Një aziatik mund të bëhet pjesë e Realit të Madridit, pasi Florentino Perez është fiksuar pas sulmuesit anësor të Tottenham Hotspur, Son Heung-Min.
Me koreano-jugorin në skuadër Perez jo vetëm që do të kishte më shumë përfitime nga shitjet e fanellave në tregun e Lindjes së Largët por do të shtonte cilësinë dhe shpejtësinë në sulmin e Los Blancos pasi Son e ka treguar veten gjatë këtyre viteve te Tottenham Hotspur në Premier League.
Për të bindur presidentin e klubit londinez Daniel Levy, numri 1 i Realit nuk do ta ketë aspak të thjeshtë pasi Son konsiderohet një lojtar shumë i rëndësishëm për Spurs-at dhe nëse vendos ta largojë Levy me siguri do të kërkojë të përfitojë sa më shumë nga shitja e sulmuesit 28-vjeçar.
Sipas mediave spanjolle, Reali i Madridit e ka nisur ofensivën për yllin aziatik pikërisht me kërkesë të presidentit Perez dhe pritet të paraqitet në zyrat e Tottenham me një ofertë zyrtare për të bindur drejtuesit e klubit anglez.
Son Heung-Min ka kontratë me Tottenhamin deri më 30 qershor të vitit 2023 ndërkohë që kartoni i tij vlerësohet rreth 80 milionë euro. Kapiteni Harry Kane mund të mos jetë i vetmi që mund të largohet nga Spurs në fund të këtij sezoni pasi bashkë me të mund të vendosë të braktisë Spurs-at edhe Son.