Temperaturat e larta që mbizotëruan në vend nuk i ndalën qytetarët në Fushë Kosovë që të vaksinohen.
Kjo komunë llogaritet ndër katër komunat me më së shumti të vaksinuar në nivel vendi. Numri i të vaksinuarve tashmë është rreth 11 mijë. Mirëpo, së fundmi në këtë komunë janë shtuar edhe rastet e reja me COVID për të cilat dyshohet se kanë ndikuar edhe dasmat.
Kryeshefi i Qendrës së Mjekësisë Familjarë në Fushë Kosovë, Mustafë Gashi, në një intervistë për KosovaPress bën të ditur se gjatë muajit qershor dhe korrik janë vaksinuar mbi 10 mijë qytetarë.
“Prej 7 prillit që kur ka filluar procesi i vaksinimit e deri më tash janë vaksinuar diku 11 mijë qytetarë, këtu vlen të theksohet se numri i qytetarëve të cilët po vaksinohen është në rritje, gjatë muajit qershor kemi pasur diku 3 mijë 500 qytetarë të vaksinuar, kurse gjatë muajit korrik është dyfishuar ky numër është rritur për 7 mijë të vaksinuar brenda muajit”, thotë ai.
Gashi tregon se janë duke kryer rapid teste dhe se numri i personave që rezultojnë pozitivë me COVID është duke u rritur.
Sipas tij, rastet e reja të infektimit me koronavirus mund të jenë të variantit Delta pasi që ka pasur ahengje të shumta gjatë verës dhe ardhje të mërgimtarëve.
“Priten të konfirmohen rastet në mënyrë laboratorike nga Instituti por që dyshimet janë që virusi Delta ka mbërri për shkak të vizitave të diasporës dhe kontakteve të shumta, tubimeve të shumta siç janë këto dasmat, ahengjet e ndryshme, vizitat nëpër familje, mundësia e përhapjes ka qenë shumë e madhe,” shton ai
Si pasojë e rritjes së temperaturave të larta, Gashi bën të ditur për KosovaPress se është rritur edhe numri i qytetarëve që kërkojnë ndihmë mjekësore në QKMF.
“Temperaturat ekstreme që po mbretërojnë në regjion dhe tek ne në Kosovë kanë ndikim direkt në shëndetin e popullatës, sidomos tek grupmoshat e caktuar siç janë fëmijët, pacientët me sëmundje kronike dhe kemi pasur një fluks të vizitave të këtyre kategorive në Qendrën e Mjekësisë Familjare,” deklaron ai.
Sipas të dhënave të fundit, në Fushë Kosovë aktualisht janë 28 raste aktive me COVID-19.