Kompania Walt Disney njoftoi të enjten se ka pezulluar të gjitha bizneset në Rusi mes luftës në Ukrainë.
Vendimi përfshin licencimin e përmbajtjes dhe produkteve, aktivitetet e Disney Cruise Line, revistën dhe turnetë e National Geographic, prodhimet e përmbajtjes lokale dhe kanalet lineare, tha në një deklaratë konglomerati shumëkombësh amerikan i argëtimit dhe medias.
“Disa nga këto aktivitete biznesi ne mund dhe do t’i ndalojmë menjëherë. Të tjerat, të tilla si kanalet lineare dhe disa përmbajtje dhe licencime produktesh do të kërkojnë kohë duke pasur parasysh kompleksitetin kontraktual”, thuhet më tej në deklaratë.
Pavarësisht vendimit, Disney tha se do të vazhdojë të punojë me partnerët e saj të organizatave joqeveritare për të ofruar ndihmë urgjente për refugjatët.
Kompania njoftoi më 28 shkurt se ka ndërprerë shfaqjen e filmave teatrale në Rusi për shkak të luftës së saj në Ukrainë dhe ka vënë nën shqyrtim pjesën tjetër të bizneseve të saj në vend./UBTNews/