Lajmet

​Ambasadori hungarez: Marrëveshja Kosovë-Serbi të arrihet sa më shpejt

Published

6 years ago

on

Ambasadori i Hungarisë në Kosovë, Jozsef Bencze nuk preferon të japë rekomandime për politikanët kosovarë, por thotë se do të ishte mirë që marrëveshja përfundimtare Kosovë-Serbi të arrihet sa më shpejt që është e mundur. Ai thotë se rruga e integrimit evropian për Kosovën dhe Serbinë është e lidhur pikërisht me marrëveshjen e cila duhet të arrihet në mes të dy vendeve.

Ambasadori hungarez në një intervistë për fundvit për KosovaPress, thotë se Hungaria është një nga vendet që mbështetët Kosovën në rrugën e integrimit evropian. Ai thotë se mbështesin lëvizjen e lirë të qytetarëve të Kosovës, pasi kjo e fundit ka përmbushur 95 kriteret e nevojshme për liberalizimin e vizave.

“Nuk na pëlqen të japim mesazhe konkrete, sepse së pari përgjegjësia kryesore është e popullit të Kosovës dhe e liderëve të Kosovës dhe nëse ata do të vendosin, ne mund t’i mbështesim, por dialogu Beograd-Prishtinë filloi shumë kohë më parë. Do të ishte mirë, të gjendet një zgjidhje e mirë sa më shpejt të jetë e mundur sepse Serbia mund të jetë anëtare e BE-së nëse dialogu Beograd-Prishtinë do të zgjidhet dhe anasjelltas, Kosova mund të shkojë përpara, nëse ky dialog Beograd-Prishtinë do të zgjidhej shumë pozitivisht, por varet nga të dy vendet. Ne mund ta mbështesim, Bashkimi Evropian mund ta mbështesë, SHBA mund ta mbështesë këtë proces, por puna e vërtet bëhet nga Kosova dhe Serbia”, thotë ai.

Duke komentuar dialogun Kosovë – Serbi, Bencze thotë se janë të interesuar për një zgjidhje sa më të mirë, teksa shton se në këtë aspekt nuk do të mungojë mbështetja hungareze.

“Ne jemi të interesuar për zgjidhjen sa më të mirë, nëse të dy vendet (Kosova dhe Serbia) do të bien dakord, ne mund ta mbështesim shumë fort këtë marrëveshje. Ne jemi të interesuar që vendet e Ballkanit Perëndimor të mund të jenë anëtare të BE-së dhe anëtare të NATO-s, përfshirë edhe Kosovën”, shprehet ai.

Ai thotë se fakti se Kosova ka arritur të përmbushë kriteret që nevojiten për liberalizimin e vizave, bën që Hungaria të jetë pro liberalizimit të vizave për kosovarët.

“Ju e dini që Hungaria është një nga mbështetësit më të mëdhenj për Kosovën dhe për integrimin evropian të Kosovës dhe liberalizimin e vizave”, thotë ai.

Bencze flet edhe për pandeminë e shkaktuar nga koronavirusi, e cila goditi gjithë botën. Ai thotë se përkundër problemeve që shkaktoi ky virus, bashkëpunimi bilateral mes Hungarisë dhe Kosovës nuk mungoi asnjëherë, duke dhënë kështu rezultatet e veta në disa fusha.

“Pandemia ishte një problem vërtet i madh jo vetëm në Kosovë, por edhe në Evropë. Vala e parë nuk ishte problem në Hungari, por vala e dytë është një problem i madh, por bashkëpunimi ynë dypalësh ishte shumë i suksesshëm në muajt e fundit. Pasi mbërrita në Prishtinë, në mes të shtatorit, kisha mundësinë të takoja 70 persona të ndryshëm, shumë të rëndësishëm në Kosovë, në Prishtinë, shumë ministra dhe shefa të organizatave të ndryshme, për shembull në polici, dogana dhe të tjerë, gjithashtu disa kryetarë komunash në vend. Nuk ishte problem. Disa programe u anuluan për shkak të pandemisë, por në muajt e fundit, ne patëm mundësinë të jemi të suksesshëm”, thekson ai.

E disa nga projektet e suksesshme që u realizuan në kuadër të këtij bashkëpunimi bilateral, Bencze thotë të jenë: zbulimi i bustit të Skënderbeut në Prizren, nënshkrimi i disa marrëveshjeve në fushën e arsimit dhe investimit, si dhe nënshkrimi i marrëveshjes lidhur me kredinë e kushtëzuar, e cila përmban pesë projekte të ndryshme për Kosovën, katër prej të cilave kanë të bëjnë me menaxhimin e ujit, dhe e pesta është një projekt i sigurisë në trafik.

Për më tepër, përkundër pandemisë së shkaktuar nga koronavirusi, ambasadori hungarez tregon se edhe këtë vit, sikurse viteve të kaluara, studentët e Kosovës e kanë mundësinë që përmes programit për bursa “Stipendium Hungaricum” të shkojnë për studime në Hungari.

Related Topics:
Continue Reading

Lajmet

AAK: Ejani ta votojmë Ligjin për Specialen

Published

34 minutes ago

on

October 6, 2026

By

Shefi i Grupit Parlamentar të AAK-së, Besnik Tahiri, u ka bërë thirrje publike të gjithë deputetëve të Kuvendit të Kosovës që të mblidhen urgjentisht për të votuar ndryshimet në Ligjin për Dhomat e Specializuara dhe Zyrën e Prokurorit të Specializuar.

Përmes një konference për media të mbajtur në ambientet e Kuvendit, Tahiri theksoi se kanë mbetur vetëm edhe 13 orë nga afati për të votuar këtë ligj dhe për të përmbyllur procesin.

