Lajmet

​BE dhe UNDP ndihmojnë mbi 7 mijë familje në varfëri të skajshme për gjashtë muajt e ardhshëm

Published

4 years ago

on

Mbi 7 mijë e 500 familje në varfëri të skajshme do të përfitojnë kuponë për ushqim, higjienë dhe artikuj të tjerë të nevojshëm për gjashtë muajt e ardhshëm, ndërsa qendrat për punë sociale në tërë territorin e Kosovës do të kenë burime njerëzore shtesë prej 40 punëtorëve socialë.

Krejt kjo falë Zyrës së Bashkimit Evropian në Kosovë dhe Programit të Kombeve të Bashkuara për Zhvillim, të cilët sot kanë lansuar projektin e përbashkët për të ndihmuar qytetarët e prekur nga COVID-19.

Shefi i Zyrës së BE-së në Kosovë, Tomas Szunyog, tha se periudha e krizës si rezultat i pandemisë me COVID-19 ka rritur pabarazitë shoqërore dhe se gjendja e personave me aftësi të kufizuara dhe fëmijëve është përkeqësuar.

“BE është këtu për të ndihmuar popullin e Kosovës, fushata e vaksinimit ka filluar dhe ne po punojmë shumë intensivisht me qeverinë dhe partnerët për të siguruar që të arrijmë sa më shumë doza të vaksinave në periudhë sa më të shkurtër. Paralelisht kemi lansuar programin BE për mbrojtje sociale, kemi ndihmuar rreth 200 mijë persona të cenueshëm përmes skemave të mbështetjes, ndihmave humanitare dhe banim për familje, gratë dhe për t’i ndihmuar më mirë atyre familjeve dhe individëve të cenueshëm. Sot kemi kënaqësinë të dorëzojmë dy rezultate konkrete të këtij programi të BE-së, si rezultat i dy aktiviteteve që janë zbatuar nga UNDP. Aktiviteti i parë është ndihma ekonomike për familjet që jetojnë në varfëri, pra shpërndarja e kuponëve 7 mijë e 500 familje, këta kuponë mund të përdoren për të blerë ushqime, higjienë dhe artikujt të tjerë thelbësor për të mbajtur amvisëritë në gjendje të dinjitetshme. Rezultati i dytë është vendosja e punëtorëve të kualifikuar në Qendrat për Punë Sociale, 40 sosh”, tha ambasadori Szunyog.

Përfaqësuesja e përhershme e UNDP-së në Kosovë, Maria Suokko, tha se pandemia në Kosovë ka goditur ata që tashmë veç kishin vështirësi, por që tha se tashmë janë bashkuar për t’iu ofruar ndihmë atyre që janë goditur më së shumti nga pandemia.

Suokko tha se projekti do të ofrojë mbështetje atyre që jetojnë në varfëri të skajshme, gratë kryefamiljare dhe viktimat e dhunës mbi baza gjinore.

“Kosova dhe populli i saj nuk janë kursyer nga efektet e pandemisë, kriza ka goditur në veçanti ata të cilët tashmë kishin vështirësi që t’ia dilnin mbanë. Në kulmin e krizës UNDP, BE, Ministria janë bashkuar për të planifikuar si të ofrojnë ndihmë të menjëhershme atyre që janë goditur më së shumti. Kjo iniciativë do të ofrojë mbështetje për ata që jetojnë në varfëri apo atyre që luftojnë në margjina të shoqërisë, amvisëritë me gratë si kryefamiljare, viktimat e dhunës mbi bazë gjinore, njerëzit që jetojnë në vende të largëta me qasje të kufizuar në shërbime sociale”, tha ajo.

Suokko tha se nga 40 vullnetarët për Qendrat për Punë Sociale, 90 për qind prej tyre janë gra, ndërsa 18 për qind nga komunitet jo shumicë.

Ministri i Financave, Punës dhe Transfereve, Hekuran Murati, tha se si ministri e vlerësojnë këtë projekt qëllimi i së cilës është lehtësimi i barrës financiare që kanë ekonomitë familjare që përfitojnë nga skema e ndihmës sociale dhe ngritja e kapaciteteve njerëzore në institucionet e Qendrave për Punë Sociale. Ai tha se si pasojë e pandemisë dhe ndërprerja e zinxhirëve të furnizimit ka pasur ndikim në rritjen e çmimeve sidomos në artikujt ushqimorë, e kjo sipas tij ka rënduar barrën e familjeve me asistencë sociale.

