Ne medoemos një deputet të PDK-së do ta votojmë për nënkryetar të Kuvendit. Ne medoemos një deputet ose deputete të LDK-së do ta votojmë për nënkryetar të Kuvendit”, ka deklaruar Kurti.

Kurti ka thënë se dëshiron të takohet me kryetarin e PDK-së, Bedri Hamza, për të diskutuar emrat e kandidatëve.

Ai e ka cilësuar si të keqardhshme braktisjen e procesit të konstituimit të Kuvendit, duke thënë se sot është humbur një mundësi për përmbylljen e tij.

“Jemi vonë, por nuk është tepër vonë. Nëse e bëjmë këtë të dielën, megjithatë do të konsiderojmë që përgjithësisht dhe së bashku ishim të suksesshëm”, ka deklaruar Kurti./A.K/

Continue Reading

Lajmet

Avokati: Kërkojmë shpalljen të pafajshëm të Fazliut, të akuzuarit s’u intervistuan nga ZPS-ja

Published

21 hours ago

on

September 11, 2026

By

Avokati i Fadil Fazliut, David Young ka kërkuar shpalljen të pafajshëm të Fadil Fazliut.

“Kërkojë me respekt që verdikti në këtë rast të korrigjohet dhe të jetë në përputhje me detyrën publike që është pafajësia e z.Fazliu”, tha Young.

Ai tha se gjatë ngritjeve të akuzave në këtë çështje, Prokuroria nuk ka intervistuar asnjëherë të dyshuarit.

 “Pjesa më e madhe e këtyre personave, e këtyre të akuzuarve nuk janë intervistuar asnjëherë. Besoj që z.Kilaj mund të ketë qenë para shumë shumë vitesh por pjesa më e madhe e të akuzuarve nuk janë intervistuar asnjëherë nga Prokuroria. Pra, mund të nxjerrim deduktimin nga kjo që Prokuroria ka marrë qasjen strategjike për të mos i intervistuar ata. Për të mos i intervistuar këta persona lidhur me pretendimet dhe a është kjo mënyrë  e drejtë për të filluar hetimet ap ngritur akuzat?! Unë besoj që jo. Unë thgem qartësisht që nuk është kështu”, tha David Young.

Young parashtroi se Fadil Fazliu duhej të paktën që të intervistohej por atij nuk iu dha mundësia të thoshte atë që kishte për të thënë.

“Nga përvoja juaj e gjerë i nderuar gjykatës ju e dini që normalisht ju jepet prokurorëve dhe hetuesve mundësia për pyetjet që do i bëjnë dëshmitarit për pretendimet dhe lidhur me provat. Në të njëjtën mënyrë, intervista I jep mundësinë të dyshuarit që të jep përgjigjet e tij ndaj pretendimeve që ngrihen kundër tij. Ndonjëherë është mënyrë e mirë për të vërtetuar provat dhe për të verifikuar pretendimet dhe për të parë se si personi përgjigjet”, tha ai.

David Young tha se kjo është mënyrë e duhur për të verifikuar provat nga mënyra se si përgjigjet I dyshuari.

“Por pas intervistave, është praktikë e zakonshme për prokurorët në nivel kombëtar dhe ndërkombëtarë që të marrin vendimin se nëse do të vazhdojnë më tej ndjekjen kundër të dyshuarit, të ngrenë akuza ndaj tij dhe kjo mund të varet nga ajo që është thënë gjatë intervistës apo jo”, tha ai.

Me kaq përfundoi fjalën përfundimtare mbrojtja e Fadil Fazliut për të vazhduar më pas me mbrojtjen e Hajredin Kucit e përfaqësuar nga avokati Alexander Admiral./A.K/

Continue Reading

Të kërkuara