Lajmet

Bizneset kërkojnë ndryshimin e disa neneve në Projektligjin për markat tregtare

Sot u mbajt dëgjim publik në Komisionin për Ekonomi, Industri, Ndërmarrësi dhe Tregti.

Published

3 years ago

March 7, 2022

Betim Gashi

Në Komisionin për Ekonomi, Industri, Ndërmarrësi dhe Tregti është mbajtur një dëgjim publik për dy projektligje, atë për markat tregtare dhe për mbrojtjen e sekreteve tregtare, për çka pati sugjerime e vërejtje rreth këtyre projektligjeve nga përfaqësuesit e bizneseve dhe të avokatisë.

Përfaqësuesit e bizneseve dhe të avokatisë me këtë rast kërkuan ndryshimin e disa neneve që mundësojnë regjistrimin e markave tregtare.

Pikërisht për këto kritika, kryesuesi i Grupit Punues, deputeti Driton Hyseni ka kërkuar nga bizneset dhe palët e interesit që të dorëzojnë komentet e tyre, për t’i paraqitur pastaj ky komision në formë të amendamenteve.

“Si grup punues kemi për detyrë që t’i shqyrtojmë këto dy projektligje nen për nen, dhe t’i paraqesim Komisionit pastaj amendamentet të cilat vijnë qoftë nga ana e juaj, apo nga palët tjera të interesit që mund të shfaqin interesim. Sipas mendimit të juaj do të kërkoj që ju të na tregoni se a janë përcaktuar saktë kushtet dhe procedurat për regjistrimin e markave tregtare. A mbrohen të drejtat që rrjedhin nga regjistrimi dhe zbatimi i këtyre të drejtave? A mendoni se me miratimin e këtij ligji plotësohen nevojat institucionale në drejtim të përmbushjes së nevojave që ka shoqëria jonë? A sigurohet mbrojtja e konsumatorit si dhe zhvillimi i sferës së pronësisë industriale të Kosovës”, theksoi Hyseni.

Kryesuesja e Komitetit për çështje ligjore në Odën Ekonomike Amerikane, Kujtesa Nezaj Shehu pati vërejtje për nenin 6 dhe 7, përveç këtyre, ajo ka kritikuar Ministrinë e Industrisë, Ndërmarrësisë dhe Tregtisë për mospërfshirje në draft ligj edhe komentet e shoqatave ndërkombëtare për markat tregtare “IMPA”.

“Kur shikova sot draft ligjin pashë që disa komente që i ka dërguar shoqata ndërkombëtare për markat tregtare “IMPA”, e cila ka një reputacion, ka dërguar disa komente për këtë draft ligj, dhe pash që nuk janë marrë për bazë asnjë prej atyre komenteve. Njëkohësisht përveç këtyre komenteve që i ka dorëzuar ‘IMPA’, unë i kam edhe disa komente, e para ka të bëjë me nenin 6 dhe 7 që janë shkaqet absolute dhe shkaqet relative për refuzim të një regjistrimi dhe ka të bëjë me atë kur mund të refuzohen aplikimet që paraqiten me keqbesim”, tha ajo.

Po ashtu, edhe avokatja Zanita Leka nga Oda e Avokatëve të Kosovës, ka kërkuar nga Grupi Punues plotësimin e nenit 15 të Projektligjit për markat tregtare.

“Në nenin 15, ku ceket përjashtimi i një deklarate pavlefshmërie për shkak të tolerimit. Këtu është cekur decitivisht, kur pronari i markës të mëhershme ka toleruar pa kundërshtim për një periudhë 5-vjeçare, konsideroj se vetëm si heshtje ka mbetur kjo, por ndoshta është më mirë të shtohet si nen ose si dispozitë në po këtë nen, ose me përfshi në këtë dispozitë që atij ose asaj t’i merret një pëlqim me shkrim brenda kësaj periudhe në mënyrë që më vonë të mos dalin probleme me gjykata”, thekson Leka.

Ndërsa, Isa Dukaj, nga Agjencia për Pronësi Industriale, tha se ndër problemet me të cilat ballafaqohet Kosova, është fakti se Kosova nuk është pjesë e Kombeve të Bashkuara. Dhe kjo sipas tij, i pengon edhe bizneset e huaja të regjistrohen në Kosovë.

Komuniteti i bizneseve, dhe çdo palë tjetër e interesit mund t’i dorëzojnë komentet e tyre në formë të shkruar adresën elektronike në Komisionin për Ekonomi deri më 11 mars.