“Jemi në Kuvend kur kanë mbetur edhe 13 orë deri te mundësia e votimit të Ligjit të Dhomave të Specializuara dhe konstituimit të plotë të vendit. Nga këtu, në emër të GP të Aleancës, u bëjmë thirrje kolegëve deputetë: ejani menjëherë në Kuvend ta votojmë Ligjin e Dhomave të Specializuara dhe Zyrës së Prokurorit Special, të bashkohemi sot gjithmonë në anën e drejtë të historisë rreth UÇK-së, vlerës më të lartë kombëtare. Kosova na thërret”, deklaroi Tahiri. /E.A/

Continue Reading

Lajmet

Haxhiu kërkon sqarim nga Kushtetuesja për kompetencat presidenciale pas skadimit të mandatit

Published

39 minutes ago

on

October 6, 2026

By

Ushtruesja e detyrës së presidentit të Kosovës, Albulena Haxhiu, i është drejtuar Gjykatës Kushtetuese për të kërkuar sqarim se kush mund t’i ushtrojë kompetencat presidenciale pas përfundimit të mandatit të saj gjashtëmujor, nëse Kuvendi nuk arrin ta zgjedhë presidentin e ri.

Këtë e konfirmoi Zyra e Presidentes në një përgjigje me shkrim për Radion Evropa e Lirë më 6 tetor – në ditën kur skadon afati për zgjedhjen e presidentit të ri.

Sipas Zyrës, Haxhiu e ka dorëzuar kërkesën në Gjykatën Kushtetuese më 5 tetor, duke u thirrur në nenin 113, paragrafi 3, nënparagrafi 1 i Kushtetutës.

“Kemi kërkuar të përcaktohet se si dhe nga kush ushtrohen kompetencat e domosdoshme presidenciale pas përfundimit të periudhës gjashtëmujore, kur presidenti i ri ende nuk është zgjedhur”, tha Zyra e Presidentes për REL-in.

Continue Reading

Lajmet

Gjeneral Jashari pret në takim lamtumirës komandantin e KFOR-it, Gjeneral Major Özkan Ulutaş

Published

51 minutes ago

on

October 6, 2026

By

Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur sot në një takim lamtumirës komandantin e KFOR-it, Gjeneral Major Özkan Ulutaş, me rastin e përmbylljes së misionit të tij ushtarak në Kosovë.

Gjatë takimit, dy krerët ushtarakë diskutuan për situatën e përgjithshme të sigurisë në Kosovë dhe rajon, si dhe për rëndësinë e bashkëpunimit dhe koordinimit të vazhdueshëm ndërmjet FSK-së dhe KFOR-it. Ata vlerësuan lart nivelin e partneritetit ndërinstitucional, duke theksuar nevojën për avancimin e mëtejshëm të bashkëpunimit profesional dhe operacional përmes angazhimeve të përbashkëta dhe shkëmbimit të përvojave.

Gjenerallejtënant Jashari shprehu mirënjohjen e tij për rolin dhe kontributin e KFOR-it në ruajtjen e paqes dhe stabilitetit në vend, duke riafirmuar përkushtimin e FSK-së për forcimin e mëtejshëm të raporteve dypalëshe.

Në përmbyllje të takimit, komandanti i FSK-së i uroi gjeneralit Ulutaş shëndet dhe suksese në marrjen e detyrave dhe përgjegjësive të reja ushtarake./E.A/

Continue Reading

Lajmet

Dyshohet se Policia përdori gaz lotsjellës me afat të skaduar mbrëmë: Cilat janë rreziqet dhe efektet e tij shëndetësore?

Published

2 hours ago

on

October 6, 2026

By

Gjatë përplasjeve të mbrëmshme mes protestuesve dhe Policisë së Kosovës para Kuvendit, ku forcat e rendit përdorën gaz lotsjellës dhe topa uji për të shpërndarë turmën, janë ngritur dyshime mbi specifikat e mjeteve të përdorura. Nga pamjet e siguruara në terren, një nga gëzhojat e gazit lotsjellës të përdorur (e llojit CS POWDER) mban datën e prodhimit qershor 2018 (Mfg Date: 06/2018), çka ngre dyshime se afati i përdorimit të tij ka skaduar prej kohësh.

Sipas raporteve ndërkombëtare mbi pajisjet për kontrollin e turmave nga organizata si Physicians for Human Rights dhe studimeve mjekësore mbi ekspertizën e mjeteve kimike, përdorimi i gazit lotsjellës të skaduar përbën një rrezik shtesë për shëndetin publik, pasi përbërësit kimikë mund të dekompozohen dhe të shkaktojnë reaksione anormale.

Ndër efektet kryesore të dëmshme të dokumentuara nga gazi i skaduar numërohen:

  • Tolerancë e zvogëluar kimike dhe reaksione më të ashpra: Komponimet e dekompozuara kimike mund të bëhen më toksike ose më irrituese se gazi me afat të rregullt.
  • Dëmtime më të rënda në rrugët e frymëmarrjes: Mund të shkaktojë spazma më të forta bronkiale, djegie intense të fytit e mushkërive dhe vështirësi më të gjata në frymëmarrje.
  • Irritim dhe djegie të theksuar të lëkurës e syve: Në vend të efektit të përkohshëm, gazi i skaduar mund të shkaktojë djegie kimike të lëkurës, skuqje të zgjatur ose dëmtime më serioze në indet e syve.
  • Rrezik për shpërthim ose ndezje anormale: Me kalimin e afatit, mekanizmi i ndezjes dhe lënda djegëse në gëzhojë mund të mos funksionojnë siç duhet, duke rritur rrezikun e djegieve fizike apo lëndimeve nga fragmentet. /E.A/

Foto: Dardan Shala

 

Continue Reading

Të kërkuara