“Ky program është i mirëseardhur për mbështetjen e atyre familjeve me kuponë ushqimorë, pra do të jenë rreth 7 mijë e 500 familje që përfitojnë për gjashtë muaj, e ku si kritere për përzgjedhjen e këtyre familjeve kanë qenë fillimisht nga familjet që kanë prindër vetushqyes, familjet që kanë anëtar me aftësi të kufizuara, familjet që jetojnë në zona të thella rurale, si dhe familje të tjera me gjendje të rëndë socio-ekonomike. Po ashtu, masa 15 e pakos emergjente fiskale ka treguar që ka hapësirë shumë përtej nivelit ekzistues për zgjerimin e skemës së asistencës sociale, prandaj ne si ministri jemi të përkushtuar që të luftojmë në këto dy fronte. Pra, në njërën anë duke ofruar më tepër ndihmë për ata që kanë më tepër nevojë, por në anën tjetër duke targetuar dhe duke rikonstrukturuar skemat sociale dhe pensionale asisoj që të mbështeten fillimisht ata që kanë nevojë me tepër për mbështetje, kurse ata që janë të aftë dhe kanë mundësi për punë t’u ofrohet mundësi e punësimi në mënyrë që edhe ato familje të kenë mundësi të përfitojnë një pagë të dinjtetshme nga puna e tyre”, tha Murati.

Murati tha se përkushtimi i tyre do të vazhdojë, për çka tha se kanë paraparë ofrimin e skemës për punësim sezonal për familjet në skemat e asistencës sociale.

Projekti i Ndihmës Humanitare financohet nga BE dhe implementohet nga UNDP. 

Related Topics:
Continue Reading

Lajmet

Nënshkruhet marrëveshja prej 8.9 milionë eurosh për mbështetjen e 198 ndërmarrjeve prodhuese dhe përpunuese

Published

2 hours ago

on

October 8, 2025

By

Është nënshkruar marrëveshje  prej 8.9 milionë euro me ndërmarrjet përfituese nga skema mbështetëse për makineri prodhuese dhe përpunuese.

Nënshkrimi u bë në një ceremoni nga Ministria e Industrisë, Ndërmarrësisë dhe Tregtisë (MINT), ku mori pjesë edhe kryeministri në detyrë, Albin Kurti.

Ndonëse qeveri në detyrë, megjithatë Kurti nga aty foli për vizionin për një qeverisje të mirë, duke thënë se po krijojnë kushtet të favorshme për bizneset.

“Është kënaqësi e veçantë të jem sot në ceremoninë e nënshkrimit të marrëveshjeve për mbështetje financiare të 198 ndërmarrjeve të vogla dhe të mesme. Këto ndërmarrje janë përzgjedhur për mbështetje në vlerë prej 8.9 milionë euro nga Ministria e Industrisë, Ndërmarrësisë dhe Tregtisë, përmes Agjencisë për Ndërmarrësi dhe Përkrahje në Kosovë. Kemi vizion për qeverisje të mirë, zhvillim të vazhdueshëm, mirëqenie, siguri dhe barazi. Krijimi i kushteve të favorshme për të bërë biznes është ndër prioritetet tona kryesore. Me këtë investim po ofrojmë mbështetje direkte për shpalosjen e potencialit të bizneseve, të cilat janë kontribuuese të rëndësishme në zhvillimin e mëtejmë të vendit”, deklaroi Kurti.

Ministrja në detyrë e Industrisë, Ndërmarrësisë dhe Tregtisë, Rozeta Hajdari pati kritika për qeveritë e kaluara.

“Kur morëm qeverisjen në vitin 2021 ne kuptuam se nuk ishte punuar për zhvillim industrial që është i rëndësishëm për qëndrueshmërinë e shtetit. Qeveria ishte me mungesë vizioni për sektorë të rëndësishëm industrial për vendin dhe mungesë për mbështetje për sektorë prodhues. Gjatë mandatit tonë qeverisës indentifikuam shumë praktika të dëmshme e të bërit biznes në Kosovë”, tha ajo./D.B/EO

Continue Reading

Lajmet

Rama bën homazhe për gjyqtarin Astrit Kalaja

Published

2 hours ago

on

October 8, 2025

By

Në hollin e Pallatit të Kongreseve në Tiranë po zhvillohen sot homazhet në nderim të gjyqtarit Astrit Kalaja, i cili humbi jetën dy ditë më parë pasi u vra me armë zjarri brenda ambienteve të Gjykatës së Apelit, teksa ndodhej në krye të detyrës.