Lajmet

Shërbimet civile do të ndalohen për qytetarët që nuk deklarojnë adresën zyrtare

Published

3 minutes ago

July 23, 2025

UBTnews

Të gjithë qytetarët e Kosovës që nuk e kanë deklaruar adresën zyrtare, nga data 1 gusht e këtij viti, nuk do të mund të pajisen me dokumentet që lëshohen nga Agjencia e Regjistrit Civil (ARC) dhe Agjencia Kadastrale e Kosovës (AKK).

Kështu u theksua në një konferencë për media të organizuar nga AKK-ja, ku u bë thirrje qytetarëve që të deklarojnë adresën e tyre zyrtare, me qëllim të lehtësimit të qasjes në shërbime dhe ndërtimit të një shteti më funksional dhe gjithëpërfshirës.

Drejtori i Agjencisë Kadastrale të Kosovës, Avni Ahmeti tha se mbi 220 mijë qytetarë tashmë e kanë bërë deklarimin e adresës, porse theksoi se kjo nuk është e mjaftueshme.

“Qëllimi i kësaj konference është që t’i informojmë të gjithë qytetarët që nuk e kanë deklaruar adresën zyrtare se nga data 1 gusht e këtij viti, nuk do të mund të pajisen me dokumentet që lëshohen nga ARC dhe AKK. Për më tepër, pa deklarimin e adresës zyrtare, qytetarët nuk mund të pajisen me certifikatën të lindjes apo certifikatën të pronës”, tha Ahmeti.

Ahmeti potencoi se deklarimi i adresës zyrtare është një obligim ligjor dhe një akt përgjegjësie qytetare që i takon gjithsecilit.

Sipas tij, një qytetar pa adresë zyrtare është një qytetar i përjashtuar nga sistemi.

“Sot, me krenari mund të themi se janë mbi 220 mijë qytetarë që tashmë e kanë bërë deklarimin e adresës zyrtare. Kjo është inkurajuese, por ende jo e mjaftueshme. Sepse në një shtet modern e të organizuar, secili qytetar duhet të jetë i regjistruar me adresë të saktë – ashtu siç në një shtet modern dhe funksional…E kemi thënë shumë herë dhe e theksojmë sërish: deklarimi i adresës zyrtare është një obligim ligjor, por mbi të gjitha është një akt përgjegjësie qytetare që i takon gjithsecilit. Një qytetar pa adresë zyrtare është një qytetar i përjashtuar nga sistemi”, tha Ahmeti.

“Pa adresë të saktë, nuk mund të ketë plane zhvillimore reale, nuk mund të ketë shërbime cilësore, siç janë ato administrative e deri tek ato më emergjente siç janë shërbimet ambulante, zjarrfikësit apo policia”, tha Ahmeti.

Ndërkaq, drejtori i Agjencisë së Regjistrit Civil, Blerim Camaj tha se qytetarët në të gjithë Kosovën nuk do të mund të pajisen me asnjë shërbim civil nëse nuk e deklarojnë adresën zyrtare.

“Të gjitha shërbimet e gjendjes civile do të kushtëzohen dhe do të ndalohen. Qytetarët nuk mund të pajisjen me çertifikata siç janë certifikata e lindjes, martesës, vdekjes dhe shërbimet e tjera të gjendjes civile nëpër gjithë territorin e Republikës së Kosovës”, tha Camaj.

Aktualitet

Çitaku kritikon MPJD për arrestimin e ish-ushtarit të UÇK-së në Serbi

Published

1 hour ago

July 23, 2025

UBT News

Sekretarja e përgjithshme e PDK-së, Vlora Çitaku ka reaguar lidhur me arrestimin e ish-ushtarit të UÇK-së në Serbi, Lulzim Halili duke thënë se misionet diplomatike duhet të jenë më të angazhuara për lirimin e ish-ushtarëve të UÇK-së nga autoritetet serbe.

Çitaku u shpreh se liria e lëvizjes duhet të jetë e garantuar, teksa kërkoi aktivizimin e misioneve diplomatike.

“Sigurisht që ne i ndjekim, e kemi parë dhe është lajm jashtëzakonisht shqetësues. Fatkeqësisht kjo tashmë është shndërruar në lajm të rregullt, sepse nuk është rasti i parë ka edhe ushtarë të tjerë të Ushtrisë Çlirimtare të Kosovës që po mbahen tash e disa muaj nëpër burgjet e Serbisë. Qeveria e Republikës së Kosovës, kjo në largim duhet të jetë shumë më aktive. Misionet tona diplomatike duhet të jenë shumë më të angazhuara në mënyrë që të vihen në funksion mekanizmat ndërkombëtarë për lirimin e tyre. Ata nuk janë njerëz pa atdhe, nuk duhet të trajtohen si njerëz pa atdhe, si njerëz pa institucione, si njerëz për fatin e të cilëve nuk brengoset askush”, tha ajo për media.

