Ministri i Jashtëm turk, Mevlüt Çavuşoğlu, tha të mërkurën se sheh një vullnet për t’u rikthyer në negociatat midis Rusisë dhe Ukrainës.
Duke folur së bashku me Ministrin e Jashtëm rus, Sergei Lavrov, Mevlüt Çavuşoğlu, tha se takimi i tyre në Ankara ishte i frytshëm, duke përfshirë vullnetin për t’u kthyer në negociatat midis Moskës dhe Kievit për një armëpushim të mundshëm.
“Mund të ketë përsëri baza për negociata Rusi-Ukrainë”, tha ai.
Nga ana e tij, Lavrov tha se “operacioni special ushtarak” në Ukrainë po shkon sipas planit dhe se ata do të arrijnë qëllimet e tyre.
Ai tha se Rusia është e gatshme të takohet me OKB-në dhe Ukrainën në Stamboll, dhe kërkon rifillimin e bisedimeve të paqes Moskë-Kiev përpara një takimi midis Putinit dhe Zelensky.
“Edhe kur Rusia dhe Turqia kanë dallime, ato respektojnë qëndrimet e njëra-tjetrës, ky është çelësi i arritjeve në marrëdhëniet”, tha Lavrov.
Eksporti i grurit
Çavuşoğlu tha gjithashtu se e sheh të arsyeshëm planin e Kombeve të Bashkuara për të eksportuar grurë ukrainas, duke shtuar se nevojiten më shumë bisedime për masat që duhen marrë për të garantuar kalimin e sigurt të anijeve nga Ukraina.
“Kërkesat për heqjen e sanksioneve për eksportet ruse të grurit janë legjitime“, tha Çavuşoğlu.
Lavrov tha se eksporti i grurit në Ukrainë nuk ka asnjë lidhje me një krizë të mundshme ushqimore.
“Përqindja e saj është shumë e vogël, rreth 1%”, tha ai.
Lavrov tha se problemi kryesor në eksportin e drithërave të Ukrainës është refuzimi i presidentit ukrainas Zelenskyy për të diskutuar pastrimin e minave detare.
Duke thënë se Moska vlerëson përpjekjet e Turqisë që synojnë të zhbllokojë situatën në lidhje me eksportet e grurit nga portet detare të Ukrainës, ai shprehu gatishmërinë për të ofruar çdo lloj sigurie për anijet që largohen nga portet e Ukrainës “dor për dore” me homologët turq. /UBTNews/