Kryetari i Lidhjes Demokratike të Kosovës, Lumir Abdixhiku deklaroi se masakra e Reçakut është pikë kthese për vëmendjen ndërkombëtare.

Pas homazheve në Kompleksin Memorial, ai tha se sot janë në Reçak për të kujtuar se sa e shenjtë është sakrifica e popullit për liri.

“Njëzetegjashtë vite më parë në mëngjesin e ftohtë të 15 janarit, forcat policore ushtarake militare e paramilitare serbe kryen aktin e tmerrshëm të masakrës së Reçakut, akt i cili më pas do të cilësohej nga ambasadori William walker si krim kundër njerëzimit. Në këtë vend u vranë 45 civilë shqiptarë, burra e gra të moshuar e fëmijë vetëm sepse ishin shqiptarë. Ky akt i rëndë, çnjerëzor, akt kundër njerëzimit ishte po ashtu pikë kthese për vëmendjen ndërkombëtare ndaj pasojave që populli i Kosovës i vuante nga regjimi i Millosheviqit dhe forcave serbe”, tha ai.

Policia e Kosovës në bashkëpunim dhe koordinim me institucionet kompetente, sot në orët e hershme të mëngjesit ka nisur një operacion policor në disa rajone të Kosovës.

Kështu ka konfirmuar, zëdhënësi i policisë Baki Kelani duke thënë se operacioni i policisë po zhvillohet në Prishtinë, Gjilan, Gjakovë dhe Mitrovicë.

“Mund të konfirmojmë se, sot në orët e hershme të mëngjesit, Policia e Kosovës në bashkëpunim dhe koordinim me institucionet kompetente ka filluar realizimin e një operacioni policor i cili përfshinë disa rajone të Kosovës, si DRP Prishtinë, DRP Gjilan, DRP Gjakovë dhe DRP Mitrovicë Jugu”, ka thënë Kelani.

Kelani nuk ka dhënë detaje shtesë mbi natyrën e operacionit.

Homazhe në Kompleksion Memorial në Reçak ka bërë edhe kreu i AAK-së Ramush Haradinaj së bashku me partnerët e koalicionit.

Haradinaj ka kërkuar drejtësi për civilët e vrarë e masakruar në Reçak nga forcat serbe.

 “E para që na duhet ta themi është se duam drejtësi, diçka që na takon me të drejtë për të kërkuar. Ende nuk ka drejtësi për Reçakun dhe për shumë masakra në Kosovë. Është absurde kjo gjendje që të mos ketë drejtësi dhe të mos nxirren para gjyqit ata qe i kanë kryer këto krime”, tha Haradinaj.

Ai ka thënë se e vërteta e Reçakut dhe Kosovës është e pandryshueshme përjetësisht.

“I përjetshëm kujtimi për martirët e Reçakut, e vërteta e Reçakut dhe Kosovës është e pandryshueshme përjetësisht, liria ka ardhur falë gjakut dhe sakrificës, gjithsesi edhe falë ndihmës së aleatëve tanë, NATO-s prirë nga Amerika”, tha Haradinaj.

Sot, janë mbushur 26 vjet nga masakra më e tmerrshme që e përjetoi popullata civile e Reçakut, një akt barbar nga forcat serbe që i mori jetën 45 shqiptarëve të paarmatosur. Qytetarë të shumtë, që në orët e para të mëngjesit, i janë drejtuar Memorialit, ku prehen ata që u vranë dhe u masakruan më 15 janar 1999, në këtë fshat të shenjtë të Kosovës.

As acari i këtij mëngjesi të ngrirë nuk e pengoi popullin e Kosovës të mblidhet aty, me kurora lulesh në duar, për të nderuar ata që, siç shprehen qytetarët, “qëndrojnë si themelet e shtetit tonë”.