Kritika pati për Ministrinë e Punëve të Jashtme, për çka Çitaku tha se në vend se të merret me beteja të vogla të brendshme, duhet të jenë në funksion të qytetarëve.

Sipas Novosti-it, ish-luftëtarit të UÇK-së iu caktua masa e ndalimit prej 48 orëve nga Zyra e Prokurorit për Krime të Luftës. /Telegrafi

Aktualitet

Dështon përpjekja e 51-të për konstituim të Kuvendit

Published

1 hour ago

July 23, 2025

UBT News

Edhe në përpjekjen e 51-të për konstituim të Kuvendit seanca dështoi nga kryesuesi Avni Dehari i cili ia ndërpreu fjalën deputetes Ganimete Musliu, ndërkaq që kanë mbetur edhe pak ditë deri te përfundimi i afatit kushtetues.

Deputetja e PDK-së Ganimete Musliut e nisi fjalimin e saj me “Nëse ke pak moral njerëzor…”, dhe kjo bëri që kryesuesi Dehari të ia ndërpres fjalën.

Musliu iu afrua fizikisht Deharit, u fjalosën dhe kryesuesi e shpalli të ndërprerë seancën duke ftuar deputetët të mblidhen sërish pas 48 orësh, më 25 korrik.

Kjo ka vë në pah se edhe më tej nuk ka pajtueshmëri midis Lëvizjes Vetëvendosje në njërën anë dhe partive të tjera në anën tjetër, për formimin e një komisioni për votim të fshehtë të kandidates për kryetare të Kuvendit, Albulena Haxhiu.

Kryeministri në detyrë Albin Kurti në fillimet e seancës nuk foli për media por vetëm kaloi në heshtje pranë gazetarëve,kurse ministri në detyrë, Hekuran Murati, nuk e ka komentuar kërkesën e presidentes Osmani drejtuar Gjykatës Kushtetuese, para seancës së 51-të konstituive.

Nga rradhët e PDK-së, deputetja Blerta Deliu-Kodra kritikoi Vetëvendssojen për moskonstitumi të Kuvendit të Kosovës, duke thënë se Kosova dhe qytetarët e saj po vuajnë për shkak të paaftësisë së tyre.

Kryetari i AAK-së, Ramush Haradinaj, ka thënë se gjendja nuk është e mirë, por sipas tij, pas kërkesës së presidentes që t’i drejtohet Gjykatës Kushtetuese lidhur me pasojat juridike që mund të lindin nëse Kuvendi i ri nuk konstituohet brenda 30-ditësh, krijohet hapësirë edhe disa ditë për Lëvizjen Vetëvendosje.

Gjithashtu edhe Kryetari i Nismës Socialdemokrate, Fatmir Limaj deklaroi se nuk do të kontribuojnë në zgjidhje gjysmake që do të shkaktonin zgjedhje duke theksuar se konstituimi i kuvendit pa pasur shumicë parlamentare mund të pasojë me zgjedhje të parakohshme.

Gjykata ka vendosur që deputetët e zgjedhur janë të obliguar që brenda 30 ditësh afat kohor që nga hyrja në fuqi e këtij aktgjykimi, të përfundojnë seancën konstituive përmes zgjedhjes së Kryetarit dhe nënkryetarëve të Kuvendit që i bie me datë 26 korrik.

Aktualitet

Musliu ia largoi mikrofonin Deharit, ndërpritet seanca

Published

2 hours ago

July 23, 2025

UBT News

Është ndërprerë seanca e sotme konstituive e Kuvendit të Kosovës me vendim të kryesuesit, Avni Dehari, pasi deputetja e PDK-së, Ganimete Musliu ia largoi mikrofonin. Dehari pasi këtij veprimi të Musliut tha se e ndërpret seancën dhe e njëjta vazhdon me 25 korrik në orën 11:00.

Paraprakisht, Musliu mori fjalën në emër të PDK-së për të propozuar anëtarin e komisionit verifikues për votim të fshehtë të kryeparlamentarit, mirëpo asaj ia ndali fjalën Dehari.

Kjo nxiti Musliun t’i shkojë te hapësira e kryesuesit të seancës duke ia marrë mikrofonin dhe ndal fjalën atij.