Ceremonia nisi në orën 09:00 dhe do të zgjasë deri në 11:00, pas së cilës trupi i pajetë i gjyqtarit do të përcillet për në banesën e fundit në Shkodër, qytetin e tij të lindjes, shkruan ATSH.

Kryeministri Edi Rama kreu homazhe ndërsa la dhe një shënim në librin e ngushëllimeve, i shoqëruar nga ministri i Drejtësisë Besfort Lamallari.

Ministri i Drejtësisë, Besfort Lamallari shprehu ngushëllime për familjen e të ndjerit, si dhe la një shënim në librin e kujtimeve.

“Lamtumirë njeriut të ligjit, shërbëtorit të drejtësisë e profesionistit të spikatur, Astrit Kalaja. Kontributi i tij i çmuar do të mbetet frymëzim për të gjithë ata që besojnë në forcën e ligjit dhe në shtetin e së drejtës. Ngushëllime për familjen, kolegët, trupën gjyqësore dhe të gjithë ata që e njohën dhe e vlerësuan Astritin. Prehu në paqe mik i dashur!”, shprehet ministri Lamallari.

Gjyqtari i Apelit Astrit Kalaja u qëllua për vdekje me armë zjarri brenda sallës së gjyqit më 6 tetor. Autori i ngjarjes, palë e dëmtuar në proces, u arrestua. Policia vuri në pranga edhe xhaxhain e tij si bashkëpunëtor, si dhe rojën e sigurisë në Gjykatën e Apelit për shpërdorim detyre./D.B/KP

Continue Reading

Lajmet

​Dogana ndalon katër tentativa për import të mallrave të falsifikuara

Published

2 hours ago

on

October 8, 2025

By

Gjatë muajit shtator, Dogana e Kosovës, ka ndaluar në katër raste të ndara tentativa për import të mallrave të falsifikuara.

Sipas njoftimit, në kuadër të këtyre kontrolleve janë ndaluar: 300 jelek dimëror me logon Moncler, 300 palë atlete me logot Adidas, Reebok dhe Miu Miu, 5. 180 palë çorape me markat Nike, Calvin Klein, Reebok dhe U.S. Polo Assn dhe 225 veshje tekstili me markën Stone Island.

“Këto ndërhyrje janë rezultat i analizës së avancuar të riskut dhe vigjilencës së oficerëve doganorë, të cilët kanë parandaluar që produktet e dyshuara si pirate të depërtojnë në tregun e vendit, duke mbrojtur konsumatorët dhe të drejtat e pronësisë intelektuale”, thuhet në njoftim./D.B/KP

Continue Reading

Lajmet

Më 11 tetor përfundon afati i votimit me postë nga jashtë Kosovës

Published

3 hours ago

on

October 8, 2025

By

Komisioni Qendror i Zgjedhjeve (KQZ) ka bërë të ditur përmes një komunikate për media se më 11 tetor përfundon periudha e votimit jashtë Kosovës për shtetasit e Kosovës, të cilët janë regjistruar për të votuar përmes postës në Zgjedhjet Lokale për Kryetarë të Komunave dhe për Kuvende Komunale.

Kjo periudhë, e cila ka filluar më 17 shtator, vlenë vetëm për 43,933 shtetasit që janë regjistruar suksesshëm si votues jashtë Kosovës.

Deri më 11 tetor 2025, votuesit e regjistruar jashtë Kosovës duhet të dërgojnë pakon e tyre me fletëvotime në ndonjërën nga kutitë postare të KQZ-së.

KQZ njofton se me qëllim të ofrimit të mundësisë për votim për shtetasit që janë regjistruar për të votuar përmes postës, kutitë postare janë funksionale në këto shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanadë, Kosovë, Kroaci, Mali i Zi, Maqedoni e Veriut, Mbretëri e Bashkuar, Norvegji, ShBA, Shqipëri, Slloveni, Suedi, Turqi dhe Zvicër./D.B/EO

Continue Reading

Të kërkuara