Përfunduan me sukses punimet e Akademive Verore të Fakultetit Menaxhment, Biznes dhe Ekonomi në UBT, të organizuara në dy module: “Ekonomi, Financë, Banka dhe Sigurime” dhe “Ndërmarrësi dhe Inovacion”.
Gjatë këtyre akademive, studentët patën mundësinë të ndjekin ligjërata dhe trajnime me rëndësi të veçantë në fushën e biznesit dhe ekonomisë, duke përfituar njohuri teorike dhe praktike nga ekspertë të fushës.
Në kuadër të Akademisë Verore për Ekonomi, Financë, Banka dhe Sigurime, u organizua trajnimi “Savings Game – Të kursejmë duke luajtur”, i realizuar nga Prof. Hamez Rama dhe Prof. Fisnik Bytyqi. Përmes aktiviteteve praktike dhe diskutimeve interaktive, trajnimi trajtoi rëndësinë e kursimit dhe menaxhimit të financave personale.
Studentët u përfshinë në simulime dhe ushtrime të ndryshme, duke marrë vendime financiare të ngjashme me ato që hasen në jetën e përditshme. Përmes lojës edukative “Savings Game”, ata kuptuan më mirë ndikimin që zgjedhjet financiare kanë në kursime dhe në planifikimin afatgjatë.
Aktiviteti u zhvillua në një atmosferë bashkëpunuese dhe dinamike, ku pjesëmarrësit ndanë përvoja dhe reflektime mbi menaxhimin e financave personale. Ky trajnim kombinoi me sukses të nxënit aktiv me elemente praktike dhe argëtuese, duke nxitur ndërgjegjësimin për rëndësinë e edukimit financiar.
Në përfundim, pjesëmarrësit vlerësuan veçanërisht qasjen praktike të përdorur gjatë trajnimit, e cila e bëri procesin e të nxënit më të qartë dhe më të kuptueshëm.
Ndërkaq, në ditën e fundit të Akademisë Verore për Ndërmarrësi dhe Inovacion, u zhvillua trajnimi interaktiv “Micro Business Game”, një simulim praktik i menaxhimit të biznesit që u ofroi studentëve mundësinë të përjetojnë në mënyrë reale procesin e drejtimit të një ndërmarrjeje.
Përmes këtij simulimi, pjesëmarrësit morën vendime strategjike në fusha të ndryshme, përfshirë prodhimin, marketingun, financat, investimet dhe menaxhimin e burimeve, duke analizuar ndikimin e secilit vendim në performancën e biznesit.
Gjatë aktivitetit, studentët punuan në ekipe, zhvilluan aftësi të rëndësishme analitike dhe vendimmarrëse, si dhe forcuan bashkëpunimin dhe komunikimin në grup.
Trajnimi u udhëhoq nga Prof. Kujtim Zylfijaj dhe Prof. Mentor Shaqiri, të cilët kombinuan njohuritë teorike me përvojën praktike përmes metodave bashkëkohore të mësimdhënies.
Ky aktivitet dëshmoi edhe një herë përkushtimin e UBT-së dhe Fakultetit Menaxhment, Biznes dhe Ekonomi për ofrimin e përvojave inovative të të nxënit, duke kontribuar në përgatitjen e studentëve për sfidat reale të mjedisit bashkëkohor të biznesit dhe në zhvillimin e kompetencave të tyre sipërmarrëse dhe menaxheriale.
Akademitë Verore të Fakultetit Menaxhment, Biznes dhe Ekonomi vazhdojnë të shërbejnë si një platformë e rëndësishme për avancimin e njohurive, zhvillimin e aftësive praktike dhe fuqizimin e lidhjes ndërmjet teorisë akademike dhe praktikës profesionale.
